‘Kayatko a Maammuan ti Ad-adu Pay Maipapan iti Relihionko’

PARA iti proyektoda iti history idiay eskuelaan, ti agtawen iti 12 a ni Ciara, a taga-Florida, E.U.A., pinilina ti makapainteres a suheto​—ti pannakaidadanes dagiti Saksi ni Jehova idiay Alemania nga iturturayan idi dagiti Nazi. “Pinilik daytoy a topiko gapu ta kayatko a maammuan ti ad-adu pay maipapan iti pakasaritaan ti relihionko,” kinunana. “Sapay koma ta maammuak ti eksakto a sinagaba dagiti Saksi ni Jehova kabayatan ti Holocaust.”

Kalpasan ti napinget a panagsukisokna, nagaramid ni Ciara iti lila a piramid a naaramid iti kayo, a mangiladawan iti lila a trianggulo a naidait idi kadagiti uniporme dagiti Saksi ni Jehova. Daytoy ti pakabigbiganda idi kadagiti kampo. Nangipigket ni Ciara kadagiti retrato nga addaan iti kapsion iti sikigan ti piramid. Nangipigket met iti dayta ti makapikapik ngem makapabileg pammati a surat ni Wolfgang Kusserow, maysa kadagiti Saksi ni Jehova, sakbay unay a napapatay.​—Kitaem Ti Pagwanawanan a Setiembre 1, 1985, panid 14.

Pinagminar ti proyekto ni Ciara a naiduma dagiti Saksi iti dadduma a balud, ta addaanda iti pagpilian: Mawayawayaanda no pirmaanda ti dokumento a mangibagbaga a tinallikudandan ti pammatida. Gapu ta saan a nagpirma ti kaaduan, dayta ti nangpaneknek a natarnaw dagiti Saksi ni Jehova.

Imbaga ni Ciara a nagunggonaan manipud iti panangpilina iti dayta a suheto para iti proyektona. Talaga a dayta ti nakatulong kenkuana a mangammo iti ad-adu pay maipapan iti relihionna. “Nupay bassit ti grupoda idiay Alemania idi a tiempo,” kinunana, “natibker ti pammati dagiti Saksi ni Jehova a nakatulong kadakuada a nangdaer iti pannakaidadanesda.”

No maysaka nga agtutubo a Saksi ni Jehova iti eskuelaan, adda kadi pamay-an a mairanudmo met ti pakasaritaan ti relihionmo?