AWAN pay maysa a milimetro ti kaatiddog ti lapayag ti bush katydid iti South America (Copiphora gorgonensis), ngem di unay umadayo ti kabaelanna no idilig iti lapayag ti tao. Dayta nga insekto ket makangngeg iti nagadu a kita ti uni uray iti adayo a distansia. Kas pagarigan, mailasinna ti nagdumaan ti uni ti sabali a katydid ken ti nasinggit nga uni ti agan-anup a paniki.

Usigem: Dagiti lapayag ti katydid ket adda iti dua a kamauna a sakana. Kas iti lapayag ti tao, ti lapayag ti katydid ket agsagap iti uni, baliwanna dayta, ken analisarenna ti frequency. Ngem adda nadiskobre dagiti sientista a karkarna a paset ti lapayag daytoy nga insekto—maysa a napnuan-pluido a lungog a kasla immarantiddog a lobo. Daytoy a paset nga inawaganda iti acoustic vesicle ket kas iti cochlea dagiti mamalia ngem basbassit nga amang. Ti acoustic vesicle ti makagapu a naisangsangayan ti panagdengngeg ti katydid.

Kuna ni Professor Daniel Robert, iti University of Bristol’s School of Biological Sciences iti United Kingdom, a dayta a nadiskobre ti makatulong kadagiti inheniero a “mangdisenio kadagiti alikamen a makatulong iti panagdengngeg a naitulad iti nakaparsuaan a basbassit ken nalawlawag nga amang ngem kadagiti agdama a maar-aramat.” Patien dagiti managsirarak a makatulong met dayta iti sumaruno a henerasion ti ultrasonic engineering technology, agraman dagiti imaging systems para kadagiti ospital.

Ania ti makunam? Babaen kadi iti ebolusion a timmaud ti naisangsangayan a panagdengngeg ti katydid? Wenno nadisenio dayta?