‘Liwliwaenyo ti Amin nga Agledleddaang’

‘Ni Jehova pinulotannak a mangliwliwa iti amin nga agledleddaang.’​—ISA. 61:1, 2.

1. Ania ti inaramid ni Jesus kadagiti agledleddaang, ken apay?

 KINUNA ni Jesu-Kristo: “Ti taraonko isu ti panangaramidko iti pagayatan daydiay nangibaon kaniak ken panangturposko iti trabahona.” (Juan 4:34) Impakita ni Jesus dagiti agkakaimbag a galad ni Amana idi intungpalna ti inted-Dios nga annongenna. Ti maysa kadagita ket ti dakkel a panagayat ni Jehova kadagiti tattao. (1 Juan 4:7-10) Dinakamat ni apostol Pablo no kasano a naipakita dayta nga ayat idi tinukoyna ni Jehova kas “Dios ti amin a liwliwa.” (2 Cor. 1:3) Impakita met dayta ni Jesus idi tinungpalna ti padto ni Isaias. (Basaen ti Isaias 61:1, 2.) Binasana dayta a padto iti sinagoga ti Nazaret sa inyaplikarna iti bagina. (Luc. 4:16-21) Iti intero a ministeriona, liniwliwana dagiti agledleddaang isu a naparegtada ken naaddaanda iti talna ti panunot.

2, 3. Kas pasurot ni Jesus, apay a masapul a liwliwaentayo met ti sabsabali?

² Kas pasurot ni Jesus, masapul a liwliwaentayo met dagidiay agledleddaang. (1 Cor.  11:1) Kinuna ni Pablo: ‘Itultuloyyo a liwliwaen ken pabilgen ti maysa ken maysa.’ (1 Tes. 5:11) Ad-adda a kasapulan ita dagiti tattao ti liwliwa gapu ta agbibiagtayo iti “napeggad a tiempo a narigat a pakilangenan.” (2 Tim. 3:1) Iti intero a lubong, umad-adu a nasingpet a tattao ti agsagsagaba ken malidliday gapu iti panagsasao ken ar-aramid ti sabsabali.

³ Impadto ti Biblia nga iti maudi nga al-aldaw daytoy dakes a sistema ti bambanag, adu ti ‘managayat iti bagbagida, managayat iti kuarta, napalangguad, natangsit, managtabbaaw, nasukir kadagiti nagannak, saan a managyaman, saan a nasungdo, awanan nainkasigudan a panagayat, saan a sidadaan iti aniaman a tulagan, manangparpardaya, awanan panagteppel, narungsot, awanan panagayat iti kinaimbag, mangliliput, natangken ti uloda, natangsit gapu iti panagpannakkel, managayat iti ragragsak imbes a managayat iti Dios.’ Nakarkaro ita dagita a kababalin gapu ta ‘dagiti nadangkes ken agpampammarang ket dumakdakesda.’​—2 Tim. 3:2-4, 13.

4. Ania ti kasasaad ti lubong ita?

⁴ Ditay koma pakasdaawan dagita ta kuna ti Sao ti Dios a “ti intero a lubong adda iti pannakabalin daydiay nadangkes.” (1 Juan 5:19) “Ti intero a lubong” ramanenna ti politika, relihion, ken komersio, agraman dagiti pamay-an ni Satanas a mangisaknap kadagiti propagandana. Awan duadua a ni Satanas a Diablo “ti agturay iti lubong” ken “ti dios daytoy a sistema ti bambanag.” (Juan 14:30; 2 Cor. 4:4) Kumarkaro dagiti kasasaad ditoy daga gapu ta napalalo ti unget ni Satanas, ta ammona a bassiten ti tiempona. (Apoc. 12:12) Makaliwliwa a maammuan a saan nga ipalubos ti Dios a bumayag pay ti dakes a sistema ni Satanas ken dandanin marisut ti isyu a pinataudna maipapan iti kinasoberano ni Jehova!​—Gen., kap. 3; Job, kap. 2.

Maikaskasaba ti Naimbag a Damag iti Intero a Lubong

5. Kasano a matungtungpal ita ti padto a panangasaba?

⁵ Bayat daytoy narigat a tiempo iti pakasaritaan ti tao, matungtungpal ti impadto ni Jesus: “Daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi kadagiti amin a nasion; ket iti kasta umayton ti panungpalan.” (Mat. 24:14) Maisaksaknapen iti intero a lubong ti panangikasaba iti Pagarian ti Dios. Nasurok itan a 7,500,000 ti Saksi ni Jehova a naikameng iti nasurok a 107,000 a kongregasion iti intero a lubong. Kas ken Jesus, ikaskasaba ken isursuroda ti maipapan iti Pagarian ti Dios. (Mat. 4:17) Gapu iti dayta, adu nga agledleddaang ti maliwliwa. Iti laeng napalabas  a dua a tawen, agdagup iti 570,601 ti nabautisaran kas Saksi ni Jehova!

6. Kasano kasaknap ti trabaho a panangasaba?

⁶ Ti pammaneknek a nakasaksaknap ti panangasaba dagiti Saksi ni Jehova ket ti pannakaipatarus ken pannakaiwaras dagiti literatura ti Biblia iti nasurok a 500 a lenguahe. Ita laeng a napasamak dayta iti pakasaritaan ti tao! Talaga a naisangsangayan ti trabaho ken panagrang-ay ti naindagaan a paset ti organisasion ni Jehova. Imposible a mapasamak dayta iti daytoy a lubong nga iturturayan ni Satanas no awan ti tulong ken panangiwanwan ti espiritu ti Dios. Gapu ta maikaskasaba ti naimbag a damag iti intero a daga, saan laeng a dagiti Saksi ti maliwliwa no di pay ket dagiti umawat iti mensahe ti Pagarian.

Panangliwliwa Kadagiti Kapammatian

7. (a) Apay a ditay namnamaen nga ikkaten amin ita ni Jehova dagiti pakarigatantayo? (b) Kasanotayo nga ammo a posible a maibturantayo ti pannakaidadanes ken pakarigatan?

⁷ Iti daytoy lubong a napno iti kinadakes ken panagsagaba, sigurado a makapasartayo kadagiti pakarigatan. Ditay namnamaen nga ikkaten ti Dios ti amin a pakaigapuan ti panagladingittayo agingga a dina pay dadaelen daytoy a sistema ti bambanag. Naipadto met a maidadanestayo, ngem mangted dayta iti gundaway a maipakitatayo ti kinatarnaw ken suportatayo iti sapasap a kinasoberano ni Jehova. (2 Tim. 3:12) Ngem iti tulong ken panangliwliwa ti nailangitan nga Amatayo, matuladtayo dagiti napulotan a Kristiano iti nagkauna a Tesalonica a nakapagibtur ken naaddaan iti pammati bayat ti pannakaidadanes ken pakarigatan.​—Basaen ti 2 Tesalonica 1:3-5.

8. Ania ti Nainkasuratan a pammaneknek a liwliwaen ni Jehova dagiti adipenna?

⁸ Awan duadua a liwliwaen ni Jehova dagiti adipenna. Kas pagarigan, idi kayat ti dakes a reyna a ni Jezebel a papatayen ni propeta Elias, nagbuteng, nagtalaw, ken kayatna pay ketdin ti matay. Ngem ni Jehova dina binabalaw ni Elias, no di ket liniwliwa ken pinabilegna a mangitultuloy iti trabahona kas propeta. (1 Ar. 19:1-21) Liniwliwa met ni Jehova ti kongregasion Kristiano idi umuna a siglo. Kas pagarigan, mabasatayo nga adda idi tiempo a “ti kongregasion iti intero a Judea ken Galilea ken Samaria simrek iti maysa a panawen ti talna, a mapabpabileg.” Ken ‘nagtultuloyda nga immadu bayat a mangipakpakitada iti panagbuteng ken Jehova ken gapu iti panangliwliwa ti nasantuan nga espiritu.’ (Ara. 9:31) Anian a yamantayo ta ‘liwliwaennatayo met ti nasantuan nga espiritu’!

9. Apay a makaliwliwa ti panangadal iti maipapan ken Jesus?

⁹ Kas Kristiano, naliwliwatayo idi naammuantayo ti maipapan ken Jesu-Kristo ken tinuladtayo ti ulidanna. Kinunana: “Umaykayo kaniak, dakayo amin a mabambannogan ken madagdagsenan, ket pagin-awaenkayto. Ibaklayyo ti sangolko ket agsursurokayo kaniak, ta naalumamay ti kababalinko ken napakumbaba ti pusok, ket makasarakkayto ti gin-awa a maipaay kadagiti kararuayo. Ta ti sangolko nalanay ken ti awitko nalag-an.” (Mat. 11:28-30) Bayat a masursurotayo ti naasi ken naayat a panangtrato ni Jesus kadagiti tattao ken tultuladentayo ti nagsayaat nga ulidanna, maksayan ti stress-tayo.

10, 11. Siasino dagiti mabalin a mangipaay iti liwliwa iti uneg ti kongregasion?

¹⁰ Maliwliwadatayo met dagiti kapammatiantayo. Kas pagarigan, kitaentayo no kasano a tultulongan dagiti panglakayen dagidiay kumapkapuy ti pammatina. Insurat ni adalan a Santiago: “Adda aya asinoman a masaksakit [iti naespirituan] kadakayo? Ayabanna koma dagiti lallakay iti kongregasion, ket ikararaganda koma.” Ania ti resultana? “Ti kararag ti pammati paimbagennanto ti addaan sagubanit, ket isu ibangonto ni Jehova. Kasta met, no nakaaramid kadagiti basol, mapakawanto dayta kenkuana.” (Sant. 5: 14, 15) Makaipaay met iti liwliwa ti dadduma a kameng ti kongregasion.

¹¹ Masansan a nalaklaka a mayebkas dagiti babbai ti problemada kadagiti padada a babbai. Ad-adda a makaipaay iti nasayaat a balakad dagiti aduan kapadasan a babbaket kadagiti ub-ubing a kakabsat a babbai. Mabalin a nakapasardan kadagiti umasping a kasasaad. Dakkel ti maitulong ti panagimdeng ken pannakaseknanda. (Basaen ti Tito 2:3-5.) Siempre, dagiti panglakayen ken ti sabsabali kabaelan ken masapul nga ‘agsaoda iti makaliwliwa kadagiti malmaldaangan a kararua.’ (1 Tes. 5:14, 15) Ken nasayaat a laglagipentayo a ti Dios ‘liwliwaennatayo iti amin a rigattayo, tapno maliwliwatayo met dagidiay adda iti aniaman a kita ti rigat.’​—2 Cor. 1:4.

12. Apay a nagpateg a tumabunotayo kadagiti Nakristianuan a gimong?

¹² Nagpateg a gubuayan ti liwliwa ti itatabuno kadagiti Nakristianuan a gimong. Sadiay a mapagsasaritaan ti Biblia isu a maparegtatayo. Mabasatayo a da Judas ken Silas “pinaregtada dagiti kakabsat babaen iti adu a palawag ket pinabilegda ida.” (Ara. 15:32) Makapabileg ti panagsasaritatayo sakbay ken kalpasan dagiti gimong. Gapuna, no agpaspasartayo iti narigat a kasasaad, ditay koma isinsina ti bagitayo ta mangpakaro laeng dayta iti bambanag. (Prov. 18:1) Nasayaat a surotentayo ti balakad ni apostol Pablo: “Agpipinnanunottayo koma iti maysa ken maysa tapno mangparegta iti ayat ken nasayaat nga ar-aramid, a saantay a baybay-an ti panagtataripnongtayo a sangsangkamaysa, kas iti kaugalian ti dadduma, no di ket agpipinnaregtatayo, ket nangnangruna a kasta bayat a makitkitayo nga umas-asidegen ti aldaw.”​—Heb. 10:24, 25.

Liwliwa Manipud iti Biblia

13, 14. Kasano a makagun-odtayo iti liwliwa manipud iti Biblia?

¹³ Bautisadotayo man wenno agad-adaltayo pay laeng iti maipapan iti Dios ken kadagiti panggepna, makagun-odtayo iti liwliwa manipud iti Biblia. Insurat ni Pablo: “Amin a bambanag a naisurat a nasaksakbay naisuratda a pakasursuruantayo, tapno babaen ti panagibturtayo ken babaen ti liwliwa manipud iti Kasuratan maaddaantay koma iti namnama.” (Roma 15:4) Ti Biblia liwliwaen ken ‘naan-anay a kabalannatayo maipaay iti tunggal naimbag nga aramid.’ (2 Tim. 3:16, 17) Sigurado a maliwliwatayo gapu ta ammotayo ti kinapudno ken addaantayo iti pudno a namnama iti masanguanan. Gapuna, maliwliwa ken mabenepisiarantayo no basaen ken adalentayo ti Sao ti Dios ken dagiti naibatay-Biblia a publikasiontayo.

¹⁴ Nangipakita ni Jesus iti nagsayaat nga  ulidan no kasano nga usaren ti Kasuratan iti panangisuro ken panangliwliwa iti sabsabali. Kalpasan ti panagungarna, nagparang iti dua nga adalanna ket ‘naan-anay a linuktan wenno inlawlawagna ti Kasuratan.’ Natukay ti puso dagiti adalan bayat ti panagsasaritada. (Luc. 24:32) Tinulad ni apostol Pablo ti nagsayaat nga ulidan ni Jesus ken ‘nakirinnason manipud iti Kasuratan.’ Dagiti taga-Berea a dimngeg kenkuana “inawatda ti sao buyogen ti napalalo unay a kinagagar ti panunot, a siaannad a suksukimatenda ti Kasuratan iti inaldaw.” (Ara. 17:2, 10, 11) Tapno maliwliwatayo, maitutop ngarud a basaentayo ti Biblia iti inaldaw ken dagiti Nakristianuan a publikasion iti kasta, maaddaantayo iti namnama bayat ti nariribuk a tiempo.

Dadduma a Pamay-an a Mangliwliwa iti Sabsabali

15, 16. Ania ti mabalintayo nga aramiden tapno matulongan ken maliwliwatayo dagiti kakabsattayo?

¹⁵ Matulongan ken maliwliwatayo dagiti kapammatiantayo iti nagduduma a pamay-an. Kas pagarigan, mabalin a datayo ti makitienda para kadagiti nataengan wenno masaksakit a kakabsat. Tulongantayo ida kadagiti trabaho iti balay kas panangipakita iti pannakaseknantayo kadakuada. (Fil. 2:4) Ken komendarantayo ida gapu kadagiti naaramidan ken nasayaat a galadda, kas iti ayat, kinatured, ken pammati.

¹⁶ Maliwliwatayo pay dagiti nataengan no bisitaentayo ida ken imdengantayo a naimbag dagiti kapadasanda ken bendision a nasagrapda iti panagserbida ken Jehova. Sigurado a maparegta ken maliwliwatayo iti kapadasanda! Mabalin nga ibasaantayo ida iti Biblia wenno kadagiti publikasiontayo. Pagsaritaantayo ti artikulo a maadal iti Pagwanawanan wenno iti Panagadal ti Kongregasion iti Biblia iti dayta a lawas. Kaduaentayo ida nga agbuya iti maysa kadagiti DVD-tayo. Ibasaan wenno iyestoriaantayo ida kadagiti makaparegta a kapadasan kadagiti publikasiontayo.

17, 18. Apay a makasiguradotayo a tulongan ken liwliwaen ni Jehova dagiti matalek nga adipenna?

¹⁷ No makitatayo nga agkasapulan iti liwliwa ti kabsattayo, mabalintayo nga iraman kadagiti kararagtayo. (Roma 15:30; Col. 4:12) Bayat a dadaerantayo ti bukodtayo a problema ken ikagkagumaantayo a liwliwaen ti sabsabali, maaddaantayo iti pammati ken determinasion a kas iti inkanta ti salmista: “Ipalladawmo ti dadagsenmo ken Jehova a mismo, ket isu saranayennakanto. Saannanto a pulos ipalubos nga agdiwengdiweng daydiay nalinteg.” (Sal. 55:22) Wen, kanayon a liwliwaen ken tulongan ni Jehova dagiti matalek nga adipenna.

¹⁸ Kuna ti Dios kadagiti nagkauna nga adipenna: “Siak​—siak Daydiay mangliwliwa kadakayo.” (Isa. 51:12) Kasta met ti aramiden kadatayo ni Jehova ken bendisionanna ti panagreggettayo a mangliwliwa kadagiti agledleddaang. Aniaman ti namnamatayo, maliwliwatayo iti sasao ni Pablo kadagiti napulotan a Kristiano idi kaaldawanna: “Ni Apotayo a Jesu-Kristo . . . ken ti Dios nga Amatayo, a nagayat kadatayo ken nangted iti agnanayon a liwliwa ken naimbag a namnama babaen ti di kaikarian a kinamanangngaasi, liwliwaenda koma ti puspusoyo ken patibkerendakayo iti tunggal naimbag nga aramid ken sao.”​—2 Tes. 2:16, 17.

Malagipyo Kadi?

• Kasano kasaknap ti trabahotayo a panangliwliwa kadagiti agledleddaang?

• Ania dagiti mabalintayo nga aramiden tapno maliwliwatayo ti sabsabali?

• Ania dagiti Nainkasuratan a pammaneknek a liwliwaen ni Jehova ti ilina?

[Salsaludsod]

[Ladawan iti panid 28]

Makiramramanka kadi a mangliwliwa kadagiti agledleddaang?

[Ladawan iti panid 30]

Agpada a makaparegta dagiti agtutubo ken nataengan