Nagporsegiak a Nangragpat iti Kalatko

KAS INSALAYSAY NI MARTHA CHÁVEZ SERNA

Maysa nga aldaw idi agtawenak iti 16, naawananak iti puot bayat nga agtartrabahoak idiay balay. Idi makapuotak, addaakon iti iddak. Diak ammo no apay a nakasaksakit ti ulok ket awan ti aniaman a nakitak ken nangngegko iti sumagmamano a minuto. Nagdanagak. Ania ngatan ti napasamak kaniak?

DAGITI madanagan a dadakkelko ti nangipan kaniak iti doktora a nangireseta kadagiti bitamina. Imbagana a naawananak iti puot gapu iti kurang a turogko. Dua a bulan kalpasanna, nagkombulsionak manen, ket kalpasanna iti kapamitlo a daras. Nagpakonsultakami iti sabali a doktor, a nangipagarup nga adda sakit ti ur-uratko isu nga inikkannak kadagiti agas a pangpakalma.

Nupay kasta, simmansan ti panagkombulsionko. Maawananak iti puot isu a matumba ken madangranak a mismo. No dadduma, makagatko ti dilak ken ngiwatko. Inton agsubli ti puotko, nakasaksakit ti ulok ken marurusokak. Naut-ot ti intero a bagik, ken masansan a diak malagip ti napasamak sakbay a nagkombulsionak. Tapno sumayaat ti riknak, masansan a masapul nga aginanaak iti maysa wenno dua nga aldaw. Nupay kasta, patiek a temporario laeng daytoy a problemak​—nga umimbagakto met laeng.

Ti Epektona Kadagiti Kalatko

Idi ub-ubingak pay, nangrugi a nakipagadal ti pamiliak kadagiti Saksi ni Jehova. Dagiti nangyadal kadakami ket dua nga special pioneer, wenno amin-tiempo a ministro nga adu nga oras iti kada bulan a mangisuroda kadagiti kinapudno iti Biblia iti sabsabali. Nakitak a ti ministerio dagidiay a payunir ti mangparparagsak kadakuada. Nangrugi metten a nariknak dayta a rag-o idi inranudko iti maestrak ken kadagiti kaeskuelaak ti maipapan kadagiti kari a nailanad iti Biblia.

Di nagbayag kalpasanna, adu iti pamiliak ti nagbalin a Saksi ni Jehova. Kaay-ayok nga ikasaba ti naimbag a damag! Idi agtawenakon iti pito, inaramidko a kalat ti agbalin met nga special pioneer. Idi agtawenak iti 16, inaramidko ti kangrunaan a makatulong kaniak a mangragpat iti dayta a kalat idi nagbautisarak. Kalpasanna, namin-adun a naawananak iti puot.

Serbisio a Kinapayunir

Iti laksid dagiti pisikal a parikutko, kaskasdi a nariknak a kabaelak ti agbalin nga amin-tiempo a ministro dagiti Saksi ni Jehova. Ngem gapu ta mamindua iti kada lawas a maawananak iti puot, impagarup ti dadduma iti kongregasion a saan a rumbeng nga akseptarek ti kasta a nadagsen a responsabilidad. Nalidayan ken naupayak. Ngem idi agangay, adda agassawa nga agserserbi iti sanga nga opisina dagiti Saksi ni Jehova iti Mexico nga immay iti kongregasionmi. Naammuanda ti tarigagayko nga agpayunir isu a pinaregtadak unay. Kinombinsirdak a saan a ti sakitko ti manglapped kaniak nga agpayunir.

Isu nga idi Setiembre 1, 1988, naawatko ti pannakadutokko kas maysa a regular pioneer iti nakayanakak nga ili ti San Andrés Chiautla, Mexico. Iti kada bulan, adu nga oras a mangasabaak maipapan iti naimbag a damag. No saanak a makapangasaba iti publiko gapu ta agkidar ti sakitko, suratak dagiti kalugarak maipapan kadagiti Nainkasuratan a topiko isu a naipaayanda kadagiti naisurat a pammaregta nga agadalda iti Biblia.

 Natakuatan ti Sakitko

Iti daytoy a tiempo, nupay dakkel ti magasto, impandak dagiti dadakkelko iti maysa a neurologo. Nadayagnos daytoy a doktor nga adda kissiwko. Gapu iti agas, nakontrol ti sakitko iti agarup uppat a tawen. Kabayatanna, natabunuak ti Pioneer Service School. Sadiay a napabileg ti tarigagayko nga agserbi iti lugar nga agkasapulan iti ad-adu a managebanghelio.

Ammo ti dadakkelko ti nasged a tarigagayko a mangparang-ay iti serbisiok. Yantangay ti sakitko ket medio nakontrol dagiti agas, pinalubosandak a mapan idiay Zitácuaro, iti Michoacán State, agarup 200 a kilometro manipud iti pagtaenganmi. Ti pannakikaduak kadagiti payunir iti dayta nga annongen ti nakatulong kaniak nga ad-adda a mangipateg iti amin-tiempo a serbisio.

Nupay kasta, kalpasan ti dua a tawen idiay Zitácuaro, simro manen ti sakitko. Maup-upay ken malidlidayak a nagawid iti pagtaengan ti dadakkelko ken masapul nga agpaagasak. Napanak iti maysa a neurologo a nangibaga a ti agas nga us-usarek ti mangdaddadael iti dalemko. Nangrugiak nga agsapul iti dadduma a pamay-an ti panangagas yantangay dimin kabaelan ti agpakonsulta iti espesialista. Kimmaro ti sakitko isu a simmardengak a payunir. Maup-upayak kada sumro ti sakitko. Ngem no basaek dagiti Salmo ken agkararagak ken Jehova, maliwliwa ken mapabilegak.​—Salmo 94:17-19.

Naragpatko ti Kalatko

Kabayatan ti kakaruan a kasasaadko, mamindua nga agkissiwak iti agmalem. Idi kuan, adda namalbaliwan ti kasasaadko. Adda doktor a nangted kaniak iti espesipiko nga agas ti kissiw, isu a nangrugin a simmayaat ti riknak iti napapaut a tiempo. Isu nga idi Setiembre 1, 1995, nagpayunirak manen. Nagtalinaed a kalkalainganna ti kasasaadko isu a kalpasan ti dua a tawen a saan a pulos a simro ti kissiwko, nagaplayak nga agserbi kas special pioneer. Kaipapanan dayta nga agserbiak iti ad-adu nga oras iti ministerio ken mapanak iti sadinoman nga agkasapulan kaniak. Panunotenyo ti nariknak idi nadutokanak nga agserbi kas special pioneer! Naragpatkon ti kalat nga inkeddengko idi ubingak pay laeng.

Idi Abril 1, 2001, nangrugiak iti baro a destinok iti maysa a bassit a lugar iti kabambantayan ti Hidalgo State. Ita agserserbiak iti bassit nga ili iti Guanajuato State. Masapul nga an-anusak ti agtomar kadagiti agasko ken masapul nga umdas ti inanak. An-annadak met ti kanek, nangruna no nataba, de lata, ken addaan iti caffeine. Ikagkagumaak ti saan a makaunget wenno agdanag unay. Ngem adu ti nagimbagan kaniak daytoy nainget a rutina. Kabayatan ti panagserbik kas special pioneer, naminsan laeng a nagkissiwak.

Yantangay maysaak a balasang ken awanan kadagiti responsabilidad iti pamilia, maragsakanak a mangitultuloy iti panagserbik kas special pioneer. Maliwliwaak a makaammo a ‘saan a nakillo ti Dios tapno lipatenna ti aramidtayo ken ti ayat nga impakitatayo maipaay iti naganna.’ Anian ti kinamanagayatna, ta saanna a kidkiddawen ti ditay maipaay kenkuana! Ti panangakseptarko iti dayta a kinapudno ti nakatulong tapno agbalin a natimbeng ti panagpampanunotko, ta no ti sakit ti mangpilit kaniak a mangisardeng manen iti kinapayunirko, ammok a maragsakanto latta ni Jehova iti naimpusuan a panagserbik.​—Hebreo 6:10; Colosas 3:23.

Awan duadua a ti panangiranudko iti pammatik iti sabsabali iti kada aldaw ti mangpabpabileg kaniak. Kanayon met a pampanunotek dagiti bendision nga isagsagana ti Dios iti masanguanan. Ikari ti Biblia nga iti baro a lubong, awanton ti sakit, “panagleddaang wenno panagsangit wenno ut-ot. Ti immuna a bambanag naglabasdan.”​—Apocalipsis 21:3, 4; Isaias 33:24; 2 Pedro 3:13.

[Dagiti Ladawan iti panid 26]

Idi agtawenak iti agarup 7 (ngato); idi agtawenak iti agarup 16, kalpasan unay a nabautisaranak

[Ladawan iti panid 27]

Panangasaba a kaduak ti maysa a gayyem