Agragsaktayo a Sangsangkamaysa!

RUMIGRIGAT a gun-oden ti kinaragsak. Adu ti marigrigatan a mangiranud iti naragsak a kapanunotanda. Gapu iti estilo ti panagbiag ita, nangruna kadagiti dadakkel a siudad, saanen a makilangen dagiti tattao ken isinsinadan ti bagbagida.

Kuna ti propesor ti psychobiology a ni Alberto Oliverio: “Adu ti naliday ita ken gapu iti biag iti siudad, marikna ti dadduma nga agmaymaysada. Gapu iti dayta, mabalin a ditay maseknan iti personal a biag ti kaopisina, kaarruba, wenno kahera iti maysa a paglakuan iti asidegtayo.” Masansan nga agresulta iti depression ti kasta a kinaliday.

Ngem naiduma ti kasasaad ken kababalin dagiti kapammatiantayo. Insurat ni apostol Pablo: “Agrag-okayo a kankanayon.” (1 Tes. 5:16) Adu ti panggapuantayo nga agrag-o ken agragsak a sangsangkamaysa. Daydayawentayo ti Kangatuan a Dios a ni Jehova; matarusantayo ti kinapudno a mensahe ti Biblia; adda namnamatayo a maisalakan ken agbiag nga  agnanayon; ken matulongantayo ti sabsabali a gumun-od met kadagita a bendision.​—Sal. 106:4, 5; Jer. 15:16; Roma 12:12.

Ti kinaragsak ken panangiranud iti kinaragsak ket pakabigbigan dagiti pudno a Kristiano. Di ngarud pakasdaawan nga insurat ni Pablo kadagiti taga-Filipos: “Maragsakanak ken makipagrag-oak kadakayo amin. Ita iti isu met laeng a wagas dakayo agragsakkayo met ken makipagrag-okayo kaniak.” (Fil. 2:17, 18) Iti dayta a teksto, namindua a dinakamatna ti kinaragsak ken pannakipagrag-o.

Ngem masapul a liklikan dagiti Kristiano nga isina ti bagbagida. Saan a makipagragsak ti maysa no isinana ti bagina kadagiti kapammatianna. Kasanotayo ngarud a masurot ti balakad ni Pablo nga ‘agtultuloy a makipagrag-o kadagiti kakabsat gapu iti Apo’?​—Fil. 3:1.

Makipagragsak Kadagiti Kapammatian

Idi sinuratan ni Pablo dagiti taga-Filipos, nalabit nakabalud idi idiay Roma gapu iti panangaskasabana. (Fil. 1:7; 4:22) Ngem saan a dayta ti nangpabaaw iti kinaregtana iti ministerio. Imbes ketdi, naragsakan nga agserbi ken Jehova iti amin a kabaelanna ken nakasagana a maibukbok kas “daton nga inumen.” (Fil. 2:17) Ipakita ti kababalin ni Pablo a ti kinaragsak ket saan nga agpannuray iti kasasaad ti maysa. Uray nakabalud, naikunana: “Agtultuloyakto met nga agrag-o.”​—Fil. 1:18.

Ni Pablo ti nangbuangay iti kongregasion ti Filipos isu a maseknan unay kadagiti kakabsat sadiay. Ammona a maparegtada met no iranudna ti ragsakna nga agserserbi ken Jehova. Isu nga insuratna: “Ita tarigagayak a maammuanyo, kakabsat, a dagiti aramidko nagbanagda a pakaparang-ayan ti naimbag a damag imbes nga iti sabali, iti kasta dagiti parautko nagbalinda a publiko a pannakaammo a mainaig ken Kristo iti nagtetengngaan dagiti amin a Guardia a Pretorio ken iti amin a sabsabali.” (Fil. 1:12, 13) Ti maysa a pamay-an a nakipagragsak ni Pablo kadagiti kakabsat a taga-Filipos ket ti panangiranudna iti makaparegta a kapadasanna. Awan duadua a nakipagragsakda met kenkuana. Ngem tapno maaramidda dayta, masapul a dida maupay iti napasaran ni Pablo. Tuladenda ketdi ti ulidanna. (Fil. 1:14; 3:17) Mabalinda pay nga itultuloy nga ikararagan ni Pablo ken ipaayan iti tulong a kasapulanna.​—Fil. 1:19; 4:14-16.

Naragsaktayo met kadi a kas ken Pablo? Ikagkagumaantayo kadi a biroken dagiti nasayaat  a banag a napasamak iti biag ken ministeriotayo? No kaduatayo dagiti kakabsattayo, nasayaat a makipagragsaktayo iti ministerio. Saan a masapul a naisangsangayan ti kapadasantayo. Mabalin nga adda nangipakita iti interes iti mensahe ti Pagarian gapu iti nagsayaat nga introduksion wenno argumentotayo. Nalabit nagsayaat ti pannakisaritatayo iti maysa a bumalay maipapan iti teksto iti Biblia. Wenno pagaammodatayo kas Saksi ni Jehova iti teritoriatayo, banag a pakaidayawan ni Jehova. Ti panangiranud kadagita a kapadasan ket pakaragsakantayo amin.

Adu nga adipen ni Jehova ti nagsakripisio ken agsaksakripisio tapno maitungpal ti trabaho a panangasaba. Dagiti payunir, agdaldaliasat a manangaywan, Bethelite, misionero, ken international servant siraragsak nga us-usarenda ti biagda iti amin-tiempo a serbisio. Maragragsakantayo kadi a makikadua kadakuada? Ipakitatayo koma ti panagyamantayo kadagitoy nga ipatpategtayo a ‘katrabahuan maipaay iti pagarian ti Dios.’ (Col. 4:11) Mabalintayo ida a paregtaen no makaduatayo ida kadagiti gimong wenno asamblea. Mabalintayo met a tuladen ti kinaregtada. No padagusentayo ida, nalabit awisentayo iti maysa a pannangan, maaddaantayo kadagiti “gundaway” a dumngeg kadagiti kapadasan ken pammaregtada.​—Fil. 4:10.

Makipagragsak Kadagidiay Masusuot

Ti panangibtur iti pannakaidadanes ken pakasuotan pinabilegna ti determinasion ni Pablo nga agtalinaed a matalek ken Jehova. (Col. 1:24; Sant. 1:2, 3) Ammo ni Pablo a maipaspasango dagiti kakabsat idiay Filipos iti umasping a pakasuotan ket maragsakan a makaammo a maparegtana ida babaen ti panagibturna. Isu nga insuratna: “Naited kadakayo ti pribilehio maigapu ken Kristo, saan laeng a tapno maaddaankayo iti pammati kenkuana, no di ket tapno agsagaba met maigapu kenkuana. Ta addaankayo iti isu met laeng a pannakidangadang kas iti nakitayo iti kasasaadko ken kas iti mangngegyo ita iti kasasaadko.”​—Fil. 1:29, 30.

Maidaddadanes met dagiti Kristiano ita gapu iti panangasabada. No dadduma, naranggas dagita a pannakaidadanes ngem kaaduanna ket di madmadlaw. Mabalin a siuulbod nga akusarandatayo dagiti apostata, idadanesdatayo dagiti kapamiliatayo, um-umsiendatayo dagiti katrabahuan ken kaeskuelaantayo. Kuna ni Jesus a ditay koma pakasdaawan wenno pakaupayan dagita. Imbes ketdi, dagita ti panggapuantayo nga agragsak. Kinunana: “Naragsakkayo inton umsiendakayo dagiti tattao ken idadanesdakayo ken siuulbod a sawenda ti tunggal kita ti nadangkes a banag a maibusor kadakayo maigapu kaniak. Agrag-o ken aglagtokayo gapu iti rag-o, yantangay dakkel ti gunggonayo iti langlangit.”​—Mat. 5:11, 12.

Ditay koma mabuteng no madamagtayo a nakaro ti pannakaidadanes dagiti kakabsattayo iti dadduma a lugar. Imbes ketdi, makipagragsaktayo kadakuada gapu iti panagibturda. Mabalintayo nga ikararag ken Jehova a pabilgenna ti pammatida ken makapagibturda. (Fil. 1:3, 4) Nupay bassit laeng ti maaramidantayo para kadagitoy a maipatpateg a kakabsat, mabalintayo a tulongan dagiti kakongregasiontayo nga agpaspasar kadagiti suot. Maseknantayo koma ken tulongantayo ida. Maaddaantayo iti gundaway a makipagragsak kadakuada no awisentayo ida iti Panagdaydayaw ti Pamiliatayo ken iti panangasaba ken panaglinglingaytayo.

Adu ti panggapuantayo nga agragsak a sangsangkamaysa! Sarangtentayo ti kababalin ti lubong a panangisina iti bagi ken itultuloytayo nga iranud ti ragsaktayo kadagiti kakabsat. Iti kasta, maparayraytayo ti ayat ken panagkaykaysa ti kongregasion ken matagiragsaktayo a naan-anay ti panagkakabsattayo kas Kristiano. (Fil. 2:1, 2) Wen, “kankanayon nga agrag-okayo iti Apo,” ta kinuna kadatayo ni Pablo: “Maminsan pay a kunaek, Agrag-okayo!”​—Fil. 4:4.

[Picture Credit Line iti panid 6]

Globe: Courtesy of Replogle Globes