“Ti Bunga ti Espiritu” Ipadayagna ti Dios

“Ni Amak maipadayag iti daytoy, nga agtultuloykayo a mangpataud iti adu a bunga.”​—JUAN 15:8.

1, 2. (a) Ania dagiti gundaway a maparegtatayo ti sabsabali? (b) Ania a sagut manipud ken Jehova ti mangpasayaat iti abilidadtayo nga agserbi kenkuana?

 USIGENTAYO ti dua nga eksena: Nadlaw ti kabsat a babai a kasla maburburiboran ti maysa nga ub-ubing a kabsat. Inyurnosna nga agkaduada a mangasaba. Bayat ti panagkaduada, inyebkas ti kabsat dagiti pakaburiboranna. Kamalmanna, nagyaman ken Jehova ti ub-ubing a kabsat gapu iti naayat a pannakaseknan ti natataengan a kabsat; dayta ti apag-isu a kasapulanna. Iti sabali a lugar, adda agassawa a kagapgapuda a nagserbi iti sabali a pagilian. Iti maysa a taripnong, bayat a maragragsakanda a manges-estoria kadagiti kapadasanda, adda agtutubo a lalaki a siuulimek nga agdengdengngeg. Sumagmamano a tawen kalpasanna, bayat nga agsagsagana a mapan iti pagilian a pakaidestinuanna, nalagipna dagita nga agassawa ken ti panagsasarita a nakaigapuan ti tarigagayna nga agbalin a misionero.

² Nalabit dagita a situasion ipalagipna ti maysa a tao a naimpluensiaam wenno nakaimpluensia kenka iti positibo a pamay-an. Siempre, manmano a mapasamak a ti maminsan laeng a pannakisarita balbaliwanna ti biag ti maysa a tao, ngem inaldaw nga addaantayo iti gundaway a mangparegta ken mangpabileg iti sabsabali. Saan kadi a nagsayaat no adda makatulong kenka a mangparang-ay iti abilidad ken kababalinmo tapno ad-adda a matulongam dagiti kakabsat ken ad-adda nga epektiboka nga agserbi iti Dios? Kinapudnona, ipapaayannatayo ni Jehova iti kasta a sagut​—ti nasantuan nga espirituna. (Luc. 11:13) Bayat nga agtigtignay kadatayo ti espiritu ti Dios, mapatanortayo dagiti galad a mangpasayaat iti tunggal aspeto ti panagserbitayo iti Dios. Anian a nakaskasdaaw dayta a sagut!​—Basaen ti Galacia 5:22, 23.

3. (a) Kasano a pakaidayawan ti Dios ti panangpatanortayo iti “bunga ti espiritu”? (b) Ania dagiti saludsod nga usigentayo?

³ Dagiti galad a patauden ti nasantuan nga espiritu iyanninawda ti mismo a personalidad ti Gubuayan dayta nga espiritu, ni Jehova a Dios. (Col. 3:9, 10) Impasimudaag ni Jesus ti kangrunaan a rason no apay a rumbeng nga ikagumaan dagiti Kristiano a tuladen ti Dios idi kinunana kadagiti apostolna: “Ni Amak maipadayag iti daytoy, nga agtultuloykayo a mangpataud iti adu a bunga.” a (Juan 15:8) Nabatad a makita iti panagsasao ken panagtigtignaytayo no patpatanorentayo “ti bunga ti espiritu.” Iti kasta, maidaydayawtayo ti Diostayo. (Mat. 5:16) Kadagiti ania a pamay-an a naiduma ti bunga ti espiritu kadagiti kababalin ti lubong ni Satanas? Kasanotayo a mapatanor ti bunga ti espiritu? Apay a mabalin a marigatantayo a mangpatanor iti dayta? Usigentayo dagita a saludsod bayat a pagsasaritaantayo ti umuna a tallo nga aspeto ti bunga ti espiritu​—ayat, rag-o, ken talna.

Ayat a Naibatay iti Nangatngato a Prinsipio

4. Ania a kita ti ayat ti insuro ni Jesus nga ipakita dagiti pasurotna?

⁴ Ti ayat a patauden ti nasantuan nga espiritu ket nalawag a naiduma iti kita ti ayat a gagangay iti lubong. Kasano? Naibatay ngamin dayta nga ayat iti nangatngato a prinsipio. Intampok ni Jesus dayta a panagduma iti Sermonna iti Bantay.  (Basaen ti Mateo 5:43-48.) Kinunana nga uray dagiti managbasol agannayasda a mangtrato iti sabsabali iti pamay-an a kayatda a pannakatrato. Saan a pudpudno a managsakripisio ti kasta nga “ayat” no di ket panangsubad laeng iti naaramid a pabor. Masapul a naidumatayo no kayattayo a ‘mapaneknekan ti bagbagitayo nga annak ni Amatayo nga adda iti langlangit.’ Imbes a tratuentayo ti sabsabali kas iti panangtratoda kadatayo, masapul a matmatan ken tratuentayo ida kas iti panangmatmat ken panangtrato kadakuada ni Jehova. Ngem kasano a maayattayo dagiti kabusortayo, kas imbilin ni Jesus?

5. Kasanotayo a maipakita ti panagayattayo kadagiti mangidadanes kadatayo?

⁵ Usigentayo ti maysa a pagarigan iti Biblia. Idi mangaskasaba da Pablo ken Silas idiay Filipos, naaresto, nakabkabil, ken naipisokda iti makin-uneg a pagbaludan, sa naitul-ong dagiti sakada. Iti kaaddada sadiay, mabalin a minaltrato ida ti agbambantay kadagiti balud. Idi di ninamnama a nawayawayaanda gapu iti ginggined, naragsakanda kadi ta adda gundawaydan nga agibales? Saan. Ti napudno a pannakaseknanda iti agbambantay​—ti managsakripisio nga ayatda​—ti nanggutugot kadakuada nga agtignay a dagus agpaay iti pagimbaganna. Gapu iti dayta, nagbalin a manamati ti agbambantay ken ti intero a sangakabbalayanna. (Ara. 16:19-34) Adu a kakabsattayo ita ti nangtulad iti kasta met la a kababalin a ‘nangbendision kadagidiay mangidadanes kadakuada.’​—Roma 12:14.

6. Kadagiti ania a pamay-an a maipakitatayo ti managsakripisio nga ayattayo kadagiti kakabsat? (Kitaenyo ti kahon iti panid 21.)

⁶ Naun-uneg pay ti panagayattayo kadagiti kapammatiantayo. “Pagrebbengantayo nga isuko dagiti kararuatayo maipaay kadagiti kakabsattayo.” (Basaen ti 1 Juan 3:16-18.) Ngem masansan a maipakitatayo ti ayattayo kadagiti babassit a pamay-an. Kas pagarigan, no adda naibaga wenno naaramidtayo a nakasair iti kabsattayo, maipakitatayo ti ayattayo no datayo ti umuna nga agtignay tapno maisubli ti talna. (Mat. 5:23, 24) Kasanon no adda nangsair kadatayo? ‘Sisasaganatayo kadi a mamakawan,’ wenno agimulmulatayo iti sakit ti nakem? (Sal. 86:5) Ti nasged nga ayat a patauden ti nasantuan nga espiritu tulongannatayo a mangpalabas kadagiti babassit a nagkamalian, a sibubulos a pakawanentayo ti sabsabali “kas iti sibubulos a panangpakawan [kadatayo] ni Jehova.”​—Col. 3:13, 14; 1 Ped. 4:8.

7, 8. (a) Kasano a ti panagayattayo iti Dios apektaranna ti panagayattayo kadagiti tattao? (b) Kasanotayo a maparayray ti panagayattayo ken Jehova? (Kitaenyo ti ilustrasion iti baba.)

⁷ Kasanotayo a mapatanor ti managsakripisio nga ayattayo kadagiti kakabsattayo? Babaen ti panangpaunegtayo iti ayattayo iti Dios. (Efe. 5:1, 2; 1 Juan 4:9-11, 20, 21) Ti tiempo a  busbusbosentayo ken Jehova babaen ti panagbasa iti Biblia, panagutob, ken panagkararag ti mangparegta kadatayo ken mangparayray iti ayattayo iti nailangitan nga Amatayo. Ngem masapul a gatangentayo ti tiempo tapno sumingedtayo iti Dios.

⁸ Kas panangyilustrar: Panunotem nga adda laeng espesipiko nga oras iti kada aldaw a mabalinmo ti agbasa iti Sao ti Dios, agutob iti nabasam, ken agkararag ken Jehova. Dimo kadi tagipatgen dayta nga oras tapno awan ti mangsinga iti personal a tiempom ken Jehova? Siempre, awan ti makalapped kadatayo nga agkararag iti Dios, ken kaaduan kadatayo ti mabalin nga agbasa iti Biblia iti aniaman nga oras a kayattayo. Kaskasdi, ditay koma ipalubos a dagiti inaldaw nga aktibidadyo ti mangagaw iti personal a tiempotayo nga umadani iti Dios. Us-usarem kadi ti ad-adu a tiempom iti kada aldaw agingga a posible tapno sumingedka ken Jehova?

“Rag-o ti Nasantuan nga Espiritu”

9. Ti nasantuan nga espiritu tulongannatayo a mangtaginayon iti rag-o iti laksid ti ania?

⁹ Ti rag-o, a maikadua nga aspeto ti bunga ti nasantuan nga espiritu, ket mabalin nga agtalinaed kadatayo ti impluensiana iti laksid dagiti pakarigatan. Nayarig dayta iti maysa a naandur a mula a makapagbiag uray iti narigat nga aglawlaw. Iti intero a lubong, adu nga adipen ti Dios ti ‘nangawat iti sao iti sidong ti adu a rigat buyogen ti rag-o ti nasantuan nga espiritu.’ (1 Tes. 1:6) Dadduma ti nakapasar kadagiti pakarigatan ken napaidaman. Kaskasdi, pinabileg ida ni Jehova babaen ti espirituna tapno ‘naan-anay a makapagibturda ken maaddaanda iti mabayag a panagitured buyogen ti rag-o.’ (Col. 1:11) Ania ti gubuayan dayta a rag-o?

10. Ania ti gubuayan ti rag-otayo?

¹⁰ Saan a kas iti “pagduaduaan a kinabaknang” ti lubong ni Satanas, manayon ti pateg dagiti naespirituan a gameng a maaw-awattayo ken Jehova. (1 Tim. 6:17; Mat. 6:19, 20) Insaganana kadatayo ti naragsak a namnama a biag nga agnanayon. Naragsaktayo ta pasetnatayo ti sangalubongan a panagkakabsat dagiti Kristiano. Kangrunaan iti amin, naibatay ti rag-otayo iti relasiontayo iti Dios. Mariknatayo ti kas iti inyebkas ni David, a nupay napilitan nga agbiag kas pugante, indaydayawna ni Jehova babaen ti kanta idi kinunana: “Agsipud ta ti naayat a kinamanangngaasim nasaysayaat ngem iti biag, dagiti bukodko a bibig padayawandakanto. Iti kasta bendituenkanto bayat ti panagbiagko.” (Sal. 63:3, 4) Uray no makapasartayo kadagiti rigat, napno ti pusotayo iti rag-o gapu iti panangidaydayawtayo iti Dios.

11. Apay a napateg nga agserbitayo ken Jehova buyogen ti rag-o?

¹¹ Indagadag ni apostol Pablo kadagiti Kristiano: “Kankanayon nga agrag-okayo iti Apo. Maminsan pay a kunaek, Agrag-okayo!” (Fil. 4:4) Apay a napateg kadagiti Kristiano nga agserbida ken Jehova buyogen ti rag-o? Gapu iti pinataud ni Satanas nga isyu mainaig iti kinasoberano ni Jehova. Kuna ni Satanas nga awan ti naimpusuan nga agserserbi iti Dios. (Job 1:9-11) Uray no napasnek ti panagserbitayo ken Jehova no ditay met naragsak, kurang ti ipapaaytayo a panagserbi. Gapuna, ikagumaantayo nga ipangag ti balakad ti salmista: “Agserbikayo ken Jehova buyogen ti panagrag-o. Umaykayo iti sanguananna buyogen ti narag-o nga ikkis.” (Sal. 100:2) Pakaidayawan ti Dios ti naragsak ken naimpusuan a panagserbitayo.

12, 13. Ania ti aramidentayo tapno maiwaksitayo dagiti negatibo a rikna?

¹² Ngem adda dagiti gundaway nga uray dagiti nasungdo nga adipen ni Jehova ket maupay ken marigatanda met a mangtaginayon iti positibo a panangmatmat. (Fil. 2:25-30) Ania ti makatulong kadatayo kadagiti kasta a gundaway? Kuna ti Efeso 5:18, 19: “Agtultuloykayo a mapno iti espiritu, nga agsasaokayo iti bagbagiyo kadagiti salmo ken daydayaw iti Dios ken naespirituan a kankanta, nga agkankanta ken pakpakuyoganyo ti bagbagiyo iti musika iti puspusoyo ken Jehova.” Kasanotayo a mayaplikar dayta a balakad?

¹³ No makariknatayo iti negatibo, umararawtayo ken Jehova ken ikagumaantayo nga utoben dagiti nadayaw a bambanag. (Basaen ti Filipos 4:6-9.) Natakuatan ti dadduma a ti panangidayyeng  kadagiti nairekord a kanta ti Pagarian ket makabang-ar ken makatulong kadakuada nga agpanunot iti positibo. Malagip ti maysa a kabsat a nakapasar iti rigat a masansan a pakaigapuan ti pannakaupayna: “Malaksid iti regular a naimpusuan a panagkararag, inkabesak met ti sumagmamano a kanta ti Pagarian. Mabang-aranak a mangkanta kadagiti nagpipintas a kanta a mangidayaw ken Jehova, napigsa man wenno nakapsut dayta. Kasta met, nairuar idi a tiempo ti libro nga Umadanika ken Jehova. Namindua a binasak dayta iti simmaganad a tawen. Kas man la makapabang-ar dayta a sapsapo iti pusok. Ammok a binendisionan ni Jehova ti panagreggetko.”

“Mamagkaykaysa a Singgalut ti Talna”

14. Ania ti makapainteres nga aspeto ti talna a patauden ti nasantuan nga espiritu?

¹⁴ Iti internasional a kombensiontayo, naragsakan a nakikadua kadagiti kakabsattayo dagiti delegado a nagduduma ti nalikudanda. Ti kasta a buya itampokna ti talna a tagtagiragsaken ti ili ti Dios ita​—ti sangalubongan a panagkaykaysatayo. Masansan a masdaaw dagiti makaimatang no makakitada kadagiti tattao nga ipagarupda nga agkakalaban ngem ‘sipapasnek a mangikagkagumaan a mangsalimetmet iti panagmaymaysa ti espiritu iti mamagkaykaysa a singgalut ti talna.’ (Efe. 4:3) Pudno a naisangsangayan daytoy a panagkaykaysa no panunotentayo dagiti rigat a napasaranda.

15, 16. (a) Ania a panamati ti inkaubingan ni Pedro, ken kasano a maysa a karit dayta? (b) Kasano a ni Jehova tinulonganna ni Pedro a mangbalbaliw iti kababalinna?

¹⁵ Maysa a karit ti panagkaykaysa dagiti tattao a nagduduma ti nalikudanda. Tapno matarusantayo no ania ti masapul a mapagballigian tapno magun-od ti kasta a panagkaykaysa, usigentayo ti kapadasan ni apostol Pedro idi umuna a siglo. Makita ti panangmatmatna kadagiti di nakugit a Gentil idi kinunana: “Pagaammoyo  unay no kasano nga iparit ti linteg a ti maysa a Judio makitipon wenno umasideg iti tao a sabali ti pulina; ket kaskasdi a ti Dios impakitana kaniak nga awan koma ti tao a naganek iti natulawan wenno narugit.” (Ara. 10:24-29; 11:1-3) Maibatay iti gagangay a panangmatmat idi a tiempo, inkaubingan ni Pedro ti panamati nga ipaalagad ti Linteg a dagiti laeng padana a Judio ti ayatenna. Mabalin a normal laeng kenkuana nga ibilang dagiti Gentil kas kabusor a rumbeng a guraen. b

¹⁶ Panunotem laengen ti panagalikaka ni Pedro idi simrek iti pagtaengan ni Cornelio. Posible kadi a ti dati nga addaan iti negatibo a panangmatmat kadagiti Gentil ket makikaykaysa kadakuada buyogen ti “mamagkaykaysa a singgalut ti talna”? (Efe. 4:3, 16) Wen, gapu ta sumagmamano nga aldaw sakbayna, linuktan ti espiritu ti Dios ti puso ni Pedro isu a binalbaliwanna ti kababalinna ken naparmekna ti saan a panangidumduma. Babaen ti sirmata, imbatad kenkuana ni Jehova a ti panangmatmatna ket saan a naibatay iti puli wenno nasionalidad. (Ara. 10:10-15) Gapuna, naibaga ni Pedro ken ni Cornelio: “Iti kinapudnona makitak a ti Dios saan a mangidumduma, no di ket iti tunggal nasion anamonganna ti tao nga agbuteng kenkuana ken agaramid iti kinalinteg.” (Ara. 10:34, 35) Nagbalbaliw ni Pedro ket pudno a nakikaykaysa iti “intero a timpuyog dagiti kakabsat.”​—1 Ped. 2:17.

17. Apay a naisangsangayan ti panagkaykaysa a tagtagiragsaken ti ili ti Dios?

¹⁷ Ti kapadasan ni Pedro tulongannatayo a mangapresiar iti naisangsangayan a panagbalbaliw a mapaspasamak iti ili ti Dios ita. (Basaen ti Isaias 2:3, 4.) Minilion a tattao ‘manipud iti amin a nasion ken tribu ken ili ken pagsasao’ ti nangbalbaliw iti panagpampanunotda tapno maitunos dayta iti “naimbag ken makaay-ayo ken naan-anay a pagayatan ti Dios.” (Apoc. 7:9; Roma 12:2) Adu kadakuada ti sigud a naimpluensiaan iti gura, panagbinnusor, ken panagsisina ti lubong ni Satanas. Ngem babaen ti panagadal iti Sao ti Dios ken ti tulong ti nasantuan nga espiritu, nasursuroda a ‘suroten ti bambanag a mamataud iti talna.’ (Roma 14:19) Ti imbungana a panagkaykaysa ket nangyeg iti dayaw iti Dios.

18, 19. (a) Kasano a makatulong ti tunggal maysa kadatayo tapno maadda ti talna ken panagkaykaysa iti kongregasion? (b) Ania ti usigentayo iti sumaganad nga artikulo?

¹⁸ Kasano a makatulong ti tunggal maysa kadatayo tapno maadda ti talna ken panagkaykaysa ti ili ti Dios? Adu a kongregasion ti addaan kadagiti ganggannaet a miembro. Mabalin a naiduma ti kulturada wenno marigatanda nga agsao iti lenguahetayo. Ikagkagumaantayo kadi ida nga am-ammuen? Dayta ti irekomenda kadatayo ti Sao ti Dios. Iti surat ni Pablo iti kongregasion ti Roma, a buklen dagiti Judio ken Gentil, kinunana: “Abrasaenyo ti maysa ken maysa, a kas iti Kristo inabrasanatayo met, a maipaay iti dayag ti Dios.” (Roma 15:7) Adda kadi kakongregasionmo a mabalinmo nga am-ammuen a naimbag?

¹⁹ Ania pay ti mabalintayo nga aramiden tapno agtignay kadatayo ti nasantuan nga espiritu? Usigento dayta ti sumaganad nga artikulo bayat a pagsasaritaantayo dagiti nabatbati nga aspeto ti bunga ti espiritu.

[Footnotes]

Ania ti Sungbatyo?

• Kasanotayo a maipakita ti managsakripisio nga ayattayo kadagiti kakabsat?

• Apay a napateg nga agserbitayo iti Dios buyogen ti rag-o?

• Kasano a makatulongtayo tapno maadda ti talna ken panagkaykaysa iti kongregasion?

[Salsaludsod]

[Kahon iti panid 21]

“Dagitoy ti Pudno a Kristiano”

Insalaysay ti libro a Between Resistance and Martyrdom​—Jehovah’s Witnesses in the Third Reich ti komento ti maysa nga agtutubo a Judio a balud. Dinakamatna ti damo a pannakaam-ammona kadagiti Saksi ni Jehova idi simmangpet iti kampo konsentrasion idiay Neuengamme:

“Idi a dakami a Judio a taga-Dachau nakasangpetkami iti kampo, inlemmeng ti dadduma a Judio ti aniaman nga adda kadakuada tapno awan ti mairanudda kadakami. . . . Idi addakami pay laeng iti ruar [ti kampo konsentrasion], agtitinnulongkami. Ngem itan ta addakamin iti nakarigrigat a kasasaad, ti kangrunaan a pakaseknan ti maysa ket no kasanona nga isalakan ti bagina, nga awan bibiangna iti sabsabali. Ngem anian a naiduma dagiti Estudiante ti Biblia! Iti daydi a tiempo, nagrigat ti trabahoda ta agtartarimaanda kadagiti tubo ti danum. Nalam-ek idi ket agmalmalem a nakatakderda iti nakalamlamiis a danum. Dimi pulos mapanunot no kasanoda a naanduran dayta. Kunada nga ipapaayan ida ni Jehova iti bileg. Kas kadakami, kasapulanda unay ti tinapayda gapu ta mabisbisinda. Ngem ammoyo kadi no ania ti inaramidda? Inurnongda dagiti tinapayda sa innalada ti kagudua ken intedda ti nabati a kagudua kadagiti sangsangpet a kapammatianda a taga-Dachau. Inabrasa ken inarakupda ti maysa ken maysa. Nagkararagda sakbay a nanganda. Kalpasanna, nabsog ken naragsakda amin. Kunada a saandan a mabisin. Iti daydi a gundaway a naikunak: Dagitoy ti pudno a Kristiano.”

[Dagiti Ladawan iti panid 19]

Iti tunggal aldaw, kiskissayam kadi ti tiempom iti dadduma nga aktibidad tapno adda panawenmo a suminged ken Jehova?