Kasla Agpayso a Makan!

Babaen iti mannurat ti Agriingkayo! idiay Japan

MINGMINGMINGAM ti kasla naimas a taraon. Agsaraaw ken makapangpangankan. Ngem nakaskasdaaw ta awan ayamuom, raman, ken sustansia daytoy a “taraon.” Saan a pulos a mabangles ken saanen a rumbeng a maikabil iti refrigerator. Ania dayta? Ditoy Japan, maysa laeng ti sungbat​—ti modelo a plastik a taraon. Ti plastik a taraon ket vinyl a kaasping ti taraon a tagilako ti restawran. Daytat’ naaramid a kapadpada ti kadakkel, kabassit, sukog, ken kolor ti aktual a taraon.

Nadumaduma ti klase dagitoy nakadispley a taraon​—manipud iti tradisional a putahe dagiti Hapones a kas iti sushi, agingga kadagiti paborito ti taga-Laud a kas iti pizza ken spaghetti. Adda met dagiti kasla agpayso nga inumen, pangpaganas, ken sinam-it. Nagadu a kita. Kinapudnona, maysa nga agparpartuat ti aglaklako iti nasurok a 10,000 a plastik a taraon!

Kasla agpayso dagiti plastik a taraon. Dagiti pino a detalye​—kas kadagiti bassiusit a dugol iti kudil ti nayurno a manok, ti nadumaduma ti nagsaadanna a bukbukel iti sangaiwa a sandia, ken ti medio nalpay a bulong ti letsugas​—ket  sisisigo a naitampok. Ngem kasano a limmatak unay ti plastik a taraon kadagiti restawran ditoy Japan?

Idi arinunos ti maika-19 a siglo, dadduma a restawran ti nangidispley kadagiti sampol dagiti putaheda tapno mailakoda dagiti baro a taraon iti kaaduan a Hapones. Ti taraon ket makita ngarud dagiti aglabas uray no didan sumrek iti restawran. Siempre, saan la a dagiti tattao ti maatrakar iti naidispley no di ket uray dagiti animal ken insekto. Gapu iti bara ken agneb, mabangles ti taraon, ken nangina no isagana dagiti sampol iti kada aldaw.

Idi agangay, ti agpayso a taraon ket nasukatan kadagiti replika a naaramid iti allid. Ngem adda pagdaksan ti allid​—malunag no napudot ti paniempo. Idi agangay, ti allid ket nasukatan kadagiti vinyl a plastik. Adtoy ngaruden ti produkto nga agpaut ken makaandur iti bara ken mangatrakar kadagiti matarigagayan a kostumer​—dagiti tattao! Ngem kasano ti pannakapartuat dagiti plastik a replika?

Umuna, maaramid ti molde ti maysa a kita ti taraon. Ti karne ti baka, kas pagarigan, ket maikabil iti kuadrado a pagkargaan, sa mabukbokan iti silicon agingga a naan-anay a nalipusen ti karne. Inton timmangkenen ti molde, mabaliktad dayta. Maikkat ti karne, ket mabati ti molde. Maibukbok metten ti namaris a vinyl iti molde sa mayurno iti 82 a degree Celsius. Inton limmammiisen, maikkaten ti plastik a karne ti baka. Mabalinen a pintaan.

Tapno makaaramidka iti sandwich, masapul nga agsisina a mamolde ti tunggal pasetna​—tinapay, karne, keso, ken letsugas. Kalpasanna, ti proseso ket kaasping ti panangisagana iti agpayso a sandwich. Mapagtutuon ti nadumaduma a pasetna iti nagbaetan ti dua nga iwa a tinapay. Ngem iti plastik a sandwich, maipigket dagitoy tapno agdedekket.

Iti dadduma a wagas, maysa a kita ti arte ti panagaramid iti plastik a taraon. “Ti panangsukimat a naimbag iti agpayso a taraon ti sekreto iti panagaramid iti kasla agpaypayso a taraon,” kinuna ni Katsuji Kaneyama, nga agarup 23 a tawenen nga agar-aramid iti plastik a taraon. “Matmatan dagiti tattao a kasla makan dayta. Matmatanmi ti taraon kas banag a tuladen.”

Ti panangsukimat iti sangamalukong a kalluto nga innapuy ti pakakitaam a nagtitinnuon ti tunggal binukel. Ti sangamalukong nga innapuy “ket kasla turod,” inlawlawag ni Kaneyama. Tapno matulad dayta, masapul nga agsisina a mamolde ti tunggal binukel. Saan nga umdas ti panangurnong kadagiti binukel agsipud ta agtalinaedda a patad. Imbes ketdi, masapul a siaannad a maipigket dagiti binukel a kaasping ti kasla turod nga innapuy. No kasla agpaypayso ti maaramid a langana, ad-adda a makaatrakar dayta kadagiti mangsukimat a naimbag iti dayta.

Adu a tawen ti kasapulan tapno agbalin ti maysa a nalaing nga agaramid iti plastik a taraon. Ti agsursuro ket mabalin a mangbusbos iti umuna a sumagmamano a tawen a mangsursuro kadagiti kangrunaan a kinasigo, a mangrugi iti nasimsimple a banag a kas kadagiti uong. Kasapulan ti agarup 10 a tawen a panagadal tapno makaaramidka iti kasla agpaypayso a kakalkalap nga ikan wenno lames agraman dagiti narikut a kalukneng ken marisna. Mabalin a 15 a tawen ti kasapulan tapno maibilangka nga eksperto iti dayta a benneg.

No lumabaskanto iti maysa a restawran ditoy Japan ket makitam dagiti nakadispley a makapasaraaw a taraon, panunotem ti rigat ti pannakaaramid dagita. Mabalin a mapanunotmonto no ania ti narigrigat​—ti agaramid iti agpayso a taraon wenno ti kaaspingna a plastik!

[Kahon iti panid 27]

Babaen Kadagiti Silaw ti Kamera

Inton makakitaka iti taraon iti sine, programa iti telebision, wenno komersial, kitaem a naimbag. Mabalin a saan nga agpayso dayta. Sigun iti food stylist idiay Los Angeles a ni Chris Oliver, nagsayaat dagiti natulad a kaasping dagiti taraon agpaay iti napaut nga oras a panangipelikula iti maysa nga eksena. “Nanginngina ngem iti agpayso a taraon ngem adayo a mas praktikal,” kinunana. Kinapudnona, kadagiti nabara a silaw ti kamera, dagiti plastik a taraon ket nagsayaat a pangsandi iti agpayso a taraon.

[Ladawan iti panid 26]

Mailasinmo kadi ti agpaypayso? (Adda ti sungbat iti panid 27)

Sungbat: Ti agpaypayso a taraon ket adda iti tray iti makannawan ti babai.

[Picture Credit Line iti panid 26]

Dagiti retrato iti baba: Hachiman Town, Gujyo City, Gifu Prefecture, Japan