“Agtultuloykayo nga Agbantay”​—Apay a Nagpateg?

“ANIANTO ti pagilasinan ti kaaddam ken ti panungpalan ti sistema ti bambanag?” (Mat. 24:3) Kas sungbat ni Jesus kadagiti adalanna, nangted iti nalawag, detalyado, makita, ken di mapagduaduaan a pagilasinan a nailanad iti Mateo kapitulo 24, Marcos kapitulo 13, ken Lucas kapitulo 21. Innayonna: “Agtultuloykayo nga agbantay [wenno agridam].”​—Mat. 24:42.

No nalawagen ti pagilasinan, apay ngarud a kasapulan ti kanayonan a pammalagip? Adda dua a posible a rason. Umuna, dadduma a Kristiano ti di mangikankano iti pagilasinan gapu kadagiti pakasingaan isu a kumapuy ti espiritualidad ken kinaridamda. Maikadua, mabalin a makitada ti dadduma a paset ti pagilasinan ngem saan a direkta nga apektado ti lugarda. Isu nga ipagarupda a mabayag pay a dumteng ti “dakkel a rigat,” ti kaitungpalan ti padto ni Jesus ken di pay kasapulan ti ‘agtultuloy nga agbantay.’​—Mat. 24:21.

“Saanda a Nangikankano”

Impalagip ni Jesus kadagiti pasurotna ti maipapan kadagiti tattao idi panawen ni Noe. Naimatanganda ti panangasaba ni Noe, panangibangonna iti dakkel a daong, ken ti kinaranggas a mapaspasamak. Ngem kaaduan ti ‘saan a nangikankano.’ (Mat. 24:37-39) Kasta met laeng ti kababalin dagiti tattao ita mainaig kadagiti pakdaar. Kas pagarigan, nalawag a makita dagiti karatula mainaig iti kapartak ti lugan (speed limit) ngem adu ti di mangikankano. Isu a mapilitan dagiti autoridad a mangikabil kadagiti bungkurog (hump) iti kalsada tapno agin-inayad dagiti lugan. Umasping iti dayta, mabalin a ti maysa a Kristiano ammona ti pagilasinan iti maudi nga al-aldaw ngem makiramraman latta kadagiti aktibidad a mangsinga iti panagserbina. Kasta ti napasamak iti tin-edyer a ni Arielle, a taga-West Africa.

Magusgustuanna a buyaen ti women’s handball iti TV. Idi nangorganisar ti eskuelaanda iti handball team, magagaran nga agay-ayam isu a nalipatanna a mabalin nga agpeggad ti espiritualidadna. Nakimiembro iti team kas goalkeeper. Ania ti napasamak? Kinunana: “Dadduma a kakaduak ket adda nobioda nga agdrogdroga ken agsigsigarilio. Kankantiawandak ta saanak a kas kadakuada. Pampanunotek a saanak a maapektaran ngem diak napupuotan a dagita ti nangpakapuy iti espiritualidadko. Ay-ayam laengen ti pampanunotek uray addaak kadagiti gimong. Naapektaran met ti personalidadko kas Kristiano. Kayatko laeng idi ti agay-ayam ngem tarigagayak itan ti mangabak. Impasnekko ti nagpraktis tapno mangabakak isu a napalalo ti stress-ko. Nabaybay-ak payen dagiti gagayyemko gapu iti handball.

“Kimmaro ti bambanag idi naikkan iti penalty shot ti kalabanmi ket siak ti mangidepensa. Bayat a padpadaanak ti bola, diak  napupuotan nga inkararagko ken Jehova a tulongannak a mangsangga iti tira ti kalaban! Iti dayta a kanito a naamirisko a kimmapuy unayen ti espiritualidadko. Kasanok a napasubli ti kinaregtak?

“Nabuyak idin ti DVD a Young People Ask​—What Will I Do With My Life? a Binuyak manen ken impapusok dayta. Total, agpada ti nakaipasanguanmi ken André, ti agtutubo iti dayta a drama. Inusigko a naimbag ti imbalakad ti panglakayen ken André​—basaen ken utobenna ti Filipos 3:8. Dayta ti timmulong kaniak ket nagikkatak iti team.

“Nagdakkel a tulong dayta kaniak! Napukaw ti tarigagayko a mangabak ken ti stress-ko. Naragragsak ken nasingsingedakon kadagiti gagayyemko a Kristiano. Napatpategen kaniak dagiti naespirituan nga aktibidad. Atentiboakon kadagiti gimong isu a natagiragsakko manen dagita. Rimmang-ay met ti ministeriok. Regular itan nga ag-auxiliary payunirak.”

No gapu kadagiti pakasingaan ket dimo ikankano ti pagilasinan nga inted ni Jesus, mangaramidka kadagiti dakkel a panagbalbaliw, kas ken Arielle. Padasem dagiti sumaganad. Usarem ti Watch Tower Publications Index, a naawagan kas mapa dagiti nalmeng a gameng. Makitam dita ti adu a reperensia a naglaon kadagiti nainsiriban a balakad ken kapadasan dagiti naipasango kadagiti sulisog. Agsaganaka a naimbag ken aginotarka tapno magunggonaanka kadagiti gimong. Napaneknekan ti dadduma a makatulong ti panagtugaw iti sango. No adda pannakipartisipar ti tallaong, ikagumaam ti agkomento a dagus. Makapagtalinaedka met a naridam iti naespirituan no idiligmo dagiti agdama a pasamak iti pagilasinan ken dadduma a tanda ti ‘maudi nga al-aldaw.’​—2 Tim. 3:1-5; 2 Ped. 3:3, 4; Apoc. 6:1-8.

“Paneknekanyo a Sisasaganakayo”

Ti pagilasinan ti maudi nga al-aldaw ket mapaspasamak iti “intero a mapagnaedan a daga.” (Mat. 24:7, 14) Minilion ti agnanaed kadagiti lugar a nakaro a maap-apektaran iti sakit, kinakirang iti taraon, ginggined, ken dadduma pay a naipadto a pasamak. Ngem adu met ti agnanaed kadagiti natalna a lugar. No dimo pay napasaran ti dadduma a paset ti pagilasinan, ipapanmo kadi a mabayag pay ti dakkel a rigat? Saan a nainsiriban dayta.

Kas pagarigan, panunotem ti impadto ni Jesus maipapan kadagiti ‘angol ken kinakirang ti taraon.’ (Luc. 21:11) Umuna, dina imbaga nga aggigiddan a mapasamak iti amin a lugar ken agpapada ti kakarona. Imbes ketdi, imbagana a mapasamak dayta iti “nadumaduma a disso.” Isu a ditay namnamaen nga agpapada ken aggigiddan a mapasamak dagita iti amin a lugar. Maikadua, kalpasan la unay ti panangdakamat ni Jesus iti kinakirang ti taraon, impamatmatna a dadduma kadagiti pasurotna ti masapul nga agannad iti nalabes a pampannangan: “Asikasuenyo ti bagbagiyo tapno dagiti pusoyo saanda a pulos madagsenan iti nalabes a pampannangan.” (Luc. 21:34) Gapuna, saan a namnamaen dagiti Kristiano a mapasaranda ti amin nga aspeto ti pagilasinan. Imbes ketdi, kinuna ni Jesus: “Inton makitayo a mapaspasamak dagitoy a banag, ammuenyo a ti pagarian  ti Dios asidegen.” (Luc. 21:31) Gapu iti moderno a komunikasion, makitatayo ti amin a paset ti pagilasinan, uray no ditay mapasaran dagita iti lugartayo.

Laglagipem met nga inkeddengen ni Jehova ti “aldaw ken oras” a panangrugi ti dakkel a rigat. (Mat. 24:36) Dagiti agsasaruno a pasamak ditoy lubong dina balbaliwan dayta nga aldaw.

Binalakadan ni Jesus ti amin a Kristiano: “Paneknekanyo a sisasaganakayo.” (Mat. 24:44) Kanayon koma a nakasaganatayo. Siempre, dina kayat a sawen nga inaldaw ken agmalmalem a makipasettayo iti nateokratikuan nga aktibidad. Ken ditay ammo no ania ti ar-aramidentayo inton mangrugi ti dakkel a rigat. Mabalin a dadduma ti adda iti trabaho wenno iti balay. (Mat. 24:40, 41) Gapuna, kasanotayo a mapaneknekan a sisasaganatayo?

Agnanaed da Emmanuel ken Victorine agraman ti innem nga annakda a babbai iti maysa a lugar ti Africa, a sadiay saanda a mapaspasaran ti amin a pasamak a mangbukel iti pagilasinan. Isu nga inkeddengda nga inaldaw a pagsasaritaan ti naespirituan a bambanag tapno mapaneknekanda a nakasaganada. Kinuna ni Emmanuel: “Nagrigat ti agsapul iti tiempo a kombiniente para iti amin. Pinilimi ti 6:00 agingga iti 6:30 ti bigat. Kalpasan ti panagteksto, mangisaganakami iti sumagmamano a parapo iti publikasion a maadal iti gimong iti dayta a lawas.” Nakatulong kadi dayta tapno makapagtalinaedda a siririing? Wen! Ni Emmanuel ti koordineytor ti bagi dagiti panglakayen iti kongregasionda. Masansan nga ag-auxiliary pioneer ni Victorine ken adu ti natulonganna nga immawat iti kinapudno. Rumangrang-ay met iti naespirituan dagiti annakda.

Imbalakad ni Jesus: “Agtultuloykayo a kumita, agtultuloykayo a siririing.” (Mar. 13:33) Dimo ipalubos a ti pakasingaan ti mamagdungsa kenka iti naespirituan. Imbes ketdi, ipangagmo ti nagsayaat a balakad manipud kadagiti publikasion ken kadagiti gimong, kas iti inaramid ni Arielle. Inaldaw nga ikagumaam a paneknekan a nakasaganaka ken ‘agtultuloyka nga agbantay,’ kas iti inaramid ti pamilia ni Emmanuel.

[Footnote]

[Ladawan iti panid 4]

Ti inaldaw a panagsasarita iti naespirituan ti nakatulong iti pamilia ni Emmanuel a ‘mangpaneknek a nakasaganada’