Rumbeng Kadi nga Agpabautisar Dagiti Ubbing?

“MARAGSAKANAK ta maysan nga adipen ni Jehova ti balasitangko ken ammok a maragsakan met,” kinuna ni Carlos, a maysa a Kristiano nga ama a taga-Pilipinas. Insurat ti maysa nga ama a taga-Greece: “Maragsakankami ken baketko ta nagpabautisar kas Saksi ni Jehova ti tallo nga annakmi bayat ti kinatin-edyerda. Rumangrang-ayda iti naespirituan ken naragsakda nga agserserbi ken Jehova.”

Gagangay laeng nga agragsak dagiti nagannak no agpabautisar dagiti annakda, ngem no dadduma, adda kakuyog dayta a panagdanag. Kuna ti maysa nga ina: “Napalalo ti ragsak ken danagko.” Apay ngata? “Ammok a naan-anay itan a manungsungbat ti anakko ken ni Jehova.”

Ti panagserbi ken Jehova kas bautisado a Saksi ket maysa a kalat a nasken a ragpaten ti amin nga ubbing. Kaskasdi, mabalin a mapanunot dagiti managbuteng iti Dios a nagannak, ‘Ammok a rumangrang-ay ti anakko ngem kabaelanna kadin a sarangten dagiti imoral nga impluensia ken agtalinaed a nadalus iti imatang ni Jehova?’ Mabalin nga isaludsod ti dadduma: ‘No masulisog iti materialismo, agtultuloy pay ngata ti anakko a siraragsak ken sireregta nga agserbi iti Dios?’ Maitunos iti dayta, ania a balakad iti Biblia ti makatulong kadagiti nagannak a mangtingiting no nakasaganan nga agpabautisar dagiti annakda?

Panagbalin nga Adalan​—Ti Kangrunaan a Kualipikasion

Awan ti ibaga ti Biblia nga espesipiko nga edad a panagpabautisar ngem deskribirenna dagidiay kualipikado iti dayta. Binilin ni Jesus dagiti pasurotna: “Mangaramidkayo iti ad-adalan kadagiti tattao iti amin a nasion, a bautisaranyo ida.” (Mat. 28:19) Gapuna, ti bautismo ket para kadagidiay adalanen ni Kristo.

Ania ti kayat a sawen ti sao nga adalan? Kuna ti Pannakatarus iti Kasuratan: ‘Ti kangrunaan a pagaplikaran ti termino ket amin dagidiay mamati kadagiti pannursuro ni Kristo ken mangannurot a naimbag kadagita.’ Kabaelan kadin dagiti ubbing ti agbalin a pudno nga adalan ni Kristo? Maysa a misionera a nasurok nga 40 a  tawen nga agserserbin iti Latin America ti nagsurat maipapan kadakuada a tallo nga agkakabsat a babbai: “Nupay ubbingkami pay idi, ammomin a kayatmi ti agserbi ken ni Jehova ken agbiag iti Paraiso. Tinulongannakami ti dedikasionmi a nangsaranget kadagiti pakasuotan a pakaipaspasanguan dagiti agtutubo. Dimi pinagbabawyan ti panagdedikarmi iti Dios idi ubbingkami pay.”

Kasanoyo nga ammo no maysan nga adalan ni Kristo ti anakyo? Kuna ti Biblia: “Babaen a mismo iti ar-aramidna ipabigbig ti maysa nga ubing ti bagina no ti aramidna nasin-aw ken nalinteg.” (Prov. 20:11) Usigenyo ti sumagmamano a pamay-an a mangipakita nga ‘iparparangarang ti maysa nga ubing ti panagrang-ayna’ kas adalan.​—1 Tim. 4:15.

Pammaneknek a Maysa nga Adalan

Natulnog kadi ti anakyo? (Col. 3:20) Ar-aramidenna kadi dagiti naituding a trabahona iti balayyo? Kuna ti Biblia maipapan ken Jesus idi agtawen iti 12: “Nagtultuloy a nagpasakup [kadagiti nagannakna].” (Luc. 2:51) Siempre, awan ti anak a naan-anay a makapagtulnog kadagiti nagannakna. Ngem dagiti pudno a Kristiano masapul a ‘sisisinged a surotenda dagiti addang ni Jesus.’ Gapuna, dagiti ubbing nga agtarigagay nga agpabautisar ket pagaammo koma a natulnog kadagiti nagannakda.​—1 Ped. 2:21.

Usigenyo dagiti sumaganad a saludsod: Ti kadi anakyo ‘sapsapulenna nga umuna ti Pagarian’ babaen ti naan-anay a pannakiramanna iti ministerio? (Mat. 6:33) Situtulok kadi a mangiranud iti naimbag a damag, wenno masapul pay a pilitem a mangasaba iti binalaybalay? Sipapanunot kadi iti responsabilidadna kas di bautisado nga agibumbunannag? Magagaran kadi a mangsarungkar kadagiti interesado a nakasaritana iti ministerio? Ibagbagana kadi kadagiti kaeskuelaan ken mannursurona nga isu ket maysa a Saksi ni Jehova?

Napateg kadi kenkuana ti itatabuno kadagiti gimong? (Sal. 122:1) Maay-ayatan kadi nga agkomento iti Panagadal iti Pagwanawanan ken iti Panagadal ti Kongregasion iti Biblia? Magagaran kadi a makipaset iti Teokratiko nga Eskuelaan ti Panagministro?​—Heb. 10:24, 25.

Ikagkagumaan kadi ti anakyo ti agtalinaed a nadalus iti moral babaen ti panangliklikna kadagiti dakes a kakadua iti eskuelaan ken iti sadinoman? (Prov. 13:20) Ania ti pilpilienna a musika, pelikula, programa iti TV, video game, ken site ti Internet? Ipakpakita kadi ti panagsasao ken tigtignayna a kayatna nga annuroten dagiti pagalagadan ti Biblia?

Kasano kauneg ti pannakaammo ti anakyo iti Biblia? Maibagana kadi iti bukodna a sasao no ania dagiti nasursurona bayat ti Panagdaydayaw ti Pamiliayo? Mailawlawagna kadin dagiti pamunganayan a kinapudno iti Biblia? (Prov. 2:6-9) Adda kadi interesna nga agbasa iti Biblia ken mangadal kadagiti publikasion ti klase matalek ken masirib nga adipen? (Mat. 24:45) Agsalsaludsod kadi maipapan kadagiti pannursuro ken teksto ti Biblia?

 Makatulong dagita a saludsod tapno maammuanyo ti naespirituan a panagrang-ay ti anakyo. Kalpasan a mausigyo dagita, mabalin nga adda makitayo a masapul a parang-ayenna sakbay nga agpabautisar. Ngem no pampaneknekanen ti panagbiagna nga isu ket maysan nga adalan ken indedikarnan ti biagna iti Dios, nalabit mariknayo a mabalinnan ti agpabautisar.

Dagiti Ubbing Maidaydayawda ni Jehova

Adu nga adipen ti Dios ti matalek ken nasungdo bayat ti kinaagtutubo wenno kinaubingda, kas kada Jose, Samuel, Josias, ken Jesus. (Gen. 37:2; 39:1-3; 1 Sam. 1:24-28; 2:18-20; 2 Cron. 34:1-3; Luc. 2:42-49) Ken nasursuruan la ketdi a naimbag manipud kinaubingda dagiti nagipadto nga uppat a babbalasang ni Felipe.​—Ara. 21:8, 9.

Kinuna ti maysa a Saksi idiay Greece: “Nabautisaranak idi 12 ti tawenko. Diak pulos pagbabawyan ti desisionko. Naglabasen ti 24 a tawen sipud idi, ket 23 a tawenko itan a payunir. Gapu iti panagayatko ken Jehova nasarangetko dagiti pakarigatan a maipaspasango kadagiti agtutubo. Iti edad a 12, bassit laeng ti ammok iti Kasuratan no idilig ita. Ngem ammok nga ay-ayatek ni Jehova ken kayatko ti agserbi kenkuana iti agnanayon. Maragsakanak ta tinulongannak nga agtultuloy nga agserbi kenkuana.”

Agtutubo man wenno nataenganen masapul a mabautisaran ti asinoman a mangpampaneknek nga isu ket pudno nga adalan. Insurat ni apostol Pablo: “Buyogen iti puso watwaten ti maysa ti pammati maipaay iti kinalinteg, ngem buyogen iti ngiwat mangaramid ti maysa iti publiko a panangideklara maipaay iti pannakaisalakan.” (Roma 10:10) No nagpabautisaren ti maysa nga ubing nga adalan ni Kristo, dakkel a panagballigi dayta kenkuana ken kadagiti nagannakna. Awan koma ti makalapped kadakayo ken iti anakyo a mangsagrap iti napalaus a rag-o nga agur-uray kadakayo.

[Footnote]

[Kahon iti panid 5]

Ti Umiso a Panangmatmat iti Bautismo

Dadduma a nagannak ibilangda ti bautismo dagiti annakda kas makagunggona nga addang ngem adda kakuykuyogna a peggad​—kas iti panangala iti lisensia nga agmaneho. Ti kadi panagpabautisar ken sagrado a panagserbi ti maysa pagpeggadenna ti masakbayanna? Saan sigun iti Biblia. Kuna ti Proverbio 10:22: “Ti bendision ni Jehova​—isu dayta ti mangpabaknang, ket awan rigat nga inayonna iti dayta.” Ken insurat ni Pablo iti agtutubo a ni Timoteo: “Iti kinaagpaysuanna, dayta ket panggun-od iti dakkel a gunggona, daytoy nadiosan a debosion agraman iti pannakapnek.”​—1 Tim. 6:6.

Pudno, saan a nalaka ti agserbi ken Jehova. Adu a rigat ti napasaran ni Jeremias kas propeta ti Dios. Ngem insuratna maipapan iti panagdayawna iti pudno a Dios: “Ti sasaom nasarakan, ket kinnanko ida; ket ti saom agbalin kaniak a panagragsak ken panagrag-o ti pusok; ta ti naganmo naipanagan kaniak, O Jehova a Dios ti buybuyot.” (Jer. 15:16) Ammo ni Jeremias a gubuayan iti rag-o ti panagserbina iti Dios. Ti lubong ni Satanas ti pagtataudan ti pakarigatan. Dagiti nagannak masapul a tulonganda dagiti annakda a mangbigbig iti dayta.​—Jer. 1:19.

 [Kahon/Ladawan iti panid 6]

Rumbeng Kadi nga Itantan ti Anakko ti Agpabautisar?

No dadduma, mabalin nga itantan dagiti nagannak ti panagpabautisar dagiti annakda uray no kualipikadodan. Ania dagiti mabalin a rasonda?

Maamakak nga agpabautisar ti anakko di la ket ta makaaramidto iti nadagsen a basol ket mailaksid. Nainkalintegan kadi a panunoten a no itantan ti ubing ti agpabautisar, saan a manungsungbat iti Dios gapu kadagiti aramidna? Kinuna ni Solomon kadagiti agtutubo: “Ammuem a maigapu [kadagiti aramidmo] iyegnakanto ti pudno a Dios iti pannakaukom.” (Ecl. 11:9) Ken impalagip ni Pablo iti amin: “Tunggal maysa kadatayo makikuentanto iti Dios maipaay iti bagina.”​—Roma 14:12.

Amin nga agdaydayaw iti Dios, bautisado man wenno saan, ket manungsungbat kenkuana. Diyo liplipatan a salakniban ni Jehova dagiti adipenna babaen ti ‘saanna a panangipalubos a masulisogda iti labes ti kabaelanda nga itured.’ (1 Cor. 10:13) No la ket ta ‘agtalinaedda a sipupuot’ ken sarangtenda ti sulisog, masiguradoda ti tulong ti Dios. (1 Ped. 5:6-9) Insurat ti maysa a Kristiano nga ina: “Ad-adu ti rason dagiti bautisado nga annak a mangliklik iti dakes nga impluensia ti lubong. Ti anakko a nabautisaran idi agtawen iti 15, ibilangna dayta a proteksion. Kinunana: ‘Dimo panunoten a labsingen ti linteg ni Jehova.’ Ti bautismo ket nabileg a mangtignay kenka nga agaramid iti kinalinteg.”

No sinanayyo dagiti annakyo nga agtulnog ken Jehova babaen ti sao ken aramid, makapagtalekkayo nga itultuloyda nga aramiden dayta kalpasan ti bautismoda. Kuna ti Proverbio 20:7: “Ti nalinteg magmagna iti kinatarnawna. Naragsak ti annakna a sumaruno kenkuana.”

Adda pay dagiti kalat a kayatko a maragpat ti anakko. Masapul a masursuro dagiti ubbing ti agtrabaho tapno kabaelandanto a suportaran ti bagida. Ngem napeggad no paregtaenyo ida nga isentroda ti biagda iti edukasion ken pinansial a seguridad imbes nga iti pudno a panagdayaw. Maipapan iti “bin-i,” wenno sao ti Pagarian a saan a dimmakkel, kinuna ni Jesus: “No maipapan iti daydiay naimula iti nagbabaetan dagiti sisiitan, daytoy daydiay dumdumngeg iti sao, ngem ti pakaringgoran daytoy a sistema ti bambanag ken ti makaallilaw a pannakabalin ti kinabaknang leppesenda ti sao, ket isu agbalin a di nabunga.” (Mat. 13:22) Ti panangparegta kadagiti annak a mangyun-una kadagiti nailubongan a kalat pakapuyenna ti tarigagayda nga agserbi iti Dios.

Maipapan kadagiti ubbing a kualipikado nga agpabautisar ngem di umanamong dagiti nagannakda, kinuna ti maysa a panglakayen: “No malapdan ti ubing nga agpabautisar bumannayat ti panagrang-ayna iti naespirituan ket maupay.” Insurat met ti maysa nga agdaldaliasat a manangaywan: “Mabalin a kumapuy ti espiritualidad ti ubing ket panunotenna a ti lubong ti mangted kenkuana iti balligi.”

[Ladawan]

Rumbeng kadi nga iyun-una ti panageskuela iti unibersidad?

[Ladawan iti panid 3]

Kabaelan ti maysa nga ubing a paneknekan nga isu ket maysa nga adalan

[Ladawan iti panid 3]

Panagsagana ken pannakipaset kadagiti gimong

[Ladawan iti panid 4]

Panagtulnog kadagiti nagannak

[Ladawan iti panid 4]

Panangasaba

[Ladawan iti panid 4]

Panagkararag