Ti Panangtaraon ken Panangpadakkel Dagiti Animal Kadagiti Annakda

Babaen iti mannurat ti Agriingkayo! idiay Espania

AGARUP dua a dekada a taripatuen dagiti tattao a nagannak ti annakda. Iti kasumbangirna, adu nga animal ti masapul a mangipaay iti kompleto a programa ti panangtaraon ken panangsanay kadagiti annakda iti sumagmamano a bulan iti kalgaw. Adtoy ti sumagmamano a pagarigan a mangipakita a nagrigat ti trabaho dagiti animal a nagannak iti kada tawen.

1. White Stork Iti naipakuyog a ladawan, awan ti tiempo ti kita ti tikbaboy a maawagan iti white stork nga aginana iti kalgaw. Gapu ta adda pakanenda a mabisin a sibong, agmalmalem nga agsublisubli dagiti nagannak iti asideg a dan-aw tapno agbirok kadagiti tukak, babassit nga ikan, alutiit, wenno dudon, malaksid pay iti masansan a panangtarimaanda iti umok. Nagadu ti kanen dagiti sibong. Agasem, bayat ti umuna a sumagmamano a lawas, inaldaw a maibusda ti taraon a kagudua iti timbang ti bagida! Uray pay no nasursurodan ti agtayab, agtultuloy a pakanen ti nagannak a white stork dagiti annakda iti sumagmamano pay a lawas.

2. Cheetah Masansan a kanayon nga agsolsolo ti ina a cheetah a mangaywan kadagiti urbonna. Dandani inaldaw a masapul nga aganup iti kanenna tapno mataraonanna a naimbag ti bagina no agpaspasuso iti babassit pay nga urbonna​—a kadawyan a tallo agingga iti lima nga urbon. Narigat daytoy a trabaho, ta kaaduanna, awan ti maanupna. Kasta met, iti las-ud ti sumagmamano nga aldaw masapul nga iyakarna ti pamiliana iti sabali a rukib ta masansan nga agbirok dagiti leon kadagiti urbon a nalakada a tiliwen. Apaman a piton a bulan dagiti urbon, rugianna idan a sanayen nga aganup, maysa a trabaho nga agkasapulan iti adu a tiempo nga agpaut iti makatawen wenno napapaut pay. Kadawyan a makipagnaed dagiti urbon iti inada iti maysa agingga iti maysa ket kagudua a tawen.

3. Little Grebe Dandani di sinaan dagiti tumatayab a grebe ti sibongda. No mapessaanen dagiti sibong, panawandan ti tumtumpaw nga umokda ket umulida iti naimeng a bukot ti nagannakda. Umulida iti naimeng a supot nga adda iti baet dagiti payak ken dutdot iti barukong ti maysa kadagiti nagannakda. Maimengan ken masalakniban sadiay dagiti sibong, bayat nga aglanglangoy ti ina wenno ti ama iti aglawlaw. Agsinnublat dagiti nagannak nga agbatok iti pagtaraonda ken mangawit kadagiti sibong. Nupay nabiit a masursuro dagiti sibong ti agbatok ken mangtaraon iti bagbagida, agtultuloy ti kinasinged dagiti nagannak kadagiti annakda iti sumagmamano a tiempo.

4. Giraffe Masansan a maysa laeng ti ipasngay dagiti giraffe iti maminsan a panaganak, ket nalaka laeng a maawatan no apay. Ti kayyanak a giraffe, kas iti makitam iti ladawan, ket mabalin nga 60 a kilo ti timbangna ken 2 a metro ti katayagna! Kalpasan ti maysa nga oras, agtakderen ti urbon a giraffe ket di agbayag, sumuson iti inana. Siam a bulan a mapasuso dayta, nupay mangrugin nga agarab di agbayag kalpasan a mayanak. No agpeggad ti urbon a giraffe, sumirok iti nagbaetan ti saka ti inana, ta dagiti napigsa a kugtar ti ina ket nagsayaat a salaknib kadagiti kaaduan nga agkaan kenkuana.

5. Common Kingfisher Masapul a nalaing ken napili dagiti salaksak no agkalapda iti ikan nga ipakanda kadagiti sibongda. Natakuatan dagiti ornitologo, wenno mangad-adal kadagiti tumatayab, a pakanen ti nagannak dagiti kappesa a sibongda kadagiti babassit  nga ikan a kurang pay a maysa a pulgada. Siaannad a sippiten ti ina ti ikan, a makinruar ti ulona tapno nalaklaka nga alun-onen dagiti mabisin a sibong no maisubo ti ikan nga umuna ti ulona. Bayat a dumakdakkel dagiti sibong, mangisangpet dagiti nagannak iti daddadakkel nga ikan ket in-inut a sansanenda a pakanen ida. Iti damo, mapakan ti tunggal sibong iti agarup kada 45 a minuto. Ngem no agarup 18 nga aldawdan, nalaingdan a mangan ket mapakanda iti ikan iti kada 15 a minuto! Ti sibong a makita iti ladawan ket pimmanawen iti umok ken din agbayag, agkalapen iti kanenna. Mabalin a pagarupem a sumardengen dagiti nagannak nga agaywan iti sibongda. Ngem saan a kasta dagiti salaksak! Masansan a maulit manen ti panangaywanda iti sibong iti sumaganad nga anakda bayat ti kalgaw.

Siempre, saan pay a naammuan ti adu a detalye maipapan iti nadumaduma a pamay-an ti panangaywan dagiti animal iti annakda. Ngem bayat nga umad-adu ti maammuan dagiti agad-adal iti nakaparsuaan, agparang a nainkasigudan kadagiti animal ti mangaywan kadagiti annakda. No ngarud ti Dios inikkanna dagiti animal iti kasta a rikna, sigurado a kayatna a taraonan ken aywanan met dagiti tattao a nagannak ti annakda.