Kasta ti maibagatayo no dadduma. Agparang a maitunos dayta iti mabasa iti Hebreo 12:16. Kuna ti teksto a ni Esau ‘saanna nga impateg ti sagrado a bambanag’ ken “impadawatna [ken Jacob] dagiti kalinteganna kas inauna a kasukat ti maysa a pannangan.” Kasla ipamatmatna nga idi nagun-odan ni Jacob dagiti ‘kalintegan kas inauna,’ isu metten ti nagbalin a kapuonan ti Mesias.—Mat. 1:2, 16; Luc. 3:23, 34.

Ngem sigun kadagiti salaysay ti Biblia, saan a masapul nga inauna ti maysa tapno agbalin a kapuonan ti Mesias. Usigentayo ti dadduma nga ebidensia:

Kadagiti annak ni Jacob (Israel), ni Ruben ti inauna nga anakna ken Lea. Idi agangay, ni Jose ti inauna nga anak ni Jacob iti dungdungnguenna nga asawa a ni Raquel. Idi nakaaramid ni Ruben iti nadagsen a basol, naited ken Jose dagiti kalintegan kas inauna. (Gen. 29:31-35; 30:22-25; 35:22-26; 49:22-26; 1 Cron. 5:1, 2) Ngem saan a nagbalin a kapuonan ti Mesias da Ruben ken Jose. Imbes ketdi, nagtaud ti Mesias ken Juda, a maikapat nga anak ni Lea.—Gen. 49:10.

 Nairekord iti Lucas 3:32 ti lima a tattao a nagbalin a kapuonan ti Mesias. Agparang a kasla inaunada amin. Gapuna, ni Boaz pinutotna ni Obed, ket ni Jesse ti anakna.—Ruth 4:17, 20-22; 1 Cron. 2:10-12.

Nupay kasta, saan nga inauna ti anak ni Jesse a ni David. Isu ti buridek iti walo nga agkakabsat a lallaki. Ngem nagtaud ti Mesias ken David. (1 Sam. 16:10, 11; 17:12; Mat. 1:5, 6) Kasta met, saan nga inauna ti anak ni David a ni Solomon nupay maysa a kapuonan ti Mesias.—2 Sam. 3:2-5.

Saan nga ipakita dayta a saan a napateg ti panagbalin nga inauna. Addaan idi ti inauna iti mararaem a posision ken masansan nga agbalin a sumaruno nga ulo ti sangakabbalayan. Doble met ti bingayna iti maipatawid a sanikua.—Gen. 43:33; Deut. 21:17; Jos. 17:1.

Ngem mabalin a maited iti sabali ti kalintegan kas inauna. Pinagtalaw ni Abraham ni Ismael isu a naited ken Isaac ti kalintegan kas inauna. (Gen. 21:14-21; 22:2) Ken kas nadakamaten, manipud ken Ruben, naited ken Jose ti kalintegan kas inauna.

Ita, subliantayo ti Hebreo 12:16 a kunana: “Awan koma ti mannakiabig wenno uray asinoman a saan a mangtagipateg iti sagrado a bambanag, a kas ken Esau, nga impadawatna dagiti kalinteganna kas inauna a kasukat ti maysa a pannangan.” Ania ti kaipapanan dayta?

Saan nga inlawlawag ni apostol Pablo iti dayta ti maipapan iti pamilia a nagtaudan ti Mesias. Kalkalpasna idi a pinaregta dagiti Kristiano a ‘mangaramidda kadagiti nalinteg a dana maipaay kadagiti sakada.’ Iti kasta, magun-odanda ti “di kaikarian a kinamanangngaasi ti Dios,” a mabalin a saanda a magun-odan no makiramanda iti seksual nga immoralidad. (Heb. 12:12-16) No makiramanda iti seksual nga immoralidad, agbalinda a kas ken Esau. Saanna nga ‘impateg ti sagrado a bambanag’ ken literal nga awan panagraemna kadagita gapu iti inaramidna.

Nagbiag ni Esau idi panawen dagiti patriarka, ken mabalin a sagpaminsan nga adda pribilehiona idi nga agidaton. (Gen. 8:20, 21; 12:7, 8; Job 1:4, 5) Ngem gapu ta nainlasagan ti panagpampanunot ni Esau, insukatna amin dagita a pribilehio iti sangamalukong laeng a gisado. Mabalin a kayatna idi a liklikan ti naipadto a panagsagaba a mapasaran ti kaputotan ni Abraham. (Gen. 15:13) Impakita met ni Esau nga awan panagraemna ken saanna nga impateg dagiti sagrado a banag idi nangasawa iti dua a pagano a babbai a nagladingitan dagiti nagannakna. (Gen. 26:34, 35) Naiduma unay ken Jacob, a nangasawa iti agdaydayaw iti pudno a Dios!—Gen. 28:6, 7; 29:10-12, 18.

Gapuna, ania ti makunatayo iti pamilia a kapuonan ni Jesus, ti Mesias? Adda dagiti gundaway nga inauna ti nagbalin a kapuonanna—ngem saan a kanayon. Nabigbig dayta dagiti Judio ken inawatda dayta, kas idi inawatda a ti Kristo agtaud ken David, ti buridek nga anak ni Jesse.—Mat. 22:42.