NO ANIA TI KUNA TI BIBLIA
Ipapatay
Sadino ti ayan dagiti natay?
“Tapokka ket iti tapok agsublikanto.”—Genesis 3:19.
TI KUNA TI TATTAO
Mamati ti dadduma nga adda sumuno a biag—iti langit, impierno, purgatorio, wenno Limbo. Adda met dagiti mamati a mayanakda manen iti sabalin a kita ti biag. Ngem kadagiti saan a mamati kadagiti narelihiosuan a pannursuro, ti ipapatay ket ti basta panagpatingga laeng ti biag ti tao.
TI KUNA TI BIBLIA
Kuna ti Eclesiastes 9:10 nga “awan ti aramid wenno uray gakat wenno uray pannakaammo wenno uray sirib idiay Sheol [Tanem], ti disso a papanam.” Ilawlawag met ti Biblia no ania ti mapasamak agpadpada kadagiti tattao ken animal no matayda. Kunana: “Isuamin mapanda iti maymaysa a lugar. Napaaddada amin manipud iti tapok, ket agsublida amin iti tapok.”—Eclesiastes 3:20.
Ania ti kasasaad dagiti natay?
“Ti espirituna pumanaw, isu agsubli iti dagana; iti dayta nga aldaw mapukaw dagiti panunotna.”—Salmo 146:4.
TI KUNA TI TATTAO
Naisuro iti adu a nakadepende kadagiti inaramid ti maysa a tao bayat a sibibiag ditoy daga no anianto ti pagbanaganna iti sumuno a biag. No nagaramid iti naimbag, magunggonaan iti agnanayon a kinaragsak; no dakes isuna, mapasaranna ti agnanayon a pannakaparigat. Adda met dagiti mamati a sakbay a mapalubosan dagiti tattao a dumatag iti Dios, masapul a madalusan pay idiay purgatorio dagiti basolda kalpasan ti ipapatayda. Dagidiay saan a nadalusan ket agnanayon kano a mapaidaman iti kasta a kinaragsak.
TI KUNA TI BIBLIA
Dagiti natay ket saanen a makarikna iti ragsak wenno pannakaparigat. Kinapudnona, awanen ti puotda isu nga awan a pulosen ti aniaman a mariknada. Dida met matulongan wenno madangran dagiti sibibiag. Sigun iti Eclesiastes 9:5, 6: “Dagiti sibibiag sipapanunotda a mataydanto; ngem no maipapan kadagiti natay, saanda a pulos sipapanunot iti aniaman . . . Kasta met, ti ayatda ken ti gurada ken ti imonda napukawen, ket agingga iti tiempo a di nakedngan awanandan iti bingay iti aniaman a banag a kasapulan a maaramid iti baba ti init.”
Adda ngata pay namnama para kadagiti natay?
“No ti nabaneg a lalaki matay mabalinna kadi ti agbiag manen? Amin dagiti aldaw ti inkapilitan a panagtrabahok agurayakto, agingga a ti gin-awak dumteng.”—Job 14:14.
TI KUNA TI TATTAO
Mamati ti kaaduan a no naikeddengen nga impierno ti papanan ti maysa, awanen ti namnamana. Agnanayon kanon a maparigat idiay impierno. Ngem dagidiay adda iti purgatorio ket makagun-od kano laeng iti kinaragsak idiay langit kalpasan ti umap-apuy a pannakadalus dagiti basolda.
TI KUNA TI BIBLIA
Kalpasan ti panaginanada ken patay, dagiti natay ket pagungaren, wenno pagbiagento manen, ditoy daga ti Anak ti Dios. Kuna ti Biblia: “Dikay agsiddaaw iti daytoy, agsipud ta um-umayen ti oras nga amin dagidiay adda kadagiti pakalaglagipan a tanem mangngegdanto ti timekna ket rummuarda.” (Juan 5:26, 28, 29) Kalpasan dayta, ti kababalin ti maysa iti dayta a tiempo ti pakaibasaran no isu ket maipaayan iti biag nga agnanayon. *
^ par. 14 Para iti ad-adu pay nga impormasion maipapan iti panagungar, kitaem ti kapitulo 7 ti libro nga Ania a Talaga ti Isursuro ti Biblia? nga impablaak dagiti Saksi ni Jehova
Baka Kayatmo Met ti
SUNGBAT DAGITI SALUDSOD MAIPAPAN ITI BIBLIA
Agpayso Kadi ti Impierno? Ania ti Impierno Sigun iti Biblia?
Adu a tattao ti mamati a ti impierno ket lugar a pakatutuokan iti agnanayon a sadiay a madusa dagiti dakes a tattao. Ngem kasta kadi ti isursuro ti Biblia?
SUNGBAT DAGITI SALUDSOD MAIPAPAN ITI BIBLIA
Isursuro Kadi ti Biblia ti Reinkarnasion?
Ania ti mapasamak no matay ti tao?
SUNGBAT DAGITI SALUDSOD MAIPAPAN ITI BIBLIA
Mabasa Kadi ti Purgatorio iti Biblia?
Baka makigtotka no maammuam ti naggapuan dayta a sursuro.
