Nayanakak idi 1948 iti bassit a purok iti makin-abagatan a laud ti Nigeria. Iti dayta a tiempo, nabautisaran kas Saksi ni Jehova ni Angkel Moustapha, ti ub-ubing a kabsat ni Tatang, ken ti inauna a kabsatko a ni Wahabi. Idi siam ti tawenko, natay ni Tatang. Permi ti ladingitko. Imbaga ni Manong Wahabi a makitaminto manen ni Tatang inton mapagungar. Dayta a makaliwliwa a kinapudno ti nangtignay kaniak nga agadal iti Biblia. Nabautisaranak idi 1963. Nabautisaran met ti tallo pay a kakabsatko.

Idi 1965, nakikaduaak iti manongko a ni Wilson idiay Lagos. Na-enjoy-ko ti makikadua iti dadduma a regular pioneer iti Igbobi Congregation. Nakitak ti ragsak ken kinaregtada ket kayatko a kastaak met, isu nga idi Enero 1968, nagpayunirak metten.

Ni Albert Olugbebi ket maysa a Bethelite. Nangyurnos isuna iti espesial a miting para kadakami nga agtutubo maipapan iti panagkasapulan kadagiti special pioneer iti makin-amianan a Nigeria. Malagipko pay ti makatukay nga imbaga ni Brother Olugbebi: “Ubbingkayo pay. Usarenyo ti tiempo ken pigsayo para ken Jehova. Nakaad-adu ti trabaho ita!” Kayatko a tuladen ni propeta Isaias,  a mapan iti sadinoman a pangibaonan ni Jehova, isu a nagaplayak.​—Isa. 6:8.

Idi Mayo 1968, naibaonak kas special pioneer iti siudad ti Kano, iti makin-amianan a Nigeria. Napasamak dayta bayat ti Biafran War (1967-1970). Gapu iti gubat, nagadu ti nagsagaba ken natay iti makin-amianan a Nigeria. Idi kuan, simmublat a naparigat ti makindaya a Nigeria. Kinombinsirnak ti maysa a brother a saanakon a mapan. Ngem imbagak: “Pagyamanan iti pannakaseknam. Ngem ibabaonnak ni Jehova sadiay, isu a siguradoak a dinak baybay-an.”

Makapaladingit unay ti situasion idiay Kano. Gapu iti gubat, nadadael ti dakkel a siudad. No addakami iti ministerio, malabsanmi no dadduma dagiti bangkay dagiti namasaker bayat ti gubat. Agpayso nga adda sumagmamano a kongregasion idiay Kano, ngem kaaduan a kakabsat ti pimmanaw. Basbassit ngem 15 nga agibumbunannag ti nagbati, ket mabutbuteng ken maup-upayda. Ngem permi ti ragsak dagitoy a kakabsat idi simmangpetkami idiay nga innem nga special pioneer. Natignay unay dagiti kakabsat iti pammaregtami. Tinulonganmi ida a mangorganisar manen kadagiti gimong ken trabaho a panangasaba ken mangipatulod manen kadagiti reportda iti ministerio ken kadagiti order-da a publikasion iti sangay.

Sinursuromi nga special pioneer ti lengguahe a Hausa. Adu a lumugar ti dimngeg kadakami idi nangngegda ti mensahe ti Pagarian iti bukodda a lengguahe. Ngem nagan-annadkami ta saan a kayat dagiti miembro ti kadakkelan a relihion a mangasabakami. Naminsan, adda lalaki a nakaiggem iti kutsilio a nangkamat kadakami iti partner-ko. Imbag la ketdin ta naparpartakkami nga agtaray isu a saannakami a nakamatan! Uray no adda dagiti peggad, ‘natalgedkami’ iti tulong ni Jehova, ket immadu ti bilang dagiti agibumbunannag. (Sal. 4:8) Ita, nasuroken a 500 dagiti agibumbunannag iti 11 a kongregasion iti Kano.

Idi Agosto 1968, sumagmamano a bulan kalpasan ti kaaddak idiay Kano, naibaonak iti Niamey, ti  kabesera ti Republic of Niger, a kaduak ti dua pay nga special pioneer. Idi kuan, naammuanmi a ti Niger, iti West Africa, ti maysa kadagiti kapudotan a lugar iti daga. Malaksid nga ibturanmi ti pudot, masapul pay a sursuruenmi ti opisial a lengguaheda a French. Iti laksid dagitoy a pakarigatan, nagtalekkami ken Jehova ken nangasabakami iti Niamey a kadua ti sumagmamano nga agibumbunannag sadiay. Di nagbayag, dandani amin a makabasa idiay Niamey ket napaimaanmi iti libro a Ti Kinapudno a Mangiturong iti Biag nga Awan Inggana. Dagiti tattao payen ti umay kadakami tapno dumawatda iti kopiada!

Di nagbayag, nadlawmi a saan a kayat dagiti autoridad dagiti Saksi ni Jehova. Idi Hulio 1969, nagtataripnongkami para iti kaunaan nga asamblea sirkito iti pagilian. Agarup 20 ti immatender. Padpadaananmi ti panagbautisar ti dua a baro nga agibumbunannag. Ngem iti umuna nga aldaw ti asamblea, immay dagiti polis ken pinasardengda ti programa. Impandakami nga special pioneer ken ti manangaywan iti sirkito iti presinto. Kalpasan a napagsaludsodankami, imbagada nga agsublikami kabigatanna. Nariknami a baka mangriribuk dagiti autoridad, isu nga inyurnosmi a maangay ti palawag ti bautismo iti pribado a balay ken saanmi nga impadlaw ti panangbautisarmi kadagiti kandidato iti karayan.

Sumagmamano a lawas kalpasanna, siak ken ti lima pay nga special pioneer ket pinapanaw ti Ministry of the Interior. Inikkandakami iti 48 nga oras a pumanaw iti pagilian, ken dakamin ti mangipamuspusan iti ipapanawmi. Nagtulnogkami ket napankami iti sanga nga opisina ti Nigeria, a sadiay a naawatmi ti baro nga asaynmentmi.

Naibaonak iti bassit a purok ti Orisunbare. Na-enjoy-ko ti ministerio a kadua ti bassit a grupo dagiti agibumbunannag sadiay. Ngem kalpasan ti innem a bulan, imbaonnak ti sanga nga opisina nga agsubli iti Niger a sisiak. Nupay idi damo ket nakigtotak ken medio madanaganak, magagaranak a makakita manen kadagiti kakabsat iti Niger!

Nagsubliak iti Niamey. Kabigatanna, kalpasan a simmangpetak sadiay, adda negosiante a taga-Nigeria a nakalasin a maysaak a Saksi ni Jehova isu a nagsalsaludsod maipapan iti Biblia. Inyadalak iti Biblia. Ket kalpasan a naisardengna ti agsigarilio ken agbartek, nabautisaran. Naragsakak a nakikadua kadagiti kakabsat iti panangasaba iti nadumaduma a paset ti Niger ken nakakita iti agtultuloy a panagrang-ay ti nadumaduma a rehion sadiay. Idi damok ti mapan sadiay, 31 laeng ti Saksi iti pagilian; idi pimmanawak, addan 69.

Idi 1977, nagsubliak iti Nigeria para iti maysa a training. Kalpasan ti tallo a lawas a pannakasanayko, ti koordineytor ti Komite ti Sangay a ni Malcolm Vigo, impabasana ti maysa a surat manipud iti sangay ti Sierra Leone. Agbirbirokda iti nasalun-at  ken single a payunir a brother a makasao iti English ken French tapno agserbi kas manangaywan iti sirkito iti Guinea. Imbaga ni Brother Vigo a masansanayak para iti dayta nga asaynment. Inyunay-unayna a saan a nalaka dayta nga asaynment. “Panunotem pay a naimbag sakbaymo nga awaten,” imbagana. Ngem dagus nga insungbatko, “Ni Jehova ti mangibabaon kaniak, isu a mapanak.”

Napanak iti Sierra Leone ket nakasaritak dagiti kakabsat iti sanga nga opisina. Maysa a miembro ti Komite ti Sangay ti nangibaga kaniak, “Awan unay ti ammomi maipapan iti trabaho ti Pagarian idiay Guinea.” Nupay ti sanga nga opisina iti Sierra Leone ti mangas-asikaso iti trabaho a panangasaba iti Guinea, awan ti komunikasionda kadagiti kakabsat gapu iti gulo ti politika sadiay. Ken uray namin-adu a pinadas ti sangay ti mangibaon iti kabsat a bumisita sadiay, awan latta. Isu nga imbaondak iti Conakry a kabesera ti Guinea, tapno padasek ti mangala iti permit nga agbalinak a residente sadiay.

Idi nakasangpetak iti Conakry, napanak iti embassy ti Nigeria ket kinasaritak ti ambassador. Imbagak a kayatko ti mangasaba iti Guinea. Imbagana a pumanawakon ta baka maarestoak wenno nakarkaro pay ti mapasamak kaniak. “Agsublikan iti Nigeria ta idiayka a mangasaba,” imbagana, ngem insungbatko, “Diak kayat ti pumanaw.” Isu a nagsurat iti Guinean Minister of the Interior tapno tulongannak, ket talaga a tinulongannak ti minister.

Di nagbayag, nagsubliak iti sanga nga opisina ti Sierra Leone ket impakaammok kadagiti kakabsat ti desision ti minister. Permi ti ragsak dagiti kakabsat idi naammuanda a binendisionan ni Jehova ti biahek. Napatgan ti kiddawko nga agbalinak a residente ti Guinea!

Manipud 1978 agingga iti 1989, nagserbiak kas manangaywan iti sirkito iti Guinea, Sierra Leone, ken kas suno a manangaywan iti sirkito iti Liberia. Agkarasakitak idi damo. No dadduma, mapasamak dayta kadagiti nasulinek a lugar. Ngem impamuspusan dagiti kakabsat a maitaraydak iti ospital.

Naminsan, nagmalariaak iti nakaro, ken naaddaanak iti ariet. Idi immimbagak, naammuak a pagsasaritaan gayam idin dagiti kakabsat no sadino ti pangipumponanda kaniak! Uray adda dagidi a napeggad a situasion, diak pulos napanunot a panawan dagiti asaynmentko. Kombinsidoak a ti laeng Dios ti makaipaay kadatayo iti kasayaatan a proteksion. Ngamin, uray no mataytayo, kabaelannatayo a pagungaren.

Idi 1988, naam-ammok ti payunir a ni Dorcas. Nakapakpakumbaba ken ay-ayatenna unay ni Jehova. Nagkasarkami, ken kinaduanak iti trabaho iti sirkito. Nadungngo ken managsakripisio ni Dorcas. Tapno makapankami kadagiti kongregasion, magnakami iti agingga iti 25 a kilometro (15 a milia) nga awitmi ti gargaretmi. No ad-adayo dagiti kongregasion, aglugankami iti aniaman a mabalin a pagluganan iti napitak ken lasonglasong a kalsada.

 Nakaturtured ni Dorcas. Kas pagarigan, adda dagiti tiempo a masapul a bumallasiwkami iti karayan nga adu ti buayana. Naminsan, nagbiahekami iti lima nga aldaw, ngem naperdi dagiti kayo a rangtay isu a nagbangkakami. Idi tumakder ni Dorcas tapno sumanglad, natnag ketdin iti karayan. Adalem ti karayan, ken agpadakami a dimi ammo ti aglangoy. Adda met dagiti buaya sadiay. Imbag laengen ta adda dagiti agtutubo a bimmatok ken nangalaw kenkuana. Namin-adu a natagtagainepmi dayta a nakabutbuteng a pasamak. Ngem nagtultuloykami latta iti asaynmentmi.

Idi rugrugi ti 1992, nasorpresakami idi naammuanmi a masikog ni Dorcas. Agsardengkami kadin iti amin-tiempo a serbisio? Napanunotmi, “Rinegaluannakami ni Jehova!” Isu a Jahgift ti impanaganmi iti anakmi. Kalpasan ti uppat a tawen, addan ading ni Jahgift, ni Eric. Talaga a regalo kadakami ni Jehova ti dua nga annakmi. Nakapagserbi ni Jahgift iti sumagmamano a tiempo iti remote translation office iti Conakry, ket maysa met a ministerial nga adipen ni Eric.

Uray masapul a sumardeng ni Dorcas iti kina-special pioneer-na idi agangay, nagtultuloy latta isuna kas regular pioneer bayat a padpadakkelenna dagiti annakmi. Iti tulong ni Jehova, nakapagtultuloyak nga special pioneer. Idi dadakkelen dagiti annakmi, special pioneer manen ni Dorcas. Ita, agpadakamin nga agserserbi kas misionero iti Conakry.

Kanayon a napanak kadagiti nangibaonan kaniak ni Jehova. Masansan a mariknami ken baketko ti proteksion ken bendisionna. Gapu ta agtaltalekkami ken Jehova, naliklikanmi ti adu a problema a mapaspasaran dagidiay agtaltalek kadagiti material a banag. Nasursuromi kadagiti kapadasanmi ken Dorcas a ti Gubuayan ti pudno a kinatalged ket ti “Dios a mangisalakan [kadatayo],” ni Jehova. (1 Cron. 16:35) Siguradoak a ‘salaknibanto ni Jehova a Dios’ ti biag ti amin nga agtaltalek kenkuana.​—1 Sam. 25:29.