1, 2. (a) Ania ti ramanen ti ‘awanan bayad a di mailadawan a sagut’ ti Dios? (b) Ania dagiti saludsod nga usigentayo iti daytoy nga artikulo?

IDI imbaon ni Jehova ti bugbugtong nga Anakna ditoy daga, intedna ti agbalin a kadakkelan a sagut gapu iti ayat! (Juan 3:16; 1 Juan 4:9, 10) Dineskribir ni apostol Pablo dayta kas ‘awanan bayad a di mailadawan [wenno, nakapatpateg] a sagut’ ti Dios. (2 Cor. 9:15) Apay nga inusarna dagita a sasao?

² Ammo ni Pablo a sigurado a matungpal ti amin a nagsasayaat a kari ti Dios gapu iti naan-anay a sakripisio ni Kristo. (Basaen ti 2 Corinto 1:20.) Ngarud, ti ‘awanan bayad a di mailadawan a sagut’ ti Dios ramanenna ti isuamin a kinaimbag ken matalek nga ayat nga ipaay ti Dios kadatayo babaen ken Jesus. Talaga a nakakaskasdaaw dayta a sagut ta saan a pulos a mailadawan ti tao. Ania koma ti epektona kadatayo dayta a naisangsangayan a sagut a naawattayo? Ken kadagiti ania a pamay-an a tignayennatayo dayta a sagut bayat nga agsaganatayo para iti Pananglaglagip iti ipapatay ni Kristo inton Mierkoles, Marso 23, 2016?

3, 4. (a) Ania ti mariknam no adda mangted kenka iti sagut? (b) Kasano a gapu iti naisangsangayan a sagut mabalin nga agbalbaliw ti biagmo?

³ No adda mangted kenka iti sagut, sigurado a maragsakanka. Ngem adda dagiti naisangsangayan wenno nagpateg a sagut a mabalin a mangbalbaliw iti biag ti maysa. Kas pagarigan, ipapanmo a nasentensiaanka iti ipapatay gapu iti krimen a nakairamanam. Pagammuan ta adda tao a nagboluntario a mangako iti dusa para kenka. Situtulok dayta a tao a matay para kenka! Ania ngata ti epekto kenka dayta a sagut?

⁴ Gapu iti naawatmo a naayat ken naisangsangayan a sagut, sigurado a matignayka a mangusig kadagiti ar-aramidem ken mangbalbaliw pay ketdi iti panagbiagmo. Mabalin a matignayka nga agbalin a naparabur ken naayat iti sabsabali ken mangpakawan pay kadagiti nakabasol kenka. Iti intero a panagbiagmo, mariknam a nakautangka iti dayta a tao a situtulok a nangipaay iti biagna para kenka.

5. Apay a napatpateg nga amang ti sagut ti Dios a subbot ngem iti aniaman a sagut?

⁵ Ngem adayo a napatpateg ti sagut nga inted kadatayo ni Jehova babaen ken Kristo ngem iti nadakamat a pagarigan. (1 Ped. 3:18) Usigentayo no apay. Gapu iti natawidtayo a basol, maipasangotayo amin iti ipapatay. (Roma 5:12) Gapu iti ayat ni Jehova, imbaonna ni Jesus ditoy daga “tapno ramananna ni patay maipaay iti tunggal tao.” (Heb. 2:9) Saan laeng nga inispal ni Jehova ti biagtayo ita, no di ket impaayna ti solusion tapno agnanayon a mapukaw ti ipapatay. (Isa. 25:7, 8; 1 Cor. 15:22, 26) Amin a mangipakita iti pammati ken Jesus maaddaandanto iti natalna ken naragsak nga agnanayon a biag, kas iturayan ti Pagarian ti Dios ditoy daga wenno kas ar-ari a makipagturayto ken Kristo iti dayta a Pagarian. (Roma 6:23; Apoc. 5:9, 10) Ania pay dagiti bendision a nairaman iti daytoy a sagut ni Jehova?

6. (a) Ania dagiti segseggaam a bendision gapu iti sagut ni Jehova? (b) Ania dagiti tallo a banag a pakatignayantayo nga aramiden gapu iti sagut ti Dios?

⁶ Karaman iti sagut ni Jehova ti pannakapaimbag ti amin a sakit, ti panagbalin a paraiso ti daga, ken ti panagungar dagiti natay. (Isa. 33:24; 35:5, 6; Juan 5:28, 29) Sigurado nga ayatentayo ni Jehova ken ti dungdungnguenna nga Anak gapu ta intedda kadatayo ti ‘awanan bayad a di mailadawan a sagut.’ Ngem ti saludsod ket, Ania ti pakatignayantayo nga aramiden gapu iti ayat ti Dios? Usigentayo no kasano a ti ayat ti Dios tignayennatayo a (1) mangsurot a naimbag iti ulidan ni Kristo Jesus, (2) mangayat kadagiti kakabsattayo, ken (3) naimpusuan a mangpakawan iti sabsabali.

7, 8. Ania koma ti mariknatayo iti ayat ni Kristo, ket tignayennatayo a mangaramid iti ania?

⁷ Umuna, masapul a matignaytayo nga agbiag para ken Kristo Jesus. Kinuna ni apostol Pablo: “Ti ayat nga adda iti Kristo pilitennakami [wenno, tignayennakami].” (Basaen ti 2 Corinto 5:14, 15.) Nabigbig ni Pablo a no awatentayo ti naisangsangayan nga ayat ni Kristo, matignaytayo nga agbiag para kenkuana. No naan-anay a matarusantayo ti inaramid ni Jehova para kadatayo, tignayennatayo ti ayatna nga agbiag iti wagas nga anamongan ni Jesus. Kasano a maaramidtayo dayta?

⁸ Dagidiay mangay-ayat ken Jehova matignayda a mangtulad iti ulidan ni Kristo, a tuladenda ti pannagnana ken surotenda a naimbag dagiti addangna. (1 Ped. 2:21; 1 Juan 2:6) Mapaneknekantayo ti ayattayo iti Dios ken ni Kristo babaen ti  panagtulnogtayo. Kinuna ni Jesus: “Ti addaan kadagiti bilinko ket tungpalenna ida, isu dayta ti agayat kaniak. Kalpasanna ti agayat kaniak ayatento ni Amak, ket isu ayatekto ket silalawag nga iparangkonto kenkuana ti bagik.”—Juan 14:21; 1 Juan 5:3.

9. Ania dagiti bambanag a mabalin a mangimpluensia kadatayo?

⁹ Iti panawen ti Memorial, nasayaat nga usigentayo ti kasasaadtayo. Isaludsodtayo: ‘Kadagiti ania nga aspeto ti biag a tultuladek ti ulidan ni Kristo Jesus? Ania pay dagiti masapul a parang-ayek?’ Nagpateg nga isaludsodtayo dagitoy iti bagitayo ta kanayon a maal-allukoytayo a mangtulad iti lubong. (Roma 12:2) No saantayo a naannad, mabalin nga agbalintayo a pasurot dagiti masirib iti daytoy a lubong wenno dagiti artista ken dagiti mabigbigbig iti isports. (Col. 2:8; 1 Juan 2:15-17) Kasano a maliklikantayo dayta?

10. Iti panawen ti Memorial, ania dagiti saludsod a mabalin a damagentayo iti bagitayo, ket dagiti sungbatna tignayennatayo a mangaramid iti ania? (Kitaen ti ladawan iti rugi ti artikulo.)

¹⁰ Nagsayaat a gundawayantayo ti panawen ti Memorial tapno sukimatentayo ti panagkawkawestayo, dagiti buybuyaen ken dengdenggentayo, kasta met dagiti adda iti kompiuter, selpon, ken tablet-tayo. No agpilika iti pagbadom, isaludsodmo iti bagim: ‘No mapanak iti lugar a papanan ni Jesus, mabainak ngata no daytoy ti pagbadok?’ (Basaen ti 1 Timoteo 2:9, 10.) ‘No isuotko daytoy, mabigbigda ngata a pasurotnak ni Kristo Jesus?’ Mabalin met nga isaludsodtayo dagita no agpilitayo iti buyaentayo ken denggentayo. ‘Maragsakan ngata ni Jesus a mangbuya iti daytoy a pelikula wenno dumngeg iti daytoy a musika? No binulodna ti selpon wenno tablet-ko, mabainanak ngata iti makitana kadagita?’ No agpilika iti video game, damagem iti bagim: ‘Marigatanak ngata a mangilawlawag ken Jesus no apay a pagay-ayatko nga ay-ayamen daytoy a video game?’ Ti ayattayo ken Jehova ti mangtignay kadatayo a mangibelleng kadagiti bambanag a saan a maitutop para iti maysa nga adalan ni Kristo uray kasano kangina dayta. (Ara. 19:19, 20) Idi nagdedikartayo, inkaritayo a saantayo nga agbiag para iti bagitayo no di ket para ken Kristo. Ngarud, saantayo nga ipalubos nga adda manglapped kadatayo a mangsurot a naimbag iti ulidan ni Kristo.—Mat. 5:29, 30; Fil. 4:8.

11. (a) Kasano a ti ayattayo ken Jehova ken ni Jesus tignayennatayo a mangasaba? (b) Kasano a ti ayattayo matignaynatayo a tumulong kadagiti kakabsat iti kongregasion?

¹¹ Gapu iti ayattayo ken Jesus, matignaytayo met a naregta a makiraman iti panangasaba ken panagaramid iti adalan. (Mat. 28:19, 20; Luc. 4:43) Iti panawen ti Memorial, adda gundawaytayo nga ag-auxiliary pioneer ken mangbusbos iti 30 wenno 50 nga oras iti panangasaba. Mabalin kadi a gundawayam dayta? Narikna ti maysa a balo a lakay nga agtawen iti 84 a saannan a kabaelan ti ag-auxiliary pioneer ta lakay ken nakapuyen. Ngem tinulongan dagiti payunir iti lugarda. Iluganda ken nangpilida iti teritoria a mabalin a trabahuenna tapno maalana ti kalatna a 30 nga oras. Mabalin kadi a tulongam ti maysa a kabsat iti kongregasionyo tapno mariknana met ti ragsak ti panag-auxiliary pioneer iti panawen ti Memorial? Siempre, saan a kabaelan ti amin ti ag-auxiliary pioneer. Nupay kasta, mabalin nga usarentayo ti panawen ken pigsatayo tapno manayonantayo ti panagsakripisiotayo a mangidayaw ken Jehova. No aramidentayo dayta, kas ken Pablo, maipakitatayo a tigtignayennatayo ti ayat ni Kristo. Ania pay ti pakatignayantayo nga aramiden gapu iti ayat ti Dios?

12. Ti ayat ti Dios tignayennatayo a mangaramid iti ania?

¹² Maikadua, tignayennatayo ti ayat ti Dios a mangayat kadagiti kakabsattayo. Nabigbig ni apostol Juan daytoy. Insuratna: “Dungdungnguen, no kastoy ti panangayat kadatayo ti Dios, ngarud datayo pagrebbengantayo nga ayaten ti maysa ken maysa.” (1 Juan 4:7-11) Wen, no kayattayo nga ayatennatayo ti Dios, masapul a bigbigentayo a rebbengentayo nga ayaten dagiti kakabsattayo. (1 Juan 3:16) Ania dagiti praktikal a pamay-an a maipakitatayo ti ayattayo?

13. Ania nga ulidan ti impakita ni Jesus iti panangayat iti sabsabali?

¹³ Usigentayo ti ulidan ni Jesus. Bayat ti panangasabana ditoy daga, impangpangrunana a tinulongan dagiti nanumo. Inagasanna dagiti pilay, bulsek, tuleng, ken dagiti umel. (Mat. 11:4, 5) Maragragsakan ni Jesus a mangisuro kadagiti mabisin iti naespirituan, dagidiay ibilang dagiti lider ti relihion kas ‘nailunod a tattao.’ (Juan 7:49) Inayatna dagitoy a nanumo ken inkagumaanna a tinulongan ida.—Mat. 20:28.

14. Ania ti mabalinmo nga aramiden tapno maipakitam ti ayat kadagiti kakabsatmo?

¹⁴ Nagsayaat a gundaway ti panawen ti Memorial tapno matuladmo ni Jesus babaen iti panangpanunotmo no kasano a matulongam dagiti kakabsat iti kongregasionyo. No aramidem dayta, sigurado nga adda dagiti mabalin a magunggonaan iti ayatmo. Mabalin nga adda dagiti natataengan a kakabsat nga agkasapulan iti tulong. Mabalin kadi a bisitaem ida? Mabalin kadi a mangipanka iti kanenda, tulongam ida kadagiti trabaho iti balay, iluganmo ida a mapan makigimong, wenno awisem ida a kaduaendaka iti ministerio? (Basaen ti Lucas 14:12-14.) Ipalubostayo koma a ti ayat ti Dios ti mangtignay kadatayo a mangayat kadagiti kakabsattayo.

15. Ania ti masapul a bigbigentayo?

¹⁵ Maikatlo, ti ayat ni Jehova tignayennatayo a mangpakawan kadagiti kakabsattayo. Kas annak ni Adan, natawidtayo amin ti basol ken ti dusa nga ipapatay. Saantayo a mabalin nga ibaga, “Saanko a kasapulan ti subbot.” Uray ti kalilintegan nga adipen ti Dios ket agkasapulan latta iti di kaikarian a kinamanangngaasi ni Jehova babaen ken  Kristo. Masapul a bigbigen ti tunggal maysa kadatayo a napakawanen ti nagdakkel nga utangtayo. Apay a napateg dayta? Masarakan ti sungbat iti maysa kadagiti ilustrasion ni Jesus.

16, 17. (a) Ania ti masursurotayo iti ilustrasion ni Jesus maipapan iti ari ken kadagiti adipen? (b) Kalpasan a mautobmo ti ilustrasion ni Jesus, ania ti ikagumaam nga aramiden?

¹⁶ Insalaysay ni Jesus no kasano a pinakawan ti maysa nga ari ti adipenna nga addaan iti dakkel nga utang a 10,000 a talento, wenno 60,000,000 a denario. Ngem saan a kayat a pakawanen ti napakawan nga adipen ti padana nga adipen a nakautang kenkuana iti 100 a denario. Nakapungtot ti ari idi naammuanna nga awanan asi daydiay adipen a naan-anay a pinakawanna. Kinuna ti ari: “Nadangkes nga adipen, winaswasko amin dayta nga utang maipaay kenka, idi a nagpakaasika kaniak. Saan kadi a rebbeng, met, a maasianka iti padam nga adipen, a kas met iti panangngaasik kenka?” (Mat. 18:23-35) Wen, gapu iti kasta unay nga asi ti ari matignay koma ti adipen a mangpakawan iti padana nga adipen. Kasta met, ania koma ti pakatignayantayo nga aramiden gapu iti ayat ken asi ni Jehova?

¹⁷ Ti panawen ti Memorial ket mangipaay kadatayo iti nagsayaat a gundaway a mangusig no adda ing-ingpentayo a sakit ti nakem kadagiti kakabsattayo. No adda man, nagsayaat a tuladentayo ni Jehova a “sisasagana a mamakawan.” (Neh. 9:17; Sal. 86:5) No apresiarentayo ti pananglipat ni Jehova iti nagdakkel nga utangtayo, matignaytayo a naimpusuan a mangpakawan iti sabsabali. Saantayo a magun-od ti ayat ken pammakawan ti Dios no saantayo nga ayaten ken pakawanen ti sabsabali. (Mat. 6:14, 15) Agpayso a saanen a mabaliwan ti napalabas uray nangpakawantayon, ngem agbalin a nasayaat ti masanguanantayo.

18. Kasano a nakatulong ti ayat ti Dios iti maysa a kabsat a balasang tapno maanusanna ti pagkapuyan ti maysa a kabsat?

¹⁸ Para iti adu kadatayo, saan a nalaka nga “anusan” nga inaldaw dagiti kakabsat. (Basaen ti Colosas 3:13, 14; Efeso 4:32.) Kas pagarigan, ni Lily ket maysa a kabsat a balasang iti maysa a kongregasion. Tinulonganna ti balo nga agnagan Carol. [1] Kanayon nga ilugan ni Lily ni Carol, gumatang kadagiti kasapulanna, ken impakitana ti kinaimbagna iti dadduma pay a pamay-an. Iti laksid ti amin nga ar-aramiden ni Lily, manangbabalaw ken narigat latta a pakilangenan ni Carol. Nupay kasta, dagiti nasayaat a kualidad ni Carol ti kinita ni Lily. Intultuloyna a tinulongan iti adu a tawen agingga a nagsakit iti nakaro sa kalpasanna natay. Kinuna ni Lily: “Uray no kasta, il-iliwek a makita ni Carol inton panagungar. Kayatkonto a maam-ammo inton perpekton.” Wen, ti ayat ti Dios tignayennatayo a manganus kadagiti kakabsattayo ken mangsegga iti panawen inton agnanayon a mapukawen ti kinaimperpekto ti tao.

19. Kasano a tignayennaka ti nakapatpateg a sagut ti Dios?

¹⁹ Talaga nga immawattayo iti ‘awanan bayad a di mailadawan a sagut’ manipud ken Jehova. Ipategtayo koma daytoy a nagpateg a sagut. Bayat ti panawen ti Memorial, utobentayo koma ti amin nga inaramid ni Jehova ken ti Anakna a ni Jesus para kadatayo. Wen, ti ayatda tignayendatayo koma a mangtulad ken Jesus, mangayat kadagiti kakabsattayo, ken naimpusuan a mangpakawan kadagiti kakabsattayo.