Ania Ngata ti Ibaga ti Anakyo?

NAGANNAK: Iti ruar Ti Pagwanawanan nga Enero 15, 2010, panid 16-20, nadakamat nga adda koma panagensayoyo a kadua dagiti annakyo. Nangipaay dayta nga artikulo kadagiti impormasion a makatulong kadakayo a mangisagana kadagiti annakyo a mangsango kadagiti karit iti eskuelaan. Mabalinyo nga aramiden dagita a panagensayo bayat ti Panagdaydayaw ti Pamiliayo.

ADU a karit ti pakaipaspasanguan dagiti ubbing a Saksi ni Jehova. Masansan a damagen dagiti kaeskuelaanda no apay nga adda dagiti aktibidad a dida pakiramanan, kas iti panagsaludo iti bandera, bertdey, ken project mainaig kadagiti piesta. Ania ngata ti isungbat ti anakyo no maipasango kadagiti kasta a saludsod?

Adda dagiti annak a Kristiano a mangibaga laeng iti: “Maiparit ngamin dayta iti relihionmi.” Makomendaran dagita nga ubbing gapu iti natibker a takderda. Mabalin nga awanen ti kanayonan a saludsod no kasta ti sungbatda. Ngem idagadag kadatayo ti Biblia a ‘sisasaganatayo koma nga agikalintegan iti sanguanan ti tunggal maysa nga agkalikagum kadatayo iti rason’ maipapan kadagiti patpatientayo. (1 Ped. 3:15) Tapno maaramidtayo dayta, saan nga umdas nga ibaga, “Maiparit ngamin dayta iti relihionmi.” Uray no saan nga umanamong kadatayo ti dadduma, mabalin nga adda dagiti mayat a mangammo no apay a kasta ti pangngeddengtayo.

Adu nga agtutubo a Saksi ti mangestoria kadagiti salaysay iti Biblia kadagiti kaeskuelaanda babaen ti panangusarda kadagiti publikasion kas iti Agsursuroka iti Naindaklan a Mannursuro. Mabalin a makatulong dagitoy a salaysay kadagiti annak a Saksi a mangilawlawag no apay nga ar-aramidenda wenno saanda nga ar-aramiden ti maysa a banag. Adda dagiti estudiante a kaay-ayoda ti umimdeng kadagiti estoria iti Biblia, ket adu a panagadal iti Biblia ti nairugi gapu iti dayta. Adda met dagidiay dida maanusan ti umimdeng iti intero nga estoria iti Biblia. Dadduma ngamin kadagita ket narigat a maawatan dagiti estudiante no saan a mailawlawag a naimbag. Idi a ni Minhee nga agtawen iti 11 ket inawis ti gayyemna iti maysa a selebrasion ti bertdey, kinunana: “Saan nga ibaga kadatayo ti Biblia a selebrarantayo ti bertdey. Sigun iti Biblia, napapatay ni Juan a Mammautisar bayat ti maysa a selebrasion ti bertdey.” Ngem malagip ni Minhee a kasla di naawatan ti gayyemna ti insungbatna.

No dadduma, makatulong ti panangipakitada kadagiti kaeskuelaanda iti maysa a ladawan wenno salaysay iti aniaman kadagiti librotayo. Ngem kasanon no dagiti mangimatmaton iti eskuelaan paritanda dagiti ubbing a mangipakita kadagiti narelihiosuan a publikasion kadagiti kaeskuelaanda? Kabaelanda kadi ti mangasaba uray awan ti publikasion? Kasanoyo a matulongan dagiti annakyo a mangidepensa iti patpatienda?

Agensayokayo

Makatulong ti panagensayo iti pagtaengan, ket dagiti nagannak ti agakem kas kaeskuelaan. Bayat nga ikagkagumaan dagiti annakyo nga idepensa ti pammatida, komendaranyo koma ti panagreggetda ken ipakitayo no kasanoda a mapasayaat pay ti pannakirinnasonda ken no apay a makagunggona dayta. Kas pagarigan, isingasingyo nga agusarda  kadagiti sasao a maawatan dagiti kaeskuelaanda. Kuna ni Joshua nga agtawen iti siam a di maawatan dagiti kaeskuelaanna dagiti sasao a “konsiensia” ken “kinasungdo.” Gapuna, nagusar kadagiti nalaka a maawatan a sasao no makirinnason kadakuada.​—1 Cor. 14:9.

Nupay agsaludsod ti dadduma nga estudiante, mabalin a mapukaw ti interesda no atiddog ti sungbat. Dagiti agtutubo a Saksi maparayrayda ti interes dagiti kaklaseda no iramanda ida iti saritaan ken makirinnasonda kadakuada. Kuna ni Haneul nga agtawen iti sangapulo, “Kaykayat dagiti kaeskuelaak ti makiraman iti saritaan ngem ‘tay dumngeg iti attiddog nga eksplanasion.” Tapno makiramanda iti saritaan, masapul nga agsaludsod ken umimdengka a naimbag no iyebkasda dagiti kapanunotanda.

Dagiti eksena iti kahon ipakitada no kasano a makirinnason dagiti Kristiano nga annak kadagiti kaeskuelaanda. Saanda a masapul a kabesaduen dagitoy yantangay saan nga agpapada dagiti ubbing ken agduduma ti reaksionda depende iti kasasaad. Gapuna, ti aramiden laeng ti agtutubo a Saksi ket alaenna ti kababagas dagita, iyebkas iti  bukodna a sasao, ken iti pamay-an a maitutop iti situasion ken kadagiti kaeskuelaanna. No adda annakyo nga ages-eskuela, padasenyo nga idrama dagitoy nga eksena.

Agkalikagum iti tiempo ken panagregget ti panangsanay kadagiti annak. Kayat dagiti Kristiano a nagannak nga itukit kadagiti annakda dagiti prinsipio ti Biblia ken allukoyen ida a mangyaplikar kadagita.​—Deut. 6:7; 2 Tim. 3:14.

Iti sumaganad a Panagdaydayaw ti Pamiliayo, padasenyo nga ensayuen a kadua dagiti annakyo dagiti nadakamat nga eksena. Kitaenyo no kasano kaepektibo dagitoy. Laglagipenyo a diyo koma ikabesa dagiti sungbat wenno sasao. Kinapudnona, mabalinyo nga ulit-uliten nga idrama ti eksena, a baliwbaliwanyo ti ibagayo ket kitaenyo no kasano nga ibagay dagiti annakyo ti sungbatda. Bayat nga ikagumaanda nga ilawlawag ti nakaibatayan ti patpatienda, tulonganyo ida nga agbalin a nainkalintegan ken naannad. Di agbayag, maisuroyo kadagiti annakyo no kasanoda nga idepensa ti patpatienda kadagiti kaeskuelaan, kaarruba, ken mannursuroda.

[Kahon/Ladawan iti panid 4, 5]

PANAGSELEBRAR ITI BERTDEY

Mary: Hi John. Kayatka koma nga imbitaran inton bertdeyk.

John: Nagsayaat man ta nalagipnak, Mary. Ngem ania aya ti aramidenyo?

Mary: Siempre, selebraranmi ti bertdeyk. Apay, diyo aya selselebraran ti bertdeym?

John: Saan.

Mary: Apay ngay? Ammom, nakaragragsak ti pamiliami idi nayanakak.

John: Naragsak met ti pamiliami idi nayanakak. Ngem panagkunak, saan a rason dayta tapno agselebrarkami iti tinawen. Adu a tattao ti mangibilang iti bagida a kapatgan bayat ti panangselebrarda iti bertdeyda. Ngem saan kadi a napatpateg ti Dios? Ken saan kadi a rumbeng nga agyamantayo kenkuana gapu ta inikkannatayo iti biag?

Mary: Kayatmo a sawen, saan a rumbeng a selebraranmi ti bertdeyk?

John: Adda kenka dayta, Mary. Ngem panunotem daytoy: Nupay adu a tattao ti maragsakan nga umawat kadagiti regalo no bertdeyda, kuna ti Biblia a naragragsak ti mangted ngem iti umawat. Imbes a bagitayo laeng ti ipangpangrunatayo no bertdeytayo, saan kadi a nasaysayaat nga agyamantayo iti Dios, maseknan kadagiti sabsabali, ken mangaramid iti kinaimbag kadakuada?

Mary: Diak man napanunot dayta. No kasta, didaka pulos regregaluan dagiti nagannakmo?

John: Regregaluandak, ngem saandan nga iyuray ti bertdeyk. Masansan a regaluandak iti aniaman a gundaway. Ay wen gayam, Mary, kayatmo kadi a maammuan no kasano a nangrugi ti panangselebrar iti bertdey?

Mary: Wen, kasano?

John: Inton bigat, estoriaek kenka ti maysa a makapainteres a napasamak a bertdey idi un-unana.

PANAGSALUDO ITI BANDERA

Gail: Claire, apay a dika agsalsaludo iti bandera?

Claire: Pagyamanan iti panangisaludsodmo iti dayta, Gail. Ngem mabalin kadi a maammuan no apay nga agsalsaludoka iti bandera?

Gail: Gapu ta ay-ayatek ti pagiliantayo.

Claire: Ammok nga ay-ayatem met ni nanangmo, Gail. Ngem saan aya a dimo met salsaluduan?

Gail: Wen nga agpayso. Panagkunak, agsalsaludoak iti bandera gapu ta raraemek dayta. Awan kadi ti panagraemmo iti bandera?

Claire: Adda. Ngem saantayo met a salsaluduan ti asinoman ken aniaman a banag a raraementayo, di ngamin?

Gail: Hustoka, raraemek ti maestratayo, ngem diak met salsaluduan. Panagkunak, diak ammo a talaga no apay nga agsalsaludoak iti bandera.

Claire: Ammom, Gail, adu a tao ti mangibaga a ti bandera ket simbolo ti pagilian. Ti panagsaludoda iti bandera kaipapananna nga aramidenda ti aniaman para iti pagilianda. Ngem saan a kasta ti panangmatmatko. Diak mabalin nga ited ti biagko para iti pagiliantayo gapu ta ti Dios ti nangted iti biagko. Itedko laeng ti biagko para kenkuana. Isu a nupay raemek ti bandera, diak agsalsaludo iti dayta.

Gail: Kasta gayam.

Claire: Ammom, maragsakanak ta nagsaludsodka. No kayatmo a maammuan no apay nga ar-aramidek wenno diak ar-aramiden ti maysa a banag, damagem laeng kaniak. Ay wen gayam, kuna ti Biblia nga idi un-unana, maysa nga ari iti Babilonia ti nangibilin kadagiti tattao nga agruknoyda iti imahen. Adda dagiti saan a nagruknoy uray kaipapanan dayta ti pannakapapatayda.

Gail: Talaga? Ania ti napasamak kadakuada?

Claire: Iyestoriakto kenka inton mangaldawta.

ELEKSION ITI ESKUELAAN

Mike: Tim, asino ti kayatmo nga agbalin a presidente iti klasetayo?

Tim: Dispensarem ngem awan ti asinoman a piliek kadakuada.

Mike: Apay met?

Tim: Adda napilikon a kasayaatan a lider. Kas maysa a Kristiano, inkarik a surotek ni Jesus. Isu a diak a mabalin ti agpili iti sabali a lider. Ammom kadi no apay nga ibilangko ni Jesus a kasayaatan a lider?

Mike: Saan, ken diak interesado a mangammo iti dayta.

Tim: Ala ngarud, ngem no kas pagarigan ta kayatmonto a maammuan, maragsakanakto a mangibaga kenka.

[Ladawan]

“Hi John. Kayatka koma nga imbitaran inton bertdeyk”

[Ladawan iti panid 3]

“Apay a dika agsalsaludo iti bandera?”