Panangisardeng iti Panagtakaw iti Tagilako

“Saan la a siksika ti agproblema iti panangpasardeng iti panagtakaw, problema dayta ti intero a komunidad; pagimbagan ti amin no maisardeng ti panagtakaw.”​—“EVERY RETAILER’S GUIDE TO LOSS PREVENTION.”

TI PANAGTAKAW iti tagilako, kas iti dadduma a dakes nga aramid, maimpluensiaanna ti panunot ti maysa a tao, isu nga agikalintegan. Isu a kas iti hardinero a mangiramut iti ruot iti hardinna, dagidiay mayat a mangisardeng iti panagtakaw iti tagilako masapul nga iramutanda ti dakes a panagpampanunotda. ‘Pabaruenyo ti panunotyo,’ imbalakad ti Biblia idiay Roma 12:2. Ket idiay 1 Pedro 1:14, mamagbaga: “Sumardengkayo a maisuksukog maitunos kadagiti tarigagay a sigud nga adda kadakayo.” Dagiti sumaganad a lima a punto ket mabalin a makatulong iti agtatakaw iti tagilako a mangbaliw iti panunotna maipapan iti panagtakaw.

Dagiti Makatulong a Mangilinteg iti Panagpampanunot

▪ Umuna, ti panagtakaw iti tagilako ket maibusor iti linteg. Mabalin a kadawyan ti panagtakaw iti pagnanaedanna, ken mabalin a saan a matiliw; ngem ti agtatakaw iti tagilako kaskasdi a lablabsingenna ti linteg.​—Roma 13:1.

Ania ti mapasamak no adu ti manglabsing iti linteg? Sigun iti Biblia, “mabibineg ti linteg.” (Habakuk 1:3, 4) Iti sabali a pannao, agbalin nga awan serserbin ti linteg, isu a mariribuk ti urnos dagiti umili. Kada adda agtakaw iti tagilako, pakapuyenna ti pamuon ti kagimongan dagiti natulnog iti linteg. No mapasamak dayta, agsagaba ti amin.

▪ Maikadua, ti panagtakaw iti tagilako dadaelenna ti panagtalek. Ti kasta a di kinamapagpiaran, dadaelenna dagiti natauan a relasion, isu a marigatan dagiti tattao nga agkikinnaawatan ken aglalangen buyogen ti kinaawan panangidumduma.​—Proverbio 16:28.

“Ti kadakkelan a pagkapuyak ket managtalekak unay.” Kasta ti kinuna ti maysa a makinkukua iti tiendaan dagiti kawes idi nabangkarote gapu kadagiti mannanakaw. Agtalek unay idi nga isu ket saan a takawan dagiti suki ken empleadona. Ita, ammonan a nagtalek idi kadagiti tattao a di mapagtalkan.

 Mabalin nga agulbod ti maysa a tao iti sabali isu nga ipababana ti pakasaritaanna iti dayta a tao. Ngem dagiti makintiendaan agsuspetsada iti amin a sumrek iti tiendaanda a simmaruno kadakuada. Pagarupenda a posible nga agtakaw dagiti mapagpiaran a tattao. Adda kadi kalintegan ti siasinoman a mangipagarup iti kasta?

▪ Maikatlo, ti panagtakaw iti tagilako ket mabalin a mangiturong kadagiti nakarkaro a krimen. Inton agangay, dagiti agtatakaw iti tagilako mabalin nga agaramidda kadagiti nadagdagsen a krimen.​—2 Timoteo 3:13.

Ti Pagtungpalan ti Panagtakaw iti Tagilako

▪ Maikapat, ken ti kapatgan, daydiay agtatakaw iti tagilako ket bumusbusor iti Mannakabalin-amin a Dios. Ibaga ti Saona a ti mannanakaw “saan koma nga agtakawen,” ket mamakdaar maipapan iti panangukom a maibusor kadagidiay mangkarit Kenkuana. (Efeso 4:28; Salmo 37:9, 17, 20) Ngem pakawanen ni Jehova dagidiay mannanakaw nga agbalbaliw. Mabalinda ti makikappia iti Dios.​—Proverbio 1:33.

▪ Maikalima, agpatingganton ti panagtakaw iti tagilako, kas iti amin a sabali pay a krimen. Inton naan-anay nga iturayan ti Pagarian ti Dios ti daga kas naikari iti Biblia, mabuyoganton iti kinatarnaw ken kinamapagpiaran ti pannakilangen dagiti tattao iti maysa ken maysa. Daytoy kaipapananna nga awanton ti agsagaba iti nakalkaldaang nga epekto ti panagtakaw iti tagilako.​—Proverbio 2:21, 22; Mikias 4:4.

[Kahon/Ladawan iti panid 10]

DAGITI NALAKA A PAMAY-AN A PANGLAPPED ITI PANAGTAKAW

Dadduma a babassit a negosio mabalin a dida kabaelan dagiti nangina a sistema ti seguridad. Ngem daytoy dina kayat a sawen nga awanen maaramidanda a manglapped kadagiti agtatakaw iti tagilako. Masansan a masaluadan dagiti negosio ti tagilakoda babaen kadagitoy simple a pamuspusan.

Iti insuratda a publikasion, dagiti detektib a da Michael Brough ken Derek Brown impaganetgetda a masapul nga asikasuen dagiti kostumer: “Siputanyo ti amin. . . . Sika ken dagiti paralakom ti kangrunaan nga agsiput.” Insingasingda nga asitgam ti maatap nga agtatakaw iti tagilako iti kastoy a pamay-an: “Nabirokam kadin ti sapsapulem? Pangngaasim ta ibatim dayta iti cash register ta iserrekko ti gatadna.” “Balkutek kadin?” “Umanay kadi ti sueter kenka?” “Iyalaanka kadi iti basket?” Kinuna dagiti detektib: “Daytoy ti mangipakaammo kadagiti mapagpiaran a kostumer, agraman dagiti mannanakaw a nadlawmo ken sipsiputam ida.”

No maipapan iti kinaurnos, kinunada: “Pagtalinaedem a naurnos ken nadalimanek dagiti tagilakom. No nasiputka ken ammom dagiti nakadispley a tagilakom, ken nadalimanek dagitoy, nalaklaka a makitam no adda nanggaraw wenno nangala iti tagilakom.”​—Every Retailer’s Guide to Loss Prevention.

Kastoy ti isingasing ti imbestigador a ni Russel Bintliff: “Dagiti nawayang a pasilio ken napekpek nga estante ti makatulong kadagiti empleado a mangpaliiw iti ar-aramiden dagiti kostumer. Babaen iti pannagna iti pasilio a nakapaliiwanna iti mapagduaduaan a tao, maammuan ti empleado ti naawan a tagilako ken kalpasanna, babaen iti panagpammarang a kasla agsuksukimat iti suplay a tagilako, mapaliiwna no ania ti adda iti shopping cart wenno basket ti suki. . . . Maammuan dagiti agtatakaw iti tagilako ti mapaspasamak; dinto pay ketdi madlaw dagiti mapagpiaran a kostumer a sipsiputan ida ti empleado.” No maipapan iti kasasaad ti pasilio, kinunana: “Nawaya koma ti pasilio tapno masiputan [ti makinkukua] ken dagiti empleadona ti ar-aramiden dagiti kostumer.”​—Crimeproofing Your Business​—​301 Low-Cost, No-Cost Ways to Protect Your Office, Store, or Business.

[Ladawan iti panid 9]

Ti kinamapagpiaran pasayaatenna ti panagtalek ken panaggagayyem