BAYAT ti siam nga aldaw a napartak a kampania a panangasaba idi Agosto/Septiembre 1929, nasurok a 10,000 a manangaskasaba ti nagwaras iti Estados Unidos. Nakaipaimada iti nasurok a 250,000 a libro ken bokleta. Karaman kadagidiay a manangiwaragawag iti Pagarian ket ti agarup sangaribu a colporteur. Anian a nagdakkel ti immaduan ti bilangda! Impadamag ti Bulletin * a “kasla di nakappapati” a napamitlo ti bilang dagiti payunir manipud 1927 agingga’t 1929.

Iti naladaw a paset ti 1929, nagsuek ti ekonomia ti Estados Unidos. Iti Black Tuesday—Oktubre 29, 1929—ti panagbaba dagiti presio iti New York Stock Exchange ti nakaigapuan ti panagsuek ti sangalubongan nga ekonomia a nagresulta iti Great Depression. Nalugi dagiti banko. Naisardeng ti panagtrabaho kadagiti farm. Nagserra dagiti dadakkel a paktoria. Minilion ti naawanan iti trabaho. Idi 1933, dimmanon iti 1,000 kada aldaw iti Estados Unidos ti mangilaklako iti tintinnaganda a balay.

Kasano a nakapagtultuloy dagiti amin-tiempo a manangaskasaba kabayatan ti kasta a krisis? Ti maysa a sungbat ket ti balay a lugan. Gapu ta saan a maabangan ken mabuisan ti balay a lugan wenno trailer, adu ti nakapagtalinaed a payunir. * Ken bayat ti kombension, nagserbi dayta kas libre a hotel. Idi 1934, nangipaay ti Bulletin iti detalyado a plano para iti bassit ngem komportable a pagtaengan nga addaan iti nagsayaat a linia ti danum, paglutuan, makupin a kama, ken proteksion manipud iti lamiis.

Porsegido ti adu a manangaskasaba iti intero a lubong nga agaramid iti bukodda a balay a lugan. “Awan pay idi ti kapadasan ni Noe nga agibangon iti barko,” malagip ni Victor Blackwell, “ket awan met ti kapadasak wenno ammok maipapan iti panagaramid iti balay a trailer.” Ngem nakaaramid latta ni Victor.

Addaan da Avery ken Lovenia Bristow iti balay a lugan. Kinuna ni Avery, “Kaslaak la pag-ong a tugottugotna ti balayna.” Nagpayunir dagitoy nga agassawa a kaduada da Harvey ken Anne Conrow, nga addaan met iti balay a lugan a nadidingan iti tar paper. Maregreg ti sumagmamano a paset ti diding tunggal umakarda. “Awan pay idi ti kasta a trailer,” malagip ni Avery, “ken awan metten ti simmaruno a kasta!” Ngem kinuna ni Avery a dagiti agassawa a Conrow ken ti dua nga annakda a lallaki ti “kararagsakan pay laeng a pamilia.” Insurat ni Harvey Conrow, “Saan a pulos nagkurang dagiti kasapulanmi, ket naan-anay a mariknami a natalgedkami gapu iti panagserbimi ken Jehova ken iti naayat a panangaywanna.” Idi agangay, dagitoy nga agassawa a Conrow ken ti dua nga annakda ket naggigiddan a nagadal iti Gilead ken naidestinoda iti Peru kas misionero.

Nagpayunir met ti intero a pamilia Battaino. Idi dandanin maaddaan iti anak da Giusto ken Vincenza, pinagbalinda ti 1929 Model A Ford a trakda a “kasla nagpintas a hotel” saan a kas kadagiti tolda a dati a naggigiananda. Kaduada ti balasitangda bayat nga intultuloyda ti trabaho a magusgustuanda, ti  panangasaba kadagiti Italiano nga agnanaed iti Estados Unidos.

Adu ti dimngeg iti naimbag a damag, ngem manmano a makaited iti donasion a kuarta dagiti nakurapay ken awanan trabaho. Isu a nagduduma a banag ti isukatda kadagiti literatura ti Biblia. Dua a payunir ti nakailista iti 64 a nadumaduma a banag nga inted kadakuada dagiti interesado a tattao. Daytoy a listaan ket “kasla imbentario ti maysa a tiendaan ti ili.”

Nakasarita ni Fred Anderson ti maysa a mannalon a kayatna ti maaddaan kadagiti librotayo ket insukatna ti daan nga anteohos ni nanangna. Iti kabangibang a talon, naginteres ti maysa a lalaki kadagiti literaturatayo ngem kinunana, “Awan met anteohosko.” Idi impadasna ti anteohos a naited ken Fred, eksakto kenkuana ti gradona isu a siraragsak a nagdonar para kadagiti libro ken iti anteohos.

Adda pagpupokan ti manok nga itugtugot ni Herbert Abbott iti likud ti luganna. No adda tallo wenno uppat a manok nga isukat dagiti bumalay kadagiti literaturatayo, ilakona dagita iti tiendaan sa paggasolinana ti paglakuanna. “Adda kadi gundaway a maibusankami iti kuarta? Wen, adda,” insuratna, “ngem dimi impalubos a dayta ti mangpasardeng kadakami. Agingga nga adda gasolina ti luganmi, inkam latta mangasaba ket naan-anay nga agtalekkami ken Jehova.”

Nagballigi dagiti adipen ni Jehova kadagidi a narigat a tawtawen gapu ta nagpannurayda kenkuana ken nabileg ti determinasionda. Bayat nga agbagbagyo, natupakan iti kayo ti trailer da Maxwell ken Emmy Lewis ket nagudua dayta. Imbag laengen ta nakaruarda sakbay a napasamak dayta. “Saan a dagitoy a pasamak ti nakalapped kadakami,” insurat ni Maxwell, “ket saan a pulos simmiplot iti panunotmi ti sumardeng. Adu pay ti masapul a maaramid, ket determinadokami a mangaramid iti dayta.” Iti tulong dagiti naayat a kakabsat, natarimaan da Maxwell ken Emmy ti balay a luganda.

Uray iti narigat a kasasaad ita, makitkitatayo ti kasta a kinamanagsakripisio iti minilion a nareregta a Saksi ni Jehova. Wen, kas kadagidi a nagkauna a payunir, determinadotayo a mangitultuloy a mangasaba agingga nga ibaga ni Jehova a nalpasen dayta.