Dagiti Agkakapateg a Nalagipna

Kalpasan a naawatna ti libro nga Agsursuroka iti Naindaklan a Mannursuro, inkeddeng ti maysa a babai nga ikkan iti kasta a libro ti baketen a manangna. Adda Alzheimer’s disease ni manangna nga agtawenen iti 85. Ngem napasnek idi nga agad-adal ken mannursuro iti Biblia iti unos ti 70 a tawen. Ita, manmanon ti malagipna kadagiti napalabas a pasamak ken manmanon a makisarita.

“Iti umuna nga aldaw,” kinuna ti adingna, “inlawlawagko a nadisenio ti libro tapno tumulong kadagiti nagannak a mangyukuok iti adu a prinsipio ken pannursuro ti Biblia iti annakda ken kayatko nga ibasa dayta kenkuana. Saan a nagun-uni. Ngem idi rugiakon a basaen, gimmanaygay ken sinungbatanna ti tunggal saludsod a nayimtuod iti panagbasa. Adda dagiti gundaway a bayat a dakdakamatek ti maysa a teksto, isun ti nangituloy iti dayta sigun iti malagipna​—ngem sigun iti King James Version, a malagipna sipud idi kinaagtutubona. Pasaray iggamanna ti takkiagko bayat a basbasaek ti maysa a salaysay iti Biblia sana kinuna, ‘Ay, malagipko dayta!’

“Idi agawidkamin​—kalpasan nga imbasak ti nasurok a kagudua iti libro​—imbagana a kayatna a mangngeg ti ad-adu pay. Ni lakayna a mangas-asikaso iti tunggal kasapulanna, ti nangituloy a nangibasa kenkuana iti nabatbati a paset ti libro. Gapu iti daytoy a kapadasak ken ni manangko, naamirisko a napateg ti panangibasa kadagiti kasta a publikasion kadagiti lallakay, babbaket, ken masaksakit.”

Daytoy a libro a napintas dagiti ladawanna ken addaan iti 256 a panid a kadkadakkel daytoy a magasin ket magusgustuan agpadpada dagiti ubbing ken natataengan. Nupay simple ti pannakaisalaysay dagiti adalen a naibasar kadagiti pannursuro ni Jesu-Kristo, dagiti suhetona ket maibagay iti amin nga edad. Mabalinmo ti agkiddaw iti kopiam babaen ti panangsuratmo iti naipakuyog a kupon ken ibusonmo dayta iti naipaay nga adres wenno iti maitutop nga adres iti panid 5 daytoy a magasin.

□ Kayatko ti maaddaan iti libro nga Agsursuroka iti Naindaklan a Mannursuro.

□ Interesadoak iti libre a panagadal iti Biblia.