Ipangagmo Kadi Dagiti Nalawag a Pakdaar ni Jehova?

“Daytoy ti dalan. Magnakayo iti dayta.”​—ISA. 30:21.

1, 2. Ania ti determinado nga aramiden ni Satanas, ken kasanonatayo a tulongan ti Sao ti Dios?

 NAPEGGAD ken mangyaw-awan ti maysa a karatula iti dalan a mangitudtudo iti di umiso a direksion. Ipapanmo a binagaannaka ti gayyemmo nga adda dakes a tao a nangbaliw iti karatula tapno maisagmak dagiti di naannad nga agdaldaliasat. Ipangagmo kadi ti pakdaarna?

² Ni Satanas ket kas iti dayta a dakes a tao a determinado a mangyaw-awan kadatayo. (Apoc. 12:9) Nagtaud kenkuana dagiti peggad a nausig iti napalabas nga artikulo ken nairanta dagita a mangisiasi kadatayo iti dalan nga agturong iti agnanayon a biag. (Mat. 7:13, 14) Imbag laengen ta pakpakdaarannatayo ti naasi a Dios a ditay suroten ti mangyaw-awan a ‘karatula’ ni Satanas. Pagsasaritaantayo ita ti tallo pay a peggad a nagtaud ken Satanas. Bayat nga usigentayo no kasanonatayo a tulongan ti Sao ti Dios tapno ditay mayaw-awan, panunotentayo a kaduatayo a magmagna ni Jehova ken ibagbagana: “Daytoy ti dalan. Magnakayo iti dayta.” (Isa. 30:21) Mapabileg ti determinasiontayo a mangipangag ken Jehova no utobentayo dagiti nalawag a pakdaarna.

Dimo Suroten Dagiti “Ulbod a Mannursuro”

3, 4. (a) Kasano nga arig naatianan a bubon dagiti ulbod a mannursuro? (b) Nagtaudan dagiti ulbod a mannursuro, ken ania ti kayatda?

³ Ipapanmo nga addaka iti natikag a lugar. Adda nasirpatmo a bubon ket gapu ta mawawkan nagturongka sadiay, a mangnamnamaka nga adda masakdom. Ngem idi nakadanonka, anian a pannakapaaymo ta naatianan met gayam! Dagiti palso a mannursuro ket arigda naatianan a bubon. Mapaay ti asinoman a sumakdo kadakuada iti danum ti kinapudno. Babaen kada apostol Pablo ken Pedro, pinakdaarannatayo ni Jehova maipapan kadagiti ulbod a mannursuro. (Basaen ti Aramid 20:29, 30; 2 Pedro 2:1-3.) Siasino dagita a mannursuro? Ibagada dagitoy nga apostol ti nagtaudan dagiti ulbod a mannursuro ken no kasanoda nga iyaw-awan dagiti tattao.

⁴ Kinuna ni Pablo kadagiti panglakayen iti kongregasion ti Efeso: “Manipud kadakayo tumakderto dagiti tattao ket agsaodanto iti tiritir a bambanag.” Ken insurat ni Pedro kadagiti pada a Kristiano: ‘Addanto met dagiti ulbod a mannursuro iti nagtetengngaanyo.’ Nagtaudan ngarud dagiti ulbod a mannursuro? Mabalin nga iti uneg ti kongregasion. Maibilangda nga apostata. a Ania ti kayatda? Saanda la a panawan ti organisasion ni Jehova, kayatda pay nga ‘iyadayo dagiti adalan tapno sumurot kadakuada.’ Dagiti adalan a tuktukoyen ni Pablo ket dagiti adalan ni Jesu-Kristo. Imbes a mangaramidda iti bukodda nga adalan, kayatda nga alaen wenno takawen dagiti adalan iti uneg ti kongregasion. Kas iti ‘narawet a lobo,’ kayatda nga alun-onen dagiti karnero. Kayatda a dadaelen ti pammati dagiti kameng ti kongregasion tapno panawanda ti kinapudno.​—Mat. 7:15; 2 Tim. 2:18.

5. Ania dagiti pamay-an nga us-usaren dagiti ulbod a mannursuro?

⁵ Kasano ti panangyaw-awan dagiti ulbod a mannursuro? Nakasiksikap ti pamay-anda. Dagiti apostata ‘siuulimek nga iserrekda’ iti  kongregasion dagiti kapanunotanda, kas iti agipuspuslit a sililimed a mangiserrek kadagiti bambanag iti maysa a pagilian. Agus-usar dagiti apostata kadagiti “parparbo a sasao.” Pagparparangenda a pudno dagiti di umiso a kapanunotanda, kas iti palsipikador a mamagbalin a pudno kadagiti di umiso a dokumento. Agiwarasda kadagiti ‘makaallilaw a sursuro,’ ‘tiritirenda ti Kasuratan’ tapno maitunos iti bukodda a kapanunotan. (2 Ped. 2:1, 3, 13; 3:16) Nalawag a saan a ti pagimbagantayo ti pampanunoten dagiti apostata. No surotentayo ida, maisiasitayo iti dalan nga agturong iti agnanayon a biag.

6. Ania ti nalawag a pakdaar ti Biblia maipapan kadagiti ulbod a mannursuro?

⁶ Kasano a masalaknibantayo ti bagitayo kadagiti ulbod a mannursuro? Ibaga ti Biblia no ania ti aramidentayo. (Basaen ti Roma 16:17; 2 Juan 9-11.) “Liklikanyo ida,” kuna ti Biblia. Kayatna a sawen a masapul nga adaywantayo ida. Ti pakdaar ti Biblia ket mayarig iti pakdaar ti doktor a liklikam ti maysa a tao nga adda makaakar a sakitna. Ammo ti doktor a matayka no maakaranka. Nalawag ti pakdaarna isu nga aramidem ti ibagana. Kuna ti Biblia a dagiti apostata ket adda ‘sakitda iti isip’ ken ikagumaandatayo nga akaran babaen kadagiti ulbod a pannursuroda. (1 Tim. 6:3, 4) Ni Jehova ket kas iti naimbag a doktor. Silalawag nga ibagbagana nga adaywantayo dagiti ulbod a mannursuro. Gapuna, determinadotayo koma a kanayon a mangipangag iti pakdaarna.

7, 8. (a) Kasanotayo a maliklikan dagiti ulbod a mannursuro? (b) Apay a determinadotayo a mangliklik kadakuada?

⁷ Kasanotayo a liklikan dagiti ulbod a mannursuro? Ditay pastreken ida iti pagtaengantayo wenno kablaawan ida. Ditay met basaen dagiti literaturada, buyaen dagiti programada iti TV, sukimaten ti Web site-da, wenno agkomento kadagiti blog-da. Apay? Ay-ayatentayo ngamin ti “Dios ti kinapudno” isu a ditay denggen dagiti ulbod a pannursuro a maikontra iti Sao ti Dios. (Sal. 31:5; Juan 17:17) Ay-ayatentayo met ti organisasion ni Jehova, a mangisursuro kadagiti agkakaimbag a kinapudno, kas iti nagan ti Dios ken ti kaipapanan dayta, ti panggepna iti daga, no ania ti mapasamak no mataytayo, ken ti namnama a panagungar. Malagipmo kadi ti nariknam idi damo a naammuam dagita ken ti dadduma pay a kinapudno? Gapuna, dimo ipalubos a ti kinaulbod dagiti apostata iyadayodaka iti organisasion a nangisuro kenka kadagita a kinapudno.​—Juan 6:66-69.

⁸ Aniaman ti ibaga dagiti ulbod a mannursuro, ditay dumngeg kadakuada! Apay a mapanka kadagiti naatianan a bubon no maallilaw ken mapaayka laeng? Determinadotayo koma nga agtalinaed a matalek ken ni Jehova ken iti organisasionna a nabayagen a napaneknekan a mangipapaay iti nasin-aw ken makarepresko a danum ti kinapudno manipud iti naipaltiing a Sao ti Dios.​—Isa. 55:1-3; Mat. 24:45-47.

 Dimo Ipangag Dagiti “Ulbod a Sarita”

9, 10. Ania ti impakdaar ni Pablo ken ni Timoteo maipapan iti ‘ulbod a sarsarita’? Ania dagiti ulbod a sarsarita a pampanunoten ni Pablo? (Kitaenyo met ti footnote.)

⁹ No dadduma, nalaka nga ilasin no ti karatula ket nabaliwan ken sabali ti itudona a direksion. Ngem no dadduma, narigat a madlaw dayta. Kasta dagiti kinaulbod a nagtaud ken Satanas. Pinakdaarannatayo ni apostol Pablo maipapan iti maysa kadagiti nasikap a pamay-an ni Satanas​—dagiti “ulbod a sarita.” (Basaen ti 1 Timoteo 1:3, 4.) Tapno ditay maisiasi iti dalan nga agturong iti biag, masapul nga ammotayo no ania dagiti ulbod a sarsarita, ken no kasanotayo a liklikan dagita?

¹⁰ Karaman iti umuna a surat ni Pablo ken ni Timoteo ti pakdaarna maipapan kadagiti ulbod a sarsarita. Ni Timoteo ket maysa a manangaywan a Kristiano a nadutokan a mangtaginayon iti kinadalus ti kongregasion ken mangtulong kadagiti kapammatianna nga agtalinaed a matalek. (1 Tim. 1:18, 19) Inusar ni Pablo ti Griego a sao a tumukoy iti sarsarita wenno kinaulbod. Sigun iti The International Standard Bible Encyclopaedia, tumukoy dayta a sao iti narelihiosuan nga estoria a saan nga agpaypayso. Nalabit pampanunoten ni Pablo dagiti narelihiosuan a kinaulbod a naitampok kadagiti nagkauna nga estoria a mamagusioso iti sabsabali. b Mangpataud laeng dagita nga estoria iti “salsaludsod a siraraken”​—dagiti awan kaes-eskanna a saludsod nga agresulta iti awan serserbina a panagsirarak. Us-usaren ni Satanas dagita nga ulbod a sarsarita ken narelihiosuan a kinaulbod tapno malipatan dagiti tattao ti kapatgan a bambanag. Nalawag ti balakad ni Pablo: Dimo ipangag dagiti ulbod a sarsarita!

11. Kasano a sisisikap nga us-usaren ni Satanas ti palso a relihion a mangyaw-awan kadagiti tattao? Ania a pakdaar ti makatulong kadatayo tapno ditay mayaw-awan?

¹¹ Ania ti sumagmamano nga ulbod a sarsarita a mangyaw-awan kadagiti saan a naannad? Maibilang nga “ulbod a sarita” ti aniaman a pannursuro ti relihion a ‘mangyadayo kadatayo iti kinapudno.’ (2 Tim. 4:3, 4) Ni Satanas nga agpampammarang kas “anghel ti lawag” sisisikap nga us-usarenna ti palso a relihion a mangyaw-awan kadagiti tattao. (2 Cor. 11:14) Kas pagarigan, ibagbaga dagiti relihion ti Kakristianuan a sursurotenda ni Kristo, ngem isursuroda dagiti kinaulbod kas iti Trinidad, umap-apuy nga impierno, ken di matay a kararua. Ipagarup ti adu a ti Krismas ken Easter ket makaay-ayo iti Dios ngem nagtaud iti palso a panagdayaw ti maar-aramid kadagita a selebrasion. Ditay maallilaw kadagiti ulbod a sarsarita no ipangagtayo ti pakdaar ti Dios a panawantayo ti palso a relihion ken ‘isardengtayo a sagiden ti di nadalus a banag.’​—2 Cor. 6:14-17.

12, 13. (a) Ania ti tallo a kinaulbod a nagtaud ken Satanas? Ken ania ti agpayso maipapan kadagita? (b) Kasanotayo a maliklikan ti panangallilaw ni Satanas babaen kadagiti ulbod a sarsarita?

¹² Adda dadduma pay a kinaulbod ni Satanas a mangyaw-awan kadatayo no ditay naannad. Umuna: Mabalinmo nga aramiden ti aniaman a kayatmo; sika ti mangikeddeng iti umiso ken di umiso. Iparparegta dagita ti media ken Internet. Gapu ta kanayon a maipasangotayo kadagita a kinaulbod, nalakatayo laeng a maimpluensiaan kadagiti imoral a kapanunotan ti lubong. Ngem ti agpayso, kasapulantayo ti Dios a mangibaga kadatayo iti umiso ken di umiso. (Jer. 10:23) Maikadua: Saan a makibiang ti Dios iti ar-aramid dagiti tattao. Gapu iti dayta, ti laeng agdama ti pampanunotenda ket didan maseknan iti masanguanan isu nga agbalindan a “di aktibo wenno di nabunga.” (2 Ped. 1:8) Ngem ti agpayso, napartak ti iyaadani ti aldaw ni Jehova, ken masapul nga itultuloytayo a seggaan dayta. (Mat. 24:44) Maikatlo: Saan a maseknan kenka ti Dios. No patientayo dayta a kinaulbod ni Satanas, mabalin nga agsardengtayo nga agserbi ken Jehova gapu ta mariknatayo a ditay  maikari iti ayatna. Ngem ti agpayso, ay-ayaten ken ipatpateg ni Jehova ti tunggal agdaydayaw kenkuana.​—Mat. 10:29-31.

¹³ Masapul a kanayontayo a naannad tapno ditay maimpluensiaan iti panagpampanunot dagiti tattao iti lubong ni Satanas. No dadduma, kasla agpayso ti ibagbaga ken kapanunotanda. Ngem laglagipentayo a nalaing a mangallilaw ni Satanas. No ditay kayat a maallilawnatayo babaen kadagiti ulbod a sarsarita, masapul nga ipangagtayo dagiti pakdaar ti Biblia.​—2 Ped. 1:16.

Dimo ‘Suroten ni Satanas’

14. Ania ti impakdaar ni Pablo kadagiti ub-ubing a balo a babbai, ken apay a masapul nga ipapusotayo dayta?

¹⁴ Ipapanmo a nakakitaka iti karatula a “Daytoy ti Dalan nga Agturong ken Satanas.” Siasino kadatayo ti mayat a mangsurot iti dayta? Ngem pinakdaarannatayo ni Pablo maipapan iti sumagmamano a pamay-an a dagiti dedikado a Kristiano mabalin a ‘maisiasida a sumurot ken Satanas.’ (Basaen ti 1 Timoteo 5:11-15.) Nupay agpaay dagita a sasao ni Pablo kadagiti “ub-ubing a balo a babbai,” agaplikar met ti prinsipio dayta kadatayo amin. Mabalin a saan nga impagarup dagiti Kristiano a babbai idi umuna a siglo a sursurotenda ni Satanas ngem impakita ti tigtignayda a sumursurotda kenkuana. Kasanotayo a maliklikan dayta? Usigentayo ti pakdaar ni Pablo maipapan iti tsismis.

15. Ania ti panggep ni Satanas, ken ania dagiti dinakamat ni Pablo a pamay-an ni Satanas tapno maibanagna dayta?

¹⁵ Kayat ni Satanas nga agsardengtayo a mangikasaba iti naimbag a damag. (Apoc. 12:17) Kayatna nga usarentayo ti tiempotayo kadagiti bambanag nga awan serserbina ken mangpataud iti panagririri iti ili ni Jehova. Paliiwem dagiti dinakamat ni Pablo a pamay-an ni Satanas. “Di makumikom, nga umalla-allatiwda.” Kas pagarigan, iti daytoy tiempo a narang-ay ti teknolohia, nalaka a masayang ti tiempotayo ken ti sabsabali babaen ti panangipasa kadagiti saan a napateg nga e-mail. “Manangidanondanon.” Ti tsismis ket mabalin nga agresulta iti pammadakes a masansan a pakaigapuan ti panagririri. (Prov. 26:20) Ammo man dagiti mamadpadakes wenno saan, tultuladenda ni Satanas a Diablo. c “Mannakibiangda pay iti ar-aramid ti sabsabali a tattao.” Awan karbengantayo a makibiang iti biag ti sabsabali. Ti kasta a kababalin mabalin a singaennatayo a mangitungpal iti inted-Dios nga annongentayo a mangikasaba iti Pagarian. No agsardengtayo a makiraman iti trabaho ni Jehova, mangrugitayo metten a mangsurot ken Satanas. Masapul a pilientayo no asino ti dasigantayo.​—Mat. 12:30.

16. Ania a balakad ti masapul nga ipangagtayo tapno maliklikantayo ti ‘maisiasi a sumurot ken Satanas’?

¹⁶ No ipangagtayo ti balakad ti Biblia, ditay ‘maisiasi a sumurot ken Satanas.’ Usigentayo ti sumagmamano a nainsiriban a balakad ni Pablo. “Aduankayo ti aramiden iti trabaho ti Apo.” (1 Cor. 15:58) No okupadotayo kadagiti aktibidad mainaig iti Pagarian, awan tiempotayo kadagiti saan a napateg a bambanag a mamagpeggad kadatayo. (Mat. 6:33) Agsao iti “naimbag a maipaay a pangpabileg.” (Efe. 4:29) Ditay koma pulos dumngeg ken agiwaras iti tsismis. d Patanorentayo ti panagtalek ken panagraem kadagiti kapammatiantayo. Iti kasta, dagiti laeng makapabileg imbes a makapaupay ti sawentayo. ‘Pagbalinem a kalat ti panangasikaso iti bukodmo nga aramid.’ (1 Tes.  4:11) Ipakitam a maseknanka iti sabsabali ngem aramidem dayta buyogen ti panagraem. Laglagipem nga adda personal a bambanag a dida kayat a pagsasaritaan ken maammuan ti sabsabali. Dimo met idesisionan ida kadagiti bambanag nga isuda ti rumbeng nga agdesision.​—Gal. 6:5.

17. (a) Apay a pakpakdaarannatayo ni Jehova maipapan iti dalan a ditay suroten? (b) Ania ti determinasionmo maipapan iti dalan a kayat ni Jehova a pagnaantayo?

¹⁷ Anian a yamantayo ta silalawag nga ibagbaga ni Jehova no ania ti ditay suroten! Ngem laglagipentayo a gapu iti dakkel a panagayat kadatayo ni Jehova, impaayna ti amin a pakdaar a napagsasaritaantayo. Dina kayat a maallilawnatayo ni Satanas ken agsagabatayo. Nupay akikid ti dalan a kayat ni Jehova a pagnaantayo, dayta laeng ti dalan nga agturong iti agnanayon a biag. (Mat. 7:14) Ipangagtayo koma a kanayon ti balakad ni Jehova: “Daytoy ti dalan. Magnakayo iti dayta.”​—Isa. 30:21.

[Footnotes]

Ania ti Sungbatyo?

Kasanoyo a mayaplikar dagiti pakdaar kadagiti sumaganad a teksto?

• 2 Pedro 2:1-3

• 1 Timoteo 1:3, 4

• 1 Timoteo 5:11-15

[Salsaludsod]

[Kahon/Dagiti Ladawan iti panid 19]

 Panangipalais Kadagiti Dutdot

Adda nagkauna nga estoria dagiti Judio a mangipakita no ania ti epekto ti tsismis.

Maysa a tsismoso ti nangpadpadakes iti masirib a lalaki iti purokda. Idi agangay, naamirisna a di nasayaat ti inaramidna isu a dimmawat iti pammakawan iti masirib a lalaki ket imbagana nga aramidenna ti amin tapno agkappiada. Kuna ti masirib a lalaki: “Mangalaka iti pungan a napunno iti dutdot. Butiakam sa ipalaismo iti angin dagiti dutdot.” Nupay masmasdaaw, inaramidna ti imbilin ti masirib a lalaki sa nagsubli.

“Napakawanak kadin?” kinunana.

“Ummongem pay nga umuna ti amin a dutdot,” insungbat ti masirib a lalaki.

“Ngem kasano a maummongko ket impalaisen ti angin.”

“No kasano a saanen a maummong dagiti dutdot saan metten a maibabawi ti dakes nga epekto ti pammadakesmo.”

Nalawag ti adal. Saanen a maibabawi ti aniaman a naisawang, ken ditay mabalbaliwanen ti dakes nga imbungana. Gapuna, sakbay nga agtsismistayo, nasayaat a laglagipentayo a dagiti isaotayo ket kas iti dutdot a maipalais iti angin.

[Ladawan iti panid 16]

Kasano a ti dadduma mabalin a paspastrekenda iti pagtaenganda dagiti apostata?