Panangmatmat iti Lubong

Sunscreen Dagiti Hipopotamo

“Salakniban dagiti hipopotamo ti awanan dutdot a kudilda manipud iti init babaen ti panagling-etda iti sunscreen a kaasping dagiti komersial a produkto nga us-usaren ti tattao,” impadamag ti The Independent ti London. Idi ineksamenda ti ling-et ti maysa nga animal iti zoo idiay Tokyo, naammuan dagiti sientista idiay Kyoto, Japan, a masalaknibanna ti kudil ti hipopotamo manipud iti makadangran a bara ti init ken rugit iti tropiko. Ti napalet, napigket, ken awan kolorna a ling-et ket in-inut a limmabaga, sa kimmayumanggi ken nagbalin a kasla plastik. Idi kimmayumanggi, nagbalin a nakaal-alsem ti dati nga alkalina, isu a nagbalin a nabirtud a pangontra iti mikrobio. Ti kimmayumanggi a ling-et ket agserbi met a sunscreen babaen ti panangagsepna iti lawag nga ultraviolet, kas ti maaramidan dagiti komersial a sunscreen. Nupay kasta, mabalin a saanto nga aglako dagiti kompania ti kosmetiko kadagiti sunscreen a nagtaud iti hipopotamo, kinuna ti periodiko. Ti umuna a makagapu ket manmano dagiti hipopotamo iti lubong. Maikadua, nabangsit ngamin ti ling-et dagitoy.

 Ti Panagbagkat iti Barbel Kissayanna ti Depression Dagiti Pensionado

Sigun iti maysa a panagadal, ti “panagbagkat iti barbel kissayanna ti depression iti 50 a porsiento kadagiti natataengan a tattao,” kinuna ti periodiko nga Australian. No kasta, ti panagbagkat ti barbel ket mabalin a kapada ti panagtomar iti agas a kontra depression kadagiti natataengan, sigun iti doktor ti saksakit ti lallakay ken babbaket a ni Dr. Nalin Singh iti Royal Prince Alfred Hospital ti Sydney. Iti panagadal a nakiramanan ti 60 a lallaki ken babbai nga agtawen iti promedio a 72, uray dagidiay nagehersisio iti kalkalainganna “naksayan ti depression-da iti 30 a porsiento, a kaasping dagidiay saan a nagbagkat iti barbel ngem naaywanan ti salun-atda,” kinuna ti The Australian. Malaksid iti panangparmekna iti depression, ti panagbagkat iti barbel papigsaenna dagiti “lumaklakay a tulang ken masel, tapno saan a nalaka a matumba dagiti lallakay ken babbaket. Makatulong met a mangkontrol iti arthritis, diabetes ken alta presion,” kinuna ti periodiko. Insingasing ni Singh a ti panagbagkat iti barbel ket “maitukon koma a kangrunaan a pangagas iti depression, nangruna kadagiti natataengan a tattao.”

Ti Panagbuya iti Telebision Mangisuro iti Kinaranggas

“Ti panagbuya kadagiti telenobela ket padaksenna ti kababalin dagiti ubbing, nangruna ti panangpadakes, panagtsismis, panangiwaras iti saosao, panangdadael kadagiti relasion ti dadduma a tattao, ken pammutbuteng babaen iti sasao,” sigun iti maysa a panagadal nga impadamag ti periodiko a The Times iti London. Ti panagadal a naiparang iti British Psychological Society natakuatanna a ti panagbuya iti saan a direkta a kinaranggas iti telebision adda “naisangsangayan a pakainaiganna” kadagiti dakes a kababalin dagiti agtutubo, kinuna ti periodiko. Dagiti kadaksan a telenobela ket addaan iti promedio a 14 nga eksena ti panangpadakes iti maysa nga oras. Madanagan ti mannursuro a ni Sarah Coyne iti University of Central Lancashire, England, a dakes nga ulidan kadagiti agtutubo ti maipaay ti “masansan ken awan sardayna” a panangipabuya iti saan a direkta a kinaranggas kas nainkalintegan, makaay-ayo, wenno makagunggona.

Dagiti Agpaut nga Epekto ti Pannangan iti Bassit a Karbohidrato

Nupay mabalin a kumuttong dagiti agdietdieta no bassit ti kanenda a karbohidrato, bassit ti magun-odan nga impormasion maipapan kadagiti agpaut nga epekto dagita a taraon. Madanagan ti dadduma a managsirarak a ti taraon nga aduan iti protina ket mabalin a mangpataud kadagiti sakit iti dalem ken bato, osteoporosis, ken dadduma pay a nakaro a sakit. “Kaaduan kadagiti naimas a ramen ti taraon a bassit ti karbohidratona​—kas koma ti napuskol ti pannakaiwana a karne ti baka nga addaan iti sarsa a béarnaise​—​ket aduan iti taba nga agbara iti urat. . . , isu a dakkel ti peggad nga agsakit ti puso ken maistrok ti maysa a tao,” kinuna ti magasin a Time. Maisupadi iti dayta, impatuldo ni Dr. David Katz iti Yale University School of Public Health: “Iti nagadu a panagadal, dagiti taraon nga aduan iti gunnot, ken aduan karbohidrato, a masarakan kadagiti prutas, nateng, ken bukbukel ti napaneknekan a mangpaatiddog iti biag, mangtaginayon iti kalkalainganna a timbang, mangpabassit iti risgo ti panagkanser, panagsakit ti puso, panagdiabetes, panagsakit ti bagis, ken mangpasalun-at iti intero a bagi.”

Dagiti Napintaan nga Eskultura

“Pagarupen dagiti arkeologo ken historiador iti arte a natural a marmol ti buya dagiti nalatak nga estatua,” kas kadagiti kadaanan nga estatua dagiti Griego, kinuna ti Aleman a magasin nga Spektrum der Wissenschaft. Ngem ti “kinapudnona, napintaan dagitoy iti natayengteng.” Agpapan pay kadagiti historikal a panangtukoy kadagiti napintaan nga estatua ken ti pannakatakuat iti nagbabassit a kolor kadagiti estatua, saan unay a naginteresan dayta dagiti eskolar. Ngem iti nabiit pay, idi naadal ti agdinamag a color-weathering relief, nakita ti saan a direkta nga ebidensia a napintaan dagiti estatua. Agduduma ti kabiit ti panagkuplat dagiti kolor ti pintura, isu a ti dadduma a pinta a nairutap iti estatua ket maapektaran kadagiti elemento sakbay a maapektaran ti dadduma a pasetna. Ti nagdumaan iti pannakaapektarna iti nadumaduma nga elemento ket mangpataud iti nadumaduma a padron ti panagkupas, isu a nabatad a napintaan ti estatua iti nadumaduma a kolor. Agparang a ti arte ti eskultura “ket imbilang dagiti Griego ken Romano a nairingpasen no napintaanen dayta,” kinuna ti damag.

Dagiti Chameleon nga Addaan iti Napartak a Dila

Kasano a maibiat ti maysa a chameleon ti dilana iti kasta unay a kapartak tapno matiliwna ti biktimana? “Ti sekreto ket maysa a mekanismo a mangiduron nga agurnong iti enerhia a kas iti mabennat a palsiit sakbay a maaramat dayta,” kinuna ti magasin a New Scientist. Ammo dagiti sientista a ti dila ti chameleon ket addaan kadagiti tisyu a nalikmut iti “kasla siliniador a masel.” Ita, babaen ti panangi-video ken panangbuyada iti dayta iti nabambannayat ngem iti gagangay, natakuatan dagiti Olandes a 200 laeng a kapaset ti maysa a segundo sakbay nga ibiatna ti dilana, “usarenen ti chameleon ti kasla siliniador a masel tapno mapapigsa dagiti palunapin ti dilana, sana urnosen dagitoy a kas kadagiti seksion ti teleskopio. No rumaut ti chameleon, mausar ti naurnong nga enerhia iti 20 la a kapaset ti maysa a segundo, a mangpapartak iti dila” tapno matiliw ti biktimana.

Dagiti Di Manamati a Briton

Idi napagsaludsodan ti 10,000 a tattao iti sangapulo a pagilian, natakuatan a ti Britania ti “karaman kadagiti kaaduan a di mamati nga adda Dios . . . , ken kabassitan kadagiti addaan iti narelihiosuan a pammati ken makipaspaset kadagiti narelihiosuan nga aramid,” kinuna ti The Times ti London. Nupay imbaga ti 46 a porsiento kadagiti Briton a kanayon a mamatida nga adda Dios, dua laeng a pagilian, ti Russia ken ti Republika ti Abagatan a Korea, ti nagkuna a manmano dagiti mamati. Nasurok a 90 a porsiento kadagiti umili idiay Nigeria, Indonesia, ken Lebanon ti mamati a ti diosda ti maymaysa a pudno a Dios, ngem 3 laeng iti kada 10 idiay Britania ti addaan kasta a panamati. Iti kaaduan a pagilian, nasurok a 80 a porsiento ti nagkuna a ti panamati iti Dios ti mamagbalin iti maysa a nasaysayaat a tao, ngem 56 a porsiento laeng kadagiti Briton ti immanamong. Nupay 85 a porsiento idiay Estados Unidos, 99 a porsiento idiay Indonesia, ken 83 a porsiento idiay Mexico ti mamati a pinarsua ti Dios ti uniberso, 52 la a porsiento idiay Britania ti mamati iti dayta. Idi napagsaludsodan no nataltalna ti lubong no awan ti relihion, 6 a porsiento ti nagkuna a wen idiay Estados Unidos, 9 a porsiento idiay India, ken 11 a porsiento idiay Israel, ngem idiay Britania, 29 a porsiento!