Taginayonem ti Pannakariknam iti Kinaganat

“Ikasabam ti sao, naganetgetka koma iti dayta.”​—2 TIM. 4:2.

MAILAWLAWAGMO KADI?

Apay a nangasaba a sigaganat dagiti Kristiano idi umuna a siglo?

Kasanotayo a mataginayon ti pannakariknatayo iti kinaganat?

Apay a nagangganat ita ti panangikasaba iti Pagarian?

1, 2. Ania dagiti saludsod a tumaud maipapan iti bilin a ‘mangasaba a sigaganetget’?

GAGANGAY a naganat ti trabaho dagiti parasalbar iti biag. Kas pagarigan, agap-apura nga umarayat dagiti bombero iti ayan ti puor ta ammoda nga adda dagiti agpegpeggad a biag.

² Kas Saksi ni Jehova, kayattayo a tulongan dagiti tattao a maisalakan. Isu nga ipappapusotayo ti annongentayo a mangikasaba iti naimbag a damag ti Pagarian. Siempre, ditay matartaranta a mangaramid iti dayta. Ania ngarud ti kayat a sawen ni apostol Pablo idi imbalakadna: “Ikasabam ti sao, naganetgetka koma iti dayta”? (2 Tim. 4:2) Kasanotayo a mangasaba a sigaganetget wenno sigaganat? Ken apay a nakagangganat ti trabahotayo?

APAY A NAGANAT TI PANANGASABATAYO?

3. Ania dagiti resulta ti panangipangag wenno panangilaksid dagiti tattao iti mensahe ti Pagarian?

³ No panunotem a makaispal iti biag ti panangasabatayo, nalabit mariknam a naganat ti panangiranud iti naimbag a damag. (Roma 10:13, 14) Kuna ti Sao ti Dios: “No kunaek iti daydiay nadangkes: ‘Di bumurong a mataykanto,’ ket pudno a tumallikud iti basolna ket agaramid iti kinahustisia ken kinalinteg, . . . di bumurong nga agtultuloyto nga agbiag. Saanto a matay. Awan kadagiti basolna a kadagita a nagbasol ti malagipto maibusor kenkuana.” (Ezeq. 33:14-16) Kinapudnona, kuna ti Biblia kadagidiay mangisursuro iti mensahe ti Pagarian: “Maisalakanmonto agpadpada ti bagim ken dagidiay agimdeng kenka.”​—1 Tim. 4:16; Ezeq. 3:17-21.

4. Apay a masapul a taginayonen ni Timoteo ti pannakariknana iti kinaganat?

⁴ Tapno matarusantayo ti balakad ni Pablo ken ni Timoteo maipapan iti panangtaginayon iti pannakarikna iti kinaganat, usigentayo ti dadduma a konteksto ti pannakatema a teksto. Mabasatayo: “Ikasabam ti sao, naganetgetka  koma iti dayta iti mainugot a panawen, iti nariribuk a panawen, mangtubngarka, mangtinggarka, mamagbagaka, buyogen ti isuamin a mabayag a panagitured ken arte ti panangisuro. Ta addanto las-ud ti tiempo a saandanto nga anusan ti makapasalun-at a sursuro, no di ket, maitunos kadagiti bukodda a tarigagay, mangurnongdanto kadagiti mannursuro a maipaay iti bagbagida tapno gagatelenda dagiti lapayagda; ket iyadayodanto dagiti lapayagda iti kinapudno.” (2 Tim. 4:2-4) Impadto ni Jesus a tumaud ti apostasia. (Mat. 13:24, 25, 38) Sakbay a mapasamak dayta, masapul a sigaganat nga ‘ikasaba ni Timoteo ti sao’ iti uneg ti kongregasion tapno saan a maallilaw ken maatrakar dagiti Kristiano iti palso a sursuro. Agpegpeggad idi ti biag dagiti tattao. Komusta met ita?

5, 6. Ania dagiti popular a pannursuro a patpatien dagiti tattao a makaskasabaantayo?

⁵ Kimmaro ken nagsaknap itan ti panagapostasia manipud iti pudno a panagdayaw. (2 Tes. 2:3, 8) Ania dagiti pannursuro a magusgustuan a denggen dagiti tattao ita? Iti adu a lugar, sireregta a maisursuro ti ebolusion a kas man la maysa a pannursuro ti relihion. Nupay gagangay a maus-usar ti siensia a mangilawlawag ken mangsuporta iti ebolusion, dandani nagbalinen a maysa a relihion ngem saan a mamati iti Dios. Kas resultana, naapektaran ti panangmatmat dagiti tattao iti Dios ken iti sabsabali. Ti maysa pay a popular a sursuro ket saan kano nga interesado kadatayo ti Dios; isu a saan a masapul nga aginterestayo kenkuana. Apay a minilion a tattao ti maatrakar unay kadagita a pannursuro nga uray la paturogenna ida iti naespirituan? Agpada nga iyanninawda daytoy a mensahe, ‘Mabalinmo nga aramiden ti amin a kayatmo gapu ta awan ti mangdusa kenka.’ Sigurado a magustuan dayta a denggen ti adu a tattao.​—Basaen ti Salmo 10:4.

⁶ Ngem adda pay dagiti magustuan a denggen dagiti tattao. Dadduma a makimismisa kayatda dagiti mannursuro a mangibaga kadakuada, ‘Ay-ayatennaka latta ti Dios uray ania ti aramidem.’ Dagiti papadi ken papastor ibagbagada a dagiti seremonia, Misa, piesta, ken imahen ket mangyeg iti bendision ti Dios. Dagita ngamin ti pagaayat a denggen dagiti tattao. Ngem saan nga ammo dagita a makimismisa a nakapegpeggad ti kasasaadda. (Sal. 115:4-8) Ngem no isurotayo kadakuada ti pudno a mensahe ti Biblia, mariingtayo ida iti naespirituan. Iti kasta, masagrapda dagiti bendision nga ipaay ti Pagarian ti Dios.

ANIA TI KAYAT A SAWEN TI NAGANAT A PANANGASABA ITA?

7. Kasanotayo a maipakita ti kinaganattayo?

⁷ Ti naannad a doktor ket naipamaysa iti panagoperana gapu ta agpegpeggad ti biag. Umasping iti dayta, maipakitatayo ti kinaganat iti ministeriotayo no naipamaysatayo iti trabahotayo, kas iti panangpanunottayo kadagiti problema, saludsod, wenno impormasion a paginteresan dagiti makasaritatayo. Maipakitatayo pay ti kinaganattayo babaen ti panangbaliw iti eskediultayo tapno masarungkarantayo dagiti tattao iti tiempo a kombiniente kadakuada.​—Roma 1:15, 16; 1 Tim. 4:16.

8. Ania ti gagangay a ramanen ti kinaganat?

⁸ Ti pannakarikna iti kinaganat ramanenna met ti panangyun-una iti napapateg a bambanag. (Basaen ti Genesis 19:15.) Kas pagarigan, ipapantayo a naalamon ti resulta ti eksaminasionmo, inayabannaka ti doktor iti opisinana sa kinunana: “Delikado ti kasasaadmo. Agtignayka a dagus. Adda laengen makabulan tapno maagasan ti sakitmo.” Saanka met siguro nga agap-apura a pumanaw a kas iti bombero a mapan agarayat. Imbes ketdi, mabalin a damagem no ania ti masapul nga aramidem, agawidka, ket panunotem a naimbag no ania dagiti masapul nga iyun-unam.

9. Apay a maikunatayo a sigaganat a nangasaba ni Pablo idi adda idiay Efeso?

 ⁹ Adda maadaltayo iti kinaganat ni Pablo no usigentayo ti imbagana kadagiti panglakayen idiay Efeso maipapan iti panangikasabana iti naimbag a damag iti distrito ti Asia. (Basaen ti Aramid 20:18-21.) Agparang a manipud idi simmangpet, okupado a nangikasaba iti naimbag a damag kadagiti tattao iti binalaybalay. Kanayonanna, iti uneg ti dua a tawen, adda eskediulna nga ‘inaldaw a mangipaay kadagiti palawag iti pagtataripnongan ti eskuelaan ni Tirano.’ (Ara. 19:1, 8-10) Nalawag a makita ti kinaganat ni Pablo iti rutinana. Ti bilin a ‘naganetgetka koma iti ministerio’ ket saan a nairanta a mangpadagsen iti annongentayo. Ngem masapul nga iyun-unatayo ti trabaho a panangasaba.

10. Apay a maragsakantayo a nagtignay a sigaganat dagiti Kristiano agarup 100 a tawen ti napalabasen?

¹⁰ Ti ulidan ti bassit a grupo dagiti Estudiante ti Biblia a nangikasaba iti naimbag a damag sakbay ti 1914, iyilustrarna no ania ti kaipapanan ti pannakarikna iti kinaganat. Nupay sumagmamano laeng a ribu ti bilangda, ammoda nga agbibiagda iti naganat a tiempo ken sireregta nga inkasabada ti Pagarian. Nagipablaakda kadagiti sermon iti ginasut a diario ken nagipabuyada kadagiti color slide ken moving picture a maawagan iti “Photo-Drama of Creation.” Iti kasta a pamay-an, naipakaammoda ti naimbag a damag iti minilion a tattao. No saanda a nakarikna iti kinaganat, mano ngata kadatayo ti nakangngeg iti mensahe ti Pagarian?​—Basaen ti Salmo 119:60.

DIYO IPALUBOS A MAPUKAW TI PANNAKARIKNAYO ITI KINAGANAT

11. Apay a napukaw ti dadduma ti pannakariknada iti kinaganat?

¹¹ Mabalin a malipatan ti maysa ti kinapateg ti panangasaba gapu kadagiti pakasingaan. Panggep ti sistema ni Satanas nga ipamaysatayo dagiti personal a kalat ken dagiti saan unay a napateg a bambanag. (1 Ped. 5:8; 1 Juan 2:15-17) Adda dagidiay dati a nangyun-una iti panagserbida ken Jehova ngem napukawda ti pannakariknada iti kinaganat. Kas pagarigan, ti nagkauna a Kristiano a ni Demas ket ‘katrabahuan’ idi ni Pablo iti ministerio ngem nagpasinga iti dakes a sistema ti bambanag. Imbes nga inyun-unana a pabilgen ti kabsatna a ni Pablo bayat ti narigat a kasasaad, pinanawanna ketdi.​—Flm. 23, 24; 2 Tim. 4:10.

12. Ania nga oportunidad ti silulukat ita, ken ania dagiti oportunidad a silulukat iti masanguanan?

¹² Tapno mataginayontayo ti kinaganattayo, masapul a labanantayo ti tarigagaytayo nga ad-adda a mangtagiragsak kadagiti tukon ti lubong. Masapul nga ikagumaantayo a ‘petpetan a sititibker ti pudpudno a biag.’ (1 Tim. 6:18, 19) Nalabit kombinsidoka a ti biag nga agnanayon ditoy daga bayat ti panagturay ti Pagarian ti Dios ket mangted iti agnanayon a gundaway tapno matagiragsakmo dagiti makapainteres nga aktibidad. Ngem ti oportunidadtayo ita a mangtulong kadagiti tattao a makalasat iti Armagedon ket saanto a mauliten.

13. Ita ta nagbalintayon a Kristiano, kasanotayo a mataginayon ti kinaganattayo?

¹³ Pudno, kaaduan a tattao ita ti matmaturog iti naespirituan. Ania ti makatulong tapno ditay mapukaw ti kinaganattayo? Panunotentayo nga arigna nakaturogtayo met idi iti kasipngetan. Ngem nariingtayon, ken linawagannatayo ni Kristo, kas dinakamat ni Pablo. Addaantayon iti pribilehio a mangisilnag iti lawag. (Basaen ti Efeso 5:14.) Kalpasan a dinakamat dayta ni Pablo, insuratna: “Itultuloyyo ti agaluad a siiinget a ti pannagnayo saan a kas kadagiti nakuneng no di ket kas kadagiti masirib a tattao, a gatangenyo ti nainggundawayan a tiempo maipaay iti bagbagiyo, agsipud ta dagiti aldaw dakesda.” (Efe. 5:15, 16) Bayat nga agbibiagtayo iti dakes a sistema, ‘gatangentayo ti tiempo’ agpaay kadagiti aktibidad a makatulong kadatayo nga agtalinaed a siririing iti naespirituan.

 AGBIBIAGTAYON ITI KRITIKAL A TIEMPO

14-16. Apay a nagangganat ita ti panangikasaba iti Pagarian?

¹⁴ Kanayon a naganat ti Nakristianuan a ministerio, ngem nagangganat dayta ita. Manipud 1914, nalawlawagen ti pagilasinan a nadakamat iti Sao ti Dios. (Mat. 24:3-51) Ad-adda nga agpegpeggad ti biag dagiti tattao ita. Iti laksid dagiti nabiit pay a katulagan iti kappia, addaan latta dagiti kabibilgan a nasion iti agarup 2,000 a nuklear nga armas a nakasagana a mapabettak. Sigun kadagiti autoridad, ginasut dagiti “mapukpukaw” a nuklear nga armas. Adda kadi kadagiti terorista ti dadduma kadagita? Kuna dagiti managpaliiw a nalaka laeng a maikisap ti sangatauan babaen iti gubat nga irugi dagiti terorista. Ngem saan laeng a ti gubat ti mamagpeggad iti sangatauan.

¹⁵ “Ti panagbalbaliw ti klima ti kapeggadan a pangta iti salun-at iti intero a lubong iti maika-21 a siglo,” kuna ti 2009 a report ti The Lancet ken ti University College London. Kunana pay: “Dagiti epekto ti panagbalbaliw ti klima iti salun-at apektaranna ti kaaduan a tattao kadagiti sumaruno a dekada ken ad-adda a pagpeggadenna ti biag ken salun-at ti binilion a tattao.” Mabalin a madadael ti adu a lugar gapu iti ingangato ti patar ti baybay, tikag, layus, epidemia, napigsa a bagyo, ken gubat gapu iti panagiinnagaw iti bumasbassit a kinabaknang ti daga. Wen, dagiti gubat ken didigra pagpeggadenda ti sangatauan.

¹⁶ Mabalin nga ipagarup ti dadduma a ti panangrugi ti nuklear a gubat ket agbanag kadagiti pasamak a mangtungpal iti “pagilasinan.” Ngem saan a matarusan ti kaaduan ti pudpudno a kaipapanan ti pagilasinan. Adun a dekada a nalawag a makitkitan dayta a mangipasimudaag a pudpudno ti kaadda ni Kristo ken napartak ti iyaadani ti panungpalan daytoy sistema ti bambanag. (Mat. 24:3) Ita pay laeng a nakalawlawag a makita ti kaitungpalan ti nakaad-adu nga aspeto ti pagilasinan. Panawenen nga agriing dagiti tattao iti naespirituan. Makatulong ti ministeriotayo a mangriing kadakuada.

17, 18. (a) Ania ti epektona kadatayo “ti panawen”? (b) Ania ti mamagbalbaliw iti panangmatmat dagiti tattao maipapan iti mensahe ti Pagarian?

¹⁷ Bassit laengen ti nabati a tiempo tapno paneknekantayo ti ayattayo ken ni Jehova ken ileppastayo ti trabahotayo a panangasaba a naipaannong kadatayo iti daytoy maudi nga al-aldaw. Ad-adda nga agaplikar ita ti kinuna ni Pablo kadagiti Kristiano idiay Roma idi umuna a siglo: “Ammoyo ti panawen, nga orasen tapno agriingkayo iti turog, ta ita ti pannakaisalakantayo as-asidegen ngem idi tiempo a nagbalintayo a manamati.”​—Roma 13:11.

¹⁸ Dagiti pasamak a naipadto iti maudi nga al-aldaw tulonganda dagiti tattao a mangbigbig a kasapulanda ti naespirituan. Makita ti dadduma a kasapulan ti tao ti tulong no panunotenda ti pannakapaay ti natauan a gobierno a mangsolbar iti panagsuek ti ekonomia, pangta ti nuklear, kinaranggas, wenno pannakadadael ti aglawlaw. Mabigbig met ti dadduma a kasapulanda ti naespirituan gapu kadagiti pasamak iti pamiliada kas iti panagsakit, diborsio, wenno ipapatay dagiti ipatpategda iti biag. Ipakpakitatayo a nakasaganatayo a tumulong kadagita a tattao no makiramramantayo iti ministerio.

NATIGNAY GAPU ITI PANNAKARIKNA ITI KINAGANAT

19, 20. Kasano a natignay ti adu a Kristiano a nangbalbaliw iti panagbiagda gapu iti pannakariknada iti kinaganat?

¹⁹ Adu a Kristiano ti natignay a mangpalawa iti ministerioda gapu iti pannakariknada iti kinaganat. Kas pagarigan, adda agkabannuag a pagassawaan a taga-Ecuador a nangpasimple iti biagda kalpasan a natabunuanda ti 2006 nga espesial nga aldaw ti asamblea a “Taginayonenyo a Simple ti Matayo.” Inlistada dagiti bambanag a dida kasapulan. Iti uneg ti tallo a bulan, pinanawanda ti tallo ti kuartona nga apartmentda, immakarda iti  maysa ti kuartona nga apartment, ken inlakoda ti dadduma nga alikamenda isu nga awan ti utangdan. Di nagbayag, nag-auxiliary payunirda ken sinurotda ti singasing ti manangaywan iti sirkito nga agserbida iti kongregasion a dakdakkel ti panagkasapulanna.

²⁰ Insurat ti maysa a kabsat a taga-North America: “Idi nakiasambleakami ken baketko idi 2006, 30 a tawenen a bautisadokami. Bayat ti panagawidmi kalpasan ti programa, nagsaritaanmi no kasanomi nga iyaplikar ti balakad a panangpasimple iti biag. (Mat. 6:19-22) Adda tallo a balaymi, lote, nangina a luglugan, maysa a motorboat, ken maysa a motor home. Gapu ta nariknami a kaskam la maag a Kristiano, pinagbalinmi a kalat ti sumrek iti amin-tiempo a ministerio. Idi 2008, nagregular payunirkami kas iti balasangmi. Nakaragragsak ti agserbi a kadua dagiti kakabsat! Nakapagserbikami iti lugar nga addaan iti dakdakkel a panagkasapulan. Kasta met, ad-adda a simmingedkami ken Jehova gapu ta ad-adu ti maar-aramidanmi agpaay kenkuana. Ti nangnangruna nga ibilangmi a bendision ket ti pannakakitami iti kinaragsak dagiti tattao no mangngeg ken matarusanda ti kinapudno iti Sao ti Dios.”

21. Ania a pannakaammo ti mangtignay kadatayo a mangasaba a sigaganat?

²¹ Ammotayo a dandanin dumteng iti daytoy dakes a lubong ti “aldaw ti panangukom ken ti pannakadadael dagiti di nadiosan a tattao.” (2 Ped. 3:7) Ti pannakaammotayo iti Sao ti Dios tignayennatayo a sireregta a mangideklara iti um-umayen a dakkel a rigat ken kalpasanna, ti baro a lubong. Pagtalinaedentayo koma ti kinaganattayo a mangibaga kadagiti tattao iti pudpudno a namnama. No naan-anay a makiramantayo iti daytoy naganat a trabaho, maipakitatayo ti pudno a panagayattayo iti Dios ken kadagiti tattao.

[Salsaludsod]