Manipud Kadagiti Agbasbasa

Postpartum Depression Naimpusuan nga agyamanak gapu iti artikulo a “Nagballigiak a Nakidangadang iti Postpartum Depression.” (Hulio 22, 2002) Nagpasngayak makatawen ken tallo a bulanen ti napalabas. Pagammuan ta simmabali ti ugalik. No dadduma, masairko idi dagiti ay-ayatek, ket diak mailawlawag ti mapaspasamak kaniak. Ita, sumaysayaaten ti kasasaadko. Nakatulong kaniak ti artikulo.

A. P., Romania

Kalpasan a nabasana ti artikulo, impudno ti iyad-adalak iti Biblia nga adda kasta a sakitna. Ita, linawasen a mapan idiay ospital ket babaen ti agas, siraragsak a maitultuloynan nga aramiden dagiti rebbengenna.

A. M., Japan

Daytoy nga artikulo ti sungbat dagiti kararagko. Talaga nga ammoyo kakabsat ti kasapulan dagiti kakabsatyo a babbai. Kas man la inarakupnak ni Jehova ken ti organisasionna idi naawatko daytoy nga artikulo.

C. W., Estados Unidos

Agpapaimbagak manipud iti postpartum depression, ket daytoy nga artikulo ti nangpabileg ken nangparegta kaniak. Inramanyo dagiti detalye a naan-anay laeng a maawatan daydiay nagsakiten iti kastoy. Panggepko nga idulin daytoy a ruar ti Agriingkayo! iti natalged a lugar tapno agpaiwanwanak kadagiti makatulong a singasingna no kasapulak ti pammaregta.

E.V.F., Brazil

Ita pay laeng a nakabasaak iti artikulo a nangpikapik unay iti pusok a kas iti inaramid daytoy nga artikulo. Nagsinakami ken ni lakayko gapu iti sakitko a postpartum depression. Lima itan ti tawen ti balasangko, ket ay-ayatek unay. Agarup tallo a tawen ti napalabas sakbay a napagballigiak daytoy a kasasaad.

A. O., Puerto Rico

Tallo a bulanen nga agsagsagabaak iti postpartum depression. Idi naibaga kaniak nga adda artikulo ti kabaruan nga Agriingkayo! maipapan iti daytoy a suheto, kasta unay ti sangitko nga uray la a diak nakasao. Dayta pay laeng ti nabasak a kasayaatan nga artikulo maipapan iti postpartum depression. Agyamanak ken Jehova ken iti organisasionna gapu iti kasta a nasayaat a panangaywanna kadakami!

A. L., Canada

Agimtuod Dagiti Agtutubo Agyamanak unay gapu iti artikulo nga “Agimtuod Dagiti Agtutubo . . . Kasano nga Agbalinak nga Ad-adda a Makaay-ayo?” (Hulio 22, 2002) Duapulo ket dua ti tawenko, ket dayta nga artikulo ti nangparegta kaniak a mangpasayaat iti ugalik. Ti umuna a kalatko isut’ panagbalinko a naemma. Kangrunaanna, kayatko ti agbalin a makaay-ayo iti imatang ni Jehova. Pangngaasiyo ta itultuloyyo ti agipablaak kadagita a nagsayaat nga artikulo.

A. H., Japan

Daytoy nga artikulo ti nangpikapik iti pusok. Sangapulo ket walo ti tawenko, ket no dadduma, malipatak no kasano kapateg ti panangparang-ayko kadagiti naespirituan a kualidadko. Manipud ita, babaen ti tulong ni Jehova, ikeddengkon a sukayen ti bunga ti espiritu.​—Galacia 5:22, 23.

M.R.A., Brazil

Iti napalabas a dua a tawen, sangkapanunotko no makaay-ayoak met laeng iti sabsabali, ket no dadduma, pagarupek a saanak ngamin unay a napintas. Kalpasan a binasak daytoy nga artikulo, agyamanak unay gapu ta naammuak a no agbalinak nga adipen ti Dios, mapagbalinko ti bagik a makaay-ayo kenkuana ket daytoy ti kapatgan.

I. P., Estados Unidos