Manipud Kadagiti Agbasbasa

Dagiti Siudad Sangapulo ket tallo ti tawenko, ket naragsakanak a nangbasa kadagiti artikulo a “Madrid​—Kabesera a Naaramid Para iti Maysa nga Ari” (Hunio 22, 2003), “Barcelona​—Museo iti Ruar a Pakabuyaan iti Namaris nga Arkosna ken Nadumaduma nga Estilo” (Hulio 8, 2003), ken “Seville​—Dalan nga Agturong Kadagiti Kontinente ti America” (Hulio 22, 2003). Kas maysa nga Espaniola nga agnanaed ditoy Alemania, naragsakanak a nangbasa kadagiti artikulo maipapan iti nakayanakak a pagilian. Pangngaasiyo ta itultuloyyo ti agsurat kadagiti kasta nga artikulo.

C.G.R., Alemania

Kaay-ayok ti agbasa iti Agriingkayo! ngem dagiti artikulo maipapan iti nadumaduma a pagilian ti kangrunaan a magustuak. Naragsakanak a nangbasa kadagiti artikulo maipapan kadagiti siudad ti Espania. Naragsakanak met unay a nakakita iti artikulo a “St. Petersburg​—‘Tawa a Pangbuyaan ti Russia iti Europa.’” (Agosto 22, 2003) Talaga a kayatko a makita dagiti makapainteres a lugar ken ti tiempo a saan a naan-anay a nasipnget dagiti rabii. Gapu iti daytoy nga artikulo, “nakapasiarak” sadiay.

O.A.V., Russia

Dagiti Insekto Agyamanak unay iti serye a “No Mangiwaras Dagiti Insekto iti Sakit,” nga addaan iti kahon nga “Agiwaras Kadi Dagiti Insekto iti HIV?” (May 22, 2003) Adu a tawenen nga agnanaedak iti siudad nga aduan iti lamok no kalgaw. Madanaganak di la ket ta maakaranak iti virus ti HIV. Gapu iti artikuloyo, saanakton a madanagan iti daytoy a kalgaw!

J. L., Albania

Manipud Kadagiti Agbasbasa Magustuak a basaen ti paset a “Manipud Kadagiti Agbasbasa.” No dadduma, us-usarek ti komento dagiti agbasbasa tapno maparegta dagiti iyad-adalak iti Biblia a mangusig iti sumagmamano nga artikulo. Ipakpakita dayta a benneg a saan a barengbareng dagiti panagreggetyo a mangdanon iti puso dagiti tattao.

S. A., Russia

Pannaturog Idi rinugiak a binasa ti serye nga “Umdas Aya ti Pannaturogmo?” (Marso 22, 2003), intultuloyko a binasa dayta gapu ta makapainteres unay. Sipud idi agtutuboak, masansan a maturogak iti dua wenno tallo laeng nga oras iti kada rabii. Daytoy a magasin ti nakatulong kaniak a mangamiris a masapul nga agpadoktorak.

W. A., Taiwan

Danum Agtartrabahoak iti tay-ak ti nutrision ken panangtaginayon iti umiso a timbang ti bagi, isu a ti artikulo a “Danum​—Likido a Napateg iti Biag” ti eksakto a kasapulak. (Hunio 8, 2003) Iti maysa la nga artikulo, nagupgopyo ti amin a naadalko iti 30 nga oras a kurso maipapan iti nutrision. Panggepko nga usaren daytoy nga impormasion tapno matulongak dagiti klientek.

J.F.S.F., Brazil

Postpartum Depression Idi Abril, nagbalinkami ken ni lakayko nga ama ken ina. Kalpasan a naipasngay ti anakmi, nangrugin a napasarak dagiti nadeskribir iti artikulo a “Pannakaawat iti Postpartum Depression.” (Hunio 8, 2003) Ibaga ti amin a naglibnos ti anakmi, ngem diak kayat a kitaen. Masansan nga agsangitak ken agpupok idiay balay. Kalpasan a nabasak ti artikulo, inarakupko ni lakayko ket inlawlawagko ti riknak. Naragsakan a nakaammo iti makagapu kadagiti panagbalbaliw a nakitana kaniak. Agyamanak iti panagsuratyo maipapan iti daytoy a suheto buyogen iti maitutop a kinaannad. Napikapikyo ti pusok.

S. V., Italia

Tour de France Para iti maysa a proyektomi idiay eskuelaan, pinilik ti suheto maipapan kadagiti bisikleta. Dimteng iti umiso a tiempo ti artikulo a “Ti Tour de France​—100 a Tawen ti Karikutan a Pannubok iti Panagbisikleta”! (Hulio 8, 2003) Nabaelak pay ketdi a binasa ti salaysayko iti klasemi. Adun nga artikulo iti Agriingkayo! ti nausarko para kadagiti proyektok idiay eskuelaan. Pagyamanan.

N. K., Alemania