Sigun iti maysa a panagadal idiay Switzerland, 14% a dakdakkel ti posibilidad a matay ti maysa nga agtawen iti nasurok nga 60 iti kasangayna ngem iti dadduma nga aldaw. Iti kasangayda, 18% a mas gagangay nga agsagaba ti kaaduan a tattao iti makapapatay nga atake ti puso, 21% a mas gagangay a maistrok dagiti babbai, ken 35% a mas gagangay nga agpakamatay dagiti lallaki. Mamati dagiti sientista a ti stress ken arak ket karaman kadagiti makagapu iti yaadu ti panagpakamatay ken aksidente. Ngem di umanamong ti dadduma nga eksperto. Kunada a ti kamali met laeng ti tattao ti mabalin a makagapu iti pannakaiparna ti ipapatay ti adu iti kasangayda.

Dakdakkel ti posibilidad a mainterbiu dagiti guapo nga aplikante iti trabaho no ikabilda ti retratoda iti résumé-da no idilig kadagiti napipintas a babbai. Apay? Sigun kadagiti managsirarak nga Israeli, mabalin a gapu ta babbai ti kaaduan nga agtrabtrabaho kadagiti human resource departments a mangpili no siasino dagiti mainterbiu. Kuna ti The Economist a ti “di makaay-ayo” a rason ket “umapal dagiti babbai kadagiti napipintas nga aplikante.”

Tallo a mangilablaban iti talna—maysa nga 82 anyos a madre ken ti dua a kakaduana nga agedad iti 63 ken 57—ti nabiit pay a nangserrek iti maysa a lugar iti Oak Ridge, Tennessee a nakaidulinan ti 100 a tonelada a nuklear a material, sada nangipinta kadagiti kontra gubat a sasao iti maysa kadagiti pasdek. Kinuna ti Energy Secretary a ni Steven Chu a “makapadanag unay” ti naliway a seguridad iti “maysa kadagiti maibilang a katatalgedan koma a pasilidad iti lubong.”

Imbilin ti kangatuan a korte ti nasion a nasken nga ikkaten dagiti kompania ti sigarilio dagiti napatak a kolor ken logo kadagiti pakete ti sigarilio. Amin a sigarilio a mailako itan ket masapul a nakapakete iti di makaatrakar a kolor kape nga addaan kadagiti makapaseggar a ladawan a mangipakita kadagiti peggad ti panagsigarilio.