Iti din agbayag, inton iturayan ti baro a nailangitan a gobierno ti Dios ti sangatauan, agbalinto ti daga a naragsak a lugar, agtutunosto dagiti tattao nga agyan iti dayta, ken agaramidda iti nasayaat ken makapnek a trabaho. Inapointaran ti Dios ni Jesu-Kristo a mangituray iti intero a daga. Saan a kas iti adu nga agtuturay ita, aramidento ni Jesus ti pagsayaatan dagiti iturayanna. Ti panagturayna ket naibatay iti ayat ken agbalinto a naimbag, naasi, ken patas nga Ari.​—Isaias 11:4.

Dagiti tattao iti baro a lubong ket saanto a masinasina gapu iti nasionalidad wenno puli. Agkaykaysanto ti amin a tattao. (Apocalipsis 7:9, 10) Amin a tattao nga agyan iti daga, ayatendanto ti Dios ken dagiti kaarrubada. Agtutunos ken agkaykaysadanto a mangitungpal iti orihinal a panggep ti Dios a mangaywan iti pagtaenganda, ti daga.​—Salmo 115:16.

Inton iturayanen ti Pagarian ti Dios ti daga, naan-anay a kontrolen ti Namarsua ti amin nga aspeto ti paniempo ken pagtalinaedenna a balanse dayta. (Salmo 24:1, 2) Idi adda ni Jesus ditoy daga, impakitana ti kabaelanna nga aramiden babaen ti pannakabalin nga inted ti Dios kenkuana idi pinasardengna ti nakabutbuteng a bagyo. (Marcos 4:39, 41) Iti panagturay ni Kristo, awanton dagiti natural a didigra a pagbutbutngantayo. Isublinto ti Pagarian ti Dios ti natalna a panagbiag dagiti tattao a kadua dagiti animal ken saanton a madadael ti aglawlaw.​—Oseas 2:18.

Perpektonton ti salun-at ti amin. Awanton ti agsakit, lumakay, wenno matay. (Isaias 35:5, 6) Matagiragsakto dagiti tattao ti napintas ken nadalus nga aglawlaw kas iti natagiragsak idi ti umuna nga agassawa iti hardin ti Eden. Iti baro a lubong, kas iti Eden, mangpataudto ti daga iti adu a makan para iti amin nga agyan iti daga. (Genesis 2:9) Kas iti Israel a nagkauna nga ili ti Dios, amin nga agyan iti Paraiso ket ‘mapnekto a mangan iti taraon.’​—Levitico 26:4, 5.

Iti sidong ti sangalubongan a gobierno ti Dios, natalnanto ti panagbiag ti amin a tattao ken nasayaat ken patasto ti panangtratoda iti maysa ken maysa. Awanton ti gubat, panangabuso iti turay, ken saantayton a marigatan nga agbirok kadagiti kasapulantayo. Ikarkari ti Biblia: “Agtugawto ti tunggal maysa iti sirok ti ubasna ken iti sirok ti kayona a higos, ken awanto ti pagbutnganda.”​—Mikias 4:3, 4.

Addanto balay ti amin a pamilia ken saanda a madanagan a mapukawda dayta. Makapnekto ti amin a trabaho nga aramidentayo. Kas ibaga ti Biblia, dagiti agyan iti baro a lubong ti Dios “didanto agbannog iti awan serserbina.”​—Isaias 65:21-23.

Ikarkari ti Biblia: “Sigurado a mapnonto ti daga iti pannakaammo maipapan ken Jehova.” (Isaias 11:9) Dagiti tattao iti baro a lubong agsursurodanto iti di matukod a sirib ti Namarsua, ni Jehova, ken maipapan kadagiti nagpipintas a banag a pinarsuana. Saandanto nga usaren ti pannakaammoda nga agaramid kadagiti armas wenno mangdangran iti sabsabali. (Isaias 2:4) Imbes ketdi, masursuroda ti agbiag a natalna a kadua ti sabsabali ken no kasanoda nga aywanan ti daga.​—Salmo 37:11.

Insagana a naimbag ti Dios ti daga tapno naan-anay a matagiragsaktayo ti biag iti tunggal aldaw. Kayatna nga agbiag nga agnanayon dagiti tattao ditoy daga. (Salmo 37:29; Isaias 45:18) Tapno matungpal ti orihinal a panggep ti Dios, “alimonennanto ni patay iti agnanayon.” (Isaias 25:8) Ikarkari ti Biblia: “Awanton ni patay. Awanto metten ti panagladingit wenno panagsangit wenno ut-ot.” (Apocalipsis 21:4) Ikkanto ti Dios ti amin a tattao iti gundaway nga agbiag nga agnanayon​—agpada dagiti isalakanna inton dadaelenna daytoy dakes a lubong ken dagiti di mabilang a natay a pagungarenna iti um-umayen a baro a lubong.​—Juan 5:28, 29; Aramid 24:15.

 Uray ita, minilion ti agsagsaganan nga agbiag iti sidong ti Pagarian ti Dios a nakaas-asidegen. Uray imperpektoda, ikagkagumaanda ti agbalin a kita ti tao a kayat ti Dios nga agbiag iti baro a lubongna. Kasano? Babaen ti panangam-ammoda ken Jehova a Dios ken ti imbaonna, ni Jesu-Kristo.​—Juan 17:3.

Ammuem ti ad-adu pay no kasano a malasatam ti panungpalan daytoy a lubong ket agbiagka iti um-umayen a nasaysayaat a lubong. Awatem ti libre nga interactive a panagadal iti Biblia nga iyaw-awis dagiti Saksi ni Jehova babaen ti libro nga Agbiagka a Naragsak iti Agnanayon!