Solusion Kadagiti Gagangay a Reklamo

SAAN nga ibaga ti Biblia a nalaka ti biag dagiti naasawaan. Ti Dios pinaltiinganna ni apostol Pablo a mangisurat a dagiti agassawa maipasangoda “kadagiti inaldaw a parikut.” (1 Corinto 7:28, Today’s English Version) Ngem dakkel ti maaramidan ti agassawa tapno lumag-an dagiti parikutda ken ad-adda a maparagsakda ti maysa ken maysa. Usigenyo ti sumaganad nga innem a gagangay a reklamo dagiti agassawa, ken kitaenyo no kasano a makatulong ti panangyaplikar kadagiti prinsipio ti Biblia.

1

REKLAMO:

“Lumamlamiisen ti relasionmi.”

PRINSIPIO TI BIBLIA:

‘Siguraduenyo ti napatpateg a bambanag.’​—FILIPOS 1:10.

Rumbeng nga ipangpangrunayo ti relasionyo kas agassawa gapu ta maysa dayta kadagiti kapatgan a banag iti biagyo. Gapuna, usigenyo no dagiti eskediulyo ti maysa a mangpakpakaro iti parikut. Saanyo koma nga ipalubos a dagiti inaldaw nga aktibidad ti makagapu nga agsina ti lubongyo a dua. Siempre, adda dagiti gundaway a dikayo makapagkadua nalabit gapu iti panggedan ken dadduma pay a di maliklikan a kasasaad. Ngem kabaelanyo ken rumbeng a limitaranyo ti aniaman a banag a mabalinyo a  kontrolen, kas iti tiempo nga agpaay kadagiti pagesman wenno gagayyem.

Nupay kasta, mabalin a nayonan ti dadduma ti trabaho wenno pagesmanda tapno maibus ti tiempo a rumbeng nga ipaayda iti asawada. Dagitoy nga indibidual ket saan laeng a basta ‘lumamlamiis ti relasionda’ iti asawada no di ket itartarayanda dagiti problemada. No sika wenno ti asawam ti adda iti kasta a kasasaad, nasken nga ammuem dagiti kangrunaan a makagapu ket risutem dagita. Babaen laeng iti panagbalinmo a nasinged iti asawam a rumayray ti panagayatyo iti maysa ken maysa ken ‘agbalinkayo a maymaysa a lasag’ iti naan-anay nga anag.​—Genesis 2:24.

No kasano nga inyaplikar ti dadduma daytoy a balakad: Da Andrew a ken Tanji, a taga-Australia, ket sangapulo a tawenen nga agassawa. Kuna ni Andrew: “Naadalko a ti panangbusbos iti adu unay a tiempo iti trabaho ken kadagiti gagayyem pagpeggadenna ti relasion ti agassawa. Gapuna, iwaywayaanmi ken baketko ti agtungtong ken mangyebkas iti rikriknami iti maysa ken maysa.”

Da Dave ken Jane, a taga-Estados Unidos, ket 22 a tawenen nga agassawa. Kagudua oras kada rabii a pagsarsaritaanda dagiti kapadasan ken kapanunotanda. Kuna ni Jane: “Nakapatpateg dayta a gundaway ket saanmi nga ipalubos nga adda makasinga iti dayta.”

2

REKLAMO:

“Awanen ti magangganabko iti daytoy a relasion.”

PRINSIPIO TI BIBLIA:

“Tunggal maysa itultuloyna koma a sapulen, saan a ti bukodna a pagsayaatan, no di ket ti pagsayaatan ti sabali a tao.”​—1 CORINTO 10:24.

No ti kangrunaan a pakaseknan ti maysa a tao ket ti magunggonana iti panagasawa, saanto pulos a naragsak uray no mamin-ano a mangasawa. Agballigi ti panagasawa no ipangpangruna ti tunggal maysa ti mangted imbes nga umawat. Dinakamat ni Jesus ti rason: “Ad-adu ti kinaragsak iti panangted ngem iti panangawat.”​—Aramid 20:35.

No kasano nga inyaplikar ti dadduma daytoy a balakad: Da Maria ken Martin, a taga-Mexico,  ket 39 a tawenen nga agassawa. Ngem saan a kanayon a naragsak ti relasionda. Adda maysa a malagipda a nairteng a situasion. “Iti kabarbaraan ti panagsubangmi,” kinuna ni Maria, “adda naibagak a makapainsulto ken ni Martin ket nakapungtot unay. Inlawlawagko a nakaungetak laeng isu a diak napupuotan ti naisawangko. Ngem dinak maawatan.” Kuna ni Martin, “Iti dayta a panagapami, napanunotko a nasaysayaat no agsinakamin. Nabannogakon a mangsalsalbar iti relasionmi.”

Panagraem ti sapsapulen ni Martin, idinto ta pannakaawat ti kalkalikaguman ni Maria. Awan kadakuada ti napagustuan iti kayatna.

Kasanoda a nasolbar ti parikutda? “Pinalamiisko pay ti ulok,” kuna ni Martin, “ket kalpasanna, nagnumuanmi nga iyaplikarmi ti nainsiriban a balakad ti Biblia nga agrinnaem ken aginnanuskami. Kadagiti naglabas a tawen, nasursuromi nga uray kasano kaadu dagiti tumaud a parikutmi, mapagballigianmi dagita no dumawatkami iti tulong ti Dios babaen ti kararag ken no iyaplikarmi ti balakad ti Biblia.​—Isaias 48:17, 18; Efeso 4:31, 32.

3

REKLAMO:

“Saanna nga ar-aramiden dagiti obligasionna kas asawa.”

PRINSIPIO TI BIBLIA:

“Tunggal maysa kadatayo makikuentanto iti Dios maipaay iti bagina.”​—ROMA 14:12.

Siempre, saan a naan-anay ti balligi ti panagasawa no maymaysa laeng ti mangikagkagumaan a mamagballigi iti dayta. Ngem nakarkaro pay ti kasasaad no agpadada a di mangar-aramid iti obligasionda, nga agpimpinnabasolda lattan.

No ti laeng nakaipamaysaan ti panunotmo ket dagiti rumbeng nga aramiden ti asawam, pulos a saankanto a naragsak. Nangnangruna a kasta no pagpambarmo dagiti pagkuranganna tapno dimo metten aramiden dagiti responsabilidadmo. Ngem no ikagumaam ti agbalin a nasayaat nga asawa, sumayaat la ketdi ti relasionyo. (1 Pedro 3:1-3) Kapatgan iti amin, maipakitam iti Dios a raraemem ti urnosna iti panagasawa ket dagita a tignaymo ti mangparagsak unay iti pusona.​—1 Pedro 2:19.

No kasano nga inyaplikar ti dadduma daytoy a balakad: Da Kim ken ni lakayna, a taga-Korea, ket 38 a tawenen nga agassawa. Kuna ni Kim: “No dadduma, marurod ni lakayko kaniak ket dinakon kasarsarita. Diak ammo no apay. Panagriknak, limmamiisen ti ayatna kaniak. Isu a mapampanunotko no dadduma, ‘Apay a kayatna a tarusak ti riknana idinto ta dina man la ikagumaan a tarusan ti riknak?’”

Mabalin a ti di nainkalintegan a pannakatratona ken ti pagkurkurangan ni lakayna ti pakaipamaysaan koma ti panunot ni Kim. Ngem saan a kasta ti inaramidna. Kuna ni Kim: “Imbes nga agsaksakit lattan ti nakemko, naadalko a nasaysayaat a siak ti umun-una a makikappia. Nagangayanna, agpadakami a nagbalin a kalmado ket sitatanang a naurnosmi ti bambanag.”​—Santiago 3:18.

 4

REKLAMO:

“Saan nga agpaspasakup ni baketko.”

PRINSIPIO TI BIBLIA:

“Ti ulo ti tunggal lalaki isu ti Kristo.”​—1 CORINTO 11:3.

No ipagarup ti asawa a lalaki a saan nga agpaspasakup ni baketna, rumbeng nga usigenna nga umuna no isu ket situtulok nga agpaspasakup iti ulona a ni Jesu-Kristo. Maipakita ti asawa a lalaki ti panagpasakupna babaen ti panangsurotna iti ulidan ni Jesus.

Insurat ni apostol Pablo: “Assawa a lallaki, itultuloyyo nga ayaten dagiti assawayo, no kasano a ti Kristo inayatna met ti kongregasion ken inyawatna ti bagina a maipaay iti dayta.” (Efeso 5:25) Ni Jesus saanna nga ‘inturayan’ dagiti adalanna. (Marcos 10:42-44) Impaayanna dagiti pasurotna iti nalawag a panangiwanwan ken inlintegna ida no kasapulan. Ngem pulos a di nagbalin a nagubsang. Naasi kadakuada ken nangipakita iti konsiderasion kadagiti pagkapuyanda. (Mateo 11:29, 30; Marcos 6:30, 31; 14:37, 38) Kanayon nga impangpangrunana ti pagimbaganda.​—Mateo 20:25-28.

Ti asawa a lalaki nasken nga isaludsodna iti bagina, ‘Ti kadi panangmatmatko iti kinaulo ken kadagiti babbai ket ad-adda a naibatay iti kaugalian imbes a kadagiti balakad ken pagarigan iti Biblia?’ Kas pagarigan, ania ti panagkunayo iti babai a di umanamong iti kapanunotan ni lakayna ken sititibker ngem siraraem nga iyebkasna ti naiduma a panangmatmatna? Iti Biblia, ni Sara nga asawa ni Abraham ket naibilang nga ulidan iti panagpasakup. (1 Pedro 3:1, 6) Nupay kasta, ibagana ti kapanunotanna no kasapulan, a kas idi saan a makita ni Abraham dagiti banag a mamagpeggad iti pamilia.​—Genesis 16:5; 21:9-12.

Nalawag a saan a binutbuteng ni Abraham ni Sara tapno agulimek lattan. Saan a naulpit. Umasping iti dayta, ti asawa a lalaki a mangsursurot iti balakad ti Biblia saanna a maltratuen ni baketna tapno agpasakup iti tunggal pagayatanna. Magun-odanna ti panagraem ni baketna no ipakatna ti kinaulona iti naasi a pamay-an.

No kasano nga inyaplikar ti dadduma daytoy a balakad: Kastoy ti kinuna ni James a taga-England, a walo a tawenen a naasawaan: “Ammok itan nga ikabilangan ni baketko sakbay a mangaramidak kadagiti napateg a desision. Ikagkagumaak nga ipangpangruna dagiti pagimbaganna imbes a dagiti pagimbagak.”

Ni George a taga-Estados Unidos ket 59 a tawenen a naasawaan. Kunana: “Ikagkagumaak a tratuen ni baketko kas intelihente ken makabael a katakunaynay, saan ket a kas nababbaba ngem siak.”​—Proverbio 31:10.

 5

REKLAMO:

“Saan nga ammo ni lakayko ti mangidaulo.”

PRINSIPIO TI BIBLIA:

“Ti pudpudno a masirib a babai binangonna ti balayna, ngem daydiay maag rebbaenna dayta babaen kadagiti bukodna nga ima.”​—PROVERBIO 14:1.

No agkedked ni lakaymo nga agdesision wenno mangidaulo iti pamilia, adda ti tallo a pagpiliam. (1) Mabalin a kanayonmo a dakamaten dagiti pagkuranganna wenno (2) mabalin nga agawem ti akemna kas ulo ti pamilia wenno (3) mabalin a naimpusuan a komendaram iti aniaman a maar-aramidanna. No aramidem ti aniaman kadagiti umuna a dua a pagpilian, rebrebbaem ti balaymo babaen kadagiti mismo nga imam. No ti maikatlo ti piliem, bangbangonem wenno pabpabilgem ti relasionyo kas agassawa.

Napatpateg iti adu a lallaki ti panagraem ngem iti panagayat. Gapuna, sumayaat la ketdi ti panangibaklay ni lakaymo iti akemna no ipakitam a raraemem, nga ipariknam nga epektibo ken maapresiar dagiti panagreggetna a mangidaulo iti pamilia. Siempre, adda dagiti dikay pagtunosan no dadduma, ket nasken a pagsaritaanyo dagita. (Proverbio 18:13) Ngem ti tono wenno ti sasaoyo mabalin a rebbaen wenno pabilgenna ti relasionyo kas agassawa. (Proverbio 21:9; 27:15) No ipeksam ti riknam buyogen ti panagraem, dakdakkel ti posibilidad a sidadaanto ni lakaymo a mangibaklay iti kinaulona.

No kasano nga inyaplikar ti dadduma daytoy a balakad: Ni Michele, a taga-Estados Unidos ken 30 a tawenen a naasawaan, kunana: “Yantangay agmaymaysa ni Nanang a nangpadakkel kadakami nga agkakabsat, natibker ken saan idi nga agpampannuray iti siasinoman. Natuladko dagita a galadna. Isu nga ikagkagumaak a kanayon nga ipakita ti umiso a panagpasakup. Kas pagarigan, nasursurok ti agkonsulta ken lakayko imbes nga agdesisionak lattan a bukbukodko.”

Ni Rachel, a taga-Australia ken 21 a tawenen nga agassawada ken Mark, ket dakkel met ti epekto kenkuana ti pannakapadakkelna. “Pulos a saan idi nga agpaspasakup ni Nanang ken ni Tatang,” kinunana. “Agkaraapada ken dida ammo ti agrinnaem. Kadagiti immuna a tawtawenmi ken Mark kas agassawa, natuladko ti ugali ni Nanang. Ngem iti panaglabas ti tawtawen, nasursurok ti kinapateg ti panangyaplikar iti balakad ti Biblia maipapan iti panangipakita iti panagraem. Ita, naragragsakkamin ken ni Mark.”

6

REKLAMO:

“Saankon a maanusan dagiti makaparurod nga ugali ti asawak.”

PRINSIPIO TI BIBLIA:

“Itultuloyyo nga anusan ti maysa ken maysa ken sibubulos a pakawanen ti maysa ken maysa no ti asinoman adda pakaigapuan ti reklamona maibusor iti sabali.”​—COLOSAS 3:13.

Idi agin-innaremkayo, nalabit a dagiti laeng nasayaat a galad ti makitkitam iti ar-armem wenno agar-arem kenka ket dimo makita dagiti  pakapilawanna. Mabalinmo kadi nga aramiden dayta ita? Awan duadua nga adda dagiti nainkalintegan a reklamom iti asawam. Ngem saludsodam ti bagim, ‘Ania kadagiti galad ti asawak ti ipangpangrunak a kitaen​—dagiti nasayaat wenno dagiti naalas?’

Nagusar ni Jesus iti epektibo nga ilustrasion a mangipakita a napateg ti panangpalabas kadagiti pakapilawan a makitatayo iti sabsabali. Insaludsodna: “Apay . . . a matmatam ti garami iti mata ni kabsatmo, ngem saanmo nga imutektekan ti pasanggir iti bukodmo a mata?” (Mateo 7:3) Ti garami ket mabalin a bassit laeng a ruot, idinto ta ti pasanggir ket dakkel a kayo a maus-usar a mangtengngel iti atep ti balay. Ania ti ipagpaganetgetna? “Umuna nga ikkatem ti pasanggir iti bukodmo a mata, ket kalpasanna makitamto a silalawag no kasano nga ikkaten ti garami iti mata ni kabsatmo.”​—Mateo 7:5.

Rinugian ni Jesus daytoy nga ilustrasion babaen ti nabileg a pakdaar. “Isardengyo ti mangukom,” kinunana, “tapno saankayo a maukom; ta iti panangukom a panguk-ukomyo, maukomkayto.” (Mateo 7:1, 2) No kayatmo a palabsen ti Dios dagiti kamalim​—ti pasanggir iti matam​—pagimbagam no palabsem dagiti pakapilawan ti asawam.​—Mateo 6:14, 15.

No kasano nga inyaplikar ti dadduma daytoy a balakad: Ni Jenny, a taga-England ket siam a tawenen nga agassawada ken Simon. Kunana: “Ti masansan a pakasuronak ken lakayko ket dina ammo ti agplano a nasaksakbay, nga ultimo minuto ti panangaramidna iti bambanag. Masdaawak ta magusgustuak dayta idi agnobiokami pay. Ngem naamiriskon nga adda met dagiti kamalik, kas iti nalabes a panangkontrolko kenkuana. Nasursuromi ken Simon a palabsen dagiti babassit a pagkuranganmi iti maysa ken maysa.”

Kastoy ti kinuna ni Curt, nga asawa ni Michele nga immunan a nadakamat: “No ti kitkitaem ket dagiti laeng makaparurod a kababalin ti asawam, kasla lallalo a dumakkel dagita. Isu a ti nangnangruna a kitkitaek ket dagiti galad a nagustuak ken Michele idi agar-aremak pay kenkuana.”

Ti Tulbek ti Balligi

Ipakita dagita a sumagmamano a pagarigan a nupay saan a maliklikan dagiti parikut iti nagbaetan ti agassawa, mapagballigian dagita. Ania ti tulbek ti balligi? Patanorenyo ti panagayat iti Dios ken ti kinamasindadaan a mangyaplikar kadagiti balakad a linaon ti Saona, ti Biblia.

Dayta a tulbek ti balligi ket nasursuro da Alex ken Itohan, a taga-Nigeria ken 20 a tawenen nga agassawa. Kuna ni Alex: “Napaneknekak a masolbar ti dandani amin a parikut ti agassawa no iyaplikarda dagiti prinsipio ti Biblia.” Kuna met ni baketna: “Nasursuromi ti kinapateg ti kanayon a panagkaduami nga agkararag ken ti panangyaplikar iti balakad ti Biblia a naimpusuan nga aginnayat ken aginnanuskami. Basbassit itan dagiti parikutmi ngem idi nabiitkami pay nga agassawa.”

Kayatmo kadi a maammuan ti ad-adu pay no kasano a magunggonaanka ken ti pamiliam kadagiti praktikal a balakad iti Sao ti Dios? No kasta, kiddawem kadagiti Saksi ni Jehova nga ilawlawagda kenka ti kapitulo 14 ti libro nga Ania a Talaga ti Isursuro ti Biblia? b

[Footnotes]

[Ladawan iti panid 4]

Ipapaayanmi kadi ti tiempo ti tunggal maysa?

[Ladawan iti panid 5]

Ad-adu kadi ti ipapaayko ngem iti kayatko a magun-odan?

[Ladawan iti panid 6]

Siak kadi ti umun-una a makikappia no adda dimi pagkinnaa- watan?

[Ladawan iti panid 7]

Ikabkabilangak kadi ti kapanunotan ni baketko sakbay a mangaramidak iti desision?

[Ladawan iti panid 9]

Dagiti kadi nasayaat a galad ti asawak ti nangnangruna a kitkitaek?