Mangyeg iti Agnanayon a Biag ti Pananggun-od iti Anamong ti Dios

“Sika bendisionamto ti asinoman a nalinteg, O Jehova; kas iti maysa a dakkel a kalasag, palikmutamto ida iti anamong.”​—SAL. 5:12.

1, 2. Ania ti kiniddaw ni Elias iti balo a taga-Sarepta, ken ania ti impanamnamana kenkuana?

 MABISBISINEN ti balo a taga-Sarepta ken ti anakna, kasta met ti propeta ti Dios. Bayat nga agsagsagana ti balo a mangaron, nagkiddaw kenkuana ni propeta Elias iti danum ken tinapay. Sidadaan a mangted iti danum ngem ti adda laeng a taraonda ket ‘sangarakem nga arina iti dakkel a burnay ken sangkabassit a lana iti putik.’ Para kenkuana, awan ti umdas a taraon a mairanudna isu nga imbagana dayta iti propeta.​—1 Ar. 17:8-12.

² “Manipud iti adda dita iyaramidannak nga umuna iti bassit a nagbukel a tinapay,” imbilin ni Elias, “ket iruarmonto dayta kaniak, ket kalpasanna mabalinmo ti mangisagana iti agpaay kenka ken iti anakmo. Ta daytoy ti kinuna ni Jehova a Dios ti Israel, ‘Ti met laeng dakkel a burnay ti arina saanto a maibusan, ket ti met laeng putik ti lana saanto a makurangan.’”​—1 Ar. 17:13, 14.

3. Ania a napateg a desision ti masapul nga aramidentayo?

³ Adda napatpateg a desision a masapul nga aramiden ti balo ngem iti basta panangikeddeng no iranudna wenno saan ti sangkabassit a taraonda. Agtalek kadi ken Jehova nga ispalenna ida nga agina wenno ipangpangrunana dagiti material a kasapulanda ngem iti pananggun-od iti anamong ken pannakigayyem iti Dios? Maipaspasangotayo iti umasping a situasion. Ad-adda kadi a pakaseknantayo ti pananggun-od iti anamong ni Jehova ngem iti panangyun-una iti material a bambanag? Masapul nga agtalek ken agserbitayo iti Dios. Ken adda dagiti addang a mabalintayo nga aramiden tapno magun-odtayo ti anamongna.

‘Maikarika nga Umawat iti Dayaw’

4. Apay a maikari ni Jehova a dayawentayo?

⁴ Adda kalintegan ni Jehova a mangnamnama nga agserbi kenkuana dagiti tattao iti pamay-an nga anamonganna. Nagkaykaysa a pinatalgedan  dayta ti maysa a grupo dagiti nailangitan nga adipenna, a kunkunada: “Maikarika, Jehova, a mismo a Diosmi, nga umawat iti dayag ken iti dayaw ken iti pannakabalin, agsipud ta pinarsuam ti amin a bambanag, ket gapu iti pagayatam napaaddada ken naparsuada.” (Apoc. 4:11) Maikari ni Jehova a dayawentayo gapu ta isu ti Namarsua.

5. Apay a rumbeng a matignaytayo nga agserbi ti Dios gapu iti panagayatna kadatayo?

⁵ Ti maysa pay a rason nga agserbitayo ken Jehova ket ti awan kaasping a panagayatna kadatayo. Kuna ti Biblia: “Ti Dios pinarsuana ti tao iti ladawanna, iti ladawan ti Dios isu pinarsuana; pinarsuana ida a lalaki ken babai.” (Gen. 1:27) Addaan ti tao iti pribilehio ken responsabilidad a mangikeddeng no agserbi iti Dios wenno saan ken iti abilidad nga agdesision. Nagbalin ni Jehova nga Amatayo gapu ta isu ti gubuayan ti biagtayo. (Luc. 3:38) Kas iti maysa a nasingpet nga ama, inaramidna ti amin tapno maipaayna ti kasapulan dagiti annakna, iti kasta, matagiragsakda ti biag. “Pagleggakenna ti initna” ken “pagtuduenna,” tapno maaddaan ti planeta a Daga iti napintas nga aglawlaw ken makapataud iti nawadwad a taraontayo.​—Mat. 5:45.

6, 7. (a) Ania a nakas-ang nga epekto ti inyeg ni Adan iti amin a kaputotanna? (b) Anianto ti maaramidan ti daton ni Kristo kadagidiay manggunggun-od iti anamong ti Dios?

⁶ Inispalnatayo met ni Jehova manipud kadagiti nakas-ang nga epekto ti basol. Idi nagbasol ni Adan, nagbalin a kasla maysa a sugador a taktakawanna ti pamiliana tapno adda isugalna. Gapu iti panagrebeldena ken Jehova, impaidam ni Adan kadagiti annakna ti namnamada nga agnanayon a kinaragsak. Ti kinamanagimbubukodanna ti nangituggod iti sangatauan iti panangadipen ti naulpit nga apo, ti kinaimperpekto. Gapuna, amin a tao ket agsakit, maldaangan, ken matay inton agangay. Tapno mawayawayaan ti maysa nga adipen masapul nga adda gatad a maibayad. Umasping iti dayta, nagbayad ni Jehova tapno maispaltayo kadagiti nakas-ang nga epekto ti basol. (Basaen ti Roma 5:21.) Maitunos iti pagayatan ni Amana, impaay ni Jesu-Kristo ti “kararuana kas subbot a kasukat dagiti adu.” (Mat. 20:28) Iti din agbayag, dagiti nakagun-od iti anamong ti Dios matagiragsakdanto ti naan-anay a gunggona nga itden ti naibayad a subbot.

⁷ Ti Namarsua kadatayo a ni Jehova inaramidna ti amin tapno maipaayna ti kasapulantayo, iti kasta, agbalin a naragsak ken makagunggona ti biagtayo. No magun-odtayo ti anamongna, makitatayto no kasano nga ikkatenna ti amin a panagsagaba a mapaspasaran ti sangatauan. Ipakitanto ni Jehova iti tunggal maysa kadatayo nga isu ti “mananggunggona kadagidiay sipapasnek a mangsapsapul kenkuana.”​—Heb. 11:6.

“Dagiti Tattaom Situtulok nga Idatondanto ti Bagbagida”

8. Ania ti maadaltayo iti kapadasan ni Isaias no iti panagserbi iti Dios?

⁸ Tapno magun-odtayo ti anamong ti Dios, masapul a siuumiso nga usarentayo ti wayawayatayo nga agpili. Saan ngamin a pilpiliten ni Jehova ti asinoman nga agserbi kenkuana. Insaludsodna idi kaaldawan ni Isaias: “Siasinonto ti ibaonko, ket siasinonto ti mapan a maipaay kadakami?” Pinadayawan ni Jehova ti propeta babaen ti panangbigbigna iti kalintegan daytoy a mangngeddeng. Panunotenyo laengen ti ragsak ni Isaias idi kinunana: “Adtoyak! Ibaonnak.”​—Isa. 6:8.

9, 10. (a) Ania ti rumbeng a kababalintayo nga agserbi iti Dios? (b) Apay a maitutop nga agserbitayo ken Jehova iti amin-kararuatayo?

⁹ Dagiti tattao ti mangikeddeng no agserbida iti Dios wenno saan. Kayat ni Jehova a situtuloktayo nga agserbi kenkuana. (Basaen ti Josue 24:15.) Saan a maragsakan ti Dios kadagidiay mapilpilit nga agdayaw kenkuana; dina met awaten ti panagserbi dagidiay a ti motiboda ket mangay-ayo laeng iti padada a tao. (Col. 3:22) No ‘bumdengtayo’ a mangipaay iti sagrado a panagserbi babaen ti panangipalubostayo a dagiti nailubongan a bambanag ti mangsinga iti panagdayawtayo, ditay magun-od ti anamong ti Dios. (Ex. 22:29) Ammo ni Jehova a pagimbagantayo ti amin-kararua a panagserbitayo kenkuana. Indagadag  ni Moises kadagiti Israelita a pilienda ti biag ‘babaen ti panangayatda ken Jehova a Diosda, babaen ti panagimdengda iti timekna ken babaen ti panagtalinaedda kenkuana.’​—Deut. 30:19, 20.

¹⁰ Ni Ari David iti nagkauna nga Israel inkantana ken Jehova: “Dagiti tattaom situtulok nga idatondanto ti bagbagida iti aldaw ti puersa militarmo. Kadagiti kinangayed ti kinasanto, manipud iti aanakan ti bannawag, addaanka iti bunggoy dagiti agtutubo a tattao a kas kadagiti amor.” (Sal. 110:3) Adu a tattao ita ti mangyun-una iti kinabaknang ken paglinglingayan. Ngem ti sagrado a panagserbi ti kapatgan kadagidiay mangay-ayat ken Jehova. Paneknekan dayta ti kinaregtada a mangikasaba iti naimbag a damag. Naan-anay nga agtalekda a kabaelan ni Jehova nga ipaay ti inaldaw a kasapulanda.​—Mat. 6:33, 34.

Dagiti Sakripisio nga Anamongan ti Dios

11. Ania a gunggona ti manamnama a masagrap dagiti Israelita no mangidatagda iti sakripisio ken Jehova?

¹¹ Iti sidong ti Linteg ti tulag, masapul a mangidatag ti ili ti Dios iti makaay-ayo a sakripisio tapno magun-odda ti anamongna. Kuna ti Levitico 19:5: “No kas pagarigan agisakripisiokayo iti pakikaykaysa a sakripisio ken Jehova, isakripisioyo dayta tapno magun-odanyo ti anamong maipaay iti bagbagiyo.” Mabasatayo iti isu met laeng a libro ti Biblia: “No kas pagarigan mangisakripisiokayo iti sakripisio ti panagyaman ken Jehova, rebbeng nga isakripisioyo tapno magun-odan ti anamong maipaay kadakayo.” (Lev. 22:29) No mangidatag dagiti Israelita iti maitutop a daton nga animal iti altar ni Jehova, ti asuk nga agpangato ket arigna “makabang-ar a sayamusom” iti pudno a Dios. (Lev. 1:9, 13) Maay-ayo ken mabang-aran ti Dios kadagita nga ebkas ti ayat dagiti adipenna. (Gen. 8:21) Kadagitoy nga aspeto ti Linteg, adda dagiti prinsipio nga agaplikar ita. Anamongan ni Jehova dagita a maidatag a makaay-ayo a sakripisio. Ania dagiti sakripisio nga awatenna? Usigentayo ti dua a banag: ti kondukta ken panagsasaotayo.

12. Ania dagiti aramid a mamagbalin a makarimon iti Dios ti panangidatag iti ‘bagitayo kas sakripisio’?

¹² Iti surat ni apostol Pablo kadagiti taga-Roma, kinunana: “Iparangyo ti bagbagiyo a maysa a sakripisio a sibibiag, nasantuan, makaay-ayo iti Dios, maysa a sagrado a panagserbi buyogen ti pannakabalinyo nga agrason.” (Roma 12:1) Masapul a ti maysa taginayonenna ti bagina a makaay-ayo iti Dios tapno magun-odna ti anamong ti Dios. No rugitanna dayta babaen ti panagusarna iti sigarilio, bua, droga, wenno nalabes a panaginum iti arak, awan serserbi ti datonna. (2 Cor. 7:1) Kanayonanna, aniaman nga imoral a kondukta pagbalinenna a makarimon ken Jehova ti sakripisio ti maysa yantangay daydiay “mangyugali iti pannakiabig agbasbasol a maikaniwas iti bukodna a bagi.” (1 Cor. 6:18) Tapno maay-ayo ti Dios, masapul nga ‘agbalin ti maysa a nasantuan iti isuamin a kababalinna.’​—1 Ped. 1:14-16.

13. Apay a maitutop ti panangidayawtayo ken Jehova?

¹³ Ti sabali pay a sakripisio a makaay-ayo ken  Jehova ket mainaig iti panagsasaotayo. Dagidiay mangay-ayat ken Jehova kanayon nga agsaoda iti naimbag maipapan kenkuana iti publiko ken iti uneg ti pagtaenganda. (Basaen ti Salmo 34:1-3.) Basaenyo ti Salmo 148-150, ken paliiwenyo no kasano kasansan a paregtaennatayo dagitoy a tallo a salmo a mangidayaw ken Jehova. Wen, “iti biang dagidiay napalungdo mayanatup ti panangidaydayaw.” (Sal. 33:1) Ken ti Pagwadantayo a ni Jesu-Kristo impaganetgetna ti kinapateg ti panangidayaw iti Dios babaen ti panangikasaba iti naimbag a damag.​—Luc. 4:18, 43, 44.

14, 15. Ania a sakripisio ti imbalakad ni Oseas nga ipaay dagiti Israelita, ken ania ti reaksion ni Jehova iti dayta?

¹⁴ Ti kinaregtatayo a mangasaba paneknekanna ti panagayattayo ken ni Jehova ken ti tarigagaytayo a manggun-od iti anamongna. Kas pagarigan, usigentayo no kasano a binalakadan ni propeta Oseas dagiti Israelita a nakiraman iti palso a panagdayaw ken nakapukaw iti anamong ti Dios. (Os. 13:1-3) Kinuna ni Oseas nga ipakaasida ken Jehova: “Mamakawanka koma iti biddut; ket awatem no ania ti naimbag, ket kas pangsubad idatonminto dagiti urbon a toro dagiti bibigmi.”​—Os. 14:1, 2.

¹⁵ Ti toro ti kanginaan nga animal a mabalin nga idaton dagiti Israelita ken ni Jehova. Gapuna, ‘dagiti urbon a toro dagiti bibigtayo’ iladawanda ti naimpusuan, napudno a sasao a mangidayaw iti pudno a Dios. Ania ti reaksion ni Jehova kadagidiay mangipapaay iti kasta a sakripisio? Kinunana: “Ayatekto ida iti bukodko a sibubulos a nakem.” (Os. 14:4) Kadagidiay mangipapaay iti kasta a sakripisio ti panagdayaw, manamnamada ti pammakawan, anamong, ken pannakigayyem kadakuada ni Jehova.

16, 17. No ti pammati iti Dios ti mangtignay iti maysa a mangikasaba iti naimbag a damag, ania ti marikna ni Jehova iti panagdayaw dayta a tao?

¹⁶ Ti panangidaydayaw ken Jehova iti publiko ket kanayon a nagpateg a paset ti pudno a panagdayaw. Nakapatpateg iti salmista ti panangidayawna iti pudno a Dios isu nga impakaasina: “Pangngaasim pagragsakam dagiti boluntario a daton ti ngiwatko, O Jehova.” (Sal. 119:108) Komusta met ita? Impadto ni Isaias maipapan iti dakkel a bunggoy dagiti tattao iti kaaldawantayo: ‘Dagiti pakaidaydayawan ni Jehova iwaragawagdanto. Buyogen ti pannakaanamong dagiti sagutda umulidanto iti altar ti Dios.’ (Isa. 60: 6, 7) Kas kaitungpalanna, minilion ti mangipapaay iti Dios iti “sakripisio ti panagdaydayaw, kayatna a sawen, ti bunga dagiti bibig a mangaramid iti publiko a panangideklara iti naganna.”​—Heb. 13:15.

¹⁷ Sika met ngay? Mangipapaayka kadi iti Dios iti makaay-ayo a sakripisio? No saan, sidadaanka kadi a mangaramid iti panagbalbaliw ken rugiamon nga idaydayaw ni Jehova iti publiko? No ti pammatim tignayennaka a mangikasaba iti naimbag a damag, ti datonmo ket ‘ad-addanto a makaay-ayo ken Jehova ngem iti maysa a toro.’ (Basaen ti Salmo 69:30, 31.) Manamnamam a makagteng ken Jehova ti “makabang-ar a sayamusom” ti sakripisio a panangidaydayawmo kenkuana ken magun-odmo ti anamongna. (Ezeq. 20:41) Iti kasta, mariknamto ti awan kaaspingna a ragsak.

‘Bendisionanto ni Jehova ti Asinoman a Nalinteg’

18, 19. (a) Ania ti panangmatmat ti adu a tattao ita iti panagserbi iti Dios? (b) Ania ti pagbanagan ti pannakapukaw iti anamong ti Dios?

¹⁸ Kas idi tiempo ni Malakias, adu a tattao ita ti nakagteng iti isu met laeng a konklusion: “Awan pategna ti agserbi iti Dios. Ket ania ti magunggona iti panangsalimetmettayo iti pagrebbengan kenkuana?” (Mal. 3:14) Gapu ta materialistikoda,  pagduaduaanda ti abilidad ni Jehova a mangitungpal iti panggepna ken matmatanda a saanen nga agaplikar dagiti lintegna. Para kadakuada, makapasuron ken panangsayang laeng iti tiempo ti panangikasaba iti naimbag a damag.

¹⁹ Namunganay dagita a kababalin idiay hardin ti Eden. Ni Satanas ti nangallukoy ken Eva a mangilaksid iti anamong ti Dios ken iti pudno a pateg ti nagsayaat a biag nga inted ni Jehova kenkuana. Kanayon nga al-allukoyen ita ni Satanas dagiti tattao a mamati nga awan ti magunggonada no aramidenda ti pagayatan ti Dios. Ngem napaneknekan da Eva ken Adan a ti pannakapukawda iti anamong ti Dios kaipapananna ti pannakapukawda iti biagda. Dagidiay mangtultulad iti di nasayaat nga ulidanda mabigbigdanto met nga umiso dayta.​—Gen. 3:1-7, 17-19.

20, 21. (a) Ania ti inaramid ti balo a taga-Sarepta, ken ania ti resultana? (b) Kasano ken apay a rumbeng a tuladentayo ti ulidan ti balo a taga-Sarepta?

²⁰ Ti nakalkaldaang a nagbanagan da Adan ken Eva ket naiduma iti resulta dagiti pasamak a nadakamat itay maipapan ken ni Elias ken ti balo a taga-Sarepta. Kalpasan a nangngegna dagiti makaparegta a sasao ni Elias, nagluto ti balo ket immuna a pinakanna ti propeta iti sumagmamano a tinapay. Kalpasanna, tinungpal ni Jehova ti inkarina babaen ken Elias. Kuna ti salaysay: “Nagtultuloy a mangan, isu agraman kenkuana ken ti sangakabbalayanna, iti adu nga aldaw. Ti met laeng dakkel a burnay ti arina saan a naibusan, ket ti met laeng putik ti lana saan a nakurangan, maitunos iti sao ni Jehova a sinaona babaen ken Elias.”​—1 Ar. 17:15, 16.

²¹ Sumagmamano laeng kadagiti binilion a tattao ita ti situtulok a mangtulad iti inaramid ti balo a taga-Sarepta. Naan-anay a nagtalek nga ispalen ti Dios, ket saan a binaybay-an ni Jehova. Dayta ken ti dadduma pay a salaysay ti Biblia patalgedanna a maikari ni Jehova a pagtalkantayo. (Basaen ti Josue 21:43-45; 23:14.) Ti kapadasan dagiti Saksi ni Jehova ita ket mangted iti kanayonan a pammaneknek a saan a pulos a baybay-an ti Dios dagidiay an-anamonganna.​—Sal. 34:6, 7, 17-19. a

22. Apay a naganat a gun-odentayo itan ti anamong ti Dios?

²² Asidegen ti aldaw ti panangukom ti Dios “kadagidiay amin nga agnanaed iti rabaw ti intero a daga.” (Luc. 21:34, 35) Sigurado a dumteng dayta. Awan kaimudingan ti kinabaknang wenno material a kinanam-ay no idilig iti kinapateg ti panangipangag iti kunaen ti Ukom a dinutokan ti Dios: “Umaykayo, dakayo a binendisionan ni Amak, tawidenyo ti pagarian a naisagana kadakayo.” (Mat. 25:34) Wen, ‘bendisionanto ni Jehova ti asinoman a nalinteg; kas iti maysa a dakkel a kalasag, palikmutannanto ida iti anamong.’ (Sal. 5:12) Saan kadi a rumbeng laeng a gun-odentayo ti anamong ti Dios?

[Footnote]

Malagipyo Kadi?

• Apay a maikari ni Jehova iti naimpusuan a panagdayawtayo?

• Ania dagiti sakripisio nga awaten ita ni Jehova?

• Ania ti iladawan dagiti ebkas a ‘dagiti urbon a toro dagiti bibigtayo,’ ken apay a rumbeng nga ipaaytayo dagita ken Jehova?

• Apay a rumbeng a gun-odentayo ti anamong ti Dios?

[Salsaludsod]

[Ladawan iti panid 13]

Ania ti kiniddaw ti propeta ti Dios nga aramiden ti napanglaw ken mabisbisin a balo?

[Ladawan iti panid 15]

Ania a gunggona ti masagraptayo no mangipaaytayo iti sakripisio a mangidaydayaw ken Jehova?

[Ladawan iti panid 17]

Dikanto pulos mapaay no naan-anay nga agtalekka ken Jehova