Manipud Kadagiti Agbasbasa

Panangidumduma Pagyamanan iti serye nga “Agpatingganto Pay Ngata ti Panangidumduma?” (Setiembre 8, 2004) Bayat a binasak dayta, naamirisko a medio mangidumdumaak. Nakaskasdaaw ta masansan a masuronak kadagiti mangidumduma. Ammok a makatulong kaniak daytoy a magasin.

M. U., Estados Unidos

Uray no agnanaedak nga adayo iti katutubo a pagiliak, diak marikna a maysaak a biktima ti panangidumduma. Ngem tinulongannak daytoy a serye tapno makipagriknaak kadagiti maidumduma. Agyamankami ta asidegen a pagpatinggaen ni Jehova daytoy a parikut!

T. G., Norway

Komendarak ti panggepyo a mangriing kadagiti tattao maipapan iti parikut ti panangidumduma. Nupay kasta, patiek a manangidumdumakayo met gapu iti panid 8 ken 9. Dineskribiryo sadiay ti dua a Judio a limmabas a saan a natignay a timmulong iti nadunor a tao. Apay a dagiti Judio ti piniliyo?

H. H., Estados Unidos

Kastoy ti sungbat ti “Agriingkayo!”: Ni Jesus a maysa a Judio ti nangisalaysay iti pangngarig maipapan iti naimbag a Samaritano. Idi kaaldawan ni Jesus, adu a Judio ti mangidumduma kadagiti Samaritano. Isu a babaen ti panangisuro ni Jesus a ti sabali ti pulina ket naimbag a kaarruba ti maysa a Judio, adda nagpateg a leksion nga isursurona kadagiti Judio a dumdumngeg idi kenkuana.

Dagiti Sakit ti Isip Pagyamanan iti artikulo a “No Adda Sakit ti Isip ti Ay-ayatem.” (Setiembre 8, 2004) Adun a tawen nga adda sakit ti isip ni nanangko. Maawatak itan a rumbeng a paregtaek nga agpatulong ken awan ti rumbeng nga ibainna maipapan iti daytoy.

M. P., Ukraine

Agtawenak laeng iti 16, ngem adun a tawen nga agsagsagabaak iti depression. Agyamanak unay iti panangisuratyo kadagita a makatulong nga artikulo tapno maiwanwanak kadagiti narigat a tiempo. Sigurado a saanto laeng a sisiak ti mabenepisiaran.

K. J., Alemania

Itultuloyyo ti agsurat kadagita nga artikulo! Tultulongandakami amin a makaamiris a nasken nga agbalinkami a naan-anus ken nadungdungngo ken gun-oden ti tulong a kasapulanmi. Anian ti panangsegseggami nga agbiag iti baro a lubong ti Dios, nga awanan kadagiti kasta a nakaro a sakit!

K. F., Estados Unidos

Dagiti Agtutubo Agtawenak iti 15 ket masansan metten a nakisaritaak kadagiti mannursuro ken kaklasek maipapan iti pammatik. Agpayso ti imbaga ti artikulo a “Dagiti Agtutubo a Nangikalintegan iti Pammatida” (Setiembre 8, 2004)​—talaga a salaknib ti panangasaba idiay eskuelaan. Itultuloyyo ti agsurat kadagiti kasta a nagsayaat nga artikulo!

R. B., Alemania

Paraiso Nagustuak ti artikulo a “Bassit a Paraiso.” (Setiembre 8, 2004) Diak pay naammuan ti kagudua kadagiti animal a nadakamat! Manipud ita, ikagumaakton a basaen ti tunggal ruar ti Agriingkayo!

W. C., Francia

Pagyamanan unay iti daytoy nga artikulo. Manmanoak nga agbiahe iti sabali a lugar, ngem babaen kadagiti panid ti Agriingkayo! kanayon a makapagbiaheak. Ti kinapintas ti panamarsua ni Jehova ti kanayon a mangpaamanga ken mangipaamiris kadakami iti naindaklan nga ayatna.

D. H., Estados Unidos

Nasaysayaat Napikapikak unay iti pakasaritaan ti biag ni Charles Sinutko kas naisalaysay iti artikulo a “Nasaysayaat Ngem iti Kinalatak.” (Agosto 22, 2004) Immikkat ni Kabsat Sinutko iti karerana ken tinallikudanna ti kinalatak ken kinabaknang tapno agserbi ken Jehova. Kontentodan ken ni baketna nga agbiag kadagiti simple a kasasaad. Nakasangitak gapu iti napigsa a pammatida ken dayta ti nangpabileg iti panagtalekko ken Jehova. Naparegtaak a mangigaed iti ministeriok. Pagyamanan iti daytoy makaparegta a pakasaritaan ti biag.

I. B., Poland