MATIGNAYTAYO la ketdi nga agyaman no adda naawattayo a nagpaiduma a regalo. Impaganetget ni Jesus dayta a leksion kalpasan a pinaimbagna ti sangapulo a lallaki nga addaan iti nakaro ken saan idi a maagasan a sakit. Maysa kadakuada ti “nagsubli, nga indaydayawna ti Dios buyogen ti natbag a timek.” Kinuna ni Jesus: “Saan kadi a nadalusan ti sangapulo? Sadino, ngarud, ti ayan ti dadduma pay a siam?” (Lucas 17:12-17) Ti leksion? Mabalin a malipatantayo a dagus dagiti nasayaat a naaramidan kadatayo ti dadduma!

Ti subbot ti kasayaatan a regalo a naited kadatayo. Maysa dayta a regalo nga awan kapadana. Kasano ngarud nga ipakitam ti panagyamanmo iti inaramid ti Dios para kenka?

• Am-ammuem ti Nangted. Saan a gapu ta adda subbot, automatikon nga agbiag nga agnanayon ti amin a tattao. Imbes ketdi, imbaga ni Jesus iti kararagna iti Dios: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.” (Juan 17:3) No naammuam nga adda maysa a tao a nangsalbar iti biagmo idi ubingka, saanmo kadi a kayat a  maam-ammo dayta a tao ken maammuan no apay a sinalbarnaka? Ni Jehova a Dios ti nangted iti regalo a subbot a makasalbar iti biag. Kayatna a maam-ammom isuna ken agbalin a gayyemna. Iyunay-unay ti Biblia: “Umadanikayo iti Dios, ket isu umadaninto kadakayo.”—Santiago 4:8.

• Ipakitam ti pammatim iti subbot. “Ti mangwatwat iti pammati iti Anak adda agnanayon a biagna.” (Juan 3:36) Ania ti kayat a sawen ti panangwatwat iti pammati? Masapul a napakuyogan iti aramid ti pammatitayo iti subbot. (Santiago 2:17) Ania a kita ti aramid? Agbalin laeng a kukuam ti maysa a regalo no agtignayka ket awatem dayta. Isu a masapul nga agtignayka ket awatem ti subbot. Kasano? Ammuem no ania a kita ti panagbiag ti kayat ti Dios, sa agbiagka maitunos iti naammuam. * Ikararagmo iti Dios a pakawanennaka ken ikkannaka iti nadalus a konsiensia. No ipakitam ti pammatim iti subbot, maaddaanka iti namnama nga agbiag a natalna, natalged ken narang-ay iti agnanayon!—Hebreo 11:1.

• Atenderam ti Pananglaglagip iti ipapatay ni Jesus. Inrugi ni Jesus ti tinawen nga okasion a mangipalagip kadatayo kadagiti pagimbagan nga ited ti subbot. Kinunana maipapan iti dayta nga okasion: “Itultuloyyo nga aramiden daytoy kas panglaglagip kaniak.” (Lucas 22:19) Laglagipento dagiti Saksi ni Jehova ti ipapatay ni Jesus inton Abril 11, 2017, iti aldaw ti Martes, kalpasan ti ilelennek ti init. Agarup maysa oras ti programa a pakairamanan ti maysa a lektiur a mangilawlawag iti kinapateg ti ipapatay ni Jesus ken no kasano a mangyeg dayta kadagiti bendision ita ken iti masanguanan. Idi napan a tawen, agarup 20 a milion iti intero a lubong ti immatender iti dayta a Pananglaglagip. Maragsakankami a mangawis kenka a makikadua kadakami kas panangipakita iti panagyaman iti kasayaatan a regalo ti Dios.