KAYAN-ANAK pay laeng ti anakko a ni Gary idi 1958 idi nadlawko nga adda depektona. Ngem limmabas pay ti sangapulo a bulan sakbay a natakuatan dagiti doktor no ania ti sakitna ken lima a tawen sakbay a kinompirma dayta dagiti espesialista iti London. Napalalo ti ladingitko idi nakitak a nakarkaro nga amang dagiti sintomas iti balasangko a ni Louise, a nayanak siam a tawen kalpasan ni Gary.

“Agpada nga addaan dagiti annakmo iti LMBB syndrome, * ket awan agasna dayta,” siaalumamay a kinuna kaniak dagiti doktor. Bassit pay idi ti pannakaammo maipapan iti daytoy a manmano a sakit. Karaman kadagiti sintomas ti kasta a sakit ket ti depekto iti mata nga agresulta iti pannakabulsek, kinalukmeg, surok a ramay ti ima ken/wenno saka, nabuntog a panagsursuro, problema ti koordinasion ti bagi, diabetes mellitus, osteoarthritis, ken depektibo a kidney. No kasta, saan a kaskarina ti panangaywan kadagiti annakko. Sigun iti nabiit pay a panagadal, 1 iti kada 125,000 a tattao iti Britania ti addaan iti kastoy a sakit, nupay mabalin nga ad-adu pay ti addaan iti kastoy a sakit ngem di unay nakaro.

Adda Saksi ni Jehova a nakasaritak di nagbayag kalpasan a nakiasawaak, ket dagus a nabigbigko ti kinapudno. Ngem awan pulos ti interes ni lakayko iti dayta. Gapu iti trabahona, kanayonkami nga umakar, isu a saanak a regular a makagimong. Nupay kasta, intultuloyko ti nagbasa iti Biblia ken nagkararag ken Jehova. Naliwliwaak idi nabasak a “ni Jehova agbalinto a natalged a kamang maipaay iti asinoman a nailupitlupit, natalged a kamang kadagiti tiempo ti riribuk” ken ‘saannanto a baybay-an dagidiay mangbirbirok kenkuana.’—Sal. 9:9, 10.

Nakapuy ti panagkita ni Gary isu nga idi innem ti tawenna, inserrekmi iti maysa a boarding school iti abagatan a kosta ti England a para kadagiti addaan iti depekto. Kanayon a tumawag kaniak a mangibaga kadagiti parikutna, ket gundawayak met nga ilawlawag kenkuana dagiti pamunganayan a prinsipio ti Biblia. Sumagmamano a tawen kalpasan ti pannakayanak ni Louise, nagsakitak met iti multiple sclerosis ken fibromyalgia. Nagsubli iti pagtaenganmi ni Gary idi 16 ti tawenna manipud iti paggigiananna nga eskuelaan. Ngem in-inut a kimmapuy ti panagkitana, ket nairehistro kas bulsek idi 1975. Pinanawannakami ni lakayko idi 1977.

Di nagbayag kalpasan a nagsubli ni Gary, nakitimpuyogkami iti maysa a naayat a kongregasion, ket nabautisaranak idi 1974. Napalalo ti yamanko idi adda panglakayen a timmulong ken Gary bayat a mapaspasaranna dagiti pisikal a panagbalbaliw ti maysa nga agtutubo. Timmulong met ti dadduma pay a Saksi kadagiti trabaho iti pagtaenganmi, ket idi agangay, lima kadakuada ti tinangdanan ti lokal a gobierno kas paraaywan iti pagtaenganmi. Nagdakkel a tulong dayta kadakami!

Nagtultuloy a rimmang-ay ni Gary iti kinapudno ket nabautisaran idi 1982. Yantangay tarigagayna  ti ag-auxiliary pioneer, inkeddengko a kaduaen ket intultuloyko dayta iti adu a tawen. Nakaragragsak ni Gary idi dinamag kenkuana ti manangaywan iti sirkitomi, “Apay a dimo padasen ti ag-regular pioneer, Gary?” Dayta laeng a pammaregta ti kasapulan ni Gary, ket naaprobaran a payunir idi 1990.

Namindua a nasuktan ti nagsuopan ti padingpading ni Gary, idi 1999 ken idi 2008, ngem adayo a nakarkaro ti sakit ni Louise. Nayanak a bulsek ni Louise, ket idi nakitak a surok ti ramay ti maysa a sakana, ammokon nga addaan met iti LMBB syndrome. Ipakita dagiti eksaminasion a depektibo met ti adu a lalaemna. Iti simmaganad a tawtawen, limmasat iti adu nga operasion, pakairamanan ti lima nga operasion iti kidney. Adda met diabetes-na kas ken Gary.

Gapu ta ammo ni Louise dagiti mabalin a tumaud a problema no maoperaan, nakisarita a nasaksakbay kadagiti siruhano, anestesiologo, ken dagiti opisial iti ospital ket inlawlawagna no apay a saan nga agpayalison iti dara. Kas resulta, nagbalin a nasinged kadagiti nangasikaso kenkuana.

Okupadokami iti pagtaenganmi, nangnangruna iti panagdayaw ken Jehova. Adu nga oras idi nga ibasbasaak da Gary ken Louise sakbay pay nga adda dagiti moderno nga elektroniko a katulongan. Adda itan dagiti CD, DVD, ken recordings manipud iti www.isa4310.com a makatulong iti linawas a panagadalmi iti Biblia, ket makapagkomentokami pay kadagiti gimong.

No dadduma, ikabesa ni Gary dagiti komentona, ket no adda palawagna iti Teokratiko nga Eskuelaan ti Panagministro, yebkasna dayta iti bukodna a sasao. Nadutokan a ministerial nga adipen idi 1995 ken kanayon nga okupado iti Kingdom Hall, a kablaawanna dagiti kakabsat ken tumulong a mangasikaso iti sound system.

Adda dagiti kakabsat a mangkuyog ken Gary iti ministerio, nga iduronda ti wheelchair-na gapu ta adda arthritis-na. Maysa a kabsat ti timmultulong kenkuana a mangyadal iti Biblia iti maysa nga interesado. Naparegta met ni Gary ti maysa a Kristiano nga inaktibo iti 25 a tawen. Tumabtabuno itan iti gimong dagitoy a dua a tinulonganna.

Idi siam ti tawen ni Louise, nasursurona ken lolana ti aggansilio. Siak met ken ti maysa kadagiti paraaywan ti nangisuro kenkuana nga agborda. Gapu ta magusgustuanna nga aramiden dagita, aggansilio kadagiti namaris a blanket para kadagiti ubbing ken natataengan a kakabsat iti kongregasion. Agaramid met kadagiti greeting cards babaen iti babassit a maipigket a ladladawan. Nasursuro ni Louise ti agmakinilia idi tin-edyeren. Ita, iti tulong ti makapagsao a kompiuter, kanayon a makikomunikar kadagiti gagayyemna babaen ti e-mail. Nabautisaran ni Louise idi agtawen iti 17. No tiempo dagiti espesial a kampania, ag-auxiliary pioneer-kami nga agiina. Kas ken Gary, imemoria met ni Louise dagiti teksto tapno mayebkasna ti pammatina iti inkari ti Dios a maysa a lubong, a sadiay “maluktanto ti matmata dagidiay bulsek” ken “awanto ti agtataeng nga agkuna: ‘Masakitak.’”—Isa. 33:24; 35:5.

Anian a yamanmi kadagiti napateg a kinapudno a linaon ti naipaltiing a Sao ni Jehova! Agyamyamankami unay iti naayat a suporta ti kongregasionmi, ta no awan dayta saanmi koma a maaramidan ti adu nga aktibidadmi. Ken gapu iti tulong ni Jehova, nagbalin a makapnek ti biagmi.