Agtalinaedkayo a Siririing kas iti Inaramid ni Jeremias

“[Siak ni Jehova] agtalinaedak a siririing maipapan iti saok tapno itungpalko dayta.”​—JER. 1:12.

1, 2. Kasano a ti ‘panagtalinaed ni Jehova a siririing’ ket nainaig iti kayo nga almendro?

 KADAGITI turod ti Libano ken Israel, ti almendro ti maysa kadagiti kaunaan a kayo nga agsabong. Dagiti nakapimpintas a derosas wenno puraw a sabongna ket makita iti arinunos ti Enero wenno rugrugi ti Pebrero. Ti Hebreo a naganna literal a kaipapananna “daydiay agriing.”

² Idi a ni Jehova dinutokanna ni Jeremias kas propetana, dayta a pakabigbigan ti kayo nga almendro ket maitutop a mangyilustrar iti napateg a kinapudno. Iti rugrugi ti ministerio ti propeta, nasirmatana ti maysa a saringit dayta a kayo. Ania ti kaipapanan dayta? Inlawlawag ni Jehova: “Agtalinaedak a siririing maipapan iti saok tapno itungpalko dayta.” (Jer. 1:11, 12) No kasano a nasapa nga ‘agriing’ ti kayo nga almendro, ‘nasapa met a bumangon’ ni Jehova iti piguratibo nga anag tapno ibaonna dagiti propetana a mangpakdaar iti ilina maipapan iti dakes a pagbanagan ti kinasukirda. (Jer. 7:25) Ken saan nga aginana​—‘agtalinaed a siririing’​—agingga a matungpal ti sinaona. Idi 607 K.K.P., iti mismo a naikeddeng a tiempo, dimteng ti panangukom ni Jehova iti apostata a nasion ti Juda.

3. Ania ti masiguradotayo maipapan ken Jehova?

³ Kasta met ita, ni Jehova ket siririing wenno kanayon a nakasagana a mangitungpal iti pagayatanna.  Sigurado nga itungpalna ti saona. Ania ti epektona kenka ti panagbalin ni Jehova a kanayon a nakasagana? Kombinsidoka kadi nga iti daytoy tawen 2011, “siririing” ni Jehova a mangitungpal kadagiti karina? No adda panagduaduatayo kadagiti sigurado a kari ni Jehova, itan ti tiempo nga agriingtayo iti aniaman a naespirituan a panagdungsa. (Roma 13:11) Kas propeta ni Jehova, nagtalinaed a siririing ni Jeremias. Ti panangusig no kasano ken apay a nakapagtalinaed a siririing ni Jeremias iti inted-Dios nga annongenna tulongannatayo a makapagtultuloy iti trabaho nga inted kadatayo ni Jehova.

Naganat a Mensahe

4. Ania dagiti karit a nakaipasanguan ni Jeremias iti panangipakaammona iti mensahena, ken apay a naganat dayta?

⁴ Nalabit agtawen ni Jeremias iti agarup 25 idi dinutokan ni Jehova kas managwanawan. (Jer. 1:1, 2) Ngem iti panagriknana, isu ket maysa laeng nga ubing a saan a pulos a kualipikado a makisarita kadagiti lallakay iti nasion nga addaan iti autoridad. (Jer. 1:6) Agkakadagsen a pammabalaw ken nakabutbuteng a panangukom dagiti impakaammona, nangruna kadagiti papadi, ulbod a mammadto, ken agtuturay, agraman kadagidiay nangsurot iti “turongen ti kaaduan” ken nangpatanor iti “manayon a di kinamatalek.” (Jer. 6:13; 8:5, 6) Madadaelto ti nadayag a templo ni Ari Solomon, a sentro ti pudno a panagdayaw iti agarup uppat a siglo. Malangalangto ti Jerusalem ken Juda, ken makautibo dagiti umilina. Pudno a naganat ti mensahe a naibilin nga ipakaammo ni Jeremias!

5, 6. (a) Kasano nga us-usaren ita ni Jehova ti klase Jeremias? (b) Ania ti nakaipamaysaan ti panagadaltayo?

⁵ Iti kaaldawantayo, siaayat nga impaayan ni Jehova ti sangatauan iti grupo dagiti napulotan a Kristiano nga agserserbi kas piguratibo a managwanawan a mangipakdaar iti panangukom ti Dios iti daytoy a lubong. Adun a dekada a daytoy a klase Jeremias idagdagadagna kadagiti tattao nga agbalinda nga alerto iti tiempo a pagbibiagantayo. (Jer. 6:17) Ipaganetget ti Biblia a saan a nabannayat ni Jehova, ti Naindaklan a Manangikeddeng iti Tiempo. Dumteng ti aldawna iti eksakto a tiempo, iti oras a di ninamnama dagiti tattao.​—Sof. 3:8; Mar. 13:33; 2 Ped. 3:9, 10.

⁶ Ammo ti ili ni Jehova a dandaninan iyeg ti baro a lubongna. Gapuna, ammoda a bassiten ti tiempoda a mangasaba. Naganat ngarud nga ipakaammoda ita kadagiti tattao ti mensahe ni Jehova. Ania ti epekto dayta kenka? Impasimudaag ni Jesus a masapul a dumasig ti amin iti Pagarian ti Dios. Usigentayo ti tallo a galad a nakatulong ken Jeremias nga agtalinaed a siririing iti annongenna ken makatulong met kadatayo a mangaramid iti kasta.

Panagayat iti Tattao

7. Ilawlawagyo no kasano a ti ayat tinignayna ni Jeremias a mangasaba iti laksid dagiti narigat a kasasaad.

⁷ Ania ti nangtignay ken Jeremias a mangasaba iti laksid dagiti narigat a kasasaad? Ti panagayatna kadagiti tattao. Ammo ni Jeremias a dagiti palso a papastor parparigatenda dagiti tattao. (Jer. 23:1, 2) Dayta a pannakaammo ti nangtulong kenkuana a mangitungpal iti annongenna buyogen ti ayat ken asi. Kayatna a mangngeg dagiti kailianna dagiti sasao ti Dios tapno agbiagda. Gapu ta maseknan unay, sinangitanna ti didigra a mapagteng kadakuada. (Basaen ti Jeremias 8:21; 9:1.) Ti libro nga Un-unnoy silalawag nga iyanninawna ti dakkel a panagayat ken pannakaseknan ni Jeremias iti nagan ken ili ni Jehova. (Un. 4:6, 9) No makakitaka ita kadagiti tattao a ‘nalalatan ken naiwarawara a kasla karkarnero nga awanan pastor,’ saanka kadi a matignay a mangiranud iti makaliwliwa a damag maipapan iti Pagarian ti Dios?​—Mat. 9:36.

8. Ania ti mangipakita a saan a nagsakit ti nakem ni Jeremias uray no nagsagaba?

⁸ Nagsagaba ni Jeremias iti mismo nga ima dagiti tattao a kayatna a tulongan, ngem saan a nagibales wenno nagsakit ti nakemna. Nangipakita iti mabayag a panagitured ken kinaasi kadagiti tattao, uray iti dakes nga ari a ni Zedekias!  Kalpasan nga inyawatna tapno mapapatay, impakaasi latta ni Jeremias nga agtulnog koma daytoy nga ari iti sao ni Jehova. (Jer. 38:4, 5, 19, 20) Ti kadi panagayattayo kadagiti tattao ket kas kauneg iti panagayat ni Jeremias?

Inted-Dios a Kinatured

9. Apay a maibagatayo a naggapu iti Dios ti kinatured ni Jeremias?

⁹ Bimdeng ni Jeremias idi damo a nakisarita kenkuana ni Jehova. Ipakita dayta a saan a nainkasigudan ti kinatured ken kinatibkerna. Kinapudnona, ti naisangsangayan a bileg ni Jeremias bayat ti panagipadtona ket maigapu iti naan-anay a panagpannurayna iti Dios. Adda ni Jehova iti propeta ‘kas maysa a mannakabalin’ yantangay tinulongan ken pinabilegna ni Jeremias a mangitungpal iti annongenna. (Jer. 20:11) Pagaammo ti kinatured ni Jeremias ta bayat ti ministerio ni Jesus ditoy daga, impagarup ti dadduma nga isu ti napagungar a ni Jeremias!​—Mat. 16:13, 14.

10. Apay a maikunatayo a naparebbengan dagiti napulotan a natda ‘kadagiti nasion ken pagpagarian’?

¹⁰ Kas “Ari ti nasnasion,” ni Jehova binilinna ni Jeremias a mangipakaammo iti mensahe a pannakaukom ti nasnasion ken pagpagarian. (Jer. 10:6, 7) Iti ania nga anag a naparebbengan dagiti napulotan a natda ‘kadagiti nasion ken pagpagarian’? (Jer. 1:10) Kas iti nagkauna a propeta, ti klase Jeremias ket immawat iti annongen manipud iti Soberano ti uniberso. Gapuna, nadutokan dagiti napulotan nga adipen ti Dios a mamakdaar maibusor kadagiti nasion ken pagpagarian. Gapu ta inautorisaran ida ti Kangatuan a Dios ken us-usarenda ti nasin-aw a pagsasao a linaon ti naipaltiing a Saona, iwarwaragawag ti klase Jeremias a dagiti nasion ken pagpagarian ita ket maparut ken madadaelto iti inkeddeng ti Dios a tiempo ken iti bukodna a pamay-an. (Jer. 18:7-10; Apoc. 11:18) Determinado ti klase Jeremias nga agtultuloy a mangitungpal iti inted-Dios nga annongenda a mangipakaammo iti mensahe a panangukom ni Jehova iti intero a daga.

11. Ania ti makatulong kadatayo nga agtultuloy a mangasaba uray no maipasangotayo iti narigat a kasasaad?

¹¹ Gagangay a maupaytayo no dadduma gapu iti ibubusor, kinaaleng-aleng, ken narigat a kasasaad. (2 Cor. 1:8) Ngem kas ken Jeremias, masapul nga itultuloytayo ti agserbi ken ditay sumuko. Itultuloy koma ti tunggal maysa kadatayo ti umararaw iti Dios, agpannuray kenkuana, ken ‘agurnong iti tured.’ (1 Tes. 2:2) No aramidentayo dagita makapagtalinaedtayo a siririing kadagiti inted-Dios a responsabilidadtayo, a pakairamanan ti panangikasaba iti pannakadadael ti Kakristianuan, nga iladawan ti di matalek a Jerusalem. Saan laeng a ti “tawen ti naimbag a nakem iti biang ni Jehova” ti ideklara ti klase Jeremias no di ket “ti aldaw ti pammales iti biang ti Diostayo.”​—Isa. 61:1, 2; 2 Cor. 6:2.

Rag-o a Nagtaud iti Puso

12. Apay a maikunatayo a nataginayon ni Jeremias ti rag-ona, ken ania ti kangrunaan a makagapu a naaramidna dayta?

¹² Pagragsakan ni Jeremias nga itungpal ti trabahona. Kinunana ken Jehova: “Ti sasaom nasarakan, ket kinnanko ida; ket ti saom agbalin kaniak a panagragsak ken panagrag-o ti pusok; ta ti naganmo naipanagan kaniak, O Jehova.” (Jer. 15:16) Para ken Jeremias, maysa a pribilehio ti agbalin a pannakabagi ti pudno a Dios ken mangikasaba iti saona. Imutektekanyo ta idi pinampanunot ni Jeremias ti panangumsi kenkuana dagiti tattao, napukawna ti rag-ona. Ngem idi inut-utobna ti kinaimnas ken kinapateg ti mensahena, nagsubli ti rag-ona.​—Jer. 20:8, 9.

13. Apay a napateg ti pannangan kadagiti naun-uneg a naespirituan a kinapudno tapno mataginayon ti rag-otayo?

¹³ Tapno mataginayontayo ita ti rag-otayo iti trabaho a panangasaba, masapul a mangantayo iti “nakired a taraon,” dagiti nauneg a kinapudno iti Sao ti Dios. (Heb. 5:14) Makapabileg ti naan-anep a panagadal. (Col. 2:6, 7) Ipakitana kadatayo no ania ti marikna ni Jehova iti ar-aramidentayo. No marigatantayo a mangbirok iti  tiempo nga agbasa ken agadal iti Biblia, nasken a sukimatentayo ti eskediultayo. Uray ti sumagmamano laeng a minuto a panagadal ken panagutobtayo iti kada aldaw pasingedennatayo ken ni Jehova ken ‘paragsaken ken pagrag-oenna ti pusotayo,’ kas iti napasamak idi ken Jeremias.

14, 15. (a) Ania ti imbunga ti panagtalinaed ni Jeremias a matalek iti annongenna? (b) Ania ti bigbigen ti ili ti Dios maipapan iti trabaho a panangasaba?

¹⁴ Malaksid iti awan sardayna a panangipakaammo ni Jeremias kadagiti pakdaar ken panangukom ni Jehova, impapusona pay ti annongenna a “mangbangon ken mangimula.” (Jer. 1:10) Adda nasayaat nga imbunga ti trabahona nga agibangon ken agimula. Dadduma a Judio agraman dagiti saan nga Israelita, a kas kadagiti Recabita, ni Ebed-melec ken Baruc, ti nakalasat iti pannakadadael ti Jerusalem idi 607 K.K.P. (Jer. 35:18, 19; 39:15-18; 43:5-7) Dagita a nasungdo ken managbuteng iti Dios a gagayyem ni Jeremias maitutop nga iladawanda ita dagiti addaan iti naindagaan a namnama a gagayyem met ti klase Jeremias. Maragsakan unay ti klase Jeremias a mangpabpabileg iti pammati ti “dakkel a bunggoy.” (Apoc. 7:9) Umasping iti dayta, dagitoy a nasungdo a kakadua dagiti napulotan maragsakanda unay a mangtulong kadagiti nasingpet a tattao a mangammo iti kinapudno.

 ¹⁵ Bigbigen ti ili ti Dios a ti panangikasaba iti naimbag a damag ket saan laeng a panagserbi iti publiko para kadagidiay dumngeg no di ket maysa dayta a kita ti panagdayaw iti Diostayo. Adda man interesado wenno awan no mangasabatayo, mangyeg kadatayo iti dakkel a rag-o ti sagrado a panagserbitayo ken Jehova.​—Sal. 71:23; basaen ti Roma 1:9.

‘Agtalinaedkayo a Siririing’ iti Annongenyo!

16, 17. Kasano nga ipakita ti Apocalipsis 17:10 ken Habakuk 2:3 ti kinaganat ti tiempotayo?

¹⁶ Maipaganetget ti kinaganat iti tiempo a pagbibiagantayo no usigentayo ti naipaltiing a padto iti Apocalipsis 17:10. Timmaud ti maikapito nga ari, ti Anglo-Americano a Kabilgan a Turay. Kastoy ti mabasatayo maipapan iti dayta: “Inton dumteng [ti maikapito a kabilgan a turay] masapul nga agtalinaed iti bassit a kanito.” Ita, asidegen nga agpatingga dayta a “bassit a kanito.” Maipapan iti panungpalan daytoy dakes a sistema, impasigurado kadatayo ni propeta Habakuk: “Ti sirmata agpaay pay laeng iti naituding a tiempo . . . Agtultuloyka a manginanama iti dayta; ta di bumurong a pumudnonto. Saanto a maladaw.”​—Hab. 2:3.

¹⁷ Isaludsodmo iti bagim: ‘Iyan-anninaw kadi ti wagas ti panagbiagko a bigbigek ti kinaganat ti tiempotayo? Ipakpakita kadi dayta a namnamaek nga asidegen a dumteng ti panungpalan? Wenno ipasimudaag kadi dagiti desision ken prioridadko a mabayag pay ti panungpalan wenno pagduaduaak pay ketdi ti idadateng dayta?’

18, 19. Apay a saan a tiempo ita a guminadtayo?

¹⁸ Saan pay a nalpas ti trabaho ti klase managwanawan. (Basaen ti Jeremias 1:17-19.) Anian a rag-o ti itden kadatayo ti pannakaammo a ti napulotan a natda ket sititibker a nakatakder, a kasla “adigi a landok” ken “maysa a nasarikedkedan a siudad”! Arigna a ‘nabariksan dagiti lomoda iti kinapudno’ gapu ta ipalpalubosda a pabilgen ida ti Sao ti Dios agingga a mairingpasda ti annongenda. (Efe. 6:14) Buyogen ti kasta met la a determinasion, ti dakkel a bunggoy aktibo a supsuportaranda ti klase Jeremias a mangitungpal iti inted-Dios nga annongenda.

¹⁹ Saan a tiempo ita a guminadtayo iti trabaho a mainaig iti Pagarian. Imbes ketdi, usigentayo ti kababagas ti Jeremias 12:5. (Basaen.) Maipaspasangotayo amin kadagiti suot a masapul nga ibturantayo. Dagita a pakasuotan ti pammatitayo ket mabalin a mayarig iti “lallaki a magmagna” a masapul a danggayantayo. Ngem bayat nga umad-adani ti “dakkel a rigat,” namnamaentayo a kumarkaro dagiti pakarigatan. (Mat. 24:21) Ti panangdaer kadagiti narigrigat a pakasuotan a dumteng iti masanguanan ket mayarig iti ‘pannakilumba kadagiti kabalio.’ Agkalikagum dayta iti dakkel a panagibtur tapno madanggayan ti maysa ti napartak a panagtaray dagiti kabalio. Gapuna, pagsayaatantayo no ibturantayo dagiti suot a mapaspasarantayo ita ta dayta ti mangisagana kadatayo a mangibtur kadagiti dumtengto a pakasuotan.

20. Ania ti determinado nga aramidem?

²⁰ Kabaelantayo amin a tuladen ni Jeremias ken itungpal a sibaballigi ti annongentayo a mangasaba! Dagiti galad kas iti ayat, kinatured, ken rag-o ti nangtignay ken Jeremias a simamatalek a mangitungpal iti ministeriona iti unos ti 67 a tawen. Ti nagpintas a sabong ti almendro ipalagipna kadatayo a “siririing” ni Jehova a mangitungpal iti saona. Gapuna, adda panggapuantayo a mangaramid met iti kasta. ‘Nagtalinaed a siririing’ ni Jeremias, ket maaramidantayo met dayta.

Malagipyo Kadi?

• Kasano a ti ayat tinulonganna ni Jeremias nga ‘agtalinaed a siririing’ iti annongenna?

• Apay a kasapulantayo ti tured nga aggapu iti Dios?

• Ania ti nakatulong ken Jeremias a nangtaginayon iti rag-ona?

• Apay a kayatmo ti ‘agtalinaed a siririing’?

[Salsaludsod]

[Dagiti Ladawan iti panid 31]

Agtultuloyka kadi a mangasaba iti laksid dagiti ibubusor?