Ti Panangmatmat ti Biblia

Adda Aya Di Mapakawan a Basol?

ADDA pay aya nadagdagsen a dusa ngem iti ipapatay? Wen, ti ipapatay ti maysa nga awanen ti namnamana a mapagungarto pay agsipud ta nakaaramid iti di mapakawan a basol. Imbaga ni Jesus nga adda kita ti basol a “saanto a mapakawan.”​—Mateo 12:31.

Nupay kasta, ti Dios ket deskribiren ti Biblia kas manangpakawan. Nupay agannayas ti tattao nga agimula iti sakit ti nakem ken dida mamakawan, ti Dios ‘dakkel ti pammakawanna.’ (Isaias 55:7-9) Kinapudnona, dakkel ti insakripisio ti Dios idi imbaonna ditoy daga ti patpatgenna nga Anak tapno agbalin a nakapatpateg a pangikappia, wenno pangabbong a sakripisio, ta mabalinna a punasen dagiti basoltayo.​—Juan 3:16, 17; Aramid 3:19; 1 Juan 2:1, 2.

Inton agangay, pagungaren ti Dios ti adu a nakaaramid kadagiti nadagsen a basol ngem didan manungsungbat kadagiti napalabas a naaramidanda. (Aramid 24:15; Roma 6:23) Kinapudnona, imbaga ni Jesus a malaksid iti di mapakawan a basol, “tunggal kita ti basol ken tabbaaw mapakawanto.” (Mateo 12:31) Isu a mabalin a mayimtuodyo, ‘Ania ti dakes unay a basol a di mapakawan ti Dios?’

Saanen a Posible ti Panagbabawi

Nadakamat iti pakdaar ni Jesus ti sipapakinakem ken inggagara a “tabbaaw maibusor iti espiritu.” Saan a mabalin a maabsuelto daytoy a kita ti basol. “Saan, saan nga iti daytoy a sistema ti bambanag wenno uray iti daydiay umayto,” innayonna. (Mateo 12:31, 32) Saanen a mapagungar dagidiay nakaaramid iti kasta a basol.

Ania ngay ti tabbaaw maibusor iti espiritu? Agtaud dayta iti puso, a mangipalgak iti dakes a kababalin ken panggep. Ti inggagara a panangbusor iti nasantuan nga espiritu ti Dios ti mangdegdeg iti kinakaro daytoy a basol. No iyilustrar: Iti dadduma a paset ti lubong, ti linteg ilasinna ti inggagara ken di inggagara a panangpapatay sigun iti panggep ken pamay-an ti panangpapatay, ket ikeddengna ti dusa nga ipapatay para iti inggagara wenno implano a panangpapatay.

Managtabbaaw idi ni apostol Pablo ngem kinunana: “Naipakitaanak ti asi, agsipud ta ignoranteak.” (1 Timoteo 1:13) Ti panagbasol a maibusor iti nasantuan nga espiritu ket sipapakinakem a panangbusor iti dayta. Ramanen dayta ti dakes a kasasaad ti puso nga awananen iti panagbabawi.

Nabatad a tuktukoyen idi ni Pablo daytoy a kita  ti basol idi insuratna: “Di mabalin no maipapan kadagidiay namimpinsanen a nalawagan, ken nakaramanen iti nailangitan a sagut nga awan bayadna, ken nagbalin a makiramraman iti nasantuan nga espiritu, ken nakaramanen iti nasayaat a sao ti Dios ken kadagiti pannakabalin ti um-umay a sistema ti bambanag, ngem natnagda, a pagsublien manen ida iti panagbabawi.” (Hebreo 6:4-6) Kinuna pay ti apostol: “No sipapakinakem nga iyugalitayo ti panagbasol kalpasan nga inawattayon ti umiso a pannakaammo iti kinapudno, awanen ti nabati nga aniaman a sakripisio maipaay iti basbasol.”​—Hebreo 10:26.

Gapu iti kababalin ti dadduma a relihioso a lider idi kaaldawanna, natignay ni Jesus a mangpakdaar maibusor iti di mapakawan a basol. Ngem dida impangag ti pakdaarna. Kinapudnona, isut’ impapatayda. Idi agangay, nangngegda ti di mailibak nga ebidensia nga adda milagro nga inaramid ti nasantuan nga espiritu. Naipakaammo kadakuada a napagungaren ni Jesus! Nalawag a ni Jesus ti Kristo! Ngem nagtignayda latta a sidadangkes maibusor iti nasantuan nga espiritu babaen ti panangtangdanda kadagiti Romano a soldado tapno agulbod dagitoy maipapan iti panagungar ni Jesus.​—Mateo 28:11-15.

Pakdaar Kadagiti Pudno a Kristiano

Apay a rumbeng nga ipapuso dagiti pudno a Kristiano ti pakdaar maipapan iti di mapakawan a basol? Ngamin, uray no addaantayo iti umiso a pannakaammo iti Dios ken iti maaramidan ti espirituna, mabalin a dumakes ti pusotayo. (Hebreo 3:12) Rumbeng nga agannadtayo a ditay pagarupen a saan a pulos a mapasamak daytoy kadatayo. Usigenyo ni Judas Iscariote. Matalek idi a pasurot ni Jesus. Napili nga agbalin a maysa kadagiti 12 nga apostol, isu nga adda la ketdi dagiti nasayaat idi a kalidadna. Ngem impalubosna a dimmakes ti panagpampanunot ken tarigagayna, isu a dagitoy ti nangkontrol kenkuana idi agangay. Kabayatan dagiti panawen a nasaksianna dagiti nakaskasdaaw a milagro nga inaramid ni Jesus, agtaktakaw idi iti kuarta. Kalpasanna, gapu iti kuarta, inggagarana a liniputan ti Anak ti Dios.

Dadduma a matalek idi a Kristiano inggagarada ti immadayo iti Dios, nalabit gapu iti sakit ti nakem, kinatangsit, wenno kinaagum, isu nga apostatada itan a bumusbusor iti espiritu ti Dios. Sipapakinakem a busbusorenda ti nalawag a maar-aramidan ti espiritu. Nakaaramid kadi dagitoy a tattao iti di mapakawan a basol? Ni Jehova ti ultimo nga Ukom.​—Roma 14:12.

Imbes nga ukomentayo ti sabsabali, nasayaat no agannadtayo a mismo a ditay agaramid kadagiti nalimed a basol nga in-inut a mangbibineg iti pusotayo. (Efeso 4:30) Ket maliwliwatayo iti kinapudno a dakkel ti panangpakawan ti Dios kadatayo, uray kadagiti inaramidtayo a nadagsen a basol, no la ket ta agbabawitayo.​—Isaias 1:18, 19.

[Ladawan iti panid 12, 13]

Nakaaramid ti dadduma a Fariseo iti di mapakawan a basol