“Rumbeng a Basaen ti Amin a Tao Daytoy a Libro”

BABAEN ITI MANNURAT TI AGRIINGKAYO! IDIAY POLAND

Sipud idi kalgaw ti 2003, nairuar ti libro nga Agsursuroka iti Naindaklan a Mannursuro iti adu a pagsasao kadagiti kombension dagiti Saksi ni Jehova iti intero a lubong. Kas iti dadduma pay a lugar, naisangsangayan ti reaksion ti tattao idiay Poland idi naawatda daytoy a libro nga addaan kadagiti nagpipintas a ladawan. Nupay nadisenio a nangnangruna nga agpaay kadagiti ubbing, ipasimudaag dagiti surat a naggapu iti adu nga agtutubo ken natataengan nga amin, aniaman ti edadda, ti mangtagtagiragsak iti daytoy a libro. Adtoy ti sumagmamano a paset dagita a surat.

“Agata ti naganko ken agtawenak iti walo. Idi naawatko daytoy a libro, dagus a nariknak a maseknan unay ni Jehova kaniak. Magustuak unay ti kapitulo 7, ‘Ti Panagtulnog Salaknibannaka.’ Adda suksukirko idi kadagiti dadakkelko, ngem ita, ammok a masapul nga agbalbaliwak agsipud ta ay-ayaten ni Jehova dagiti natulnog nga ubbing.”

Ni Marlena, maysa a balasitang nga agtawen iti 13, kastoy ti insuratna buyogen ti panangapresiar: “Ammok a nairanta kadagiti ubbing daytoy a publikasion, ngem patiek a magustuan dayta ti siasinoman. Napabileg ti pammatik ken ni Jehova agraman ken Jesus gapu iti panangbasak iti dayta. Simple ti pannakailawlawag uray dagiti narikut a banag. Diak kayat nga isardeng a basaen. Nagpintas met dagiti ladawanna! Dagiti naipakuyog a saludsod ket mamagpanunot kadagiti ubbing! Nagpintas ti libro, isu a basbasaek a naimbag. Pagyamanan unay.”

Kastoy ti imbaga ni Justyna, maysa a balasitang nga agtawen iti 15, no kasano a nagustuanna ti panangbasana iti dayta a libro: “Nagustuak unay dagiti kapitulo a binasak isu a kayatko ti agyaman unay kadakayo gapu iti daytoy napintas ken makaisuro a sagut. Patiek a daytoy a libro ket rumbeng a basaen ti amin a tao​—uray dagiti natataengan. Para kaniak, dagiti pagarigan iti dayta ket simple ken nalaka a maawatan, uray ti ubing nga agtawen iti maysa. Makaisuro met uray dagiti ladawan. Nupay kasta, kurang ti sasao tapno mayebkasko ti mariknak no basbasaek dayta.”

Agyaman met ni Eunika gapu iti daytoy a publikasion. Nupay agtawenen iti 19, magagaran a mangbasa iti daytoy baro a libro ket kinunana a “praktikal dayta kadagiti tin-edyer.” Kastoy pay ti insuratna: “Addaan iti napateg a balakad agpaay iti inaldaw a panagbiag​—idiay pagtaengan, eskuelaan ken iti kongregasion. Agyamanak kadakayo gapu iti daytoy a sagut.”

Kastoy ti kinuna ni Maria, ti naragsak nga ina ni Oliwia nga agtawen iti maysa, kalpasan a napaliiwna ti reaksion ti anakna kadagiti napintas a ladawan: “Naimpusuan nga agyamanak kadakayo gapu iti daytoy naisangsangayan a tulong iti panangisuro kadagiti annakmi. Kaay-ayo ti anakmi a ni Oliwia dayta a libro. Agpasaklot kadakami sana ipaestoria ti nadumaduma a kapitulo. Kaay-ayona la unay ti ladawan iti panid 83, a mangipakpakita iti agin-innarakup a dua nga ubbing a babbai nga agduma ti kolor ti kudilda. Kasla agpayso ti dadduma a ladawan ta uray la a sagiden, ungnguan, ken isemanna ida.”

Impaganetget met ni Maria ti makaisuro a kinapateg ti libro: “Ilawlawagna dagiti serioso nga isyu maipapan iti sekso (panid 58-60) ken panangabuso iti ubbing (panid 170-1). Nagsayaat a tulong dayta kadagiti nagannak a kayatda a nainsiriban a padakkelen ti annakda iti agdama a nadangkes a lubong nga ayan ti nagadu a peggad.”

Namnamaen dagiti nangipablaak iti Agsursuroka iti Naindaklan a Mannursuro a dayta a libro ti makatulong kadakayo a sangapamiliaan tapno mabenepisiarankayo iti pannursuro agpaay iti sangatauan nga inted ti Naindaklan a Mannursuro a ni Jesu-Kristo dandani 2,000 a tawenen ti napalabas.

[Ladawan iti panid 31]

Ni Agata

[Ladawan iti panid 31]

Ni Marlena

[Ladawan iti panid 31]

Ni Eunika

[Ladawan iti panid 31]

Da Maria ken Oliwia

[Ladawan iti panid 31]

Ni Justyna