Sangapulo laeng ti tawenko idi 1985 idi adda dagiti ubbing a taga-Cambodia nga immay nageskuela iti Columbus, Ohio, U.S.A. Maysa kadakuada ti makapagsao bassit iti Ingles. Babaen kadagiti drowing, inestoriana kaniak dagiti nakabutbuteng a panangparparigat, pammapatay, ken panaglibas. Agsangsangitak idi iti rabii bayat a pampanunotek dagitoy nga ubbing. Kayatko nga ibaga kadakuada nga addanto Paraiso ken panagungar dagiti natay, ngem saanda met a matarusan ti lengguahek. Uray ubingak pay idi, inkeddengko a sursuruen ti lengguahe a Cambodian tapno maibagak kadagiti kaeskuelaak ti maipapan ken Jehova. Diak impagarup a daytoy a desisionko ket dakkel ti epektona iti masakbayak.

Narigat ti agsursuro iti Cambodian. Namindua a kayatko payen ti sumardeng, ngem pinabilegnak ni Jehova babaen kadagiti nagannakko. Idi agangay, kinombinsirdak dagiti titserko ken dagiti padak nga estudiante a mangalaak iti karera a mangipaayto kaniak iti dakkel a sueldo. Ngem kayatko ti agpayunir, isu a pinilik dagiti kurso iti hayskul a makatulongto kaniak a mangbirok iti part-time a trabaho tapno maragpatko ti kalatko. No malpas ti klasemi, masansan a makikaduaak kadagiti payunir a mangasaba. Nagboluntarioak met a mangisuro kadagiti estudiante nga agad-adal iti Ingles kas maikadua a lengguaheda—maysa a desision a dakkel ti naitulongna kaniak idi agangay.

Idi agtawenak iti 16, nadamagko nga adda grupo a Cambodian iti Long Beach, California, U.S.A. Napanak sadiay ket nagsursuroak nga agbasa iti Cambodian. Apaman a nagturposak iti hayskul, nagpayunirak ket intultuloyko a kasabaan dagiti Cambodian a kaarrubami. Idi agtawenak iti 18, pinampanunotko no mabalinko ti umakar idiay Cambodia. Napeggad pay la idi sadiay, ngem ammok a sumagmamano laeng nga indibidual iti 10 milion a populasion ti Cambodia ti nakangngeg iti naimbag a damag ti Pagarian. Iti daydi a tiempo, adda laeng maymaysa a kongregasion iti intero a pagilian a buklen ti 13 nga agibumbunannag. Napanak idiay Cambodia iti umuna a gundaway idi agtawenak iti 19. Kalpasan ti dua a tawen, inkeddengko ti umakar ken agnaed sadiay. Nakabirokak iti part-time a trabaho a panagipatarus ken panagisuro iti Ingles tapno masuportarak ti ministeriok. Idi agangay, nangasawaak iti maysa a kabsat a kapadak ti kalatna. Maragragsakankami a tumultulong iti adu a Cambodian a mangidedikar iti biagda iti Dios.

Pinatgan ni Jehova ‘dagiti kiddaw ti pusok.’ (Sal. 37:4) Ti panagaramid iti ad-adalan ti karagsakan pay laeng a propesion. Bayat ti 16 a tawen a kaaddak iti Cambodia, daydi bassit a grupo a buklen ti 13 nga adipen ni Jehova ket nagbalin itan a 12 a kongregasion ken 4 a naiputputong a grupo!—Kas insalaysay ni Jason Blackwell.