Usigentayo ti makagapu no apay a nadakamat ni Jesus ti maipapan iti kinaawan asawa. Idi nagdamag kenkuana dagiti Fariseo maipapan iti diborsio, imbatadna ti pagalagadan ni Jehova mainaig iti panagasawa. Ipalubos ti Linteg a mangaramid ti lalaki iti kasuratan ti diborsio iti asawana no adda naduktalanna a “banag a di natakneng” ken baketna, nupay saan a kasta ti pagalagadan idi damo. (Deut. 24:1, 2) Kalpasanna, kinuna ni Jesus: “Siasinoman a mangidiborsio iti asawana a babai, malaksid no maibatay iti pannakiabig, ket mangasawa iti sabali makaaramid iti pannakikamalala.”​—Mat. 19:3-9.

Idi nangngeg daytoy dagiti adalan, kinunada: “No kasta ti kasasaad ti maysa a lalaki iti asawana, saan a maibalakad a mangasawa.” Kinuna ni Jesus: “Saan nga amin a tattao maiwayaanda daytoy a sao, no di laeng dagidiay addaan iti sagut. Ta adda dagiti eunuko a nayanak a kasta manipud iti aanakan ti inada, ket adda dagiti eunuko a napagbalin a eunuko babaen kadagiti tattao, ket adda dagiti eunuko a namagbalin iti bagbagida a eunuko maigapu iti pagarian ti langlangit. Ti makaiwaya iti dayta iwayaanna koma dayta.”​—Mat. 19:10-12.

Dagiti talaga a eunuko ket nayanak nga addaan kadagiti depekto wenno nagbalinda a kasta gapu ta naaksidenteda wenno adda naikkat a paset ti bagida. Ngem adda met dagidiay boluntario a nagbalin a eunuko. Nupay mabalinda ti mangasawa, minedmedanda ti bagida ket nagtalinaedda nga awanan asawa “maigapu iti pagarian ti langlangit.” Kas ken Jesus, pinilida ti saan a mangasawa tapno ad-adda a maipamaysada ti agserbi para iti Pagarian. Saanda a nayanak nga addaan iti sagut a kinaawan asawa ken saan met a naited dayta kadakuada. Imbes ketdi, inwayaanda dayta. Kayatna a sawen, inkeddengda nga aprobetsaren daytoy a sagut.

Maibatay iti kinuna ni Jesus, inlawlawag ni apostol Pablo a nupay awaten ti Dios ti panagserbi ti amin a Kristiano​—awanan man wenno addaan iti asawa​— ‘naim-imbag ti maaramidan’ dagidiay ‘nangikeddeng iti pusoda’ a dida makiasawa. Kasano a kasta? Dagiti naasawaan bingayenda ti tiempo ken pigsada tapno maay-ayo ken maaywananda ti asawada. Ngem dagiti awanan asawa a Kristiano mabalinda nga ipamaysa ti agserbi iti Apo nga awan ti kasta nga obligasionda. Ibilangda ti kasta a kasasaad kas “sagut” manipud iti Dios.​—1 Cor. 7:7, 32-38.

Gapuna, awan ibaga kadatayo ti Kasuratan a namilagruan a sagut a kinaawan asawa a maited iti maysa a Kristiano. Imbes ketdi, ikeddeng dayta ti indibidual babaen ti panagtalinaedna nga awanan asawa tapno maipamaysana dagiti interes ti Pagarian nga awan ti pakasingaanna. Dayta ti makagapu no apay nga inkeddeng ti dadduma ti agtalinaed a di naasawaan, ket suportaran koma ida ti sabsabali iti kasta a desisionda.