Isuroyo Dagiti Annakyo nga Agbalin a Nadayaw

KUNA ti kaaduan: “Ti nadayaw nga ubing, pakaay-ayuan ti amin.” Ipakita dagita a sasao a kaay-ayo ken nasaysayaat ti panangtrato dagiti tattao kadagidiay nadayaw.

Nagsayaat a kalangen dagiti nadayaw nga ubbing! Iti pannakikaduana iti nagduduma ti edadda nga agibumbunannag bayat ti panangasaba iti binalaybalay, napaliiw ti maysa a manangaywan iti sirkito idiay Honduras: “Masansan a madlawko a ti nadayaw ken nasayaat ti pannakasanayna nga ubing ket dakdakkel ti epektona iti bumalay ngem kadagiti sasaok.”

Kadagitoy a tiempo nga umad-adu dagiti saan a nadayaw, praktikal ken makagunggona no ammotayo no kasano a tratuen ti sabsabali. Kanayonanna, balakadannatayo ti Kasuratan nga ‘agtignaytayo iti pamay-an a maikari iti naimbag a damag maipapan iti Kristo.’ (Fil. 1:27; 2 Tim. 3:1-5) Nagpateg a suruantayo dagiti annaktayo nga agbalin a nadayaw iti sabsabali. Kasano a maisuro kadakuada a ti panagbalinda a nadayaw ket saan a pammarang laeng? a

Isuroyo ti Nasayaat a Kababalin Babaen ti Ulidanyo

Makasursuro dagiti ubbing babaen ti panangtuladda kadagiti ulidan a makitada. Gapuna, ti maysa a kangrunaan a pamay-an a maisuro dagiti nagannak ti annakda nga agbalin a nadayaw ket ti mismo a panagbalinda a nadayaw. (Deut. 6:6, 7) Napateg ti panangilawlawagyo kadagiti annakyo ti maipapan iti kinadayaw, ngem saan laeng a dayta ti kasapulan. Malaksid kadagiti pammalagip, sigurado a nagpateg ti nasayaat nga ulidanyo.

Usigenyo ti kapadasan ni Paula, b a napadakkel iti Kristiano a sangakabbalayan nga addaan iti agsolsolo a nagannak. Nayugalinan a raemen ti amin. Apay? Kunana: “Ni Nanang ti nangipakita iti ulidan, isu a gagangay laengen kadakami nga annakna ti agbalin a nadayaw.” Ti maysa a Kristiano nga agnagan iti Walter insurona dagiti annakna a lallaki a mangraem iti di manamati a nanangda. Kinunana: “Inkagumaak nga insuro kadagiti annakko a raemenda ni nanangda kas iti panagraemko, a dida koma pulos kritkritikaren.” Intultuloy ni Walter nga isuro ti Sao ti Dios kadagiti annakna, ken inkararagna ti tulong ni Jehova. Maysa kadakuada ti agserserbi itan iti sanga nga opisina dagiti  Saksi ni Jehova, ken maysa pay ti payunir. Agpada nga ipatpateg ken raraemenda dagiti nagannakda.

Kuna ti Biblia: “Ti Dios ket Dios, saan a ti riribuk, no di ket ti talna.” (1 Cor. 14:33) Naurnos ti amin nga aramiden ni Jehova. Masapul nga ikagumaan dagiti Kristiano a tuladen daytoy a nadiosan a galad ken pagtalinaedenda a nadalimanek ti pagtaenganda. Dadduma a nagannak ti nangsanay kadagiti annakda a mangkupin iti nagiddaanda sakbay a mapanda agbasa, ikabilda dagiti badoda iti umiso a lugar, ken tumulongda iti trabaho iti balay. No makita dagiti annak a nadalimanek ken nadalus ti intero a pagtaengan, dakdakkel ti posibilidadna a pagtalinaedenda a nadalus ken naurnos ti kuarto ken alikamenda.

Kasano ti panangmatmat dagiti annakyo kadagiti masursuroda iti eskuelaan? Iyeb-ebkasda kadi ti apresasionda iti ar-aramiden dagiti mannursuroda para kadakuada? Kas nagannak, iyeb-ebkasyo kadi ti kasta a panangapresiar kadagiti mannursuroda? No ar-aramidenyo dayta, kasta met a kababalin ti ipakita dagiti annakyo kadagiti mannursuroda ken iti proyektoda iti eskuelaan. Apay a diyo paregtaen ida nga iyugalida ti agyaman kadagiti mannursuroda? Ti panangyebkas iti panagyaman iti maysa a nakaaramid iti naimbag kadakayo ket nagsayaat a pamay-an a panangipakita iti panagraem, iti man mannursuro, doktor, aglaklako, wenno iti asinoman. (Luc. 17:15, 16) Makomendaran dagiti agtutubo a Kristiano a naiduma kadagiti kaeskuelaanda gapu iti nadayaw ken nasayaat a konduktada.

Masapul a dagiti kameng ti kongregasion Kristiano ti mangipakita iti nasayaat nga ulidan no iti panagbalin a nadayaw. Anian a nagsayaat a makita dagiti ubbing iti uneg ti kongregasion a mangiparparangarang iti kinadayaw babaen ti panangibagada iti “pangngaasim” ken “pagyamanan”! No ipakita dagiti adulto ti panagraemda ken Jehova babaen ti panagimdengda kadagiti gimong, matignay dagiti ubbing a mangtulad kadakuada. Masursuro dagiti ubbing a raemen dagiti kaarrubada no mapaliiwda dagiti nasayaat a kababalin dagiti kakabsat iti Kingdom Hall. Kas pagarigan, ti agtawen iti uppat a ni Andrew ammonan ti agibaga iti “Excuse me” no magna iti sanguanan dagiti adulto.

Ania pay ti mabalin nga aramiden dagiti nagannak tapno maisuroda kadagiti annakda no ania a kababalin ti manamnama kadakuada? Masapul nga iwayaanda nga iranud kadagiti annakda dagiti nasursuroda manipud iti adu a pagarigan a masarakan iti Sao ti Dios.​—Roma 15:4.

Mangisuro Babaen Kadagiti Pagarigan iti Biblia

Sinuruan la ketdi ni Anna ti anakna a ni Samuel nga agruknoy iti sanguanan ti Nangato a Padi a ni Eli. Nalabit tallo wenno uppat laeng ti tawen ni Samuel idi impanna iti tabernakulo. (1 Sam. 1:28) Mabalinyo kadi a sursuruan ti bassit nga anakyo a mangibaga iti “naimbag a bigatyo,” “naimbag nga aldawyo,” “naimbag a rabiiyo,” wenno aniaman a pangkablaaw a gagangay iti lugaryo? Kas ken ubing a Samuel, agbalinto dagiti annakyo a makaay-ayo ken ‘ni Jehova ken kadagiti tattao.’​—1 Sam. 2:26.

 Apay a diyo usaren dagiti salaysay iti Biblia a mangitampok iti nagdumaan ti panagraem ken kinaawan panagraem? Kas pagarigan, idi kayat ti di matalek nga Ari Ocozias a makita ni propeta Elias, nangibaon iti ‘maysa a panguluen ti limapulo agraman ti limapulona a lallaki’ a mangsukon kenkuana. Sigugubsang a kinuna ti panguluen a masapul a kumuyog kenkuana ti propeta. Saan a kasta ti maitutop a pannakisarita iti maysa a pannakabagi ti Dios. Ania ti inaramid ni Elias? “Ala ket, no maysaak a lalaki ti Dios,” kinunana, “bumaba koma ti apuy manipud langlangit ket ibusennaka ken ti limapulom.” Kasta ti eksakto a napasamak. “Ti apuy bimmaba manipud langlangit ket inibusna isuna ken ti limapulona.”​—2 Ar. 1:9, 10.

Iti maikadua a gundaway, adda manen naibaon ken Elias a panguluen ti 50. Sigugubsang a binilinna ni Elias a kumuyog kenkuana. Gapuna, bimmaba manen ti apuy manipud langit. Kalpasanna, naibaon manen ken Elias ti sabali pay a panguluen ti 50. Nangipakita daytoy a lalaki iti panagraem. Imbes a binilinna ni Elias, nagparintumeng sa nagpakaasi: “Lalaki ti pudno a Dios, pangngaasim napateg koma kadagita matam ti kararuak ken ti kararua dagitoy limapulo nga adipenmo. Adtoy ti apuy bimmaba manipud langlangit ket inibusna ti dua nga immun-una a panguluen ti limapulo ken ti saglilimapuloda, ngem ita ti kararuak napateg koma kadagita matam.” Maitured ngata ni Elias ti agkiddaw iti apuy manipud langit a mangtalipupos iti daytoy a lalaki a mabutbuteng ngem nagsao a buyogen ti panagraem? Saan a pulos! Imbes ketdi, imbaga ti anghel ni Jehova a kumuyog ni Elias iti panguluen. (2 Ar. 1:11-15) Saan kadi nga ipaganetget dayta a nagpateg ti panangipakita iti panagraem?

Idi a dagiti Romano a soldado tiniliwda ni apostol Pablo iti templo, saanna nga impilit nga adda kalinteganna nga agsao. Sidadayaw a dinamagna iti maysa nga opisial: “Mapalubosanak kadi nga agsao kenka iti maysa a banag?” Kas resultana, naaddaan ni Pablo iti gundaway a mangidepensa iti bagina.​—Ara. 21:37-40.

Bayat a mabisbista, tinungpada ni Jesus. Nupay kasta, ammona ti maitutop a panagprotesta: “No di umiso ti panagsaok, saksiam ti maipapan iti dakes; ngem no umiso, apay a kabilennak?” Awan ti aniaman a biddut a masarakan iti sinao ni Jesus.​—Juan 18:22, 23.

Nangipaay met ti Sao ti Dios kadagiti pagarigan no kasanotayo nga agtignay no adda nangtubngar kadatayo ken no kasanotayo a sipapakumbaba a bigbigen ti kinaliwaytayo wenno ti naaramidantayo a basol. (Gen. 41:9-13; Ara. 8:20-24) Kas pagarigan, nagpadispensar ni Abigail gapu iti nagubsang a panangtrato ti asawana a ni Nabal ken ni David. Malaksid iti panagpadispensarna, nangted pay iti nawadwad a taraon kas sagut. Nagustuan ni David ti inaramid ni Abigail isu nga idi natay ni Nabal, innalana daytoy kas asawana.​—1 Sam. 25:23-41.

Isuroyo dagiti annakyo nga agbalin a nadayaw, iti sidong man ti narigat a kasasaad wenno basta panangipakita iti nasayaat a kababalin. ‘No pagsilnagentayo ti silawtayo iti sanguanan ti tattao’ iti kasta a pamay-an, ‘maidayawtayo ti Amatayo nga adda iti langit.’​—Mat. 5:16.

[Footnotes]