‘Pagballigiem ti Dalanmo’​—Kasano?

“BALLIGI”​—makaatrakar a sao! Adda dagidiay ngimmato ti saadda gapu iti panagreggetda ket nakabalballigida ta bimmaknang ken nagbalinda a mabigbigbig. Dadduma inar-arapaapda met ti agballigi ngem naan-anay a napaayda.

Ti balligi ket nangnangruna nga agpannuray iti pangipamaysaam iti biagmo. Agpannuray met dayta no kasanom nga usaren ti tiempo ken pigsam ken no agtignayka.

Natakuatan ti adu a Kristiano a nangyeg iti dakkel a pannakapnek ti naan-anay a pannakiramanda iti ministerio. Nagballigi dagiti agtutubo ken natataengan gapu ta pinagbalinda a karera ti amin-tiempo a panagserbi. Kaskasdi, marikna ti dadduma a makauma ti panangasaba isu nga impangpangrunada a gun-oden ti sabali a kalat. Apay a mapasamak ti kasta? Ania ti mabalin nga aramidem tapno maipokus ti panagkitam iti napatpateg a banag? Kasanom a ‘mapagballigi ti dalanmo’?​—Jos. 1:8.

Ekstrakurikular nga Aktibidad ken Pagesman

Masapul nga agtalinaed a balanse dagiti agtutubo no iti panagserbida iti pudno a Dios ken iti pannakiramanda iti dadduma pay nga aktibidad. Sigurado nga agballiginto dagidiay mangaramid iti dayta ken maikarida iti naimpusuan a komendasion.

Ngem adda dagiti Kristiano nga agtutubo nga okupado kadagiti ekstrakurikular nga aktibidad ken pagesman. Saan met ketdi a dakes dagita. Ngem masapul nga isaludsodda iti bagida: ‘Kasano kaadu ti tiempo a busbusbosek kadagita nga aktibidad? Siasino dagiti kakaduak kadagita? Ania ti kababalin dagiti tattao a karaman kadagita? Ken ania ti mabalin a pakaisentruan ti biagko?’ Mabigbigmo a mabalin a maigamer ti maysa kadagita nga aktibidad agingga a bassiten ti tiempo wenno pigsana para iti naespirituan a bambanag. Ipakita dayta a napateg ti panangipasdek kadagiti prioridad.​—Efe. 5:15-17.

Usigentayo ti kapadasan ni Wiktor. a Kinunana: “Idi agtawenak iti 12, nakimiembroak iti volleyball club. Idi agangay, adu a premio ken pammadayaw ti naawatko. Adda gundawayko idi nga agbalin a nalatak iti isport.” Ngem nariribukan ni Wiktor ta naapektaran ti espiritualidadna. Naminsan, naturoganna ti panagbasana iti Biblia. Ken nabigbigna a saan unayen a naragsak a mangasaba. “Naibus ti pigsak gapu iti isport ket nabigbigko idi agangay a bimmaawen ti regtak iti naespirituan. Ammok a diak ar-aramiden ti amin a kabaelak.”

Nangato nga Edukasion?

Sigun iti Kasuratan, obligasion ti maysa a Kristiano nga aywanan ti pamiliana, ket ramanen dayta ti panangipaayna iti material a kasapulanda. (1 Tim. 5:8) Ngem tapno maaramidanna dayta, masapul kadi nga agturpos iti kolehio wenno unibersidad?

Nasayaat nga ikabilangan ti maysa no ania ti epekto ti pananggun-odna iti nangato nga edukasion iti relasionna ken Jehova. Usigentayo ti maysa a Nainkasuratan a pagarigan.

Ni Baruc ti sekretario ni propeta Jeremias. Adda idi gundaway a nagbalin nga ambisioso gapu ta dina impamaysa dagiti pribilehiona  kas adipen ni Jehova. Nakita dayta ni Jehova isu a pinakdaaranna babaen ken Jeremias: “Agtultuloy nga isapsapulam ta bagim iti naindaklan a bambanag. Dika itultuloy ti agsapul.”​—Jer. 45:5.

Ania ti “naindaklan a bambanag” a sapsapulen ni Baruc? Mabalin a naguyugoy nga agbalin a prominente iti Judio a sistema dagiti bambanag. Wenno ti tarigagayna a bumaknang. Aniaman kadagita, saanen a ti napatpateg wenno naespirituan a bambanag ti prioridadna. (Fil. 1:10) Ngem nabatad nga impangag ni Baruc ti pakdaar ni Jehova babaen ken Jeremias isu a naispal ti biagna.​—Jer. 43:6.

Ania ti maadaltayo iti dayta? Ti balakad a naawat ni Baruc ipasimudaagna nga adda problema. Agsapsapul iti naindaklan a bambanag para iti bagina. No masuportaram ti bagim, talaga kadi a masapul pay a busbosem ti tiempo, kuarta, ken pigsam a gumun-od iti nangato nga edukasion tapno laeng matungpalmo dagiti arapaapmo wenno ti arapaap dagiti nagannak wenno kabagiam?

Usigentayo ti kapadasan ni Grzegorz, maysa a computer programmer. Gapu ta naallukoy dagiti katrabahuanna, nangala iti kanayonan nga specialized training. Idi agangay, awanen ti tiempona kadagiti naespirituan nga aktibidad. Kinunana: “Kanayon a tensionadoak. Makonkonsiensiaak ta diak naragpat dagiti naespirituan a kalatko.”

Pannakaigamer iti Trabaho

Ti Sao ti Dios paregtaenna dagiti pudno a Kristiano nga agbalinda a nagaget ken responsable nga empleado ken amo. Insurat ni apostol Pablo: “Aniaman ti ar-aramidenyo, aramidenyo dayta nga amin-kararua a kas maipaay ken Jehova, ket saan a maipaay iti tattao.” (Col. 3:22, 23) Ngem nupay makomendaran ti kinagaget, adda pay napatpateg​—ti nasayaat a relasiontayo iti Namarsua. (Ecl. 12:13) No maigamer iti sekular a trabaho ti maysa a Kristiano, nalaka laeng nga agbalin a segundario iti biagna dagiti naespirituan nga aktibidad.

Ti pannakaigamer iti sekular a trabaho ibusenna ti pigsa ti maysa a Kristiano a kasapulanna tapno mataginayon ti naespirituan a kinabalansena ken matulonganna ti pamiliana. Napaliiw ni Ari Solomon a ti “dua a rakem a napinget a panagtrabaho” ket masansan a kakuykuyogna ti “panangkamkamat iti angin.” No okupado unay ti maysa a Kristiano iti sekular a karera, agresulta dayta iti agtultuloy ken nakaro nga stress. Mabalin pay ketdi nga adipenen ti trabahona agingga a nakaron ti pannakapaksuyna. No kasta, talaga kadi a ‘makapagrag-o ken makakita iti imbag iti isuamin a napinget a panagtrabahona’? (Ecl. 3:12, 13; 4:6) Ken adda pay kadi nabati a pigsana a mangitungpal kadagiti responsabilidadna  iti pamiliana ken makiraman kadagiti naespirituan nga aktibidad?

Ni Janusz, a taga-Eastern Europe ket naigamer iti negosio a panaghardin. Malagipna: “Magusgustuandak dagiti tattao kaniak ta ammok ti ar-aramidek ken mairingpasko ti amin nga ipatrabahoda kaniak. Ngem naapektaran ti espiritualidadko ken saanakon a mangaskasaba ken makigimgimong. Nagbalinak a napangato unay isu a diak inawat ti balakad dagiti panglakayen ken immadayoak iti kongregasion.”

Makapagballigika

Nausigtayon ti tallo a benneg a mabalin a pakaigameran ti maysa a Kristiano nga agresulta iti ikakapuy ti espiritualidadna. Mapaspasaram kadi ti maysa kadagita? No wen,  makatulong kenka dagiti sumaganad a saludsod, teksto, ken komento tapno masiguradom no agballigika.

Ekstrakurikular nga aktibidad ken pagesman: Kasanoka kaokupado kadagita nga aktibidad? Ag-agawenda kadi ti tiempom para kadagiti naespirituan nga aktibidad? Mapukpukaw kadin ti ragsakmo a makilangen kadagiti kapammatiam? No kasta, apay a dimo tuladen ti inaramid ni Ari David a nangipakaasi ken Jehova: “Ipakaammom kaniak ti dalan a rebbeng a pagnaak.”​—Sal. 143:8.

Maysa nga agdaldaliasat a manangaywan ti nangtulong ken Wiktor, a nadakamat itay. Kinuna ti manangaywan: “Awanen ti sabali a mangmangngegko kenka no di volleyball.” “Dayta ti nangriing kaniak,” kuna ni Wiktor. “Nabigbigko a naigamerakon iti dayta. Idi agangay, insardengkon ti makikadua kadagiti gagayyemko iti volleyball club ken nakigayyemak kadagiti kakabsat.” Sireregta nga agserserbi itan ni Wiktor iti kongregasionda. Kinunana: “Saludsodem dagiti gagayyemmo, nagannakmo, wenno dagiti panglakayen iti kongregasion no madmadlawda nga umad-adayokan ken Jehova gapu kadagiti aktibidad iti eskuelaanyo.”

Apay a dimo ibaga kadagiti panglakayen iti kongregasionyo a kayatmo ti gumun-od iti kanayonan a pribilehio? Mabalinmo kadi a tulongan dagiti lallakay ken babbaket, nalabit babaen ti panangkaduam kadakuada nga ag-shopping wenno mangaramid kadagiti trabaho iti balay? Aniaman ti edadmo, mabalinmo ti agpayunir. Mangted dayta iti ragsak iti maysa a Kristiano.

Nangato nga edukasion: Namakdaar ni Jesus maipapan iti ‘panangsapul iti bukod a dayag.’ (Juan 7:18) Aniaman nga edukasion ti ikeddengmo a gun-oden, ‘sigsiguraduem kadi ti napatpateg a bambanag’?​—Fil. 1:9, 10.

Nangaramid kadagiti panagbalbaliw ti computer programmer a ni Grzegorz. Kinunana: “Impapusok ti balakad dagiti panglakayen isu a pinasimplek ti biagko. Nabigbigko a diak kasapulanen ti kanayonan nga edukasion. Ibusenna laeng ti tiempo ken pigsak.” Ad-adu a tiempo ti binusbos ni Grzegorz kadagiti aktibidad iti kongregasion. Idi agangay, nagturpos iti eskuelaan a maaw-awagan itan iti Bible School for Single Brothers. Wen, ‘ginatangna ti tiempo’ tapno manayonan ti nadiosan nga edukasionna.​—Efe. 5:16.

Sekular a trabaho: Okupadoka kadi unay iti trabahom isu a mabaybay-amon dagiti naespirituan a bambanag? Adda kadi umdas a tiempom a makikomunikar iti pamiliam? Ken rumangrang-ay kadi ti kalidad dagiti palawagmo iti kongregasion? Makiramramanka kadi kadagiti makapabileg a saritaan? “Agbutengka iti pudno a Dios ket salimetmetam dagiti bilinna,” iti kasta, umawatkanto iti adu a bendision ni Jehova ken ‘makakitakanto iti naimbag gapu iti napinget a panagtrabahom.’​—Ecl. 2:24; 12:13.

Nalugi ti negosio a panaghardin ni Janusz, a nadakamat itay. Gapu ta awan pamastrekannan ken nailumlom iti utang, nagpatulong ken Jehova. Inlintegna dagiti bambanag ket agserserbi itan kas regular pioneer ken panglakayen iti kongregasion. Kinunana: “Nataltalna ti panunot ken pusok ta kontentoak iti simple a biag ken us-usarek ti amin a pigsak kadagiti naespirituan nga aktibidad.”​—Fil. 4:6, 7.

Iwayaam nga usigen no ania a talaga ti motibo ken prioridadmo. Ti panagserbi ken Jehova ket mangyeg iti manayon a balligi. Pagbalinem dayta a kangrunaan iti biagmo.

Mabalin nga adda dagiti masapul a balbaliwam, nga ikkatem pay ketdi dagiti saan a napateg a bambanag tapno mapaneknekam “ti naimbag ken makaay-ayo ken naan-anay a pagayatan ti Dios.” (Roma 12:2) Ngem ‘mapagballigim ti danam’ babaen ti amin-kararua a panagserbim iti Dios.

[Footnote]

[Kahon/Ladawan iti panid 31]

Kasanom a Mapagballigi ti Danam?

Gapu ta nagadu ti mangagaw iti tiempom, ania ti aramidem tapno maipamaysam ti talaga a napateg a banag? Usigem dagiti motibo ken prioridadmo babaen ti panangutobmo kadagiti sumaganad a saludsod:

EKSTRAKURIKULAR NGA AKTIBIDAD KEN PAGESMAN

▪ Ania ti kababalin dagiti tattao a karaman kadagita nga aktibidad?

▪ Kasano kaadu ti tiempo a busbusbosem kadagita?

▪ Posible kadi a dagitoy ti agbalin a kangrunaan iti biagmo?

▪ Ag-agawenda kadi ti tiempom para kadagiti naespirituan nga aktibidad?

▪ Siasino dagiti kakaduam kadagita nga aktibidad?

▪ Mapukpukaw kadin ti ragsakmo a makilangen kadagiti kapammatiam?

NANGATO NGA EDUKASION

▪ No kabaelam a suportaran ti bagim, talaga kadi a masapul a busbosem ti tiempo, kuarta, ken pigsam a gumun-od iti nangato nga edukasion?

▪ Tapno masuportaram ti bagim, masapul kadi nga agturposka iti kolehio wenno unibersidad?

▪ Ania ti mabalin nga epekto dayta iti pannakigimongmo?

▪ ‘Siniguradom kadi ti napatpateg a bambanag’?

▪ Masapul kadi a pabilgem ti panagtalekmo a kabaelan ni Jehova nga ipaay ti kasapulam?

TRABAHO

▪ Ipalubos kadi ti panggedam a maaddaanka iti umdas a tiempo a mangtagiragsak iti biag?

▪ Adda pay kadi nabati a pigsam a mangitungpal kadagiti responsabilidadmo iti pamiliam ken makiraman kadagiti naespirituan nga aktibidad?

▪ Adda kadi umdas a tiempom a makikomunikar iti pamiliam?

▪ Okupadoka kadi unay iti trabahom isu a mabaybay-amon dagiti naespirituan a bambanag?

▪ Naapektaranna kadi ti kalidad dagiti palawagmo iti kongregasion?

[Ladawan iti panid 30]

Ni Jehova pinakdaaranna ni Baruc gapu iti ambisionna