Kasano a ti dua a nagkinnari nga aginnayat iti maysa ken maysa ket dumteng iti situasion a dida agin-innuni iti adu nga oras—wenno al-aldaw pay ketdi? ‘Maymayat la daytan ngem ti agapakami,’ irasonda. Kaskasdi a saan a nasolbar ti problema, ken agpadada a saan a naragsak.

Panagibales. Agulimek ti dadduma nga assawa tapno makabalesda. Kas pagarigan, agplano ni mister para iti ngudo ti lawas a dina kinonsulta ni misis. Idi naammuan ni misis, nakaunget ken imbagana a managimbubukodan ni lakayna. “Arsagidka la unay!” kuna ti lalaki. Agburburek ti darana a pumanaw ken dinan pagpagunian ni mister. Kasla ibagbagana, “Sinaktam ti riknak isu a balsenka.”

Panangkontrol. Di agun-uni ti dadduma tapno maalada ti kayatda. Kas pagarigan, plano ti agassawa ti agbakasion ket kayat ni misis nga itugot ti nagannakna. Ngem saan a kayat ni mister. “Siak ti asawam, saan a dagiti nagannakmo,” kunana. Kalpasanna, dinan pagpagunian ni baketna agingga a mapatulokna iti kayatna.

Sabagay, ti apagbiit a panagulimek ket mamagkalma iti emosion no agpadan a napudot ti uloda. Adda pagimbagan dayta a kita ti panagulimek. Kuna ti Biblia nga adda “tiempo ti panagulimek.” (Eclesiastes 3:7) Ngem no mausar dayta tapno bumales wenno mangkontrol, saanna laeng a pabayagen ti problema no di ket pabassitenna pay ti panagraem ti agassawa iti maysa ken maysa. Kasano a maliklikam a mapasamak dayta kadakayo?

Ti umuna ket ti panangbigbigmo a saan a talaga a makasolbar iti problema ti di panagin-innuni. Pudno, mabalin a makabaleska wenno mapatulokmo ti asawam no dika agun-uni. Ngem kasta kadi ti kayatmo a panangtrato iti tao a nagkariam nga ayaten? Adda dagiti nasaysayaat a pamay-an a pangsolbar kadagiti diyo pagtunosan.

Agbalinka a mannakaawat. Kuna ti Biblia a ti ayat ket “saan a magargari nga agpungtot.” (1 Corinto 13:4, 5) Agkalmaka ngarud no gapu iti suron ti asawam maibagana ti “Dika pulos dumdumngeg” wenno “Kanayonka a maladaw.” Tarusam ketdi ti kayatna a sawen. Kas pagarigan, nalabit ti talaga a kaipapanan ti “Dika pulos dumdumngeg” ket “Panagriknak ket dimo ikabkabilangan ti opinionko.”—Prinsipio ti Biblia: Proverbio 14:29.

Ibabbabam ti bosesmo. Masansan a kumaro ti riri no agtultuloy dayta. Ngem adda maaramidam tapno saan a kumaro ti riri. Ania? Kuna ti libro a Fighting for Your Marriage: “No ibabbabam ti bosesmo ken ikabilangam ti opinion ti asawam, maikkat ti tension ken saanen a kumaro. Masansan a dayta la ti kasapulan.”—Prinsipio ti Biblia: Proverbio 26:20.

Panunotem ti pagimbaganyo a dua, saan la a ti bukodmo. Kuna ti Biblia: “Tunggal maysa itultuloyna koma a sapulen, saan a ti bukodna a pagsayaatan, no di ket ti pagsayaatan ti sabali a tao.” (1 Corinto 10:24) No ibilangmo ti asawam kas gayyemmo imbes a kabusor, saanka nga alisto a masair ken makiriri isu a maliklikam a di kasarita ti asawam.—Prinsipio ti Biblia: Eclesiastes 7:9.

Ti di panangpaguni ket maikontra iti balakad ti Biblia: “Ayaten koma ti tinunggal maysa kadakayo ti asawana a babai a kas ti panagayatna iti bagina; iti sabali a bangir, ti babai rebbeng nga addaan iti nauneg a panagraem iti asawana.” (Efeso 5:33) Apay a diyo pagnumuan a liklikanyo ti di agin-innuni?