Manipud Kadagiti Agbasbasa

Sakit a Patauden Dagiti Insekto Maysaak a propesor iti unibersidad ken pangulo dagiti laboratorio ti microbiology, parasitology, ken biochemistry sadiay iti napalabasen a 24 a tawen. Nailawlawagyo dagiti nasientipikuan a banag iti simple a pamay-an! Nagustuak ti serye a “No Mangiwaras Dagiti Insekto iti Sakit.” (Mayo 22, 2003) No dadduma, adda dagiti punto kadagiti nasientipikuan a libro a diak maawatan. Ngem no ilawlawagyo dagita a punto, insigida a maawatak ida. Pagyamanan ti amin a panagreggetyo.

M. R., Mexico

Panagkusit Pagyamanan iti artikulo nga “Agimtuod Dagiti Agtutubo . . . Ania ti Pagdaksan ti Panagkusit?” (Enero 22, 2003) Namin-adun nga intukon dagiti padak nga estudiante nga ikkandak iti dakkel a gatad ti kuarta tapno ageksamenak para kadakuada. Gapu ta diak kayat ti agkusit, pagarupenda a saanak a nainkalintegan. Pinalagipannak ti artikulo nga itandudok dagiti pagalagadan ti Dios ken saanak a pulos a makikompromiso.

F.A.C., Nigeria

Diak pulos ar-aramiden idi ti homework-ko no di ket nairuamak nga agkopia kadagiti kaklasek. Gapu iti artikulo, naawatak a ti panangkopia iti sabali ket kapada ti panagtakaw. Ket nupay di anamongan daytoy dagiti kaeskuelaak, itakderakon dayta.

Y. D., Russia

De Koriente a Bus Agnanaed ken agtartrabahoak ditoy Italia, ket apresiarek unay ti maysa a babai a Saksi ni Jehova a mangmangted kaniak iti magasinyo iti lenguahe a Ruso. Binasak ti artikulo a “Panagbiahe iti Kaatiddogan iti Lubong a De Koriente a Bus.” (Marso 22, 2003) Insalaysayna ti kosta ti Crimea idiay Ukraine a nagnaedak idi. Pagyamanan iti daytoy ababa ngem makapainteres a panagpasiar iti pagnanaedak idi a rehion.

Z. B., Italia

Diabetes Idi nabasak ti serye ti “Panangibtur iti Diabetes” (Mayo 8, 2003) ken nabasak a maysa a sintoma ti masansan nga iyiisbo, naamirisko a nalabit addaanak iti diabetes. Isu a napanak idiay ospital ket naammuak nga addaanak iti diabetes. Makabulan ti napalabasen nanipud idi nagpaeksamenak, ket ikagkagumaak a pababaen ti asukar iti darak babaen iti agas, panagdieta, ken panagehersisio. No diak binasa ti magasin, nalabit diak naammuan nga addaanak gayam iti kasta a sakit.

Y. N., Japan

Saanak a Saksi ni Jehova, ngem aw-awatek dagiti magasinyo manipud iti maysa a nasingpet a kaarrubak. Nagustuak unay ti serye maipapan iti diabetes. Gapu ta agsansanayak nga agbalin a nars dagiti babbaket ken lallakay, masapul nga agsuratak iti maysa a salaysay maipapan iti daytoy a suheto. No nasapsapa la koma iti sumagmamano nga aldaw a naawatko dayta a magasin, diak koman nagsukimat pay iti nagadu a libro! Makatulong unay dagiti artikuloyo.

A. S., Alemania

Dagiti Alinta Nagustuak ti artikulo a “Ti Makapainteres Unay a Lubong Dagiti Alinta.” (Mayo 8, 2003) Dumdumngegak idi iti maysa nga estasion ti radio iti lugarmi idi mapagsasaritaan ti maipapan kadagiti alinta. Dagus nga innalak ti ruar ti Agriingkayo! ket inukagko daytoy nga artikulo. Nasdaawak ta ad-adawen ti announcer ti radio ti ibagbagana manipud iti dayta a ruar. Dakkel gayam ti maitulong ti Agriingkayo! iti intero a lubong.

F. B., Nigeria

Nasdaawak a nakabasa nga adda gayam nasurok a 1,800 a kita ti alinta. Siguro no saan a gapu kadagitoy babassit a mannalon, agmalmalem a gabionentayo ti natangken a daga. Nupay kasta, diak maibaga a natulongannak a mismo daytoy nga artikulo tapno magustuak dagiti alinta, ngem talaga nga apresiarek ti kinapategda.

Y. N., Japan