Nalasatanda ti Delubio!

Babaen iti mannurat ti Agriingkayo! idiay Switzerland

IDI Oktubre 2000, naipadamag dagiti layus iti nadumaduma a paset ti lubong. Gapu iti napigsa a tudo, nalayus dagiti bakras ti bantay isu a nargaay dagitoy a nakayanudan ti amin a kita ti batbato​—ken uray pay ti intero a kaykayo!

Napasamak ti kasta a didigra iti estado ti Valais iti makin-abagatan a Switzerland. Nabingay daytoy a paset ti daga babaen iti karayan Rhône, nga agay-ayus nga agpalaud manipud iti glacier ti Rhône iti Central Alps agingga iti Lake Geneva​—iti kaadayo nga agarup 170 a kilometro. Ti kabambantayan iti agsumbangir ti karayan ti pagayusan ti danum nga aggapu kadagiti narunaw a niebe agingga iti karayan babaen iti nagadu a waig a nadumaduma ti kadakkelda. Gagangay a naannayas ti panagayus dagitoy. Ngem no kapigsa ti tudo iti intero a lugar, masansan nga adda mapasamak a kalamidad.

Dayta ti napasamak idiay Gondo, iti beddeng ti Italia. Daytoy a bario iti bantay a buklen ti 150 nga umili ket naapektaran iti napigsa a panagayus iti pitak ken batbato a nangdadael iti dakkel a paset ti bario. Di nagbayag, nalayusen ti dadduma a paset ti Valais. Nabangenan dagiti kalsada ken riles, sa nangrugin a napunno iti pitak ken batbato dagiti balbalay. Iti dadduma a lugar, namuntuon ti napitak a lan-ak agingga iti kangato nga 4 a metro. Nakita ti maysa a babai ti agay-ayus a pitak a nasurok a 30 a metro ti kangatona a nangyanud iti dadakkel a bato ken sitatakder a puon ti kaykayo nga agturturong iti mismo a bariona!

Agnanaed idiay Mörel ti agassawa a da Markus ken Tabitha idi napasamak ti didigra. “Nariingkami kalpasan unay ti alas sais ti agsapa gapu iti kasla bumanugbog nga uni ken panagkintayeg,” malagip ni Markus. “Nakalenteak a rimmuar tapno kitaek ti mapaspasamak. Naklaatak iti nakitak. Nadadaelen ti balbalay ken rangtay gapu iti nagkanarbaag a batbato, ken adda lugan a naidungpar iti balay ti kaarrubami. Iti pangadaywen, adda agassawa a di makapanaw iti balayda. Tinulongak ida a rimmuar iti tawa. Idi nagawidak, adda pay bassit a tiempomi ken ni Tabitha a mangala iti sumagmamano a gargaretmi.”

Saksi ni Jehova da Markus ken Tabitha ket nagkamangda kadagiti kapammatianda iti ruar ti nadidigra a lugar. “Nupay nakalasatkami,” kuna ni Markus, “sumagmamano nga aldaw a nasaem ti rikna ni Tabitha gapu iti napasamak.” Ania ti nakatulong kenkuana a mangibtur iti makadidigra a pasamak? “Ti pannakikadua ken panangandingay dagiti kapammatianmi,” kinuna ni Tabitha sana innayon, “agraman ti interes nga impakita ti adu a kaarrubami.”

Malagip da Markus ken Tabitha ti Proverbio 18:24, a kunana nga adda “gayyem a dumekket a nasingsinged ngem iti maysa a kabsat.” Kadagiti tiempo ti didigra, nagpateg la ketdin dagita a gagayyem!

[Mapa iti panid 20]

(Para iti aktual a pannakaurnosna, kitaem ti publikasion)

Naapektaran a lugar

Gondo

[Ladawan iti panid 20]

Da Markus ken Tabitha

[Picture Credit Line iti panid 20]

Mise à disposition par www.crealp.ch