KALPASAN ti panangusigda kadagiti ebidensia, adu ti agkonklusion nga adda nakalalaing a nangpataud iti biag. Alaem a pagarigan ni Antony Flew a propesor ti philosophy ken dati a kangrunaan a mangisursuro nga awan ti Dios. Idi naammuanna ti nakaskasdaaw a kinakomplikado ti biag ken dagiti linteg ti nakaparsuaan a mangiwanwanwan iti uniberso, binaliwanna ti opinionna. Iti surat ni Flew, dinakamatna daytoy a panagrasrason dagiti nagkauna a pilosopo: “Masapul nga akseptarentayo ti aniaman nga ipakita ti ebidensia, nupay saan a dayta ti ekspektarentayo.” Para ken Propesor Flew, pinaneknekan dagiti ebidensia nga adda Namarsua.

Kasta met ti konklusion ni Gerard a nadakamat iti napalabas nga artikulo iti daytoy a serye. Nupay nangato ti adalna ken narang-ay iti karerana iti entomology, kinunana: “Awan ti nakitak nga ebidensia a ti biag ket basta timmaud lattan manipud iti awan biagna a banag. Ti kinaurnos ken kinakomplikado dagiti sibibiag a banag ti nakakombinsirak nga adda la ketdi maysa nga Organisador ken Diseniador.”

No kasano a maam-ammotayo ti maysa nga artist babaen ti panangsukimattayo iti obrana, naammuan ni Gerard dagiti kualidad ti Namarsua babaen ti panangadalna kadagiti bambanag iti nakaparsuaan. Inusig met ni Gerard ti Biblia—ti libro nga impaisurat ti Namarsua. (2 Timoteo 3:16) Naammuanna iti dayta dagiti makapnek a sungbat dagiti saludsod maipapan iti napalabas ti sangatauan ken dagiti makatulong a solusion kadagiti problema ti tattao ita. Gapuna, nasiguradona a ti Biblia ket inaramid met ti nakalalaing a nangpataud iti biag.

Kas iti napaneknekan ni Gerard, dagiti sungbat ti Biblia ket nagpateg nga usigen. Paregtaendaka a mangaramid met iti kasta.