Dagiti Naisangsangayan a Saguday a Mangisalumina Kadatayo

‘Adalen ti sientista ti nakaparsuaan ta maragsakan iti dayta, ket maragsakan iti dayta agsipud ta napintas.’​—JULES-HENRI POINCARÉ, PRANSES A SIENTISTA KEN MATEMATIKO (1854-1912).

INAPRESIAR unay ni Poincaré ti kinapintas ti nakaparsuaan, nangruna “ti kasta unay a kinapintas” ti panagtutunos ken urnos a makaay-ayo iti nasientipikuan a panunot. Nupay kasta, saan a masapul nga agbalin a sientista ti maysa a tao tapno maapresiarna ti kinapintas ken urnos iti aglawlawtayo. Agarup 3,000 a tawen ti napalabasen, napikapik unay ni salmista David iti disenio a makita  iti panamarsua​—nangruna ti disenio ti bagi ti tao. Isu a nagkararag: “Idayawkanto agsipud ta iti nakaam-amak a pamay-an nakaskasdaaw ti pannakaaramidko. Nakaskasdaaw dagiti aramidmo, kas pagaammo unay ti kararuak.”​—Salmo 139:14.

Ti tao laeng ti makarikna iti panagsiddaaw ken panagraem, a saan a pulos a kabaelan uray ti kalalaingan nga animal. Ngem nakarkaro pay ti panaginterestayo iti nakaparsuaan. Inyimtuoden dagiti managpanunot a tattao iti amin nga edad: Nagtaudan ti nakaskasdaaw a disenio dagiti sibibiag a bambanag? Kinapudnona, apay nga adda dagiti sibibiag a banag? Ket ania ti akemtayo iti urnos dagiti bambanag? Saan a masungbatan ti siensia ken ti nauneg a panagpampanunot dagitoy a saludsod. Ngem ti Biblia, nga impaltiing ti Dios, ket talaga a mangipaay kadagiti pudpudno a makapnek a sungbat.​—2 Pedro 1:20, 21.

Ilawlawag daytoy nagkauna a sagrado a libro a dagiti naisalsalumina a kababalintayo kas tattao ti resulta ti pannakaparsuatayo “iti ladawan ti Dios”​—kayatna a sawen, kabaelantayo nga ipakita (uray iti nanumnumo a pamay-an) ti personalidad ti Namarsua kadatayo. (Genesis 1:27) Isu a nupay saan a kas kadagiti mata ti agila dagiti matatayo, mabalintayo nga ipakita ti nauneg a kinasirib. Mabalin a nakapuy ti panagdengngegtayo no idilig iti panniki, ngem maragsakantayo a makisarita, dumngeg iti musika, ken kadagiti makaparagsak nga uni ti nakaparsuaan. Ket nupay awan ti kompas iti bagitayo, magun-odantayo ti kasayaatan a pannakaiwanwan iti biag no basaentayo ti Nasantuan a Biblia a Sao ti Dios.​—Proverbio 3:5, 6.

Maawatantayo met no apay a datayo laeng ti makasapul iti naespirituan a taraon gapu ta naparsuatayo iti ladawan ti Dios. “Ti tao agbiag, saan nga iti tinapay laeng,” kinuna ni Jesus, “no di ket iti tunggal sao a rumrummuar iti ngiwat ni Jehova.” (Mateo 4:4) Regular kadi a basbasaem dagita a makapabang-ar a sasao babaen ti panagbasam iti Biblia?

No mataraonantayo a naimbag iti Sao ti Dios, ti espiritualidadtayo mapalawana ti pannakaawattayo agingga iti labes pay ti kabaelan dagiti sentido ti bagitayo. Kasano? Babaen ti panangpabilegna iti pammatitayo. Tulongannatayo ti pudno ken naibasar iti Biblia a pammatitayo a “makakita” iti di makita a Dios​—kas iti naaramid idi ni Moises​—ken maawatantayo met ti panggepna iti masanguanan.​—Hebreo 11:1, 27.

Nadayag a Masakbayan Kadagidiay “Makakita” iti Dios

Isuro kadatayo ti Biblia nga ay-ayaten ti Namarsua a ni Jehova a Dios ti daga ken amin a sibibiag a parsua nga adda iti dayta, nangruna dagiti managbuteng iti Dios a tattao. Gapuna, inkarina a pagpatinggaenna ti amin a kinadakes, agraman dagidiay siaagum a “mangdaddadael iti daga.” (Apocalipsis 11:18; Salmo 37:10, 11; 2 Tesalonica 1:8) Kalpasanna, ipaayna ti agnanayon a biag kadagiti tattao nga agayat ken agtulnog kenkuana. Saan la a dayta, pagbalinendanto ti intero a daga a paraiso a napno iti biag. Anian a nagsayaat a namnama!​—Lucas 23:43.

Panunotem laengen ti maaramidam ken matakuatamto inton agnanayonen ti biag ken nasalun-atkanton a kanayon! “Ti nakaparsuaan,” insurat ti maysa a sientista, “ket kanayon nga addaan iti kabbaro, kinawadwad, ken kinapintas a saan a pulos a maibus.” Kastoy ti panangyebkas ti Biblia iti dayta: “Tunggal banag inaramid [ti Dios] a napintas iti tiempona. Uray ti tiempo a di nakedngan insaadna iti pusoda, tapno ti sangatauan saanna a pulos masarakan ti aramid nga inaramid ti pudno a Dios manipud pangrugian agingga iti pagnguduan.”​—Eclesiastes 3:11.

Kasanoka nga agbalin a paset ti Paraiso a nadeskribir iti Biblia? Babaen ti panangammom iti panggep ti Dios itan ken panangaramidmo iti naammuam. “Daytoy kaipapananna ti agnanayon a biag,” kinuna ni Jesus, “ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.”​—Juan 17:3.

[Ladawan iti panid 10]

Usarem dagiti sentidom a mangpabileg iti panangipategmo iti Namarsua

[Ladawan iti panid 11]

Ti panangbasa iti Biblia ti kasayaatan a pangammo iti Namarsua kenka