Amintayo ket limitado ti orasna para iti personal a panagadal. Kasanotayo a mausar dayta iti kasayaatan a pamay-an? Umuna, saanka nga agdardaras. Ad-adu ti masursurom no adalem a naimbag uray ti bassit nga impormasion ngem no agdardaraska a mangbasa iti adu nga impormasion.

Kalpasanna, iplanom dagiti iyun-unam nga adalen. (Efe. 5:15, 16) Mabalin a makatulong kenka dagitoy a suhestion:

• Inaldaw a basaem ti Biblia. (Sal. 1:2) Mabalin a nasayaat no mangrugika iti nayeskediul a panagbasa iti Biblia para iti gimong iti tengnga ti lawas.

• Agsaganaka para iti Panagadal iti Pagwanawanan ken iti gimong iti tengnga ti lawas. Ikagumaam ti agsagana a naimbag tapno makapagkomentoka.—Sal. 22:22.

• No adda pay ti orasmo, basaem ken buyaem ti dadduma pay a naespirituan a taraon, kas kadagiti magasin para iti publiko, video, ken kadagiti naipablaak iti jw.org.

• Mangaramidka iti study project. Mabalin nga ag-research-ka maipapan iti pakaipaspasanguam a problema, no adda saludsodmo, wenno maipapan iti topiko iti Biblia a kayatmo a mas maawatan. Tapno makaalaka kadagiti ideya, kitaem ti seksion nga “Aktibidad Para iti Panagadal iti Biblia” iti jw.org.