Panangmatmat iti Lubong

Dagiti Suplemento a Bitamina ken Kanser

Idi narepaso ti 14 a panagadal a nakausigan ti panagbiag ti 170,000 a tattao, naammuan a dagiti suplemento a bitamina ket saan a makasalaknib iti kanser iti karabukob, tian, dalem, bagis, ken pali. Sigun iti medikal a magasin a Deutsches Ärzteblatt, saan la nga awan ti maitulong dagiti suplemento nga antioxidant a beta carotene ken bitamina A, C, ken E no di ket medio pakaruenda pay ti risgo ti itataud ti kanser. Kastoy ti inlawlawag ni Dr. Richard Sullivan iti Cancer Research UK: “Awan ti pangdarasan a panglapped iti kanser iti bagis. No agtomtomarka kadagiti bitamina tapno masalakniban ti bagim kontra iti dayta a sakit, saysayangem laeng ti kuartam.” Kinunana pay: “Ti kasayaatan a mangpabassit iti risgo ket manganka iti makapasalun-at ken saanka nga agsigarilio.”

 Madanaganka Aya Maipapan Kadagiti Mikrobio?

“Saan laeng nga imposible a maragpat ti arapaap a maaddaan iti pagtaengan nga awanan iti mikrobio no di ket barengbareng pay,” sigun iti maysa nga artikulo iti The New York Times. “Malaksid no adda kabbalaymo a baket wenno lakay unayen, ubing nga awan pay innem a bulanna wenno masakit unay, ti sumagmamano a gasut a bakteria iti aniaman a disso, iti pamusiposan ti ridaw wenno iti kutsara ket saan a makadangran” iti salun-atmo. Agpayso a dagiti taraon a nalaka a mabangles a mabati iti aniaman a disso iti sumagmamano nga oras ket mabalin a pagbalayan dagiti bakteria ken makasabidong a kanen. Tapno malapdan dayta, idulinmo iti refrigerator dagiti taraon a nalaka a mabangles. Tapno masalaknibam ti bagim kadagiti bakteria, saanen a kasapulan nga agusarka kadagiti produkto a kontra bakteria. “Agbuggoka laeng ken agsabonka iti sumagmamano a daras iti agmalem ket umdasen dayta,” kinuna ti periodiko.

Maaw-awanan iti Talek

“Kaaduan kadagiti Espaniol ket bassit wenno awan panagtalekda iti kaaduan nga institusion a mangtartarawidwid iti biagda,” impadamag ti periodiko nga El País iti Espania. Sigun iti Center for Sociological Research, imbaga ti nasurok laeng a kagudua kadagiti 2,500 a nakaumanna a dida agtalek iti gobierno, 56.2 a porsiento ti di agtalek kadagiti banko, ken 57.7 a porsiento ti saan nga agtalek kadagiti union dagiti trabahador. Iti pagilian a dandani 75 a porsiento iti populasion ti mangibaga a Katolikoda, nasurok nga 61 a porsiento ti nagkuna a “bassit ti panagtalekda wenno saanda nga agtalek iti Iglesia Katolika.” Iti panagkomentona iti daytoy, kinuna ti maysa nga editorial iti periodiko a Diario 16: “Nalawag nga ibilang ti kaaduan nga Espaniol a Katolikoda, ngem ti kaaduan ket saan a mangal-alagad iti daytoy a relihion wenno iti isursurona.”

Ti Panagbasa Mapasayaatna ti Memoria

Kasano a mapasayaatmo ti memoriam? “Dika manginanama iti milagro,” kinuna ti Folha Online ti Brazil. “Ti sekreto ket usarem ti utekmo.” Ti panagbasa ti maysa kadagiti pamay-an tapno maparang-aymo ti utekmo. Kasano? Kinuna ti neurologo a ni Ivan Izquierdo: “Apaman a nabasa ti tao ti sao a ‘kayo,’ mabalin a malagipna iti kakasangagasut ti maysa a segundo ti amin a kayo a naammuanna iti intero a biagna.” Sigun ken ni Izquierdo, “mapasamak amin dagitoy a di madmadlaw.” Patienna a ti kastoy a panagpanunot ket makatulong tapno saan unay a maaddaan ti utektayo iti saksakit a kas iti Alzheimer’s disease. Kinuna ti neurologo a ni Wagner Gattaz, iti Research Center for Memory Disorders, iti São Paulo, Brazil: “No ad-adda nga usarentayo ti memoriatayo, ad-adda a mataginayontayo dayta.”

Umad-adu Dagiti Maipatulod a Text

“Iti intero a lubong, nasurok a 360 a bilion a text ti maipatulod iti kada tawen,” impadamag ti International Herald Tribune. “Dayta ket agarup maysa a bilion a short messages iti kada aldaw.” Ad-adun ti pakausaran ti short message service, wenno SMS. Umad-adu a kompania ti mangipatpatulod kadagiti text message kadagiti cell phone dagiti posible nga agbalin a klienteda tapno ilakoda dagiti produktoda. Kas pagarigan, dagiti suskritor mabalinda itan a maawat dagiti kararag ti papa kadagiti cell phone-da. Dagiti polis idiay Netherlands ti nangipatulod kadagiti SMS kadagiti natakaw a cell phone tapno mapakdaaran dagiti posible a gumatang iti dayta. Ket iti dadduma a pagilian a ti narelihiosuan a linteg ti mangipalubos iti lalaki a mangidiborsio iti asawana kalpasan ti mamitlo a panangideklarana iti “Idiborsiokan” ti nangipalubosen iti panagdiborsio babaen iti SMS.

Panagusar iti Internet Idiay Netherlands

“Maysa iti tunggal 5 nga ubbing nga agtawen iti 11 agingga iti 12 ti rirriribuken ti dida am-ammo babaen kadagiti seksual a sasao bayat a makikomkomunikarda babaen iti Internet,” sigun iti panagadal a naipadamag iti Olandes a periodiko nga Algemeen Dagblad. Sigun kadagiti naisaludsod iti 660 a nagannak ken 220 nga annak nga agtawen iti 8 agingga iti 12, nasurok a kagudua kadagiti annak nga agus-usar iti Internet ti pasaray maaddaan iti “dakes a kapadasan” babaen iti maawatda no kua a “makapasuron a surat (spam)” wenno pornograpiko a ladawan wenno dadduma pay a di maitutop nga impormasion. Kaaduan nga annak ti mangipulong iti kasta a kapadasanda kadagiti dadakkelda. Imbaga pay ti panagadal a 8 iti tunggal 10 a nagannak ti madanagan maipapan kadagiti peggad a mabalin a sarangten ti anakda no agus-usarda iti Internet, dandani kagudua kadagiti nagannak ti nangibaga a kayatda a bantayan a naimbag ti annakda bayat nga us-usarenda ti Internet; 60 a porsiento kadagiti nagannak ti nangikabil iti computer iti salasda tapno masiputanda ti annakda, ket iti kada aldaw, dagiti ubbing agusarda iti Internet iti promedio a dandani maysa nga oras nga agay-ayam, agipatulod iti surat, ken makikomunikar.

Ti Balakad a Kaykayatda

“Natakuatan ti maysa a surbey a dandani dua a kakatlo kadagiti direktor dagiti nalatak a kompania kaykayatda ti balakad ti asawada ngem iti sabali a miembro ti administrasion wenno katrabahuanda no adda problemada iti panggedan,” impalgak ti The Times iti London. Sigun ken ni Bob Arnold, a ti pagkonsultaran a kompaniana ti nagaramid iti surbey, a saan a kinalaing ti sapsapulen dagiti panguluen iti negosio kadagiti mamalbalakad kadakuada, no di ket panagtalek. Kastoy ti inlawlawagna: “Gagangay a ti panagwaywayas, kinaawan panangidumduma ken kapadasan dagiti galad a maikalikagum unay kadagiti mamalbalakad kadagiti miembro iti administrasion,” ngem gapu ta ti panagtalek ti kapatgan, dagiti assawa a babbai ti kangrunaan a pilienda.

Naipakpakaunan ti Panagpatingga Dagiti Tseke

“Posible nga iti sumaganad a duapulo a tawen wenno nasursurok pay, mabalin a manmanonton ti agusar iti tseke,” kinuna ti U.S.News & World Report. Kellaat a bimmassiten ti agbaybayad babaen iti tseke sipud idi addan ti “nalaklaka ken nabibiit a pagpilian iti panagbayad kas kadagiti credit card, debit card, ken elektroniko a pannakitransaksion iti banko.” Ti dadduma pay a makagapu ket ti direkta a panagdeposito ken automatiko a panagbayad iti utang. Iti kastoy a wagas, dagiti kostumer palubosanda dagiti nakautanganda a mangkissay iti depositoda iti banko tapno pagbayad kadagiti masansan nga utangda. Sigun iti industria ti panagbanko, ti panangipatingga kadagiti papel a tseke ti mangsalaknib iti pannakatakaw ti pakabigbigan ti maysa a tao. Nupay kasta, kinuna ti dadduma a kostumer ken eksperto maipapan iti panangsaur a madanaganda. Ngamin, ti panagusar kadagiti elektroniko a tseke ti ad-adda a mangpukaw iti kinapribado ti maysa a tao ken mangpaadu kadagiti sinasaur a gakat.