Komunikasion​—Nakapatpateg iti Panagkakanaig ti Biag Ditoy Daga

IDI maladaga pay laeng ni Julie, magagaran dagiti nagannak kenkuana a makangngeg kadagiti damo nga ibalikasna. “Makaparagsak a denggen ti ‘Mama’ ken ‘Papa’ a sawen ti maysa a maladaga ta awan ti nagannak a makailadawan a naan-anay iti dayta,” kinuna ti ina ni Julie. “Idi damo nga inawagannak ni Julie iti ‘Mama,’ kasla ar-arakupennak kadagiti babassit a takiagna ken kunkunana: ‘Sika ti nanangko. Ay-ayatenka ket kayatko ti makisarita kenka.’ Pulos a diakto malipatan dayta a naisangsangayan a kanito.” Wen, talaga a napateg a sagut ti abilidad a makikomunikar!

Siempre, saan laeng a dagiti tattao ti makabael a makikomunikar. Nupay maiturturong dagiti animal babaen iti nainkasigudan a kababalin, dadduma ti addaan met kadagiti nakaskasdaaw a pamay-an ti pannakikomunikar. Kas pagarigan, dagiti agmanada nga emperor penguin iti nayelo nga Antarctica tinawen a pagunianda ti maysa ken maysa​—ngem saan a tapno agragragsak laeng. Agpannuray iti dayta ti biag ti urbon ti tunggal agassawa. Kasano?

Apaman a nakaitlogen ti kabaian, ibatina dayta iti asawana tapno ukopan ti kalakian iti arig supot nga adda iti tianna bayat a mapan mangan ti kabaian iti taaw. Kalpasan ti agarup 65 nga aldaw, agin-iniin ken aguyasen nga agsubli iti kaniebean ta nakaadayon iti 150 a kilometro. Nakaskasdaaw ti pannakasarakna iti pangen, ngem kasano a masarakan ti kabaian ti asawana ken ti kappessa nga anakna iti ummong ti rinibu nga agun-uni nga emperor penguin? Bayat ti panagmanada, ikabesa a naimbag ti tunggal penguin ti uni ti kaparehana, isu nga uray adun a bulan a nagsinada, makapagsinnarakda latta!

Malaksid kadagiti nakaskasdaaw ken nadumaduma nga uni, dagiti tigtignay, makaallukoy a kolor, aggilapgilap a lawag, ken komplikado nga angot ket mairaman met iti komunikasion dagiti animal. Ket uray no kasla di nakappapati, dagiti mula makikomunikarda met iti maysa ken maysa ken iti dadduma nga ayup, kas makitatayto. Wen, talaga a nakapatpateg ti komunikasion gapu iti kasta unay a panagpannuray ti tunggal parsua iti maysa ken maysa ken iti komplikado unay a panagkakanaig ti biag ditoy daga.

Kayatmo kadi a maammuan ti ad-adu pay maipapan kadagiti nakaskasdaaw a kita ti komunikasion iti lubong a pagbibiagantayo? Ken kayatmo kadi a sumayaat ti panangapresiarmo iti laingmo a makikomunikar tapno mapasayaat pay daytoy? Matulongandaka dagiti sumaganad nga artikulo.

[Ladawan iti panid 3]

Kasano a masarakan ti kabaian nga emperor penguin ti asawana?