1. Ania dagiti bendision a nagbalin a posible gapu iti subbot?

ADU a bendision ti nagbalin a posible gapu iti subbot a daton ni Jesu-Kristo. Gapu iti dayta, naaddaan iti gundaway dagiti annak ni Adan a mangay-ayat iti kinalinteg nga agbalin a paset ti pamilia ti Dios. Gapu iti subbot, posible a naragsak nga agbiagtayo iti agnanayon. Ngem saan la a ti naraniag a masakbayan para kadagiti natulnog a tattao ti ipaay ti daton ni Kristo. Gapu ta situtulok a natay ni Jesus ken nagtalinaed a matalek ken Jehova, masolbar dagiti napateg a bambanag a mangapektar iti amin a parsua.—Heb. 1:8, 9.

2. (a) Ania dagiti nagpateg a linaon ti kararag ni Jesus? (Kitaen ti ladawan iti rugi ti artikulo.) (b) Ania ti usigentayo iti daytoy nga artikulo?

² Agarup dua a tawen sakbay ti ipapatay ken panangipaay ni Jesus iti subbot, insurona kadagiti adalanna nga ikararagda: “Amami nga adda iti langlangit, masantipikar koma ti naganmo. Umay koma ti pagariam. Maaramid koma ti pagayatam, kas sadi langit, kasta met iti daga.” (Mat. 6:9, 10) Tapno mas  maipategtayo ti subbot, kitaentayo ti pakainaigan dayta iti pannakasantipikar ti nagan ti Dios, iti panagturay ti Pagarian ti Dios, ken iti pannakatungpal ti panggep ti Dios.

3. Ania ti saklawen ti nagan ni Jehova, ken kasano nga arig rinugitan ni Satanas dayta a nagan?

³ Ti pannakasantipikar ti nagan ti Dios ti umuna a kiddaw ni Jesus iti pagtuladan a kararagna. Saklawen ti nagan ni Jehova ti mismo a kinanaindaklan, kinatan-ok, ken kinanasantuanna. Iti sabali pay a kararag ni Jesus, inawaganna ni Jehova kas “Nasantuan nga Ama.” (Juan 17:11) Gapu ta nasantuan ni Jehova, nasantuan met amin a prinsipio ken lintegna. Ngem idiay hardin ti Eden, sitataktika a kinuestionaran ni Satanas ti kalintegan ti Dios a mangipaay iti paglintegan para kadagiti tattao. Gapu ta pinadpadakesna ni Jehova, arigna rinugitan ni Satanas ti nasantuan a nagan ti Dios.—Gen. 3:1-5.

4. Kasano a sinantipikar ni Jesus ti nagan ti Dios?

⁴ Ngem naiduma ni Jesus ta ipatpategna unay ti nagan ni Jehova. (Juan 17:25, 26) Dakkel ti papel ni Jesus iti pannakasantipikar ti nagan ti Dios. (Basaen ti Salmo 40:8-10.) Awan a pulos ti naaramid ni Jesus a kamali idi adda ditoy daga. Gapu iti dayta, napaneknekan a maitutop laeng ken karbengan ni Jehova ti mangipaay iti paglintegan kadagiti parsuana. Nagtalinaed a nasungdo ni Jesus iti nailangitan nga Amana uray idi pinarparigat ni Satanas agingga a natay. Gapu iti kinasungdo ni Jesus, pinaneknekanna a kabaelan ti perpekto a tao ti agtulnog iti Dios.

5. Kasanotayo a masantipikar ti nagan ti Dios?

⁵ Kasano a maipakitatayo nga ipatpategtayo ti nagan ni Jehova? Babaen iti aramidtayo. Kayat ni Jehova a masapul a nasantuantayo. (Basaen ti 1 Pedro 1:15, 16.) Kaipapanan dayta a ni laeng Jehova ti dayawentayo ken naimpusuan a pagtulnogantayo. Uray no maidadanestayo, ikagumaantayo a suroten dagiti nalinteg a prinsipio ken lintegna. No agaramidtayo iti naimbag, pagsilsilnagentayo ti silawtayo ket maidaydayaw ti nagan ni Jehova. (Mat. 5:14-16) Kas nasantuan a tattao, pampaneknekantayo babaen iti wagas ti panagbiagtayo a nasayaat dagiti linteg ni Jehova ken ulbod ti pammabasol ni Satanas. Saantayo a perpekto. Ngem no agkamalitayo, naimpusuan nga agbabawitayo ken adaywantayo dagiti aramid a pakaibabainan ni Jehova.—Sal. 79:9.

6. Apay nga ibilangnatayo ni Jehova a nalinteg uray imperpektotayo?

⁶ Babaen iti bileg ti daton ni Kristo, pakawanen ni Jehova ti basol dagiti addaan iti pammati iti dayta. Awatenna kas agdaydayaw kenkuana dagiti agdedikar kenkuana. Ibilang ni Jehova dagiti napulotan a Kristiano kas nalinteg nga annakna ken dagiti “sabsabali a karnero” kas nalinteg a gagayyemna. (Juan 10:16; Roma 5:1, 2; Sant. 2:21-25) Isu nga uray ita, gapu iti subbot, addaantayo iti nasayaat a relasion iti Amatayo ken gundaway a mangsantipikar iti naganna.

7. Gapu iti subbot, ania dagiti bendision nga ipaay ti Pagarian?

⁷ Daytoy ti simmaruno nga indawat ni Jesus iti Dios iti pagtuladan a kararagna: “Umay koma ti pagariam.” Ania ti pakainaigan ti subbot iti Pagarian ti Dios? Gapu iti subbot, nagbalin a posible ti pannakaummong ti 144,000 tapno agserbida a kadua ni Kristo kas ar-ari ken papadi idiay langit. (Apoc. 5:9, 10; 14:1) Ni Jesus ken dagiti  kakaduana nga agturay ti mangbukel iti Pagarian ti Dios. Iyegdanto dagiti bendision nga ipaay ti subbot kadagiti natulnog a tattao iti uneg ti sangaribu a tawen. Agbalinto a paraiso ti daga, ken perpektonton ti amin a matalek a tattao. Naan-anayto nga agkaykaysa ti pamilia ti Dios idiay langit ken ditoy daga. (Apoc. 5:13; 20:6) Rumekento ni Jesus ti ulo ti serpiente ken punasennanto ti amin nga epekto ti panagrebelde ni Satanas.—Gen. 3:15.

8. (a) Kasano a tinulongan ni Jesus dagiti adalanna tapno makitada ti kinapateg ti Pagarian ti Dios? (b) Kasanotayo a maipakita ita ti suportatayo iti Pagarian?

⁸ Idi adda ni Jesus ditoy daga, insurona kadagiti adalanna ti kinapateg ti Pagarian ti Dios. Kalpasan la unay ti panagbautisarna, inkasaba ni Jesus iti adu a lugar ti “naimbag a damag ti pagarian ti Dios.” (Luc. 4:43) Sakbay a nagpalangit, binilin ni Jesus dagiti adalanna nga agbalinda a saksina “agingga iti kaadaywan a paset ti daga.” (Ara. 1:6-8) Gapu iti panangikasaba iti Pagarian, mabalin a maammuan dagiti tattao iti intero a lubong ti maipapan iti subbot ket agpaiturayda iti Pagarian ti Dios. Maipakitatayo ita ti suportatayo iti Pagarian babaen ti panangtulongtayo kadagiti kakabsat ni Kristo ditoy daga a mangikasaba iti naimbag a damag ti Pagarian iti intero a lubong.—Mat. 24:14; 25:40.

9. Apay a masiguradotayo a tungpalen ni Jehova ti panggepna kadagiti tattao?

⁹ Ania ti kayat a sawen ni Jesus idi imbagana: “Maaramid koma ti pagayatam”? Ni Jehova ti Namarsua. No adda ibagana a mapasamak, arigna a napasamaken dayta. (Isa. 55:11) Saanna nga ipalubos a mapaay ti panggepna kadagiti tattao gapu iti panagrebelde ni Satanas. Manipud pay idi un-unana, panggepen ni Jehova a mapno ti daga kadagiti perpekto nga annak da Adan ken Eva. (Gen. 1:28) Saan koma a natungpal ti panggep ti Dios a mapno ti daga kadagiti tattao no natay da Adan ken Eva nga awanan iti annak. Pinalubosan ngarud ni Jehova a maaddaanda iti annak kalpasan ti panagbasolda. Babaen iti subbot, inikkan ti Dios ti amin nga addaan iti pammati iti gundaway nga agbalin a perpekto ken agbiag nga agnanayon. Ay-ayatennatayo ni Jehova, ken kayatna nga agbiagtayo maitunos iti panggepna.

10. Ania ti bendision nga ipaay ti subbot kadagiti natay?

¹⁰ Kasano ngay dagiti binilion a natay a saan man la a nakaam-ammo ken nakapagserbi ken Jehova? Gapu iti subbot, posible a mapagungar dagiti natay. Pagbiagento ida ti naayat a nailangitan nga Amatayo ken ikkanna ida iti gundaway nga agsursuro maipapan iti panggepna ket agbiagda nga agnanayon. (Ara. 24:15) Kayat ni Jehova nga agbiag dagiti tattao, saan ket a matay. Kas Gubuayan ti biag, isu ti agbalin nga Ama ti amin a mapagungar. (Sal. 36:9) Isu a maitutop laeng nga insuro ni Jesus nga ikararagtayo: “Amami nga adda iti langlangit.” (Mat. 6:9) Inikkan ni Jehova ni Jesus iti napateg nga akem a mangpagungar kadagiti natay. (Juan 6:40, 44) Inton agbalin a Paraiso ti daga, tungpalento ni Jesus ti akemna kas “ti panagungar ken ti biag.”—Juan 11:25.

11. Ania ti pagayatan ti Dios iti “dakkel a bunggoy”?

¹¹ Saan laeng a sumagmamano a tao ti bendisionan ni Jehova, ta kinuna ni Jesus: “Siasinoman a mangaramid iti pagayatan ti Dios, daytoy ti kabsatko a lalaki ken kabsatko a babai ken inak.” (Mar. 3:35) Kayat ti Dios nga agdayaw kenkuana ti di mabilang  a “dakkel a bunggoy” manipud iti amin a nasion, tribu, ken pagsasao. Dagiti mangipakpakita iti pammati iti subbot nga impaay ni Kristo ken mangar-aramid iti pagayatan ti Dios ipukkawdanto met: “Ti pannakaisalakan utangmi iti Diostayo, a situtugaw iti trono, ken iti Kordero.”—Apoc. 7:9, 10.

12. Kasano nga ipakita ti pagtuladan a kararag ti pagayatan ni Jehova kadagiti natulnog a tattao?

¹² Makita iti pagtuladan a kararag ni Jesus ti pagayatan ni Jehova kadagiti natulnog a tattao. Maitunos iti kararagna, kayattayo nga aramiden ti amin a kabaelantayo a mangsantipikar, wenno mangibilang a nasantuan, iti nagan ni Jehova. (Isa. 8:13) “Ni Jehova ti Pakaisalakanan” ti kaipapanan ti nagan ni Jesus. Ken mangipaay iti dayag ken dayaw iti nagan ni Jehova ti pannakaisalakantayo babaen iti subbot. Mausarto ti Pagarian ti Dios a mangibanag kadagiti bendision nga ipaay ti subbot kadagiti natulnog a tattao. Talaga nga ipasigurado kadatayo ti pagtuladan a kararag nga awan ti makalapped iti pannakatungpal ti pagayatan ti Dios.—Sal. 135:6; Isa. 46:9, 10.

13. Ania ti ipakpakitatayo no agpabautisartayo?

¹³ Ti maysa a napateg a pamay-an a maipakitatayo ti panagyamantayo iti subbot ket ti panangidedikartayo iti biagtayo ken Jehova gapu iti pammatitayo iti subbot ken ti panagpabautisartayo. Kaipapanan dayta a “kukuanatay ni Jehova” no nagpabautisartayon. (Roma 14:8) Irepresentar dayta ti panagkiddawtayo iti Dios iti nadalus a konsiensia. (1 Ped. 3:21) Sungbatan ni Jehova dayta a kiddaw babaen iti panangusarna iti bileg ti dara ti daton ni Kristo kadatayo. Masiguradotayo  nga itedna kadatayo ti amin nga inkarina.—Roma 8:32.

14. Apay a naibilin nga ayatentayo ti kaarrubatayo?

¹⁴ Kasano pay a maipakitatayo ti panagyamantayo iti subbot? Tangay maibatay iti ayat ti amin nga aramiden ni Jehova, kayatna nga amin nga agdaydayaw kenkuana ipakitada ti ayat kas kangrunaan a kualidadda. (1 Juan 4:8-11) Mapaneknekantayo a kayattayo ti agbalin nga ‘annak ti Amatayo nga adda iti langlangit’ no ayatentayo dagiti kaarrubatayo. (Mat. 5:43-48) Ti bilin nga ayatentayo ti kaarrubatayo ket sumaruno iti bilin nga ayatentayo ni Jehova. (Mat. 22:37-40) Ti panagtulnogtayo iti bilin a mangikasaba iti naimbag a damag ti Pagarian ti Dios ti maysa pay a nagpateg a pamay-an a maipakitatayo ti ayattayo iti kaarruba. No ay-ayatentayo dagiti tattao, tultuladentayo ti Dios. Kinapudnona, “naan-anay” a maipakitatayo ti ayat ti Dios no agtulnogtayo iti bilin nga ayatentayo ti dadduma, nangruna dagiti kakabsattayo.—1 Juan 4:12, 20.

15. (a) Ania dagiti bendision a maaw-awattayo ita ken Jehova? (b) Ania dagiti bendision nga agur-uray kadatayo?

¹⁵ Naan-anay a mapakawantayo no mamatitayo iti subbot. Ipasigurado ti Biblia a mabalin a “mapunas” dagiti basoltayo. (Basaen ti Aramid 3:19-21.) Kas naadaltayon, amponen ni Jehova kas annakna dagiti napulotan iti espiritu nga adipenna babaen iti subbot. (Roma 8:15-17) No maipapan kadatayo a “sabsabali a karnero,” arigna iggemen ni Jehova ti dokumento ti panangamponna kadatayo, a naisuraten ti nagantayo. Inton perpektotayon ken malasatantayo ti maudi a pannubok, maragsakanto ni Jehova a mangpirma iti dokumento ken mangampon kadatayo kas ipatpategna nga annak ditoy daga. (Roma 8:20, 21; Apoc. 20:7-9) Awan patinggana ti ayat ni Jehova kadagiti ipatpategna nga annak. Agnanayon ti bendision nga ipaay ti subbot. (Heb. 9:12) Saanto a pulos agkupas ti pateg daytoy a sagut. Awan ti makaikkat iti dayta kadatayo.

16. Kasano a naan-anay a mawayawayaantayo gapu iti subbot?

¹⁶ Di pulos kabaelan ti Diablo a lapdan dagiti pudno nga agbabbabawi nga agbalinto a paset ti pamilia ni Jehova. Immay ni Jesus ditoy daga ken natay a ‘namimpinsan,’ kayatna a sawen, namimpinsanen a naibayad ti subbot. (Heb. 9:24-26) Naan-anay nga ikkaten ti subbot ti lunod a natawid ken Adan. Gapu iti daton ni Kristo, nawayawayaantayo iti panangadipen ti lubong a konkontrolen ni Satanas, ken saantayon a kabuteng ni patay.—Heb. 2:14, 15.

17. Ania ti makunam iti panagayat ni Jehova kenka?

¹⁷ Sigurado a matungpal ti amin a kari ti Dios. No kasano a di pulos agpalia ti linteg iti nakaparsuaan, saannatayo met a pulos paayen ni Jehova ta saan a pulos agbalbaliw. (Mal. 3:6) Saan la a ti biag ti inted ni Jehova kadatayo. Impaayna met ti ayatna. ‘Naammuantayo ken namatitayo iti ayat ti Dios nga adda iti kasasaadtayo. Ti Dios ket ayat.’ (1 Juan 4:16) Agbalinton a nakapimpintas a paraiso ti intero a daga, ken agiinnayatto ti amin nga agnaed iti dayta kas panangtuladda iti Dios. Makiramantayo koma kadagiti matalek nga anghel a mangibagbaga: “Ti bendision ken ti dayag ken ti sirib ken ti panagyaman ken ti dayaw ken ti pannakabalin ken ti bileg maadda koma iti Diostayo iti agnanayon ken awan inggana. Amen.”—Apoc. 7:12.