Dagiti Singasing ti Aduan Kapadasan a Piloto Maipapan iti Panagbiahe

TALAGA a kaay-ayok ti ageroplano. Saanak laeng a makapagbiahe a siwayawaya iti apagbiit a tiempo iti nadumaduma a lugar no di ket masarakusokko dagiti ulep no nayuyem ti aldaw sa rumkuasak iti paset ti tangatang a masilsilnagan ti init. Tagtagiragsakek ti makapagagar a panaglugan iti eroplano nanipud iti damo a panageroplanok idi ubingak pay. Tawen 1956 idi. Gapu iti daytoy a pagesman, naragpatko ti karerak a propesional a piloto. Malaksid iti dayta, addada met tiempo nga agserbiak nga imbestigador iti aksidente kadagiti eroplano.

Kasano ti kinatalged ti panageroplano? Ket ania dagiti rumbeng nga aramidem a panagannad no maaddaanka iti gundaway nga agbiahe babaen ti eroplano?

Panamagbalin a Nataltalged iti Natalged a Pamay-an ti Panagbiahe

Iti intero a lubong iti kada tawen, dandani 18,000 nga eroplano ti kanayon nga agdisso ken pumanaw iti rinibribu nga eropuerto, bayat nga ibiaheda ti nasurok a 1.6 a bilion a pasahero agingga kadagiti destinasionda. Manmano ti maaksidente kadagitoy. Kinapudnona, pattapattaen ti Lloyd’s of London nga agdinamag nga ahensia iti insurance a mamin-25 a daras a nataltalged ti ageroplano ngem iti aglugan iti kotse. No estadistika ngarud ti pagsasaritaan, ti kapeggadan a paset ti panagbiahem ket ti panagbiahem a mapan ken aggapu iti eropuerto. Nupay kasta, adda sumagmamano a nainsiriban a panagannad no ageroplanoka tapno nataltalged pay daytoy medio natalged a pamay-an ti panagbiahe.

● Piliem a naimbag ti eroplano a pagluganam: Saan nga amin nga eroplano ket addaan iti agpapada a rekord ti natalged a panagbiahe. Kaaduanna, natalged a pagluganan dagiti nabayagen a kompania ti eroplano. Moderno ti eroplanoda ken nasayaat ti pakasaritaanda gapu iti rekord ti natalged a panagbiahe ken panangmantenerda.

● Piliem a naimbag ti pagkawesmo: Agpeggad iti uram ken asuk dagiti makalasat iti pannaka-kras dagiti eroplano. No kasta, agkaweska iti addaan iti atiddog a manggas ken agpantalonka wenno agpaldaka iti nagayad tapno masalakniban ti kudilmo iti gil-ayab ken bara. Makasalaknib a naimbag dagiti kawes a naaramid kadagiti natural a linabag, idinto ta dagiti sintetiko a material ket masansan a marunaw wenno dumket iti kudil, a mabalin a pakaigapuan iti nakarkaro a pannakauram. Mabalin a nalaka met a mauram ti kawes a lalat isu a saan a maisingasing nga agkaweska iti kasta. Mabalin a nasaysayaat a pangsalaknib ti agsusukot a kawes ngem iti maysa laeng. Dagiti napusyaw a kawes ket nasaysayaat met a pangdepdep iti bara ngem kadagiti natayengteng. Dagiti sapatos nga awan ti takonda, nangruna dagiti de kordon ket ad-adda nga agtalinaed kadagiti sakam ken salaknibandaka iti pannakasugat ken uram. Nasaysayaat met dagiti de lana a medias ngem kadagiti sintetiko.

● Agimdengka iti ababa nga instruksion maipapan iti kinatalged: Sakbay ti biahe, mangipaay dagiti tripulante iti komprehensibo ken ababa nga instruksion maipapan iti kinatalged. No adda aksidente, mabalin a makaruarka a dagus iti eroplano no iyaplikarmo ti malagipmo manipud iti dayta nga ababa nga instruksion. Isu a dumngegka a naimbag iti impormasion. Idi napagsaludsodan dagiti taga Canada a biahero iti eroplano, naammuan a 29 a porsiento laeng kadagiti pasahero iti biahe ti nagbasa wenno kimmita iti kard a nakailanadan iti rumbeng nga aramidenda tapno natalgedda. Iwayaam nga adalen dagiti instruksion maipapan iti kinatalged, nangruna dagidiay mangisuro no kasano a lukatan dagiti pagruaran, yantangay mabalin a sika ti umuna nga adda sadiay. Usigem no kasano a makitam ti pagruaran no nasipnget wenno saanmo unay a madlaw gapu iti asuk. Ti maysa a simple a pamay-an ket bilangem dagiti intar ti tugaw iti baetmo ken  iti pagruaran, tapno uray nasipnget, mabirokam ken malukatam ti pang-emerhensia a pagruaran.

● Limitaram ti bitbitem a kargam: “Ti kanayon a peggad [kadagiti pasahero] ket dagiti matnag a gargaret iti gagangay a panagbiahe manipud iti kargadera iti uluananda a mabalin a saan a naiserra a naimbag wenno linukatan dagiti pasahero kabayatan ti biahe. Dagitoy ti pakaigapuan ti nakaro a pannakadunor ti ulo wenno ipapatay pay ketdi,” kuna ti pagiwarnak a Flight International. No kasta, laglagipem a mabalin a makadangran ti nadagsen a karga. No agpegpeggad ngarud ti kasasaadmo, ibatim ti AMIN a kargam. Ti pannakaispalmo ti kangrunaan a panunotem! Mabalin a masukatan ti kargam inton agangay.

No Adda Emerhensia

Ti kapeggadan nga iruruar iti eroplano ket no adda apuy, sa agwaras ti asuk ken makasabidong a gas. Kastoy ti nailanad iti maysa a report maipapan iti maysa nga aksidente a napasamak: “Idi nagdisso ti eroplano, dandani awan a pulos ti makitam iti unegna iti kangato a nasurok a maysa a pie manipud iti suelona [gapu iti asuk]. Imbaga dagiti nakalasat a dandani awan pigsa ken tured ti pakinakemda nga agtaray a rummuar kadagiti pang-emerhensia a ridaw.” Ti pannakaispal ket agpannuray iti napardas nga iruruarmo iti eroplano.

Nasanay dagiti tripulante a madagdagus ken sitatalged a tumulong a rummuar iti eroplano. No kasta, agtulnogka a dagus kadagiti instruksionda. Nupay kasta, saan a kanayon a matungpal dagiti banag sigun iti pannakaiplanoda. Mabalin a matungday dagiti kasayaatan a panagregget dagiti tripulante gapu kadagiti parikut maipapan iti sound system, pannakadunor dagiti tripulante, pannakariribuk, ken dagiti epekto ti arimbangaw, bara, ken asuk. Mabalin a sabali a lenguahe ti us-usaren ti eroplano a nagluganam, ket daytoy met ti mabalin a manglapped iti nasayaat a pannakikomunikar kenka dagiti tripulante.

Ti panangusig iti aksidente ti pakakitaan a ti determinasionmo a maispal ti kangrunaan a makatulong tapno malasatam ti maysa nga aksidente. Masapul nga adda espesipiko a plano nga aramidem ken situtulokka a mangako iti pannakaispalmo. Rumbeng a nairaman iti planom ti siasinoman a kaduam a nagbiahe, nangruna dagiti ubbing wenno lallakay ken babbaket, ken dagiti pamay-an tapno dikay agsisina tapno makapagtitinnulongkayo kabayatan ti iruruaryo iti eroplano. Kastoy ti isingasing ti magasin a Flying Safety: “No masapul a sarakusokenyo ti asuk, ibagam nga agkikinnibinda. Mabalin a makaipaay iti natalged a tulong no kumpetda iti sinturonmo.” Ibagam iti kaduam wenno kakaduam a nagbiahe no ania ti aramidem no adda emerhensia.

Adda risgo ti amin a kita ti panagbiahe, ngem tulongandatayo dagiti moderno a pangpasahero nga eroplano a mangliklik iti adu a peggad tapno makasangpettayo iti destinasiontayo a nabang-aran ken nakasagana nga agtrabaho wenno agay-ayam. Agsaganaka ngem dika agdanag. Agrelakska ken tagiragsakem ti panagbiahem. Kanayon a kasta ti ar-aramidek.​—Naipatulod.

[Ladawan iti panid 13]

Panagsanay para iti pang-emerhensia nga iruruar

[Ladawan iti panid 13]

Agimdengka iti ababa nga instruksion maipapan iti kinatalged