RABII ti kaaduan a panagdakiwas dagiti taraken a pusa. Agparang a dagiti imingda ti tumultulong tapno mailasinda dagiti asideg a banag ken matiliwda ti biktimaenda, nangruna no sumipngeten.

Usigem: Dagiti iming ti pusa ket nakakabit kadagiti masel nga aduan iti nerbio a konektado iti utek. Sensitibo dagita a nerbio nga uray la madetekda ti nakapuy a pul-oy ti angin. Gapu iti dayta, madlaw ti pusa dagiti adda iti asideg uray dina makitkita dagita, banag a makatulong kenkuana iti rabii.

Gapu ta sensitibo dagiti iming ti pusa, dagita ti usarenna a mangammo iti lokasion ken panaggaraw ti tiliwenna wenno ti sabali pay a banag. Makatulong met dagiti iming tapno matantiana no lumsot ti bagina iti maysa a pagserkan sakbay a sumrek. Bigbigen ti Encyclopædia Britannica a “bassit pay laeng ti naammuan maipapan iti usar dagiti iming (vibrissae) ti pusa; ngem napaneknekanen a no maputed dagita, temporario nga agkakapuyda.”

Agdisdisenio dagiti sientista kadagiti robot a makabitan kadagiti sensor a kas kadagiti iming ti pusa tapno malisian dagita a robot ti mabalin a pakaidungparanda. Sigun iti sientista a ni Ali Javey, a propesor iti University of California, Berkeley, dagita a sensor a maawagan iti e-whiskers ket mausar iti panagdisenio kadagiti mas moderno a robot, panagimbento kadagiti baro a pamay-an iti panangkontrol iti kompiuter ken gadyet, ken iti dadduma pay a sangay ti biology.

Ania ti makunam? Babaen kadi iti ebolusion a timmaud dagiti iming ti pusa? Wenno adda nangdisenio kadagita?