1, 2. (a) Ania ti panangmatmat dagiti Saksi ni Jehova iti Biblia? (b) Ania ti paboritom a paset ti Biblia?

IPATPATEG dagiti Saksi ni Jehova ti Biblia. Mangipaay daytoy iti mapagtalkan a pannursuro ken mangted iti liwliwa ken namnama kadatayo. (Roma 15:4) Ibilangtayo ti Biblia, saan a koleksion ti kapanunotan ti tattao, no di ket “kas iti kinapudno daytoy, kas sao ti Dios.”—1 Tes. 2:13.

² Sigurado nga amintayo ket adda paboritona a paset ti Biblia. Magusgustuan ti dadduma dagiti Ebanghelio, a mangiladawan kadagiti personalidad ni Jehova nga inyanninaw ti Anakna. (Juan 14:9) Magustuan met ti dadduma dagiti paset ti Biblia a nakailanadan dagiti padto, kas koma ti libro nga Apocalipsis, a mangipakita kadagiti “bambanag a masapul a maaramid iti mabiit.” (Apoc. 1:1) Ken siasino kadatayo ti saan a maliwliwa kadagiti Salmo wenno makasursuro kadagiti praktikal a leksion manipud iti libro a Proverbio? Talaga a ti Biblia ket para iti amin.

3, 4. (a) Ania ti panangmatmattayo kadagiti publikasiontayo? (b) Ania dagiti maaw-awattayo a publikasion a nairanta kadagiti espesipiko a grupo ti tattao?

³ Gapu ta ipatpategtayo ti Biblia, ipategtayo met dagiti naibatay iti Biblia a publikasiontayo. Kas pagarigan, apresiarentayo dagiti maaw-awattayo a naespirituan a taraon kas iti libro, broshur,  magasin, ken dadduma pay a literatura. Ammotayo a dagitoy a probision ni Jehova ket makatulong kadatayo nga agtalinaed nga alerto ken mabsog iti naespirituan, ken “nasalun-at iti pammati.”—Tito 2:2.

⁴ Malaksid kadagiti publikasion para iti amin a Saksi ni Jehova, makaawattayo kadagiti naibatay iti Biblia a publikasion a nairanta kadagiti espesipiko a grupo. Dadduma a material ti nairanta a makatulong kadagiti agtutubo; dadduma met ti makatulong kadagiti nagannakda. Adu kadagiti material a mayim-imprenta ken makita iti website-tayo ti naisagana para kadagiti tattao a saan a Saksi. Dagita nga aglaplapusanan a naespirituan a taraon ipalagipda kadatayo a tungtungpalen ni Jehova ti karina nga “iyaramidannanto dagiti amin nga ili . . . iti maysa a bangkete dagiti nataba unay a putahe.”—Isa. 25:6.

5. Ania ti masiguradotayo nga apresiaren ni Jehova?

⁵ Mabalin a kayat ti kaaduan kadatayo nga ad-adu koma ti panawentayo a mangbasa iti Biblia ken kadagiti naibatay iti Biblia a publikasion. Masiguradotayo nga apresiaren ni Jehova ti panangikagumaantayo a mangusar iti tiempotayo iti kasayaatan a pamay-an babaen iti regular a panagbasa iti Biblia ken personal a panagadal. (Efe. 5:15, 16) Kinaagpaysuanna, baka saantayo a maipapaayan iti agpapada a panawen ti amin a naespirituan a taraon a mabalin a magun-odtayo. Nupay kasta, agannadtayo iti di madmadlaw a peggad. Ania dayta?

6. Ania ti makagapu a mabalin a maikapistayo kadagiti gunggona manipud iti dadduma a probision ni Jehova?

⁶ Adda peggad a mabalin a maikapistayo kadagiti pagimbagan dagiti naespirituan a probision gapu ta ipagaruptayo a saan a para kadatayo dagita. Kas pagarigan, kasano no kasla saan nga agaplikar iti situasiontayo ti maysa a paset ti Biblia? Wenno kasano no saan a nairanta nga agpaay kadatayo ti maysa a publikasion? Parparawpaw kadi ti panagbasatayo wenno saantay pay ketdin a basaen dayta? No kasta, mabalin nga ikapkapistayo ti bagitayo kadagiti impormasion a dakkel ti maipaayna a gunggona para kadatayo. Kasano a maliklikantayo ti matnag iti dayta a silo? Kangrunaan ti amin, masapul a laglagipentayo a ti Dios ti Gubuayan dagiti naespirituan a probision. Babaen ken propeta Isaias, kinunana: “Siak, ni Jehova, ti Diosmo, Daydiay mangisursuro kenka tapno magunggonaam ti bagim.” (Isa. 48:17) Makatulong no usigentayo ti tallo a singasing tapno magunggonaantayo iti amin a paset ti Biblia ken iti nagduduma a kita ti naespirituan a taraon a magun-odantayo.

7. Apay a masapul a basaentayo ti Biblia nga addaan iti silulukat a panunot?

⁷ Agbasa nga addaan iti silulukat a panunot. Nalawag a kuna ti Biblia nga “amin a Kasuratan impaltiing ti Dios ken makagunggona.” (2 Tim. 3:16) Pudno a dadduma a paset ti Biblia ket naiturong iti maysa nga indibidual wenno grupo. Dayta ti makagapu a masapul a basaentayo ti Kasuratan nga addaan iti silulukat a panunot. Kuna ti maysa a kabsat a lalaki: “No basbasaek ti Biblia, laglagipek a mabalin nga adu dagiti leksion a maadalko iti maysa a teksto. No laglagipek dayta, matignayak a mangkita kadagiti leksion a saan a nalaka a madlaw.” Sakbay nga agbasatayo iti Biblia, nasayaat no ikararagtayo a maaddaantayo iti silulukat a panunot ken sirib tapno matarusantayo dagiti leksion a kayat nga isuro kadatayo ni Jehova.—Esd. 7:10; basaen ti Santiago 1:5.

8, 9. (a) No agbasbasatayo iti Biblia, ania dagiti mabalin nga isaludsodtayo iti bagitayo? (b) Ania ti isuro kadatayo dagiti kualipikasion dagiti panglakayen maipapan ken Jehova?

⁸ Agsaludsodka. Bayat nga agbasbasaka iti maysa a paset ti Biblia, agsardengka ket isaludsodmo iti bagim dagitoy a saludsod: ‘Ania ti isuro daytoy kaniak maipapan ken Jehova? Kasano a mayaplikarko daytoy nga impormasion  iti biagko? Kasano a mausarko daytoy tapno matulongak ti sabsabali?’ No panunotentayo dagitoy a saludsod, ad-adda a magunggonaantayo iti panagbasatayo iti Biblia. Kas pagarigan, panunotem dagiti naibatay iti Biblia a kualipikasion dagiti Kristiano a panglakayen. (Basaen ti 1 Timoteo 3:2-7.) Gapu ta saan met a panglakayen ti kaaduan kadatayo, mabalin a mapanunottayo a saan unay nga agaplikar iti biagtayo dagitoy a teksto. Ngem no usigentayo ti sumagmamano a posible a sungbat dagitoy a sumaganad a saludsod, makitatayo nga adu ti magunggonatayo bayat a basbasaentayo dagita a kualipikasion.

⁹ Ania ti isuro daytoy kaniak maipapan ken Jehova? Babaen ti panangipaayna kadagiti kualipikasion a masapul a ragpaten, ipakpakita ni Jehova nga isu ket addaan iti nangato a pagalagadan mainaig kadagiti agserbi iti dayta nga annongen. Namnamaenna a mangipakitada iti nasayaat nga ulidan, ken sungsungbatanda ken Jehova no kasano a tratuenda ti kongregasion “a ginatangna babaen ti dara ti bukodna nga Anak.” (Ara. 20:28) Kayat ni Jehova a natalgedtayo iti panangiwanwan dagiti nadutokan a katulongan a papastor. (Isa. 32:1, 2) Sigun iti dayta, ipalagip kadatayo dagiti kualipikasion dagiti Kristiano a panglakayen a talaga nga ipatpategnatayo ni Jehova.

10, 11. (a) No basbasaentayo dagiti kualipikasion para kadagiti panglakayen, kasano a mayaplikartayo dagita iti biagtayo? (b) Kasano a mausartayo daytoy nga impormasion tapno matulongantayo ti sabsabali?

¹⁰ Kasano a mayaplikarko daytoy nga impormasion iti biagko? Masapul a kanayon koma a sukimaten ti maysa a panglakayen no maragragpatna pay laeng dagitoy a naespirituan a kualipikasion, a kitkitaenna dagiti mabalin a parang-ayenna. No ti maysa “ragragpatenna ti akem a manangaywan,” masapul a panunotenna a naimbag dagitoy a kualipikasion ket ikagumaanna a ragpaten dagita. (1 Tim. 3:1) Kinapudnona, makasursuro ti tunggal Kristiano kadagiti kualipikasion a nadakamat kadagitoy a teksto ta ramanen dagita dagiti bambanag a kalkalikaguman ni Jehova iti amin a Kristiano. Kas pagarigan, amintayo ket masapul nga agbalin a nainkalintegan ken nasimbeng iti panagpampanunot. (Fil. 4:5; 1 Ped. 4:7) No ipakita dagiti panglakayen a ‘mapagulidananda iti arban,’ makasursurotayo kadakuada ken ‘matuladtayo ti pammatida.’—1 Ped. 5:3; Heb. 13:7.

¹¹ Kasano a mausarko daytoy nga impormasion tapno matulongak ti sabsabali? Mabalin nga usarentayo dagiti kualipikasion dagiti Kristiano a panglakayen tapno matulongantayo  dagiti interesado wenno agad-adal iti Biblia a mangkita a naiduma ti panglakayen dagiti Saksi ni Jehova kadagiti lider ti relihion dagiti agkunkuna a Kristiano. Kasta met, no basaentayo dagita a kualipikasion, malagiptayo ti panagsakripisio dagiti panglakayen iti kongregasiontayo para kadatayo. No panunotentayo ti ar-aramidenda para kadatayo, umuneg ti panagraemtayo kadagidiay ‘agtrabtrabaho a sipipinget’ para kadatayo. (1 Tes. 5:12) Maysa pay, no ad-adda nga ipakitatayo ti napudno a panagraemtayo kadagiti managsakripisio a mangidadaulo kadatayo, ad-adda a maparagsaktayo ida.—Heb. 13:17.

12, 13. (a) No usarentayo dagiti alikamen nga adda kadatayo, ania dagiti mabalin a sukimatentayo? (b) Mangted iti pagarigan no kasano a makatulong dagiti kanayonan nga impormasion tapno maammuantayo dagiti leksion a saan a nalaka a madlaw.

¹² Agsukimatka. No usarentayo dagiti alikamen nga adda kadatayo, mabalin a sukimatentayo dagitoy nga impormasion:

• Siasino ti nangisurat iti daytoy a paset ti Kasuratan?

• Sadino ken kaano a naisurat daytoy?

• Ania dagiti napateg a pasamak idi naisurat ti maysa a libro ti Biblia?

Dagiti kastoy nga impormasion ti mabalin a makatulong tapno maammuantayo dagiti leksion a saan a nalaka a madlaw.

¹³ Kas pagarigan, usigentayo ti Ezequiel 14:13, 14. Kastoy ti mabasatayo: “No maipapan iti maysa a daga, no kas pagarigan makaaramid iti basol a maikaniwas kaniak iti panagtignay a di simamatalek, iyunnatkonto met ti imak maibusor iti dayta ket tukkolek maipaay iti dayta dagiti ungkay a nakaibitinan dagiti nagtimbukel a tinapay, ket mangibaonakto iti dayta iti nakaro a bisin ket gessatek iti dayta ti naindagaan a tao ken ti naamo nga animal. ‘Ket no dagitoy tallo a lallaki addada koma iti tengngana, da Noe, Daniel ken Job, isuda gapu iti kinalintegda maispalda ti kararuada,’ kuna ti Soberano nga Apo Jehova.” No agsukimattayo, maammuantayo a naisurat daytoy a paset ti Ezequiel idi agarup 612 B.C.E. Iti dayta a tiempo, ginasut a tawen a natayen da Noe ken Job, ngem malagip latta ti Dios ti kinamatalekda. Ngem sibibiag pay idi ni Daniel. Kinapudnona, mabalin a tin-edyer wenno nasurok la a 20 ti tawenna idi imbaga ni Jehova nga isu ket nalinteg a kas kada Noe ken Job. Ania ti maadaltayo? Ammo ken ipateg ni Jehova ti kinatarnaw ti amin a matalek nga agdaydayaw kenkuana, agraman dagiti agtutubo.—Sal. 148:12-14.

14. Kasano a makatulong kadagiti agtutubo dagiti material a maipabpablaak para kadakuada, ken kasano a makagunggona met dayta iti dadduma? (Kitaen ti ladawan iti rugi ti artikulo.)

¹⁴ No kasano a makagunggona nga adalen ti amin a paset ti Sao ti Dios, magunggonaantayo met iti amin a naespirituan a taraon a magun-odantayo. Usigentayo ti sumagmamano kadagitoy. Material para kadagiti agtutubo. Iti nabiit pay a tawtawen, adu a literaturatayo ti naipablaak para kadagiti agtutubo. ^[1] Dadduma kadagitoy ket nadisenio a mangtulong kadagiti agtutubo a mangsango iti panangpilit dagiti kapatadanda iti eskuelaan wenno kadagiti problema ti agtutubo. Kasano a magunggonaantayo amin kadagita a material? No basaentayo dagita, maipalagip kadatayo ti pakaipaspasanguan dagiti matalek nga agtutubo. Kas resultana, ad-adda a matulongan ken maparegtatayo ida.

15. Apay nga interesado koma dagiti adulto a Kristiano kadagiti impormasion a nairanta kadagiti agtutubo?

¹⁵ Maipaspasango met ti dadduma kadatayo kadagiti problema a maipaspasango kadagiti agtutubo. Amintayo masapul nga idepensatayo ti pammatitayo, kontrolentayo ti emosiontayo, labanan ti panangpilit ti dadduma, ken liklikantayo dagiti makadadael a pannakikadkadua ken paglinglingayan. Dagitoy a topiko ken ti dadduma pay ket nailawlawagen kadagiti  material a nadisenio para kadagiti tin-edyer. Marikna kadi dagiti adulto a Kristiano a maipababada no basaenda dagiti publikasion a para kadagiti agtutubo? Saan! Nupay dagita a material ket nairanta para kadagiti agtutubo, dagiti impormasion ket naibatay iti di agkupas a prinsipio ti Biblia, ket mabalin a magunggonaantayo amin kadagitoy a naespirituan a probision.

16. Ania pay ti maitulong dagiti publikasiontayo kadagiti agtutubo?

¹⁶ Makatulong dagiti publikasiontayo kadagiti agtutubo saan laeng a tapno matulonganda a mangsaranget kadagiti problemada no di ket tapno rumang-ayda iti naespirituan ken sumingedda ken Jehova. (Basaen ti Eclesiastes 12:1, 13.) Mabalin met a makagunggona dagitoy kadagiti adulto a Kristiano. Kas pagarigan, ti Abril 2009 a ruar ti Agriingkayo! ket addaan iti artikulo nga “Agimtuod Dagiti Agtutubo . . . Kasano a Matagiragsakko ti Panagbasak iti Biblia?” Nangipaay dayta nga artikulo iti adu a singasing ken addaan iti kahon a mabalin a kartiben ken mabalin nga iragpin iti Biblia kas reperensia. Nagunggonaan met kadi dagiti adulto iti dayta nga artikulo? Kuna ti 24 ti tawenna nga asawa ken ina: “Kanayon idi a marigatanak nga agbasa iti Biblia. Inaramidko dagiti singasing iti daytoy nga artikulo, ken dakkel ti usarna kaniak ti nakartib a reperensia. Ita, kaykayatkon ti agbasa iti Biblia. Makitak nga agtutunos dagiti libro ti Biblia ken agkokonektar kas kadagiti linabag ti nagpintas a nabordaan a lupot. Ita laeng a kastoy ti gagarko nga agbasa iti Biblia.”

17, 18. Kasano a magunggonaantayo no basaentayo dagiti material a naisurat para iti publiko? Mangted iti pagarigan.

¹⁷ Material para iti publiko. Manipud 2008, tinagiragsaktayo ti pagadalan nga edision Ti Pagwanawanan, a naisurat a nangnangruna para kadagiti Saksi ni Jehova. Ngem dagiti ngay magasintayo a nairanta para iti publiko? Magunggonaantayo met kadi no basaentayo dagita? Usigentayo daytoy nga ilustrasion. Maysa nga aldaw, sakbay ti palawag publiko, nakitam nga immay iti Kingdom Hall ti maysa nga inawismo. Sigurado a naragsakanka. Bayat ti palawag, nalabit pampanunotem ti bisita, isu a dengdenggem ti palawag a kasla sika ket maysa met a bisita. Kas resultana, kalpasan ti palawag, napabaro ti apresasionmo iti topiko a naipalawag.

¹⁸ Mabalin a kasta ti mariknatayo no basbasaentayo dagiti material para iti publiko. Kas pagarigan, ti publiko nga edision Ti Pagwanawanan ilawlawagna dagiti topiko a naibatay iti Biblia iti pamay-an a maawatan dagiti saan a Saksi nga agbasa. Kasta met ti adu nga artikulo iti jw.org, kas kadagiti adda iti seksion a napauluan “Sungbat Dagiti Saludsod Maipapan iti Biblia” ken “Masansan a Maisaludsod.” No basaentayo dagitoy nga impormasion, ad-adda nga apresiarentayo dagiti ammotayon a kinapudno. Kasta met, makasursurotayo kadagiti baro a pamay-an a mangilawlawag kadagiti patpatientayo no makiramantayo iti ministerio. Umasping iti dayta, kanayon a pabilgen ti Agriingkayo! ti natibker a pammatitayo nga adda pudno a Dios, ken makatulong dayta kadatayo a mangidepensa kadagiti patpatientayo.—Basaen ti 1 Pedro 3:15.

19. Kasano a maipakitatayo nga agyamantayo ken Jehova gapu kadagiti probisionna?

¹⁹ Nalawag nga impaayannatayo ni Jehova kadagiti aglaplapusanan a probision tapno mapennek ti ‘naespirituan a kasapulantayo.’ (Mat. 5:3) Itultuloytayo koma nga usaren ti amin a naespirituan a probision a magun-odantayo. Iti kasta, ipakpakitatayo nga agyamyamantayo iti Daydiay mangisursuro kadatayo tapno magunggonaantayo.—Isa. 48:17.