Realistiko a Solusion Posible Aya?

AGPARANG a ti krimen ket permanente a paset ti moderno a kagimongan. Nupay nagsayaat ti panangikagumaan dagiti mangpaspasayaat iti kasasaad dagiti nakurapay, mangipapaalagad iti linteg, ken dagiti propesional a tumultulong a mangilinteg iti kababalin dagiti kriminal, pumegpeggad ti lubong. Adda aya solusionna?

Ipakita ti Biblia nga umad-adanin ti dakkel a panagbalbaliw. Saan a maaramid daytoy gapu iti panangikagumaan dagiti natauan a gobierno. Kasanoman ti kinatan-ok dagiti kalat ti amin nga agtuturay, limitado ti kabaelanda. Talaga nga awan ti kabaelan ken alikamenda a mangpukaw iti amin a pakaigapuan ti krimen wenno mangipasdek iti naan-anay a natalged a sistema.

Ibanag ti Namarsua kadatayo ti panagbalbaliw a sarsaritaen ti Biblia. Kas Nangaramid iti uniberso, isut’ addaan iti pannakabalin ken legal a kalintegan a mangaramid iti di maaramid dagiti tattao. Isut’ deskribiren ti Biblia a “Daydiay mangpapaawan kadagiti nangato nga opisial, a  namagbalin kadagiti mismo nga ukom ti daga kas maysa laeng a di agpaypayso . . .  yantangay isu nakired iti pannakabalin.” (Isaias 40:23-26) Ania dagiti inkari ti Dios a panagbalbaliw, ken kasano a mangted dagitoy kadatayo iti pudno a namnama nga addanto nasaysayaat a lubong?

Ipakaammo kadatayo ti Salmo 37:10 ti kari ti Dios: ‘Iti apagbiit laengen a kanito, ket daydiay nadangkes awanton; ket pudno unay nga imutektekamto ti lugarna, ket [ti nadangkes] awanton.’ Panggep ti Dios a pukawen dagiti nadangkes a din agbalbaliw ken awanan panggep nga agbalbaliw. Nupay kasta, saanna a dadaelen ti amin a tattao. Kastoy ti inkari ti salmista kadagidiay situtulok nga agbalin a naemma ken napakumbaba, ken natalna: “Manginanamaka ken Jehova ket salimetmetam ti dalanna, ket itan-oknakanto a mangtagikua iti daga. Inton magessat dagidiay nadangkes, makitamto dayta.” Gapu ta awanton dagiti nadangkes, sagrapento dagiti nabati ti ‘napalalo a kinaruay ti talna’ iti lubong nga awanan iti aniaman a kita ti krimen.​—Salmo 37:11, 34.

Masapul nga Agbalbaliw ti Isip ken Puso

Ti panangdadael laeng kadagiti nadangkes ken panangispal kadagiti naimbag a tattao ket saan nga umdas tapno marisut a mamimpinsan ti parikut maipapan iti krimen. Masansan a ti krimen ket resulta ti di umiso a pannakasanay dagiti puso ken isip ti tattao. Nupay kasta, dayta ti pangartapan ti gobierno ti Dios. Addanto praktikal a panangisuro ken panangyadal tapno masanay dagiti tattao nga agayat iti kinalinteg. Kuna ti Isaias 54:13: “Amin nga annakmo tattaonto a sinursuruan ni Jehova, ket ti talna ti annakmo naruayto.”

Pudno a makapnekto ti resultana! Iladawan ti Biblia ti panagbalbaliw dagiti tattao a mabalin a kasla animal idi dagiti kababalinda. Kunana: “Ti lobo pudno a makipagtaengto iti apagbiit iti kalakian a kordero, ket iti urbon a kalding makikaiddanto a mismo ti leopardo, ket ti kigaw a baka ken ti burboran a bumaro a leon ken ti napalukmeg nga animal sangsangkamaysada.” Apay? “Agsipud ta ti daga sigurado a mapnonto iti pannakaammo ken Jehova kas iti dandanum abbonganda ti mismo a baybay.” (Isaias 11​:6, 9) Nupay kasta, saanen a nasken nga aguraykayo a sangapamiliaan kadagita a panagbalbaliw. Apay?

Mabalinmo a Sagrapen Itan

Adda dagiti tattao a mangar-aramid iti panagbalbaliw itan tapno makapagsaganada nga agbiag iti awanan krimen a lubong. Ikawkawesdan ti baro a personalidad, ti kita ti personalidad a tarigagayan ti Dios kadagiti tattao nga agbiag iti baro a lubongna. (2 Pedro 3:13) Ar-aramidenda daytoy babaen ti panangyaplikarda kadagiti prinsipio ti Biblia iti biagda. Paliiwem ti makapainteres a deskripsion nga ipaay ti Biblia: “Mapabarokayo koma iti puersa a mangtigtignay iti panunotyo, ket ikawesyo koma ti baro a personalidad a naparsua maitunos iti pagayatan ti Dios iti pudno a kinalinteg ken kinasungdo.”​—Efeso 4:23, 24.

Deskribiren pay ti Colosas 3:12-14 dagiti nasasayaat a kababalin a suksukayen itan ti adu a nasingpet panagpuspusoda a tattao. Kunana: “Kas pinili ti Dios, nasantuan ken ay-ayaten, kawesanyo ti bagbagiyo kadagiti kinalailo ti pannakipagrikna, kinamanangngaasi, kinapakumbaba iti panagpampanunot, kinaalumamay, ken mabayag a panagitured. Itultuloyyo nga anusan ti maysa ken maysa ken sibubulos a pakawanen ti maysa ken maysa no ti asinoman adda pakaigapuan ti reklamona maibusor iti sabali. Kas iti sibubulos a panangpakawan kadakayo ni Jehova, kasta met ti aramidenyo. Ngem, malaksid kadagitoy amin a banag, kawesanyo ti bagbagiyo iti ayat, ta dayta ket naan-anay a singgalut ti panagkaykaysa.”

Kayatmo kadi ti agpatulong a mangikawes iti baro a Nakristianuan a personalidad? Minilion a tattao iti intero a lubong ti mangar-aramid iti kasta babaen iti tulong dagiti Saksi ni Jehova. Kadagiti gimongda a kanayon a maang-angay kadagiti Kingdom Hall-da, ken kadagiti dadakkel a kombensionda, nasursuro uray dagiti tattao a naranggas idi a kriminal no kasano ti mangikawes iti natalna a personalidad. * No kayatmo ti maaddaan iti kasta a nagsayaat a programa a panagadal iti Biblia, dika bumdeng a makiuman kadagiti agipabpablaak iti daytoy a magasin. Maragsakandanto a tumulong kenka a makikadua kadagiti tattao nga agsagsagana itan nga agbiag iti awanan-krimen a baro a lubong ti Dios.

[Footnote]

[Dagiti Ladawan iti panid 10]

Minilion itan ti umaw-awat iti panagadal nga agpaay iti panagbiag iti awanan-krimen a lubong